ئێره‌

ئه‌و شوێنه ‌نییه ‌که ‌له ‌خه‌‌یاڵمدا بوو،

ئێر‌ه ‌سجنی خه‌یاڵه‌، ئێره ‌ڕیالیتیه‌،

لێره‌

بێزارم، ته‌نهام، کاته‌کانم هی خه‌من،

رووحم هی پووچییه‌،

*

لێره‌

یان گۆشتم، یا ژماره‌م یا پاره‌م

لێره‌،

شیعرغه‌ریبه‌، ته‌نهایه‌، هاوارێکی خنکاوه‌،

لێره ‌ده‌بێ شاعیر خۆی ئاشکرا نه‌کات،

ڕاوی وشه‌ نه‌کات، ده‌بێت وه‌ک شێت

له ‌به‌رخۆیه‌وه ‌قسه ‌بکات.

*

لێره‌ ئێواران،

ژن کۆلاێکی شیرینه‌، ده‌بێ زوو فڕی که‌ی،

منداڵ شتێکی دووره ‌زۆر دوور،

هه‌رکه‌س لێره‌، ورچێکه ‌و له ‌خه‌ودایه‌،

واباشه ‌لێی دوورکه‌ویه‌وه‌، زۆر دوور.

*

لێره‌

چاکه‌، دڵگه‌رمی، هیومانیتی، سه‌رمایانه‌

خۆیان به ‌لاپه‌ڕه‌ی کتێبه‌کاندا داپۆشێوه،

لێره‌

خودایەک هه‌یه ‌ناوی یاسایه‌،

پێغه‌مبه‌رێکیش وه‌ک (بیگ برازه‌ر)

به ‌کامێرا یان به‌ پۆلیس،

چاوی له‌ هه‌مووانه‌.

*

لێره‌

ئیتر که‌س چاوه‌روانی گۆدۆ ناکات،

گۆدۆ تێپه‌ڕیوه‌،

ئێستامان‌، دونیای دوای گۆدۆیه‌،

من نه ‌گه‌یشتنی ‌گۆدۆم دی،

نه ‌ده‌توانم، بێ چاوه‌ڕوانی گۆدۆ

بژیم.

__

بەرلين ٢٠١٥

The post ئه‌وروپا <br>دونیای دوای گۆدۆ appeared first on ژنەفتن.