ئەو گۆڕانانەی، لەدوای جەنگی جیهانیی دووەمدا، لە ڕووتەختی هزری ڕۆژئاواییدا ڕوویان دا، بواری ئەوەی ڕەخساند، لە ناوکۆی جیاواز و بەپێی پاشخانی تیۆریی فرەجۆر و لە ڕوانگەی فرەچەشنەوە، تەماشای مێژوو و گێڕانەوەی مێژوویی و چۆنیەتیی نووسینەوەی بکرێت. تا لەگەڵ ئەو پەرەسەندنە هزری و تیۆرییانە ڕێک بێتەوە، کە لە بوارە زانستییەکانی تردا ڕوویاندابوو، بەتایبەت بواری زانستە مرۆڤایەتییەکان. گۆڕانەکان گومانیان خستە سەر  شێوازە باوەکانی مێژوونووسین، کە لەسەر بنەمای گێڕانەوە گەورەکانی مێژوو دامەزرابوو، بۆ نموونە مێژوونووسیی ئیمپراتۆرییانە یاخود مارکسییانە و هەموو ئەو مۆدێلە گشتگیرانەی ڕابردوویان شرۆڤە دەکرد. ئەوەبوو چەندین هزرڤان و بیرمەند دەرکەوتن، وەک بۆ نموونە میشێل فوکۆ، جاک درێدا و ڕەخنەگرانی قوتابخانەی فرانکفۆرت…تاد، هاتن ئەو گریمانە بنەڕەتییانەی توێژینەوەی مێژوویییان لەسەر دامەزرابوو هەڵوەشاندەوە و ئەو تۆڕە ئاڵۆزەیان کەشف کرد، کە پەیوەندییەکانی نێوان دەسەڵات، گوتار و بەرهەمهێنانی مەعریفە، لەنێویشیدا گێڕانەوەی ڕابردوویان ڕام کردبوو. ئەوەتا فوکۆ، بەپێی ڕێبازە ئارکیۆلۆژی و جینالۆژییەکەی، ئەوەی ڕوون کردەوە مێژوو چەشنێکە لە پێڕەوکردنێکی گوتارییانە، کە ڕیشەکەی لەنێو بونیادە دەسەڵاتییەکاندایە، بەو مانایەی هەرچی دەگێڕدرێتەوە لە چوارچێوەی تێگەیشتن و نواندنێکی دەسەڵاتییانەیە بۆ ڕابردوو. هەر ئەمەش بیرۆکە نەریتییەکەی پێوەست بە ”حەقیقەتی بابەتییانەی مێژوو”ی هەژاند. جاک درێداش، بەپێی ڕێبازە هەڵوەشانەوەگەرایییەکەی خۆی، دەقی مێژوویی لەو دەسەڵاتە ڕەهایەی پێی دەدرا داماڵی و ڕوونی کردەوە، کە مانای دەق جێگیر نییە و چەشنێک لە لاگیریی ئایدۆلۆژییانە ڕۆڵی لە بە ئەرشیڤکردنی بەڵگە و نواندنی مێژووییدا هەبووە.

 لەبەرامبەر بەمانە، چەند قوتابخانەیەکی مێژوونووسی دەرکەوتن، لە نووسینەوەدا، هەم تێزی ئەم فەیلەسوفانەیەن قەبووڵ کردووە، هەمیش برەویان بە ڕێباز و مێتۆدی جیاوازتر داوە. ئەوەتا قوتابخانەی ئەناڵی فەڕەنسی کودەتایەکی لە بواری لێکدانەوە و شیکردنەوەی مێژوویی بەرپا کرد، بەتایبەت لە میانەی چەمکگەلی وەک (ماوەی درێژ – longue durée) و جەختکردەنەوەیان لەسەر بەردەوامێتیی بونیادە مێژوویییەکان. ئەمە سەرباری ئاوێتەکردنی مێتۆدی بوارە زانستییەکانی دی بە لێکۆڵینەوەی مێژوویی، بەتایبەت بواری جوگرافیا، ئابووری و کۆمەڵناسیی هاوچەرخ. ئەمەش مێژوونووسی خستە نێو چوارچێوەیەکی دییەوە، کە گشتگیرانەتر و لە دووتوێی فرەپسپۆڕییەوە ڕابردووی گێڕدراوەی بونیاد دەنایەوە. خۆ ئەگەر”وەرچەرخانی زمانی” لە بواری فەلسەفە، کە زیاتر لەگەڵ تێزەکانی لودڤیک ڤیتگنشتاینەوە دەستی پێ کرد، کایەی مێژوونووسی ناچار بە پێداچوونەوە بە بنەما چەقبەستووەکانی و چۆنیەتیی گێڕانەوە و ڕۆڵی زمان لە شێوەگیرکردنی کەتوار و واقیعی مێژوویی کرد، وەرچەرخانێکی ڕیشەییش بووە، کە بەسەر بنەما مەعریفییەکانی مێژووناسیدا هات؛ پەڕینەوە لە جەختکردنەوە لەسەر ژێدەری دەرەکییانەی ئەم کەتوارە بۆ شرۆڤەکردنی بونیادە زمانییەکان، وەک نێوەندی بەرهەمهێنانی مانا. ئەمەش گریمانەی بێلایەنی و درووستی پڕۆسەی گەیشتن بە ”حەقیقەتی مێژوویی” هەڵوەشاندەوە. بە کاریگەریی ئەم وەرچەرخانەش بوو، چیدی نووسینەوەی مێژوو وەک گێڕانەوەیەکی بێلایەنانەی کەتوار تەماشا نەکرا، بەڵکوو وەک بونیادێکی گوتارییانە دەبینرا، کە لە دووتوێی ڕەمزی زمانییانە، ستراتیژییەتی ڕەوانبێژییانە و پۆلێنکردنی تژی بە پەیوەندییەکانی دەسەڵات، بەرجەستە دەبوو (فوکو، ٢٠٠٨: ١٩-٢٠). لە ئاکامی ئەمەشدا مێژوونووس ئاگاییی زیاتری پەیدا کرد لە هەمبەر بە سروشتی دەقئامێزانەی کارەکەی و سنوورە مەعریفییەکانی ژێدەر و ئەو چەمکانەی بەکاریان دەهێنێت. ئەمەش ڕۆڵی لە داڕشتنەوەی ماناکانی چەمکی ”مەعریفەی مێژوویی”دا هەبوو، کە چیتر وەک بەرجەستەکردنێکی بابەتییانەی ڕابردوو نەما، بەڵکوو – لێرە بەدواوە – وەک بەرهەمێکی زمانییانە تەماشای دەکرا.

هەرچۆنێک بێت، جێکەوتەی کۆی ئەم گۆڕانانە بەسەر نووسینەوەی مێژوو، خۆی لە دووبارە داڕشتنەوەی تێگەیشتنی زانستی بۆ مێژوو بینیەوە، نزیکی خستەوە لە بوارەکانی هێرمینۆتیکا و لێکدانەوەی سیمیۆلۆژییانە و تیۆریی گوتار، تا ببێتە بوارێکی ڕەخنەیی بەئاگا لە هەمبەر بە سیاسەتەکانی ”بەرجەستەکردن لەنێو ڕابردوو” و ”نواندن لەنێو گێڕانەوە”، ئەمەش تا باشتر لە فرەییی ئەزموونی مێژوویی و جیاوازی لە گێڕانەوەیدا بگات.

یەکێک لەو ڕەوتە هزرییانەی لە هەناوی ئەم گۆڕانە مەعریفییانە هاتە دەر، ڕەوتی پۆستکۆڵۆنیالی بوو، کە جەختی لەسەر هەڵوەشاندنەوەی تێگەیشتنی هەژموونگەرانەی ئەوروپایی بەسەر مێژوونووسی کردۆتەوە. چەمکەکە پتر لە نیوەی دووەمی سەدەی بیست برەوی سەند و لە حەفتاکانی سەدەی ڕابردووشدا گەیشتە لووتکە و هەندێکجار مەرزە ئاکادێمی زانستییەکانیشی بەزاند؛ بووە بڵندگۆیەک بۆ ڕەخنەگرتن لە میراتی کۆڵۆنیالی و ئەو زنجیرەبەندییە قووچەکییەی برەوی پێ دەدا. تیۆریزەکارانی نێو ڕەوتەکە بەدوای ئاشکراکردنی ئەو دژیەکییە بوون، کە کۆمەڵگەکان لەدوای نەمانی داگیرکاریی ڕاستەوخۆوە دووچاری ببوونەوە، بەتایبەت – ئەوان بیانویستایە یان نا – بە تۆڕێک پەیوەندیی ئابووری، کولتووری و سیاسی، هەر بە زلهێزەکانەوە گرێ درابوون.

چەندین هزرڤان ڕۆڵیان لە دەرکەوتنی ڕەوتە هزرییەکەوە هەبووە. نووسینەکانی نووسەری فەڕەنسی فرانز فانۆن (١٩٢٥-١٩٦١)، بەتایبەت لە هەردوو کتێبی ”پێستی ڕەش و ڕووپۆشی سپی” و ”چەوساوەکانی سەر زەوی” ژێدەری بنەڕەتی ئەم دەرکەوتنەن. لەم دوو کتێبە خۆمان لەبەردەم بە پڕۆسەی هەڵوەشاندنەوەی هزری کۆڵۆنیاڵی دەبینینەوە. فانۆن بە توندی ڕەخنەی لە ئیمپریالیزمی ئەوروپایی گرتووە و ڕایدەگەیەنێت ئەم داگیرکارییە سیاسییە بۆتە هۆی ئەوەی ئەوروپا لەگەڵ بنەماکانی خۆیدا (بەتایبەت ڕێزگرتن لە مرۆڤ) دژ بێتەوە؛ لەگەڵ مرۆڤدا بجەنگێت و بیکوژێت و تەنانەت زەبروزەنگ لە بانگەوازکردن بۆ ئایینی مەسیحی (بزووتنەوەی موژدەگاری) بەکار بهێنێت (Green & Kathleen, 2016: 279). ئەم ڕەخنانەی ئەو هۆکار بوون بۆ تیۆریزەکردنی تێزی دژە کۆڵۆنیالی، کە بەو چەمک و دەستەواژانەی بەکاری هێنان و مانای پێدان دەستی پێ کرد. بە چەشنێک توانی زەمینەی شرۆڤەیەکی جیاواز بۆ پەیوەندیی نێوان سیستەمی کۆڵۆنیالی و مرۆڤی کۆڵۆنیالیزەکراو بسازێنێت.

چەمکی پۆستکۆڵۆنیالیزم، لەگەڵ دەرکەوتنیەوە، ئاماژە بوو بۆ لێکۆڵینەوەی جێکەوتەکانی ئیستیعمار بەسەر کولتوور، ناسنامە و پەیوەندییەکانی هێز. ڕۆشنایی خستە سەر بەردەوامێتیی مێژووی ئیستیعماری لە شێوەگیربوونی کۆمەڵگە سەردەمییەکاندا. هەتا نهاش ئەم بوارەی توێژینەوە بەدوای ئاشکراکردنی ئەو ڕێگایانەدایە، کە هێزە داگیرکارییەکان، توانیان بەهۆیەوە زمان و ئایدۆلۆژیا و بەها کولتوورییەکانی خۆیان، بەسەر میللەتانی ژێردەستە بسەپێنن. بوارە زانستییەکە پتر بەدوای ڕاگەیشتنە بەسەر ئەوەی چۆن ئەم سیاسەتە بۆتە هۆی ڕاگرتنی دوورمەودای کاریگەریی نەریتە ڕەسەنەکان و تێگەیشتنی میللەتانی پەراوێزخراو لە خودی خۆیان.

لێرەوە، تیۆریی پۆستکۆڵۆنیالیزم زیاتر گرنگی بەو پەراوێزە جوگرافییانە دەدات، کە کەوتوونەتە ژێر کاریگەریی کولتوورە ئەوروپییە سەنتەرگەراکەوە (Ashcroft, Griffiths, & Tiffin, 2002: 11). مەبەستی بنەڕەتیش هەر تەنها ڕزگاربوون لە دۆخی پەراوێزی نەبووە و نییە، بەڵکوو ڕەخنەگرتن و هەڵوەشاندنەوەی گوتارە کۆڵۆنیالییەکە بووە، تەنانەت پێداچوونەوەش بە چییەتی ڕۆژئاواییبوون و پرسیارکردن لە ڕەسەنێتیی هزر و بەرهەمە عەقڵییەکانیشی. ئەمەش بۆ ئەوەی ئەوروپا بخرێتەوە نێو ئەو بەستێن و ناوکۆ مێژووییە جیهانییەی، کە بنەماکەی کاریگەری و کارتێکردنە، نەک ڕەسەنێتی و ناڕەسەنێتی، سەنتەرێتی و کەنارگیری…تاد. ئەم تێگەیشتن و هەوڵی هەڵوەشاندنەوەیە، لەگەڵ تێز و نووسینەکانی فانۆن، بە ئاڕاستەی ئەوەدا بوو وەک گوتارێکی هزری خۆی بنوێنێت. مەبەستە بنەڕەتییەکەش هەڵوەشاندنەوەی کۆڵۆنیالیزمی هزریی ئەوروپایی بوو، هەروەها بەقەیرانکردنی ئەو مێژووەی لەگەڵ دەرەوەی خۆی هەیبوو و لە سێبەریدا مێژووی جیهانیشی جێ کردبۆوە و دەینواند.

قۆناغی هەرە گرنگی ئەم مێژووەی هزری دژەکۆڵۆنیالییە بە ئێدوارد سەعید (١٩٣٥-٢٠٠٣)ەوە بەندە؛ بە نووسینی کتێبی ”ڕۆژهەڵاتناسی”، کە بۆ یەکەمجار لە ساڵی ١٩٧٨ چاپ کراو پاشان چەند کتێب و وتاری دی بەدوادا هات. کتێبەکە بە خاڵی وەرچەرخان لە گەڵاڵەبوونی تیۆریی پۆستکۆڵۆنیالی دانراوە. ئەو ڕۆڵی لە تیۆریزەکردنی ئەم ڕەوتە هزرییەدا هەبوو و دواتریش جێکەوتەی گرنگی بەسەر ڕوانگەی مێژوونووسان لە سەرەدەریان لەگەڵ مێژوودا هەبووە.

پاشخان؛ ئێدوارد سەعید و کتێبی ڕۆژهەڵاتناسی

نووسەری کتێبی ڕۆژهەڵاتناسی ویستویەتی بە کورتی، ڕەخنە لە چۆنییەتیی وێناکردن و نواندنی ڕۆژئاوا بۆ ”ڕۆژهەڵات” بگرێت و ئەو گوتارە هەڵبوەشێنێتەوە، کە لە پشت ئەم پڕۆسەیەدا بووە. ئەم ئەکادێمیستە پێی وابوو ڕۆژهەڵاتناسی، وەک بازنەیەکی هزر و ئەزموون، چ ئاماژە بێت بۆ پەیوەندیی مێژووییی نێوان ئەوروپا و ئاسیا، یاخود سیستەمێکی خوێندنی مەعریفەی ئەوروپایی بێت، یانیش ئەو ئەگەرە ئایدۆلۆژی و وێناکاری و خەیاڵە فەنتازییانە بگرێتەوە، کە لەوێ لەبارەی جیهانێک بە ناوی ڕۆژهەڵاتەوە درووست بووە، ئەوا خاڵی هاوبەشی هەریەک لەم ڕەهەندانە ئەو هێڵەیە، کە ڕۆژهەڵات و ڕۆژئاوای جیا کردۆتەوە. هێڵێکی نەبینراو، کە مرۆڤ خۆی درووستی کردووە و حەقیقەتێکی سروشتی نییە، ئەوەندەی جوگرافیایەکی خەیاڵکراوە (سعید، ١٩٩٦: ٣٤).

تێزەکەی ئێدوارد سەعید، کە پشتی بە چەمکە بنەڕەتییەکانی نێو فەلسەفەی میشێل فوکۆ بەستبوو، بەتایبەت هەردوو چەمکی دەسەڵات و زانین، لەسەر ئەوە بونیادنرابوو، کە ڕۆژهەڵاتناسی تەنیا تەنێکی ئەدەبی یاخود دەربڕینێکی هونەری نییە، بەڵکوو گوتارێکە پاڵپشتی ئایدۆلۆژیای سەنتەرگیریی ئەوروپایی دەکات و بەهۆیەوە دەستەبژێری ڕۆشنبیر بەهانە بۆ حوکمی کۆڵۆنیالی دەهێننەوە. ئەوان، لەمیانەی ئەو زانینەی بەرهەمی دەهێنن، ڕەوایەتی بە هەژموونی دەسەڵاتییانەی ئەم سیستەمە بەسەر ناوچەکانی ڕۆژهەڵات دەدەن(سەعید، ٢٠١٨.: ٣٨). ئەم نووسەرە فەڵەستینییە هەوڵیداوە، ئەو پێشمەرجانە بدۆزێتەوە و ڕەخنەیان لێ بگرێت، کە بەهۆیانەوە زانین گۆڕانی بەسەردا دێت و تووشی پەتاکانی دەسەڵات دەبێت. کارکردنی ئەو لەسەر جێکەوتە زیانبەخشەکانی ئەم دەسەڵاتە بەسەر زانین، پەیوەست بوو بە باوەڕی ئەو بە ڕۆڵی چاکەکارانەی زانستی بەرهەمهاتوو لە پانتاییی کۆمەڵایەتیدا.

ئێدوارد سەعید بینیویەتی ڕۆژهەڵاتناسی پارادایمێکە، بۆ ئەو زانینە بە دەزگاییکراوەی، ئەگەر بتەوێت بەرەنگاری ببیتەوە، دەبێ بێیت زانینێکی پێچەوانە بەرهەم بێنیت (غاندي، ٢٠٢١: ٩١-٩٢). لێرەوە، پستبەستنی بە تێگەیشتنی فوکۆ بۆ چەمکی گوتار، هاوکاری بوو لەوەی بتوانێت ڕەهەندەکانی گوتارە ڕۆژهەڵاتناسییەکە باشتر ببینێت و بە بونیادی فراوانی دەسەڵاتی ببەستێتەوە. دەسەڵاتێک کە بەئاگایە و بەرزەفتی پڕۆسەی بەرهەمهێنانی زانینی کردووە. ئەو هاتووە، لە میانەی شرۆڤەکردنێکی مێتۆدییانەی ئەو دەقانەی لە سەدەی هەژدە بەدواوە لەبارەی ڕۆژهەڵات بەرهەم هێنرابوون، گفتوگۆی لەسەر چۆنیەتیی نواندنی ڕۆژئاوا بۆ ئەوی تری ڕۆژهەڵات کردووە و ویستویەتی دەریبخات، کە نووسینەکانیان چەندە بە ویستی ئیمپریالیزمییانەی ڕۆژئاوا خۆی، گرێدراون (Kennedy 2013: 17). پێی وابوو هەر ئەمە وایکردوە وێنایەکی جێگیر و نەگۆڕی مرۆڤی ڕۆژهەڵاتی درووست ببێت، وەک کارێکتەری دواکەوتووی ناعەقڵانی و نزمتر لە مرۆڤی ڕۆژئاوایی. ئەمەش بەهانە دەبێت بۆ هەژموونی کۆڵۆنیالییانەی ئەوروپا بەسەر خاک و زەوی ئەو مرۆڤە. ئیدی وەک مامۆستای گەورەمان موحسین محەمەد حوسێن (٢٠١١: ٢٠٢) ئاماژەی پێداوە، ئەوەی ئێدوارد سەعید ویستویەتی جەختی لەسەر بکاتەوە کرۆکی نەگۆڕی گوتاری ڕۆژهەڵاتناسانە بوو؛ باڵادەستیی ڕۆژئاوا و دواکەوتووییی ڕۆژهەڵات. لەم بەستەنەشدا، ئەو زانینەی بەرهەم هاتووە و بەرهەم دێت، تۆکمەکردنی ئەو تێزی باڵادەستیی خود و دواکەوتووییی ئەوی ترە، بەو پێیەش بێت ئەم دووانە هەرگیز بەیەک ناگەن.

لە ڕاستیدا، ئێدوارد سەعید چەمکە بنەڕەتییەکانی نێو هزری ڕۆژهەڵاتناسی هەڵوەشاندەوە. لەسەرووی هەموویانەوە چەمکی ”ڕۆژهەڵات”؛ ئەوانەی سەر بە ”ئێمە”ی سەنتەرگیری ڕۆژئاوایی نین. ئەو بەوە گەیشتووە ئەم چەمکە لە ناوکۆ ئەوروپایییەکەدا مانا جیۆ – مێژوویییەکانی خۆی لەدەست داوە و زێتر وەک وێنەیەکی خەیاڵی لە چوارچێوە گیراوە، وێنەیەک پڕ بە پێوەرەکانی ڕۆژئاوایی، لە پڕۆسێسی خەیاڵکردنەوە، کێشراوە. بەو پێیەش بێت، لە گوتاری ڕۆژهەڵاتناسیدا، ڕۆژهەڵات بوونێکی ڕاستەقینەی نییە و ئەو مانا درووستەی نییە کە هەیەتی. بەڵکوو وێنایەکە و هەڵگری چەردێک خەسڵەتی نەگۆڕە (ستەمکار، توندوتیژ، شەهوەتباز…تاد.)، وای لێ دەکات لەنێو وێنەی ئەوروپایی بۆ ناسنامە، کە لە بیرۆکەی سەنتەرگیریی ئەوروپی چڕ دەبێتەوە، جودا بکرێتەوە (الیعقوبي و طحطح، ٢٠١٩: ١٤٦). بنەمای هەرە سەرەکیی پڕۆژە ڕەخنەیییەکەی ئێدوارد سەعید، بریتی بوو لە هەڵوەشاندنەوە و سڕینەوەی وێنا دەقگرتووەی ڕۆژئاوا بۆ ڕۆژهەڵاتی کێشابوو. دەقگرتنێک کە چوو بووە سەرووی هەر گۆڕانێکی مێژوویی لە پانتایییە ”ڕۆژهەڵاتی”یەکەدا ڕوو بدات، چونکە وەک کرۆکێکی نەگۆڕی نامێژوویی و سەروو زەمەنییانە بینراوە، کە خەسڵەت و تایبەتمەندیی نەرێنییانەی بەسەردا زاڵ بووە.

ئێدوارد سەعید ڕاشکاوانە بەرەنگاربوونەوەی گوتاری ڕۆژهەڵاتناسی، کە بەشێکی زیندووی مەعریفەی کۆڵۆنیالی بووە، وەک بەرەنگاربوونەوەی ئەو پڕۆسەی بێدەنگکردن و پەراوێزخستنە دەبینی، کە بەسەر ڕۆژهەڵات وەک بابەتێکی مێژووکرد سەپێنرابوو. ئەو دەڵێ (١٩٩٦: ٣٩) ڕۆژهەڵاتناسی چەندە زانستێک بووە بۆ تێکەڵکردن و لەخۆگرتن، کە ئەمەش خۆی لە دامەزراندنی چەمکی رۆژهەڵات و جێکردنەوەی لەنێو زەینی ئەوروپایی دەبینیەوە، ئەوەندەش لەنێو ئەزموونی سیاسیدا هاوتای هەبووە، ئەویش هەژموونکاری و دەستبەسەرداگرتن و بەرزەفتکردن بوو لەلایەن ئەوروپاوە. لەم پڕۆسەیەشدا ڕۆژهەڵات خۆی نە دەنگی لێوە هاتووە و نە گوتاری بەرهەم هێناوە، بەڵکوو ”ئەوی تر”ە کز و بێدەنگەکەی ئەوروپا بووە.

بەرهەمەکانی ئێدوارد سەعید، کاریگەرییان بەسەر داڕشتنی ڕوانگەیکی ڕەخنەیی بۆ ڕۆڵی ئیمپریالیزم لە شێوەگیرکردنی ژیانی کولتووری و هزریی هەم ڕۆژئاوا و هەمیش ڕۆژهەڵاتدا هەبووە. ئەو پەیوەندییە تەواوکارییەی لەنێوان بزووتنەوەی ئیمپریالی و گوتارە ڕۆژهەڵاتناسییەکەدا هەبوو سەعیدی بەوە گەیاند، کە زۆربەی زۆری ئەو زانینەی لەبارەی ئیسلام و ڕۆژهەڵاتەوە بەرهەم هێنراوە، بەتایبەت لە سەدەی نۆزدە بەدواوە، لە خزمەت داگیرکارییەکە بوو (الیعقوبي و طحطح، ٢٠١٩: ١٤٨-١٤٩). تا وای لێ هاتووە دەوڵەتە سەرمایەدارەکان پشتیان بە داتا و لێکۆڵینەوەکانی توێژەر و گەڕیدەکانیان دەبەست بۆ فەراهەمکردنی ئەم سیاسەتەیان. تەنانەت هەندێک لە ڕۆژهەڵاتناسان زانست و زانینی خۆیان ڕاستەوخۆ خستبووە خزمەتی سیاسەتی فراوانخوازی و هەژموونی دەسەڵاتییانەی دەوڵەتەکانیان بەسەر ڕۆژهەڵاتەوە.

ڕەخنەکانی ئەم نووسەرە هەر بە دەقە ڕۆژهەڵاتناسییە ئەکادێمییەکان، یان نووسینی گەڕیدە و نوێنەرە دیپلۆماتەکان نەوەستاوە. بەڵکوو درێژ بۆتەوە بۆ ڕەخنەگرتن لە دەقە ئەدەبی و کولتوورییەکانیش. ئەو لە کتێبی کولتوور و ئیمپریالیزم (1993)، مێتۆدی خوێندنەوەی یەکتربڕی پەیڕەو کرد، بۆ شرۆڤەکردنی ئەوەی کە چۆن لە ئەدەبیاتی کلاسیکیی ئەوروپاییدا غەیرە ئەوروپی نوێندراوە و چۆن چۆنی ئەدەب ڕۆڵی لە تۆکمەکردنی ئایدۆلۆژیای ئیمپریالی هەبووە و ڕوانگەی ئەوانی تری پەردەپۆش کردووە (1993: 66). ئەم مێتۆدەش ڕۆڵی گرنگی لە برەودان بە ڕەخنەی ئەدەبی پۆستکۆڵۆنیالی هەبووە، هانی توێژەرانیشی داوە بتوانن نادیارەکانی گێڕانەوە، لە نێو بەرهەمە کولتوورییە هەژموونگەراکاندا بدۆزنەوە. لێرەوە، کولتووری هزریی ئێدوارد سەعید، چۆتە چوارچێوەی فرە دیسپلینییەوە. بە چەشنێک کە کتێبەکەی پردێک بوو لەنێوان ئەدەب و مێژوو و ئەنسرۆپۆلۆژیا، تا بەهۆی ئەم فرەیییەوە ڕوونی بکاتەوە، چۆن نواندنی کولتوورییانە بزووێنەری هێزە سیاسی و ئابوورییەکانی بووە. بەمەش ئەو هەوڵیدا ڕەخنەی توند لە بیرۆکەی بێلایەنی لە گێڕانەوەی مێژووییدا بگرێت، لەگەڵ ئەمەدا ڕوونی کردەوە گێڕانەوە ئەدەبییەکانیش، لەسەر گریمانەی ڕەسەنی ئیمپریالییانەوە هەڵچنراون.

ڕەخنەی ئێدوارد سەعید لە گێڕانەوەی کۆڵۆنیالییانەی مێژوو

ئێدوارد سەعید هەوڵی هەڵوەشاندنەوەی ئەو بۆچوونە چەسپیوەی نێو هزری ئەوروپییەکانی داوە، کە جەختی لەوە دەکردەوە بۆ ئەوەی غەیرە ئەوروپایی  لە بەستێنیی مێژووییدا هەبن، ئەوە دەبێت مێژووەکەیان ئەو سیستەمی بەهایانە لەخۆ بگرێت، کە ئەوروپا بەرهەمی هێناون. وەگەرنا جێگەیان لەسەر ڕووتەختی مێژوویی، مێژوو بە مانای پێشکەوتن و پەرەسەندنی بەردەوام، نابێتەوە. بۆیە گەر دەخوازن هەبن، دەبێت پەیڕەوی لە تێزە ئایدیالەکانی ئەوروپا بکەن و بە هەژموونی جیۆ – کولتووری و جیۆ – سیاسییەکەی ڕازی ببن. ئەم سەنتەرگیرییە ئەوروپایییە مەیسەر نەدەبوو ئەگەر بە پەراوێزخستنی ئەوانی تری دەرەوەی بازنەی شارستانییەتی ڕۆژئاوایییەکەی لەگەڵ نەبایە (حسن، ٢٠٢٢: ١٣١). چونکە – بەم تێگەیشتنە – ئەوەی ئەوان بەرهەمیان هێناوە، بەها بنەڕەتییەکانن بۆ هەر هەبوونێک لەنێو مێژوودا. ئەو پێی وابوو، ئەوەی کردوویەتی، لە چاوخشاندنەوە بە گوتاری ڕۆژهەڵاتناسی، بەشێکە لە ناوکۆیەکی فراوانتر، کە تێیدا لێکۆڵینەوە لە ژن، ڕەشپێست و گرۆ ئیتنییەکان، هەروەها لێکۆڵینەوەی سۆسیالیستی یاخو دژە ئیمپرییالیانەش هەن (سعید، ١٩٩٦: ٣٦). واتا ئەو لێکۆڵینەوە و بوارە زانستییانەی تایبەتن بەو کۆمەڵ و گرۆ مرۆیییانەی لە نێو گوتاری ئیرۆ سەنتەرییانەی مێژوونووسیندا نوێنەرایەتی نەدەکران، یاخود بە خراپی نوێندراون و بواری ئەوەیان پێ نەدراوە، لەو کایانەی لە ڕووی سیاسی و هزرییەوە دیاری کرابوون، بە باشی خۆیان بنوێنن و ئەو کەتوار و واقیعە مێژوویییەی هەیانبووە بەرجەستەی بکەن.

ئەمەش بۆ ئەو کات، لە مێتۆدی نووسینەوەی مێژووی پەراوێز خراوان یاخود نائەوروپییەکاندا، وەرچەرخانێکی بنەڕەتی بوو. ئەمە سەرباری ئەوەی پشتبەستنی ئەو بە چەمکی ”گوتار”، بەو شێوەیەی میشێل فوکۆ دایڕشتبوو و تەماشاکردنی ڕۆژهەڵاتناسی وەک سیستەمێکی گوتارییانە، توانی بە بونیادی دەسەڵاتییانەی ئەوتۆی ببەستێتەوە، کە بەرهەمهێنانی مەعریفە و نواندنی ڕابردوو سنووربەند دەکات و هەژموونی بەسەردا دەکات. ئەم تێزە ئەو گریمانانەی مێژووی ڕۆژئاوای لەسەر دامەزرابوو خستە بەردەم پرسیاری جیدییەوە و وەک توێژەرێکیش دەڵێ (El-Haj, 2005) بانگەوازێک بوو بۆ پێداچوونەوە بە چۆنیەتیی پێکهاتنی مەعریفەی مێژوویی و ڕێبازەکانی بڵاوکردنەوە و سەپاندنی.

بۆ مێژوونووسی سەنتەرگیر، ڕوانگە و گێڕانەوە و بەهای هێزە ئەوروپییەکان، چوارچێوەی زانینی مێژوویی دیاری کردوە، لەگەڵیشیدا بەپەراوێزبینین و شێواندنی مێژووی ژێردەستە لەئارادا بووە. ئەم گوتارە لەوەدا چڕ بۆتەوە جڤاکە ئەوروپایییەکان وەک سەنتەری شارستانیەت، پێشکەوتن و پرەسەندنی مێژوویی دەنوێنن، واتا نوێنەری هەرە دیاری دینامیکای مێژوویی دەکەن. لەبەرامبەرا ئەوی تری غەیرە ئەوروپایی چەقبەستووە، بێ مێژووە و پێوستی بەوەیە نوێ بکرێتەوە، واتا ئەوپەڕی میکانیکبوونی مێژوویی. ئەم تێگەیشتنە وێنایەکی بەیانی و قوچەکییانەی مێژوو بەرهەم دەهێنێت، کە تێیدا گۆڕان و پێشڤەچوون چیەتیی مێژووەکە پێک دەهێنن و دەستکەوتی ئەوروپای نوێ سەنگی پێوانی هەموو کارایییەکی مێژوویییە. لەگەڵیشیدا ئەو ”ئاڵۆسکاوی لە کارابوونی مێژوویی”، کە دەشێ ئەوانی تر هەیانبێت، وەلا دەنرێت. یانیش لە چوارچێوە هەمەگیرە ئەوروپایییەکەدا دەبینرێت و لەنێو گێڕانەوە مێژووەکانیدا دەنوێندرێت. ئاکامی تێگەیشتنی ئاواش ڕوونە؛ ڕەوایەتی بەخشین بە هەژموونی دەسەڵاتیی ئیمپریالی و وێناکردنی ”بەرزەفتکاری”، وەک حەتمیەتێکی مێژوویی و پێداویستییەکی سەردەمییانە بۆ هەبوون لەنێو مێژوودا، نەک ڕژێمێکی قۆرخکار، کە ڕووخساری هەرەدیاری مێژووەکەی زەبروزەنگ و مەحوکردنەوەی کولتووری ئەوانی تر بووە. ئەو فۆڕمە گێڕانەوەیەی هزری ئەوروپایی ویستویەتی بیسەپێنێت، نەک هەر ڕاستییەکانی پەیوەست بە مێژووی توندوتیژی کۆڵۆنیالیزمی دادەپۆشی، بەڵکوو چوارچێوەیەکی دۆگماشی بۆ گێڕانەوە داڕشتبوو و کاریگەری بەسەر کۆی گوتاری مێژوویی لە ئاستی جیهانیدا هەبووە.

لە ڕووی مەعریفییەوە، ڕوانگەی سەنتەرگەرانەی ئەوروپایی بە چەشنێک ئەزموون، تیۆری و ڕێبازە ئەوروپایییەکانی گشتاندووە، تا وای لێ هاتووە وەک پێوەری سروشتی بۆ هەر شرۆڤە و شیکارێکی مێژوویی دەربکەون. ئەمەش بووە هۆی وەلانانی زانین و تێگەیشتنی جیاواز بۆ مێژوو و گێڕانەوە غەیرە ئەوروپییەکانی ڕابردوو. کاریگەریی کۆڵۆنیالیزم لەوەدا دەردەکەوێت، کە گرنگیی زۆر بە سەرچاوەی ئەرشیڤی نووسراو داوە و پێناسەکردنی مێژووی وەک مێژووی تۆمارکراو و نواندنی دۆکیومێنتی ماددی، وەک تاکە کەرەستەی گێڕانەوەی مێژوویی. ئەمەش، زۆربەی کات، دەسەڵاتە کۆڵۆنیالییەکان زەقیان کردۆتەوە و بانگەشەیان بۆ کردوە، لەهەمبەر بە نەریتی زارەکی و کولتووری مادی و گێڕانەوەی خۆجێییان داناوە. ڕەنگە مێژووی کورد لەم ڕووەدا نموونەیەکی زۆر باش بێت، کە زۆرجار لە گوتاری مێژوویی ئەوروپایی، وەک میللەتێکی دەرەوەی مێژوو نواندراوە و دەنوێندرێت، چونکە بەشی هەر زۆری مێژووەکەی لە دەرەوەی دەقی نووسراودایە. مێژوونووسی ئەوروپایی، بە جەختکردنەوەی زۆری لەسەر دەقی نووسراو تا ئاستی بەپیرۆز بینینی بەڵگەنامە ئەرشیڤییەکان، دەیەوێت گەورەییی مێژوویییانەی خۆی بسەلمێنێت و ناهاوسەنگیی کاراییی مێژووییی لەنێوان ڕۆژئاوا و ڕۆژهەڵات بەرجەستە بکات: ڕۆژئاوای نێو گێڕانەوەی تۆمارکراو و ڕۆژهەڵاتی دەرەوەی ئەم چەشنە گێڕانەوەیە. بەمەش گەلانی کۆڵۆنیالیزەکراو تەنیا بەردەنگی نەرێنیی مێژوون، نەک کاراییی نێو ئەم مێژووە بە بەشەکەی خۆشیانەوە.

ئێدوارد سەعید لە کتێبەکەیدا ورد ڕەخنەی لەم تێگەیشتنە سەنتەرگەرایە گرتووە و پێی وایە ئەمە چەشنێکە لە چڕکردنەوەی ئایدۆلۆژییانەی مێژووی جیهانی. ئەوە ڕوون دەکاتەوە مێژوونووسان، گەریدە و کارگێڕانی ئیمپریالیست، ئەگەر مێژوویان گێڕاوەتەوە، لەگەڵیدا کاریان بۆ بونیادنانی ڕۆژهەڵاتێکی ئەفسانەیی کردووە، کە خزمەت بە ئامانجە هەژمونگەراکەی کردەی سیاسی کردووە (Burke and Prochaska, 2008: 12). ئەو نموونە بە بەرهەمەکانی ئێڕنست ڕینانی فەڕەنسایی و لۆرد کڕۆمەر دەهێنێتەوە، کە چۆن لە گێڕانەوەیان بۆ مێژوو و نواندنی ڕۆژهەڵات لەنێویدا، هەوڵی تۆکمەکردنی چەمکی باڵادەستیی ئەوروپاییان داوە (سەعيد، ٢٠١٨: ٢٦٢-٣١١). ئەم نواندنەشیان بەپێی چوارچێوەی مەعریفی تێگەیشتنی ڕۆژئاوایی بۆ زانستی مێژوو بووە، کە گشت ڕەگەزێکی غەیرە ئەوروپایی وەلا ناوە، یاخود بە کەم و ناڕەسەنی بینییە (Kennedy, 2013: 22). ئەوان لەمیانەی پێناسەکردنیان بۆ ئەوەی ڕۆژئاوایییە، کاریان بۆ بە ئەوی ترکردنی ڕۆژهەڵات کردووە. ئەمەش ئەو ڕەخنەیەیە، کە سەعید بە توندی لە مێژوونووسیی ڕۆژئاوایی گرتووە و وەک پێشتر گوتمان بریتی بوو لە چڕکردنەوەی گێڕانەوە بەدەوری ڕابردووی پنتێکی دیاریکراوی شارستانیدا. هەر ئەوەیە وای کردووە، ئەو دەقانەی مێژوونووسەکان هانایان بۆ بردووە، ئەوانە بوونە، کە ئەم تێگەیشتنەیان پشتڕاست کردۆتەوە و جەختیان لەسەر پەراوێزبوون و ناکاراییی مێژووییی ئەم ئەوی ترە کردۆتەوە، لەگەڵیشیدا بەهانەیان بۆ ”سیاسەتی ئیمپریالی” و ”حەتمیەتی مێژوویی”ی قۆناغەکە هێناوەتەوە.

بونیادنانی مێژوونووسیی پۆستکۆڵۆنیالی

گرفتی هەرە سەرەکی ئەو مێژووەی عەقڵە کۆڵۆنیالییەکە بەرهەمی دەهێنا و دەیگێڕایەوە ئەوە بوو، کە مێژووی ژێردەستەی وەک چۆن هەبووە نەنووسیوەتەوە، بەڵکوو وەک بەشێکی ئەو ناوکۆ مێژوویییەی پێی وایە مێژووی خۆیەتی و لە پەراوێزیدا ژێردەستەکانی هەبوون و هەن، نواندویەتی. واتا ئەوەی دەینووسییەوە، وەک فرانز فانۆن (٢٠٠٤: ٤٣) گوتوویەتی، مێژووی ئەو وڵاتە نەبووە کە داگیری کردووە و خەریکی بەتاڵانبردنی سەروەت و سامانی بووە، بەڵکوو مێژووی نەتەوەیی خۆی بووە لەوێدا.

ڕزگاربوون لەو تێگەیشتنە ڕۆژئاوایییە بۆ مێژوو، پێویستی بەوە بوو لە ڕۆژهەڵات خۆیدا کەسانێک دەربکەون، هەم ئەو مێژووە نووسراوە هەڵبوەشێننەوە و هەمیش لە دیدگا و بە مێتۆدێکی جیاواز، جارێکی دی مێژووی خۆیان بنووسنەوە، بەتایبەت مێژووی پەیوەندییان بە زلهێزە کۆڵۆنیالییەکانەوە. ئیتر مێژوونووسیی پۆستکۆڵۆنیالی سەری هەڵدا. دەرکەوتنی ئەم فۆڕمەی مێژوونووسینیش، لە بنەڕەتەوە، لەپێناو ڕەتکردنەوەی گێڕانەوە ئەوروپایییەکە بوو بۆ مێژووی ئیمریالیستانەی خۆی و چۆنیەتیی نواندنی مێژووی ئەو ناوچە و وڵاتانەی دەستی بەسەردا گرتبوون و لەژێر هەژموونیدا بوون. هەر لەو وڵات و شوێنانە، توێژەرانێک دەرکەوتن پێیان وابوو دەبێ لە ڕوانگەی ژێردەستەوە هەردوو مێژووەکە بنووسرێتەوە؛ لە دیدی ئەوانەوە تەماشای ئەم ئەزموونی داگیرکارییە بکرێت و لە دەرەوەی هەژموونی دەسەڵاتییانەی و جێکەوتەکانی بەسەر گێڕانەوەی ڕابردووەکە ببینرێت (Green & Kathleen, 2016: 238). بەو مانایەی پەراوێزخراو و بێدەنگکراو گێڕانەوەی خۆی هەبێت، بۆ ڕابردوویەک تێیدا ئەو خراوەتە نێو ئەم دۆخی پەراوێزبوون و باری نەدوان لەسەر خودی مێژووکردانەی خۆیەوە.

دەرچوونی کتێبەکەی ئێدوارد سەعید وەک ڕووداوێک تەماشا دەکرێت؛ وەرچەرخانێکی گرنگی نێو گەڵاڵەبوونی ئەم گوتارە پۆستکۆڵۆنیالیە، گۆڕانێکی ڕیشەیی بەسەر گوتارەکە خۆی و ڕەهەندەکانیدا هێناوە. ئەوەی ڕۆڵیشی هەبوو لەوەی ئاوا کتێبێک، جێکەوتەی هزرییانەی دوورمەودای هەبێت ئەوە بوو نووسەرەکەی جەختی لەوە دەکردەوە، کە دەبێت پێداچوونەوەیەک بەو سیستەمە بکرێت هزریی مێژوویی لەقالب دابوو. بەتایبەت ئەگەر هاتبوو، لە ناوەڕۆکدا، ڕووە نادیارەکانی گوتار و دەقی کۆڵۆنیالیزمییانەی ئاشکرا کردبوو و پەیوەندییەکانی بە کردەی سیاسی ڕوون کردبۆوە. جا، وەک لەیلا غاندی (٢٠٢١: ٨١) ئاماژەی پێ داوە، شیکردنەوەی گوتار و دەقی کۆڵۆنیالیش یەکێکە لە ڕوخسارە هەرە دیارەکانی پۆستکۆڵۆنیالیزم.

ئێدوارد سەعید بەم ڕەخنانەی، ئەفسانەی مێژوونوسیی بابەتییانەی تێک شکاند، کە تا ئەوکات مێتۆدی هەرە پێشکەوتووی نووسینەوەی مێژوو بوو لە ئەوروپا. ئەو سەلماندی ئەو مێتۆد و تێگەیشتنە بۆ مێژوو، وەک لە بەرهەمە ڕۆژهەڵاتناسییەکاندا ڕەنگی دابۆوە، لە بنەڕەتدا بەهۆی یەکتربڕینی دەسەڵات و مەعریفەوە بووە، مەبەست لێی سەپاندنی ڕوانگەیەکی تاکڕەهەند بوو بەسەر مێژوو لەخۆیدا (Çelik, 2018: 382). ئەمەشی ڕاستەوخۆ پەیوەست کرد بە ڕەخنەگرتنی لە سەنتەرگیرییە ئەوروپایییەکە، لە نووسینەوەی مێژوو. هەروەها ڕۆڵی هێزە ئیمپریالییەکان، لە شێوەگیرکردنی گێڕانەوە بەگشتی. لە کتێبی ڕۆژهەڵاتناسی بە ڕوونی دەردەکەوێت، کە نووسەرەکەی چۆن بەدوای ئاشکراکردنی جێ دەستی دەسەڵاتی کۆڵۆنیالی بوو، لە سەپاندنی وێنەی جێگیر و نەگۆڕی مێژووکرد لەنێو گێڕانەوەکاندا. خۆ لەو بەرهەمانەشی، کە لە ئەدەبیاتی ئەوروپایی دەدوێت، هەر مێژوونووسانە سەرەدەری کردووە و وەک شیلی والیا (٢٠٠٦:٧) ئاماژەی پێ داوە، وەک دەقی ئیستاتیکانە لە دەقە ئەدەبییەکانی نەڕوانیە، بەڵکوو وەک بەڵگەنامەی مێژوویی بینیونی. ئەمەش لەو بڕوایەوە، کە دەقەکان چەشنێک لە نواندن لەخۆ دەگرن و وێنە گەورەکەی لە قاڵبدانی ڕۆژهەڵات ڕوونتر پیشان دەدەن.

ڕەخنە لە کۆڵۆنیالیزم، لەگەڵ ئێدوارد سەعید، بووە پڕۆژەیەکی تایبەت بە هەڵوەشاندنەوەی گوتار و ڕەفتاری ئیستیعمارییانە. لەم ڕوانگەیەوە ئەو بە نووسینەکانی، وەک توێژەرێک بۆی چووە (حسن، ٢٠٢٢: ١٣٩)، هەوڵی داوە ڕەهەندە تیۆرییەکەی ئەم پڕۆژەیە تۆکمە بکات. ئەمەش بە ئاشکراکردنی خەوشەکانی گوتارەکەی و هەڵوەشاندنەوەی ئەو بانگەشەیەی، جەختی لەوە دەکردەوە گوایە گوتارێکی زانستییە، پشت ئەستووریشە بە زانین و بابەتگەرایییەوە. هەربۆیە هاتووە ئیشی لەسەر چەند دۆز و پرسێکی مێژوویی کردووە، کە هاوکاری بوون لە ڕوونکردنەوە و شیکردنەوەی چۆنیەتیی هەژموونی کۆڵۆنیالیزم بەسەر گێڕانەوە لە کولتوورە خۆجێییەکاندا. هەروەها لێکۆڵینەوەی وەڵامدانەوەی دەوڵەت و نەتەوەی ژێردەست بۆ میراتی کولتووری کۆڵۆنیالیزم، بەتایبەت لە قۆناغی دوای سەربەخۆبوون.

هەموو ئەمە ئاسان نەبوو، ئەگەر ئەو نەهاتایە، ڕەخنەیییانە، بنەما جێگیر و پیرۆزکراوەکانی نێو هزریی ئەورووپایی، لە ڕوانگە و ڕەهەندێکی جیاوازەوە نەخوێندبایەوە. بۆ نموونە هات گەردوونگەراییی ڕۆشنگەری ڕەت کردەوە، ئەمەش وەک ڕاپەڕینێک وابوو دژ بە مێتۆدە باوەکانی تێڕامان لە مێژوو، بە چەشنێک نووسینەوە لە مەیل بەلای هەمەگیرییەوە پەڕییەوە بۆ گێڕانەوەی پارچەپارچە و فرەدەنگ؛ گرنگیدان بە گێڕانەوە خۆجێییەکان، لەبری ئەو گێڕانەوانەی ئەوروپا بەرهەمی هێنابوون. ئەم ئاڕاستەیەش سەرەدەری لێکدانەوەی فەلسەفەی مێژووی ئەوروپایی، لە سەدەی هەژدە و نۆزدە، بۆ چەمکی ”پێشکەوتن” هەڵدەوەشاندەوە، بەتایبەت لێکدانەوەی هیگڵییانە بۆ چەمکەکە.

لەلایەکی دیکەوە، ڕوانگەی ئێدوارد سەعید ڕێژەگەری پۆستمۆدێرنە و حەتمییەتی مارکسییانەی ڕەت دەکردەوە. لەبەرامبەردا، لە میانەی سیستەمگەلی ئاڵۆسکاوی مەعریفی و ئابوورییەوە، بە دوای پەیوەندیی هێزدا بووە. لەم ڕووەدا، ڕەخنەی ئێدوارد سەعید لە مارکسیزم دەشێ نموونەیەکی گرنگ بێت، بۆ بینینی کتێبەکەی وەک سەرچاوەیەکی ئەم مێتۆدە و هەندێک لە ڕەهەندەکانی تیۆریی پۆستکۆڵۆنیالی بەگشتی. ڕەخنەکانی ئەو، پتر ئاڕاستەی مارکسیزمی ئۆرسۆدۆکسی بوو و پەیوەست بوو بە ڕەخنەگرتن لە هەژموونی ”گێڕانەوە گەورەکان”، بەسەر ڕوانگە هەمەگیرە ئەوروپایییەکەوە. لەلای ئەو، شکستی ڕیشەیییانەی چەمکەکانی مارکسیزم لە درووستکردنی ئەو ڕوانگەیە، لەوەدا بوو کە نەیتوانیوە خۆی لەگەڵ دراوە سیاسییە تایبەتەکان و ئەزموونی مێژووی جیهانی کۆڵۆنیالیزەکراودا بگونجێنێت. ئەو لە کتێبی ڕۆژهەڵاتناسیدا ویستوویەتی بسەلمێنێت، کە تیۆرییەکەی مارکس دووچاری کێماسیی ڕۆشنبیرانە بووە و مارکس خۆی کەمترین زانیاری لەبارەی جیهانی دەرەوەی ئەوروپادا هەبووە. هەر بۆیە، وەک لەیلا غاندی (٢٠٢١: ٨٨-٨٩) شرۆڤەی کردوە، مارکس کۆڵۆنیالیزمی وەک پڕۆژەیەکی مێژوویی بینیوە، کە ڕێگا خۆش دەکات لەبەردەم بەجیهانیکردنی ”شێوازی بەرهەمهێنانی سەرمایەداری” و دواتریش تێکشکاندنی شێوازە ”دواکەوتوو” و ”پێش سەرمایەدارییەکان”ی ڕێکخستنی کۆمەڵایەتی.

ئێدوارد سەعید پێی وایە ئەم تێگەیشتنەی مارکس و تێزەکانی قوتابخانە فەلسەفییەکە، لەبارەی گۆڕانی سۆسیو – ئابووری، نەک هەر لە بنەڕەتەوە خەوشی زۆریان هەیە، بەڵکوو ئەگەر لە ڕوانگەی جیهانی کۆڵۆنیالیزەکراو و لە ڕووی ئاکارییەوە تەماشای بکەین، ئەوا قێزەونە و ڕیسوایییە. چونکە هەمان ئەو مۆدێلە سواوەی دووبارە کردۆتەوە، کە لە سەدەی نۆزدەدا هەبووە و جەختی لەسەر جیاوازیی کرۆکییانەی نێوان ڕۆژهەڵات و ڕۆژئاوا دەکردەوە. سەرباری ئەمەش، وا لە ڕۆژهەڵاتی کۆڵۆنیالیزەکراو دەڕوانێت، وەک ئەوەی وێنەیەکی ئەبستراکت بێت بۆ تیۆرییەکە، نەک بارستایییەکی مرۆیی، کە خەڵکەکە بەدەست سیاسەتە داگیرکارییەکەوە دەناڵێنن. هەربۆیە لێکدانەوەکەی مارکس نەک هەر نەگونجاو بووە، بەڵکوو پشتی بە مەنتقێکی ساختەشەوە بەستووە، مەنتقی ئەرکی شارستانییانەی ئەوروپای داگیرکەر بۆ گەڕاندنەوەی ئاسیا، بۆ نێو ”ڕەوتی واقیعییانەی مێژوو” و ڕزگارکردنی ئەم کیشوەرە، لە دواکەوتوویی و هەژاریی پێش قۆناغی ئیمپریالی!. لێرەوەیە، ئەگەر مارکس گوتویەتی ”ئاسیایییەکان ناتوانن نوێنەرایەتیی خۆیان بکەن و دەبێ نوێنەرایەتی بکرێن”، ئێدوارد سەعید (١٩٩٦: ١٠٨) حەماسەت گرتوویەتی و گوتویەتی نەخێر وانییە؛ میللەتانی پاشکۆ و ژێردەستە دەتوانن بدوێن و خۆیان بنوێنن. باشترین بەڵگەش، بەڕای ئەو، مێژووی بزووتنەوە ڕزگاریخوازییەکانی سەدەی بیستەم بووە.

جێکەوتەی ئەم ڕەخنانە، لە زۆر لەو توێژینەوە پۆستکۆڵۆنیالییانە دەردەکەوێت، کە لەبارەی چینی ژێردەستە نووسران. تێیاندا تێکەڵبوونی چین، ڕەگەز و جۆری کۆمەڵایەتی، لە درووستبوونی دینامیکای کۆمەڵایەتی دەبینرا (Chakrabarty, 2000: 45)، لە کاتێکدا ئەم دینامیکایە، بە کاریگەری چڕکردنەوەی چەمکی چینایەتی بە لێکدانەوە مارکسییەکە، پەراوێز خرابوو. ئەمە پێویستی بەوە بووە، لە دەرەوەی سەرچاوە نەریتییەکانی بەردەستی مێژوونووسان، سەرچاوەی جیاواز بەکار بهێنرێت. تا مێژوونووس وێنایەکی فرەڕەهەندی زەمەنی لە لا درووست ببێت، کە پێشتر ئەرشیڤە کۆڵۆنیالییەکان ئەم چەشنە ڕوانگەیەیان بۆ زەمەنی مێژوویی نەخستۆتە بەردەستی. خۆ ئاوێتەکردنی ئێدوارد سەعید بۆ بونیادگەراییی پاش مۆدێرنە، لەگەڵ مەتریالیزمی مێژوویی، بووە هۆی داڕشتنی چوارچێوەیەکی جیاواز، کە بە مێژووگەراییی پۆستکۆڵۆنیالی ناسرا (postcolonial historicism). ئەمەش مێتۆدێکە ڕەخنەی گوتارییانە و شیکردنەوەی مەتریاڵییانە تێکەڵ بەیەک دەکات، بەڵام لە دەرەوەی ئەو حەتمییەتگەرایەی مارکسییەکان جەختییان لەسەر کردبۆوە. ڕەنگە لە یەکەمین نموونەکانی بەکارهێنانی ئەم مێتۆدە، کتێبە بەناوبانگەکەی سەر بە قوتابخانەی پۆستکۆڵۆنیالی تیمۆثی میشێل بێت، بەناوی ”کۆڵۆنیالیزەکردنی میسر”. نووسەر(٢٠١٣)، ئەوەی بۆ دەرکەوتووە وێناکردنی بەریتانییەکان بۆ جووتیاری میسری، وەک کەسانێک کە لە سروشتیاندا تەمبەڵ و تەوەزەڵن (کە ئەمەش لە ئاستی گوتاردا خەسڵەتپێدانی کولتوورییە)، لە بنەڕەتدا واقیعی چەوساندنە و بەکارهێنانی ئەم چینەی، لە چوارچێوەی سیستەمی سەرمایەداری جیهانی دەشاردەوە. نەک ئەوەی خوێندنەوەیەکی وردی چۆنیەتیی درووستبوونی مێژوویییانەی سیستەمە کۆمەڵایەتییەکەیان بێت، وەک لە خۆیدا هەبووە.

ئێدوارد سەعید و لێکۆڵینەوەی پاشکۆ

چاوەڕێی ئەوە دەکرا جێکەوتەی بەشدارییە هزرییەکانی ئێدوارد سەعید بەسەر ڕەوتە نوێیەکانی مێژوونووسیدا هەبێت، بەتایبەت ئەوانەی دژە کۆڵۆنیال بوون، یان لە دەرەوەی هەژموونی هزرییانەی ئەم جووڵانەوە سیاسی – ئابوورییە بیریان کردۆتەوە. هەرواش بوو، ئەوەی ئەو کردبووی فەراهەمکردنی زەمینەیەکی تیۆری بوو، کە مێژوونووسیی پۆستکۆڵۆنیاڵی تێدا چەکەرەی کردووە و پێگەیشتووە. هەرچەندە ئەو ڕەتی کردۆتەوە یەکێک بێت لە دامەزرێنەرانی ئەم ڕەوتە هزرییە، بەڵام خۆ ڕەخنەکانی لە چەمکی ڕۆژهەڵات سەرەتایەک بوون بۆ ”بزاڤی ڕزگاربوون”ی زانستە کۆمەڵایەتییەکان، لە ڕوانگە و دیدە ڕۆژئاوایییەکەوە (غراتالو، ٢٠١٨: ١٠٨). ئەمەش کۆڵەگەی هەرە بنەڕەتی هزری پۆستکۆڵۆنیالییە.

بەکارهێنانی مێتۆدی قوتابخانەی جنێڤ لەلایەن ئێدوارد سەعید لە یەکەمین نووسینەکانیدا، ئەوی زیاتر بە قوتابخانەی پۆستکۆڵۆنیالییەوە گرێداوە. ئەو مێتۆدی نوێی ڕەخنەی بەکار نەهێنا، هەرچەندە لەکاتی نووسینی کتێبەکەیدا باڵادەست بووە، بەڵام وەک مێتۆد ڕەتی کردۆتەوە، چونکە وای بینیوە بە چەشنێک سەرەدەری لەگەڵ دەقدا دەکات، وەک ئەوەی دابڕاو بێت لە مێژووی ڕۆشنبیری و چوارچێوەی سۆسیۆ – کولتووریی نووسەرەکەی. بەڵام هات مێتۆدەکەی جنێڤی بەکار هێنا، کە ئەوان لە لێکۆڵینەوەی دەقدا، لە میانەی شیکردنەوەی وردی زمانی نووسین، بەدوای بونیادنانەوەی ڕوانگەی نووسەر بوونە بۆ بوون. هەر ئەم تێگەیشتنەش وای کرد نووسینەکەی ئەو ببێتە سەرچاوەیەکی ئیلهامبەخش، بۆ ئەو توێژەرانەی بواری مێژوو، کە بیریان لە هەڵوەشاندنەوەی گوتارە کۆڵۆنیالییەکە کردۆتەوە و بەدوای گەڕاندنەوەی دەنگی پەراوێزخراوانەوە بوون(Roddan, 2016: 45). چونکە بۆ ئەمانە، ئەگەر دەیانویست لە بەرزەفتی ئەوروپایی بۆ حەقیقەتی مێژوویی دەربازیان ببێت، ئەوا تێزەکانی سەعید پاشخانێکی مێتۆدی باش بوون. ئەمە بە ئاشکرا لە کاریگەربوونی یەکێک لە قوتابخانە هەرە گرنگەکانی مێژوونووسیی پۆستکۆڵۆنیالی دەردەکەوێت، کە ئەویش قوتابخانەی هیندییە، ئەوەی پتر بە ”لێکۆڵینەوەی پاشکۆ – Subaltern Studies” ناسراوە. چەمکی سەبەڵترن لە بنەڕەتدا بە مانای پاشکۆ دێت، توێژەرانی هیندی لە بیریاری ئیتالی ئەنتۆنیۆ گرامشییان وەرگرتووە، کە لای ئەو بە مانای چینە پەراوێزخراوەکانی کۆمەڵگە دەهات (اشکروفت و آخرون، ٢٠١٠: ٣١٩-٣٢٠). بەڵام هیندییەکان، بەتایبت ڕێناجیت گوها، مانای تریان پێ بەخشی و بۆ وەسفکردنی خەسڵەتی گشتی پاشکۆبوون لە جڤاکی باشووری ئاسیا بەکاریان هێنا.

 لەم قوتابخانەیەدا پۆستکۆڵۆنیالیزم وەک ئامرازێکی ڕەخنەیی بووە و لە زۆر خاڵدا لەگەڵ ڕەوتی پۆستمۆدێرنە یەکتربڕ بووە. بەتایبەت هەڵتەکاندن و وەلانانی گێڕانەوە هەژموونگەراکان، ئەوانەی وەک دانیال وۆلف (٢٠٢١: ٣٤٥) وەسفی کردووە، کۆڵۆنیالیزم و هاوپەیمانەکانی لە دەستبەژێرە خۆجێییەکان بەسەر گێڕانەوەی مێژوویییان سەپاندبوو. ئەم دەستە نوێیە هەوڵیاندەدا، لە بری ئەو گێڕانەوانەوە، گێڕانەوەی خۆجێیی بهێننە پێش و دەقەکان بە چەشن و ئاڕاستەی جیاواز بخوێننەوە، بۆ ئەوەی بتوانن پەی بەوە ببەن، کە نووسەرانیان نەیانگوتووە، نەک ئەوەی گوتراوە و بیستراوە.

وەک زانراوە، هیندستان نقێمی تاجی کۆڵۆنیالیزمی بەریتانی بوو. هەر لەگەڵ سەربەخۆبوونی، گفتوگۆ و مشتومڕێکی زۆر لەنێو دەستەبژێری ئەم وڵاتە، دەستی پێ کرد. ئەوان دەیانویست جیاواز لە گێڕانەوە کۆڵۆنیالییەکە (کە جەختی لەسەر مۆدێرنە و جێکەوتەکانی، پەرەسەندنی ئابووری و تێکەڵکردنی کۆڵۆنییەکان بە سەرمایەداری جیهانی دەکردەوە)، ئەزموونی کۆڵۆنیالیزم هەڵسەنگێنن. لە دەرەوەی ئەم بابەت و ناونیشانە هەمەگیرانەوە ڕەهەندەکانی مێژووەکەی ببینن. مێژوویەکی خۆجێیی بگێڕنەوە، بەدەنگی خەڵکی هیندستان خۆیان بێت و ڕۆڵیان لە درووستکردنی تێگەیشتنیان بۆ ئێستای خۆیان بنوێنێت. ئەمە وای دەخواست توێژینەوەی ئەوتۆ ساز بکەن، کە چەشنێک لە سەنتەرێتی بە کولتووری نێوخۆییان ببەخشێت و بەهایەکی پێ بدات، جیاوازبێت لەو بەهایانەی کولتوورە ڕۆژئاوایییە – کۆڵۆنیالیستەکە ویستبووی بیسەپێنێت (Green & Kathleen, 2016: 278). چونکە ئەوان دەیانزانی، ئەگەرچی پرۆسێسە سیاسییەکە کۆتایی هاتبوو، بەڵام هێشتا لەڕووی ئابووری و کولتوورییەوە، جێکەوتەی قووڵی بەسەر زەمینەی هیندییەوە هەر مابوو.

لێکۆڵینەوەی پاشکۆ لەسەرەتادا وەڵامێک بوو بۆ دەرکەوتنی بیرۆکەی ”مێژوو لە ژێرەوە”، کە مارکسییە بەریتانییەکان دەمێک بوو کاریان لەسەر چەمکەکە کردبوو و لەگەڵ ڕەخنەکانی ئێدوارد سەعید لە سیستەمی مەعریفەی ڕۆژئاوایی ڕێک دەهاتەوە. دەستەی یەکەمی دامەزرێنەرانی ئەم قوتابخانەیە، هەر لە زانکۆ ئینگلیزییەکان خوێندبوویان، بەڵام پەروەردەکراوی ئەو مێژوونووسە بەریتانیانە بوون، کە سەر بە قوتابخانەی مارکسی بوون (وولف، ٢٠٢١: ٣٤٥؛ الیعقوبي و طحطح، ٢٠١٩: ١٠٩-١١٠). دواجار بنەماکانی ئەم قوتابخانەیەی نووسینەوەی مێژوو، لەسەردەستی مێژوونوسی هەرەدیاری هیندی ڕاناجیت گوها (١٩٢٣-٢٠٢٣)، جێگیر بوون. لەوێ، نەک هەر ڕەخنە لە گێڕانەوەی ئیمپریالییانە بۆ مێژووی هیندستان گیرا، بەڵکوو پێداچوونەوەیەکیش بوو بەو فۆڕمەی مێژوونووسین، کە لە دوای ساڵی ١٩٤٧یش، هەر باو بووە. ئەمە پێداچوونەیەوەک بوو، مەبەستی بوو مێژوو لە تێگەیشتنە باوەکە (مێژووی سەردەستە و دەستەبژێری سیاسی)، ڕزگار بکات. لەگەڵیشیدا گرنگی بە نووسینەوەی مێژووی بونیادە کۆمەڵایەتیی – ئابوورییەکان بدات؛ مێژووی ژێردەستە و پەراوێزخراوان.

پاشخانە مارکسییەکەی مێژوونووسەکان وای کرد جەخت لەسەر تێپەڕاندنی مێژووی دەستەبژێر بکەنەوە، کە هەر عەقڵیەت و ڕوانگەی کۆڵۆنیالی سەپاندبووی. ئەوەبوو ڕێناجیت گوها، لە یەکەمین بەرهەمەکانی (1983: 7)، گێڕانەوە نەتەوەییەکانی خستەژێر باری ڕەخنەوە و گفتوگۆی وردی لەبارەوە کردن. بەتایبەتیش جەختی لەسەر کاریگەربوونی دەستەبژێری هیندی، بە گێڕانەوە ئیستیعمارییەکان، کردەوە. دەیگوت ئەوان بە مێتۆدێکی کۆڵۆنیالییانەوە لەو مێژووەیان کۆڵیوەتەوە و بەسەر کۆی گێڕانەوەی مێژوویی هیندستانیان سەپاندووە. لە بەرامبەردا چین و توێژە کۆمەڵایەتییەکانی دی وەک: جووتیار، کرێکار و ژنان، کە زۆرینەی دانیشتوانی نیمچە کیشوەرەکە بوون، نەگێڕدراونەتەوە و نادیارن؛ وەک ئەوەی لە دەرەوەی مێژوودا بن.

ئیدی مەبەستی ئەم قوتابخانەیە ڕاستکردنەوەی ئەو ناهاوسەنگییە بوو، کە لە بواری ئەکادێمیدا بەرچاو دەکەوت. بەتایبەت ئەگەر دەیانبینی توێژەرانی نێو دەزگا زانستییەکان، جەخت لەسەر ڕۆڵی سەنتەرییانەی چینی دەستەبژێر و هەژموونی ڕۆشنبیریی دەستەبژێرانە دەکەنەوە. ئەوان دەیانویست هەڵسەنگاندنێکی بابەتییانەی ئەم ڕۆڵ و هەژموونە بکەن، لەپاڵیدا ڕەوش و پێگەی پەراوێزخراوان و ژێردەستەکانیش ببینن. هەربۆیە پتر ویستیان نووسینەوەیەکی جیاوازی مێژووی هیندستان بهێننە ئارا؛ مێژوویەک، کە بۆ ماوەیەکی درێژ لەژێر هەژموونی تێگەیشتنی ئەم دەستەبژێرە بۆرژوایەدا بوو و لەبنەڕەتیشدا بەرهەمی کۆڵۆنیالیزمی بەریتانی بوو (اشکروفت و آخرون، ٢٠١٠: ٣٢٠). ئەمە ئەو مێژووە بوو، کە زانینە کۆڵۆنیالییەکە کلیلە وشەکانی دیاری کردبوو و تێیدا، بە کاریگەریی نەریتە کۆڵۆنیالییەکەی مێژوونووسین، جەخت لەسەر سوودەکانی حوکمی کۆڵۆنیالی بۆ هیندستان دەکرایەوە. بەتایبەت لە ڕووی فەراهەمکردنی یەکگرتوویەکی سیاسی، سیستەمی سەردەمییانەی خوێندن، بونیادی نوێی ئابووری و پەرەپێدانی هزری ناسیونالیستی…تاد (شاکرابارتي، ٢٠١٦: ١٠).

ڕێناجیت گوها ڕێک هات ڕەخنەی لەمە گرت و ڕایگەیاند، کە ئەم پڕکردنەوەی گێڕانەوەی مێژوویی بە کاراییی دەستەبژێرەوە، مانای ئەوەیە بەشداریی میللی لە درووستکردنی ڕووداوی مێژوویی پشتگوێ خراوە. لەگەڵ ئەودا هزرڤانێکی تر دەرکەوت، ئەویش گایاتری سپیڤاک بوو، کە ئاماژەی بەوەدا دەبێت مێتۆدێکی ڕوون هەبێت، لە ناساندنی پەراوێزخراو و چۆنیەتی جیاکردنەوەیان لە کۆمەڵگەی بنەڕەتی هەژموونگەرا و جەختکردنەوە لەسەر ئەم جیاوازبوونە. مەبەست لەمەش بەدەنگهێنانی ژێردەستەیە، وەک لە وتارە گرنگ و پارادیمییەکەی، بە ناونیشانی ”ژێردەستە دەتوانێ قسە بکا؟” (٢٠٢٢)، وردی کردۆتەوە و ئاماژەی پێداوە. ئەم هزرڤانە هیندییانە و چەندانی دی لە مێژوونووسەکانی وڵاتەکە، لە نووسینەوەیان بۆ مێژوو، هەوڵیاندا تیۆرە باوەکان تێپەڕێنن، بەتایبەت تیۆرە مارکسییەکە، کە هەندێک لە دەستەبژێری هیندی بە جێگرەوەی تیۆرییە ڕۆژئاوایییەکانیان دەزانی (وولف، ٢٠٢١: ٣٤٨)، چونکە جەختی لەسەر کاریگەریی بونیادی کۆمەڵایەتی – ئابووری بەسەر ڕەوتی مێژوودا دەکردەوە.

ئەوەی جێی سەرنج بوو دیدگای ئێدوارد سەعید بۆ ڕۆژهەڵاتناسی، وەک سیستەمێکی گوتارییانە، بەتایبەت لەو ڕووەی ”ئەوی تر”ی ڕۆژهەڵاتی نیگەتیفانە دەبینی و لەزۆر باردا دەیخستە دەرەوەی ئەو مێژووەی عەقڵی ئەوروپایی، بە تاکە مێژووی درووستی مرۆڤایەتی دەزانی، بووە ئەو چوارچێوە ڕەخنەیی و تیۆرییەی مێژوونووسانی قوتابخانەی پاشکۆ بەکاریان هێنا، بۆ هەڵوەشاندنەوەی ئەو فۆڕمە باوەی نووسینەوە مێژوو. بەتایبەت جەختکردنەوەی نووسەرە فەڵەستینییەکە لەسەر دینامیکای دەسەڵات و مەعریفە؛ زەقکردنەوەی ئەو زەبروزەنگە مەعریفییەی، لەنێو نوێگەری کۆڵۆنیالیستی و پاش کۆڵۆنیالستیدا هەبووە. ئێدوارد سەعید خۆی ڕادەگەیەنێت، کە کتێبەکەی مەعریفەیەکی ڕەها و دابڕاو نییە، بەڵکوو مەبەستێکی تری لەپشتە، ئەویش سەرەداوێک بداتە دەست توێژەران، تا بەدوای توێژینەوەی وردتردا بن. ئەو لەمەدا زیاتر مەبەستی توێژەرانی جیهانی عەرەبی بوو. بەڵام ئەوەبوو زیاتر لە دەرەوەی ئەم جیهانە جێکەوتەی هەبوو و زوو هەندێک لە توێژەرە هیندییەکان، ڕوانگەی ئەویان لە لێکۆڵینەوەکانیاندا بەرجەستە کرد (شاکرابارتي، ٢٠١٦: ١٩). بۆیە دڵخۆشی خۆی ڕاگەیاندووە، ئەگەر بینیویەتی تێزەکانی لە قوتابخانەی مێژوونووسیی هیندی و قوتابخانەکانی تری سەر بە ڕەوتی پۆستکۆڵۆنیالی گرنگیان پێدراوە (سعید، ١٩٩٦: ١١٤). خۆی دوای گەڵاڵەبوونی ڕەهەندە هزری و مێتۆدییەکانی قوتابخانە هیندییەکە و هاتنەپێشی لێکۆڵینەوەی مێژووی پەراوێزخراوان، لە وتارێکی لە ساڵی ١٩٩٤دا، جەختی لەوە کردۆتەوە کتێبەکەی تەنیا شیکردنەوەیەکی ڕەخنەییانەی فرەکولتووری نەبوو، بۆ چۆنیەتیی بەکارهێنان و بەگەڕخستنی مەعریفە لەلایەن دەسەڵاتێکەوە، کە دەخوازێت بەهۆیەوە پێگەی خۆی پتەو بکات، بەڵکوو گەواهیدانێکیش بووە لەسەر ڕەوشی پاشکۆ و پەراوێزخراوان؛ ڕەوشی چەوساوەکانی سەر زەوی، کاتێک دێن لە خۆیان دەدوێن. ڕایدەگەیەنێت (١٩٩٦: ١٠٨) ئەو وەک نووسەری کتێبەکە دەیەوێت ڕۆڵێک بگێڕێت؛ ڕۆڵی ئاگایییەک، کە نوێنەرایەتیی خودێک دەکات، لە چوارچێوەی کۆمەڵێک دەق و گوتارێکی مێژووکردی پەیوەست بە خودی ڕۆژئاوایییەوە، چەپێنراوە و شێوێندراوە.

هەرچۆنێک بێت، لەم وتارە، لێرە و لەوێ دەرکەوت، ڕەخنەگرتنی ئێدوارد سەعید لە ”نواندن”، بەیەکێک لە بەشدارییە هەرە دیارەکانی هزری ئەوە. ئەو بەمە گرەوی ئاکارییانەی نووسینەوەی مێژوویی، بەم چەمکە ناساندەوە. ڕێک ئەمەش بوو، کە گایاتری سپیڤاک لە وتارەکەی خۆی، وردتر کاری لەسەر کرد. لەوێ ڕوونی کردۆتەوە چۆن هەوڵە ئەکادێمییە ڕۆژئاوایییەکان، لە پێناو گێڕانەوەی دەنگی ژێردەستە، بەرهەمهێنانەوەی گوتارێکی کۆڵۆنیالانە بووە، کە بەناوی ئەوان دواوە (سپیڤاک، ٢٠٢٢: ٥٣). ئەم قەیرانە وای لە مێژوونووسان کردوە، ڕووبەڕووی هەڵوێستی خۆیان لە پرۆسێسی بێدەنگکردندا ببنەوە. ئەمە لە کتێبەکەی پارثا چاترجی بە ناونیشانی ”هزری ناسیونالیستی و جیهانی کۆڵۆنیالی” بەڕوونی دەردەکەوێت، کاتێک نموونەی ئەوە دەهێنێتە، چۆن دەستەبژێری ناسیۆنالیستی هیندی دەستیان بە سەر زانستی کۆڵۆنیالی داگرت، لە بەرامبەردا نووسینی ئەوانەی لە دەرەوەی ئەم زانستانە، لە مێژووی هیندی قۆناغی دوای داگیرکاریی بەریتانی دوابوون، پشتگوێ دەخران (Chatterjee, 1986: 38). هەربۆیە، وەک سپیڤاک گوتویەتی، ئەگەر مێژوونووسان دەیانویست لەو تەڵەزگە مەعریفییە ڕزگاریان ببێت، دەبایە هەم پێگەی مەعریفییانەی خۆیان پێناسە بکەن و هەمیش ئاگایانەتر لە مەرزەکانی توانای نواندنی ئەوی تر بگەن.

وەک بینیمان ئێدوارد سەعید پتر هەوڵی ڕوونکردنەوەی پەیوەندیی نێوان کۆڵۆنیالیست و کۆڵۆنیالیزەکراو دابوو. بەڵام قوتابخانەی ”لێکۆڵینەوەی پاشکۆ”، بە دوای ئەو دابەشبوونانەدا بوون، کە لە خودی کۆڵۆنیالیزەکراودا هەبوو: چینایەتی، ڕەگەز و پاشکۆیەتی جووتیاران. لەمەشدا توانیان ئەوە دەربخەن، کە چۆن ئەو گێڕانەوە نەتەوەیییە باوانەی هەبوون، هەمان پلەبەندیی قوچەکییانەی ئیستعماریان دووپات کردۆتەوە. ئەمەش لە میانەی بەباشتر زانینی مێژووی چینی سەردەستە، لە مێژووی چینەکانی ژێرەوە (Chatterjee, 1986: 38). بێگومان ئەم وەرچەرخانە پێویستی بە دابڕانێکی مێتۆدییانە و نوێکردنەوەی شێوازی کارکردنی مێژوونووسەوە هەبووە. بۆیە دەبینین کاری ئەرشیڤکردن و سەرچاوەگیری، لە بەڵگەنامە ناوەندییەکانی دەوڵەتەوە گۆڕا بۆ سەرچاوەی لۆکاڵی؛ نەریتی زارەکی و پاشماوەی ماددی پەراوێزخراوان (Guha, 1983: 333). بەمەش بەرەنگاری ئەو مێژووگەرایییە ئەوروپییە بوونەوە، کە وەک ئاماژەمان پێدا ئێدوارد سەعید بە وردی ڕەخنەی لێ گرتبوو.

گایاتری سپیڤاک ڕایگەیاندووە، کتێبەکەی ئێدوارد سەعید بۆتە دەقێکی بنەڕەتی و سەرچاوەیەک، کە بەهۆیەوە لێکۆڵینەوەی پاشکۆ، ئاوا لەچوارچێوەی دەزگای ئەکادێمیدا جێگەی بۆ کرایەوە. ئەو وای دەبینی ئێدوارد سەعید توانی لێکۆڵینەوەی پۆستکۆڵۆنیالی، وەک بوارێکی سەربەخۆی زانستی بنوێنێت و لەمیانەی شرۆڤەی گوتاریی ڕۆژهەڵاتناسییەوە ڕوونی کردەوە پەراوێزخراو دەتوانێت بدوێت و دەنگی هەبێت و بەشێکی چاڵاکی کایەی زانستیی سەردەمەکە بێت (غاندي، ٢٠٢١: ٨١-٨٢). لە وتارە بەناوبانگەکەی، کە ئاماژەمان پێدا، بە ئاشکرا جێکەوتەی هزری ئێدوارد سەعید دەبینین، بەتایبەت کاتێک سوودی لە ڕەخنەی ئەو لە ”نواندن” گرتووە. هەرچەندە لە هەندێ بابەتیش کەمێک ڕەخنەیییانە لە هزری سەعید لایداوە، نەخاسمە لە پرسیارکردنی لەسەر توانای ئەکادێمیای ڕۆژئاوایی لە گێڕانەوەی ئاگایی بۆ پاشکۆ. ئەم خاتوونە جەختی لەسەر ئەوە کردۆتەوە دەنگی ژێردەستە هەردەم وەک نێوەندگیرێک، لە نێوان گوتارە هەژموونگەراکان، دەمێنێتەوە (٢٠٢٢: ٦١-٦٤). ئەمەش پێشڤەچوونێک بوو لە تێگەیشتی ئێدوارد سەعید، ئەگەر هاتووە قسەی لەسەر بێدەنگکردن کردووە. سپیڤاک، هەر بە کاریگەری نووسەری ڕۆژهەڵاتناسی، دان بەوە دادەنێت، کەوا گێڕانەوەی دەنگ بۆ ژێردەستە قورسە. وایدەبینی زۆربەی کات ئەم دەنگە، لەنێو گوتاری دەستەبژێردا دەنوێنرێت. ئەمەش وادەکات گەڕانەوە بۆ ڕەسەنی بیروبۆچوون و ڕوانگە میللییەکە، قورس و ئەستەم بێت. بێگومان ئەم ڕەخنەیە پێمان دەڵێت، کە پێویستیی بەردەوام هەیە بەوەی توێژەران بە ئاگایییەوە سەرەدەری لەگەڵ دەق و سەرچاوە و گێڕانەوەکان بکەن و لە کاریگەریی گوتارە ئاکادێمی و سیاسییە هاوچەرخەکانیان داببڕن.

خاڵێکی تری یەکتربڕ لەنێوان کارەکەی ئێدوارد سەعید و مێژوونوسیی پاشکۆ، پەیڕەکردنی مێتۆدی فرە پسپۆڕیی بوو. وەک دەزانین ئێدوارد سەعید ئەدەب، فەلسەفە، مێژوو و لێکۆڵینەوەی کولتووری ئاوێتەی یەکتر کردووە، بۆ خوێندنەوەی گوتارەکەی ڕۆژهەڵاتناسی. ئەمەش بەردەستخستنی مێتۆدێکی هەمەگیرانە بوو، لە شیکردنەوەی بنەما کولتوورییەکانی مێژوونوسیی کۆڵۆنیالی. ئەو، لە میانەی ئاوێتەکردنی ڕوانگەی پسپۆڕییە جیاوازەکانەوە، توانیبووی ئەو پەیوەندییە ببینێت، کە لەنێوان پەیکەرە کولتووری و سیاسی و ئابوورییەکاندا هەبووە، بەتایبەت لە داڕشتنی مەعریفەی مێژووییدا (Kennedy, 2013: 89). ئەوەتا بە بەکارهێنانی شیکردنەوەی ئەدەبی لە ڕەخنەگرتن لە دەقی مێژوویی، توانی خەسڵەتی درووستکراو و ساختەی گێرانەوە مێژوویییەکان باشتر دەربخات (Çelik, 2018: 382) بە هەمان شێوە، جەختکردنەوەی لەسەر بە دەقکردنی مێژوو، هاوکار بووە لەوەی تێبگات تۆمارە مێژویییەکان دەقی بارگاوین بە هەڵوێستە ئایدۆلۆژییەکانی نووسەرانیان. هەر ئەمەش ڕۆڵی هەبوو لەوەی لێکۆڵینەوەی مێژوویی بە ئاقارێکی جیاوازدا بڕوات. کێنیدی (2013: 102) تێبینی ئەوەی کردووە، کە هەم ئێدوارد سەعید و هەمیش بیریار و مێژوونووسانی سەر بە قوتابخانە هیندییەکە، بەم ئاوێتەکردنەی مێتۆدی پسپۆڕییە جیاجیاکان، هەوڵی هەڵوەشاندنەوەی گێڕانەوە هەژمونگەراکانیان داوە. هەر ئەمەش هاوکار بوو لەوەی باشتر لە ئاڵۆزییەکانی مێژوو و هزری کۆڵۆنیالی و قۆناغی پاشتریش بگەن.

کەوابێ ڕەخنەگرتن لە گێڕانەوەی کۆڵۆنیالی بۆ مێژوو، خاڵێکی هەرە هاوبەشی پڕۆژەکەی ئێدوارد سەعید و تێزە هزرییەکانی قوتابخانە مێژوونووسییەکە بوو. هەردوولا ڕەخنە لەو ڕێبازانە دەگرن، کە بەهۆیانەوە دەوڵەتانی داگیرکەر هاتوون، دابڕاو لە ڕوانگەی میللەتانی ژێردەستە، ڕەوتی مێژووەکەیان بەرجەستە کردۆتەوە. جەختکردنەوەی ئێدوارد سەعید لەسەر چۆنیەتیی ئەم نواندنەی ئەوروپییەکان بۆ ڕۆژهەڵات، لەگەڵ شیکردنەوەی گوها بۆ دیاردەی وەلانانی گێڕانەوەی کۆڵۆنیالی، لە نوێنەرایەتیکردنی پاشکۆ، ڕێک دێتەوە. بۆ نموونە گوها (1983: 15)، لە قسەکردنی لەسەر ڕاپەڕینی جووتیارانی هیندستان، ئەوەی دەرخستووە چەندە جووتیار خۆی، سەنتەرگیرانە، ڕەوتی مێژووی ئاڕاستە کردووە. ئەمەش پێچەوانەی ئەو وێنا کۆڵۆنیالییە بووە، کە بۆیان درووست کرابوو و بەسەریاندا سەپێنرابوو، گوایە ئەوان ”هەڕەمەکییانە’‘ کردار دەنوێنن و ”بێعەقڵانە” خۆیان بەرجەستە دەکەن و ”گێرەشێوێنانە” لەنێو ڕەوتی ڕووداوەکاندا دەردەکەون. ئەمەش هەمان ئەو ڕەخنەیەی ئێدوارد سەعید بوو لە وێنای ڕۆژئاوایی بۆ ڕۆژهەڵات، ئەگەر دەیانگوت ناتوانن نوێنەرایەتیی خۆیان بکەن و توانای خۆبەرزەفتکردنیان نییە و پشێوی دەخەنە نێو ڕەوتی درووستی مێژوو. بۆیە دەخوازن ئەوە لە زەیندا بەرجەستە بکەن، کە هەژموونی ئیمپریالییانە حەتمیەتێکی مێژوویییە، مەبەست لێی دەربازبوونە لەم گێرەشێوینییە و بۆ ڕاستکردنەوەی ڕەوتی مێژوو خۆیەتی.

تێزەکانی ئێدوارد سەعید و ڕەخنەی مێژوونووسان

لەسەرەتاوە بینیمان گرنگی کتێبەکەی ئێدوارد سەعید، هەر لە جێکەوتە هزرییەکانی نەبووە، بەڵکوو لە مێتۆدەکەیشی بوو. بەتایبەت شیکردنەوەی دەقە ڕۆژهەڵاتناسییەکان و هەوڵدان بۆ داڕشتنەوەی ڕووی نادیاری ئەوەی نووسراوەتەوە. لە بواری مێژوودا، ئەو مێژوونووسانی خستە بەردەم ئالەنگاری هەڵوەشاندنەوەی لاگیرییەکانی نێو تێزی سەنتەرگیریی ئەوروپایییەوە. ئەمەش زیاتر لە میانەی داننان بە فرەچەشنی ئەزموونی مێژووییدا بوو، کە وا دەخوازێت بەدوای مێتۆدی جیاوازی نووسینەوەدا بین؛ هەمەگیر بەڵام فرەچەشن، کە بتوانێت ڕوانگە جیاوازەکان لەخۆ بگرێت و وابکات دەنگی کۆمەڵگە پەراوێزخراوەکانی نێو گێڕانەوە سەنتەرەگەراکە، باشتر و ڕوونتر ببیسترێت. ئەم وەرچەرخانە لە تێگەیشتنی گێڕانەوەی مێژوویی زۆر گرنگە، ئەگەر دەخوازین تێگەیشتنێکی دادپەروەرانە و فرەڕەهەندمان، بۆ مێژووی جیهانی، چنگ بکەوێت. شیلی والیا (٢٠٠٦: ٢٦-٢٧) ڕایدەگەیەنێت نووسینەکانی ئێدوارد سەعید ڕۆڵێکی بنەڕەتیان لەو گفتوگۆیانەدا هەبوو، کە لە ڕووتەختی هزریی ئەوروپاییدا، سەبارەت بە تیۆریی مێژوو باو بوون. ڕۆڵی ئەویش پتر لە تێگەیشتن بۆ ”حەقیقەتی مێژوویی” و چۆنیەتیی ”نواندن”ی لە ناوکۆی گوتارییانەدا بووە. ئەو وای لە حەقیقەتەکە نەڕوانیوە ڕەها بێت، ئەوەندەی پەیوەستە بە دۆخی گشتی و هەڵوێستی سیاسییەوە. ئەوە بەو مانایە نایەت نکۆڵی لە ڕێبازە ئیمپیرییەکە کردبێت، پێی وابێت هەموو گێڕانەوەیەکی مێژووی ڕابردوو ساختەیە. بەڵام جەختی لەوە کردۆتەوە نووسینی ئەکادێمییانەی ئەوروپایی لەبارەی ڕابردوو، پێوەست بووە بە بونیادنانی ئیمپراتۆرییانەوە. لەو دەستپێکەوە ڕاستییەکانیان وێنا کردووە و دواتر لە گێرانەوەی مێژووییدا بەرجەستەیان کردوون. لەگەڵیشیدا چەشنێک لە خۆبەگەورەزانی کولتووری و ڕەگەزی هەبووە، کە ڕیشەی لەنێو پلانی هێنانەدی ئامانجە سیاسییەکان داکوتاوە.

لای ئێدوارد سەعید مێژوونووسین و نواندن دوو بنەمای سەرەکین، کە دەشێن هاوکار بن لە تێگەیشتنی ئەو پەیوەندییەی وڵاتانی ڕۆژئاوا لە گەڵ ژێردەستەکانیان درووستیان کردبوو. بەچەشنێک کە دەشێ تەنانەت شێوازی ئەکادێمییانەی مێژوونووسی و بەکارهێنانی سەرچاوە و پەراوێزدانان خودان بونیادێکی ئایدۆلۆژییانە بێت، کە جۆرێک بێت لە نواندنی واقیعی مێژوویی، نەک واقیعەکە لەخۆیدا. ناکرێ ئەم فۆڕمەی نواندنیش، بەو بونیادە ئایدۆلۆژییەیەوە، بەدەر بێت لە لاگیرییەوە. ئەو باش لە گرفتی نواندن لە چوارچێوەی میتۆلۆژیای ئایینی و مێژوویی گەیشتووە و درکی بەوە کردووە، کە چۆن لەم پرۆسەیەدا شتەکان لە جێگەی خۆیان دانانرێن و دەشێوێندرێن و لە بەهایان کەم دەکرێتەوە. هەر ئەمەش دیدگای ئەوی بەچەشنێک داڕشت، کە وای ببینێت گێڕانەوەی درووستی مێژوو، ئاکامێکی ستراتیژیای کولتوورییە، لە پێناو پاراستنی دەسەڵات و دەستکەوتە ماددییەکان ساز کراوە (والیا، ٢٠٠٦: ٢٩-٣٠). بەو مانایەی نواندن، کرۆکی هەر نووسینەوەیەکی مێژوو پێک دەهێنێت، کاتێک مێژوونووس دەیەوێت بەهۆیەوە حەقیقەتێکی مێژوویی بەرجەستە بکات. ئەمە پرۆسەیەکە، گەر بەئاگا نەبین، بە لاڕێماندا دەبات. لەگەڵیشیدا ئەو بڕوایەش بەهێز دەکات، کە مێژوو هیچ نییە جگە لەوەی مێژوونووس نووسیویەتیەوە. بۆیە ئەو بونیادە ئایدۆلۆژی و چوارچێوە سۆسیۆ – کولتوورییەی زەینی مێژوونووسی تێدایە، مێژووەکە دەنوێنێت و بە بەکارهێنانی زمان وەک هۆکاری پەیوەندی، دەیخاتە بەردەستمان.

ئەم تێز و دیدگا پارادیمییەی ئێدوارد سەعید لەنێو مێژوونووسان گفتوگۆ و مشتومڕی زۆریان بەدوادا هات. هەرچەندە وەک بینیمان ڕەخنەی ئەو لە گێڕانەوەی کۆڵۆنیالی لەگەڵ ئامانجەکانی نووسینەوەی مێژووی دوای کۆڵۆنیالی ڕێک دەهاتەوە، بەڵام بەشێک لە مێژوونووسان پێیان وابوو مێتۆد و دەرەنجامەکانی قەیرانیان تێدایە، چونکە ئێدوارد سەعید خۆی پتر مەیلی بەلای گشتاندنەوەیە و کەمتر لەچوارچێوەی ناوکۆیەکی دیاریکراوی مێژووییدا ماوەتەوە، بە چەشنێک نابینین نموونەکانی بە ناوکۆیەکی ئاوا پەیوەست بووبێت. ئەمە وای کردووە، وەک جۆن مەکەنزی (1994: 132) ئاشکرای کردووە، پەیوەندیی نێوان تێزە هزرییەکانی ئێدوارد سەعید و مێژوونووسان ئاڵۆز خۆی بنوێنێت و خاڵی هاوشێوە و نەگونجانیان ڕوون دەرنەکەوێت.

ئەوەی خوێنەری ئێدوارد سەعید بێت، تێبینی ئەوەی کردووە، کە ئەو چەندە کاری لەسەر چەمکی ئەکادێمیی ئۆرگانی کردووە، ئەو چەمکەی زۆر لە ڕەهەندەکانی بۆ گرامشی و تێگەیشتنی بۆ ئەرکی ڕۆشنبیر دەگەڕێتەوە و لای ئێدوارد سەعید لە تێوەگلانی ڕۆشنبیر و ئەکادێمیان بە کردەی سیاسی و بەرەنگاربوونەوەیان بۆ ئایدۆلۆژیای باو و بەرزکردنەوەی دەنگی پەراوێزخراوان خۆی بینیوەتەوە (سەعید، ٢٠١٨: ٣٧-٣٩). بەلای ئەو ”بێلایەنی” و ”بابەتیبوون” تەنیا ئامرازن؛ دەزگای نەریتگەرا بۆ چەپاندنی ڕوانگەی جیاواز بەکاری دەهێنێت. لەبەرامبەردا پێی وابوو دەبێت دەستەبژێری ڕۆشنبیر پرسیاری هەستیار بوروژێنن و لە هزردا هەردەم گەڕیدە بن، خۆ بەدوور بگرن لەوەی بکەونە ژێر کاریگەریی ڕژێمە بەرزەفتکارەکانەوە.

لەگەڵ ئەوەشدا ئەم تێگەیشتنەی ئێدوارد سەعید، لەلایەن هەندێک لە مێژوونووسان، ڕەخنەی وردی لێ گیراوە. بەتایبەت لەوەی زیاد لە پێویست تیۆرییە و کەمتر ڕیشەی بە ناو ناوکۆی ئاڵۆزی مێژوویییەوە شۆڕبۆتەوە. ڕەنگە یەکێک لە دیارترینی ئەوانەی ڕەخنەیان گرتووە جۆن مەکەنزی (1994)، بێت. ئەو پێی وایە ئەم وێنایە لەگەڵ ڕوانگەی ئەو مێژوونووسانە ڕێک دێتەوە، کاریگەر بوون بە ڕێبازە مارکسییەکە، کە جەختیان لەسەر ڕۆڵی مێژوونووس لە دۆزینەوە و بەسەنتەرکردنی گێڕانەوە لەبیرکراوەکان یاخود چەپێنراوەکان دەکردەوە. هەروەها مێژوونووسان ڕەخنەی ئەوە لە ڕێبازی ئێدوارد سەعید دەگرن، بەوەی زیاد لە پێویست تیۆرییە و کەمتر ڕیشەی لەنەو ناوکۆ مێژوویییە وردەکان داکوتاوە. مەکەنزی ئاماژە بەوە دەدات، کە گشتگیریی ڕەخنەکانی ئێدوارد لە ئیمپریالیزم، بەتایبەت لە کتێبی ”کولتوور و ئیمپریالیزم” (1993) ورد نین و ئەزموونەکان نەگێڕدراونەتەوە تا پاڵپشتی باشتری تێزەکانی بکەن، لەکاتێکدا مێژوونووسان زیاتر بەدوای ئەو گێڕانەوانەدان. هەر ئەمەش وا دەکات بەرهەمەکەی ئێدوارد سەعید بە گشتی مێژوویی بێت، بەڵام لە ڕووی کردەکییەوە نامێژوویییانە دەربکەوێت.

مەبەستی هەرە بنەڕەتی ئێدوارد سەعید ڕەخنەگرتن بوو لە گێڕانەوە گەورەکانی ڕۆژئاوا. تێکشکاندنی ئەو تێزەی، کە دەیویست لەنێو مێژوودا بەدوای جێگیر و نەگۆڕەکانی ڕۆژهەڵات بگەڕێت و لە نووسینەوەدا جەختی لێ بکاتەوە. ئەمە ئەو چوارچێوەیە بوو، کە بنەمای ئایدۆلۆژی ئیمریالیزمی پێکهێنابوو. لەگەڵ ئەوەشدا هەندێک پێیان وایە ئەم تێزەی ئێدوارد سەعید سادەکردنەوەی دۆزەکەیە، بەتایبەت ئەگەر هاتووە هەژموونی کولتوورییانەی ڕۆژئاوای وەک یەک قەوارەی جێگیر و نەگۆڕ بینیە. مەکەنزی ئاماژەی بەوە داوە کولتوورە ئیمپریالییەکە لە گۆڕانی بەردەوامدا بوو و هەرگیز جێگیر نەبووە و فرەڕەنگ بوو؛ قەوارەیەکی نەبزۆت یاخود یەکگرتوو نەبووە (MacKenzie, 1995: 133-134). ئەگەر ئێدوارد سەعید هاتووە ئاوای وێنا کردووە، ئەوا کارتێکردنە ئاڵۆزەکانی پشتگوێ خستووە، بەمەش لە دینامیکای هێزە کولتوورییەکانی کەم کردۆتەوە و وەک گوتارێکی حەتمییانەی سادە خستوویەتیە ڕوو. تۆ تەماشای ناسنامەی کولتووری بەریتانیا بکە لە سەدەی نۆزدە، دەبینی چەندە بە پێشبڕکێ و ململانێ، لەگەڵ هەریەک لە فەڕەنسا و ئەڵمانیا، کاریگەر بووە. وەک چۆن بە پەیوەندییە ئیمپریالییەکانیشی، لە ناوچەکانی ژێردەستی، کاریگەر بووە.

ئەوەی ئێدوارد سەعید لە مێژووی بینیوە و ویستوویەتی بیکاتە مۆدێلێک بۆ  نووسینەوەی مێژووی پەیوندییەکە، جەختکردنەوەی بوو لەسەر دووانەی ڕۆژهەڵات و ڕۆژئاوا، ئەو ئاڵۆزییە نێوخۆیییانە وەلا دەنێت، کە پەیوەندییەکەی تێدا پەرەی سەندووە و هۆکاری بنەڕەتی بووە لە تێگەیشتنی دینامیکای ئیپمراتۆرگەرایی. هەر مەکەنزی (1995: 135) وای دەبینێت شیکارییەکەی ئێدوارد سەعید، هەژارە لە سەرەدەریکردن لەگەڵ دژیەکی و دەرەنجامی هەڕەمەکی و ڕێککەوت و بڕیاری هەنووکەیییانە، لەکاتێکدا ئەمانە لە لێکۆڵینەوەی مێژووییدا ڕەگەزی بنەڕەتین. مێژوونووسان جەخت لەوە دەکەنەوە، کە ئەستەمە بتوانن پێشبینی وردی پێشهاتەکان بکەن. بۆ نموونە سیاسەتی پەروەردەیی بەریتانیا لە هیندستان، لە پێناو درووستکردنی هاوکار و لایەنگیر بوو، بۆ سیاسەتە ئیمپراتۆرییەکە. بەڵام بە شێوەیەکی چاوەڕواننەکراو، ئەوەی ڕوویدا ئەوە بوو، سیاسەتە فێرکارییەکە هۆکارێک بوو بۆ تۆکمەکردنی خەبات و بەرەنگاری و پتەوبوونی ناسیونالیزمی هیندی. خۆ ئەگەر نموونەی کوردی بهێنینەوە دەشێ ئاماژە بە هەمان سیاسەتی پەروەردەییی عوسمانی، لە دامەزراندنی قوتابخانەی ڕوشدییە بکەین؛ لەبری ئەوەی هەر کادیری خۆی تێدا پێ بگەیەنێ، دەبینین دەستەی منەوەرانی کورد دەرکەوتن و درەنگتر دژ بە سیاسەتە ئیمپراتۆرییەکەی گوتاری نێوی کوردبوون و کرداری کوردانەیان نواند.

 دەشێ دوایین ڕەخنەی مێژوونووسانە لە نووسینەوەکانی ئێدوارد سەعید ئەوە بێ، ئەو لە ڕەهەندێکی تەواو ئاکارییەوە تەماشای بابەتەکان دەکات. ئەمەش سەرنجی ڕەخنەگرانی ڕۆشنبیر زیاتر ڕادەکێشێ، وەک هی مێژوونووسان، کە بەدوای ئاڵۆزییەکان و نادیارەکانی ڕابردوو دان. ئەو ئەگەر لە هەر کەسێک، ڕۆژهەڵاتناسێک، گەڕیدە یان دیپلۆماتێک دەدوێ، ڕاست و ڕێک لە نێو دووانەی وەک ”پاڵەوانانی دژ بە ئیمپریالیزم” و ”دڕندە ئیمپریالیستەکان” پۆلێنبەندیان دەکات، بەمەش سروشتی فرە ڕوخساری ڕووداو و کارای مێژوویی پشتگوێ دەخات؛ دەشێ کەسێک ئەگەر لە پۆستێکی سیاسیدایە بە چەشنێک لە مێژوو بدوێت، کە لە پۆستەکەی نەما و خۆی بۆ نموونە لە نێو دەزگایەکی ئەکادێمی بینیەوە بە چەشنێکی تر ئەو مێژووە ببینێت و بینووسێتەوە. خۆ لە بواری کوردناسیدا نموونەی زۆری ئاوامان هەن: مینۆرسکی، نیکیتین و ئیدمۆندس…تاد، لەو کەسانەن.

هەرچی ڕەخنەی مێژوونووسانی پۆستکۆڵۆنیالییە لە ئێدوارد سەعید، ئەوا زێتر لە بینین و چرکردنەوەی پەیوەندییەکان بووە بە دوالیزمەکان؛ ڕۆژهەڵات/ڕۆژئاوا، سەردەستە/ژێردەستە، کە لەشێوەی ئەو تیۆرییە ڕۆژئاوایییانەی خۆی ڕەخنەی لێ گرتبوون، چەشنێک لە حەتمییەتی مێژوویی پێوە دیارە. ئەمە ڕەخنەیەکی نووسەرێکی دیاری هیندییە، کە ئەویش هومی بابایە و هاتووە لەم تێزە هەرە بنەڕەتییەی سەعید گرتوویەتی. لە ڕوانگەی ئەودا ڕۆژهەڵاتناسی، چ وێناکردن بێت یان بەرجەستەکردنی ڕاستییەکانی رۆژهەڵات، دیدگا بێت یان گێڕانەوە، لەبەریەکدانانی هەمەگیر و تایبەتمەندبوون بێت، کە ئەمە مێتۆدی کارکردنی ئیدوار سەعید بوو، دەشێ ئەم دژیەکییە ڕووکەشە پۆزەتیفانەتر ببینرێت و کۆکراوەی هەم زانست و زانینی تۆکمەی کۆڵۆنیالیزم بێت، هەمیش خەیاڵکردنی ئەوی تر بێت. ئەم هزرڤانە هیندییە وای دەبینێت دوالیزمەکە (ڕۆژئاوا لەبەرامبە بە ڕۆژهەڵات) و پڕۆسێسی وێناکردنەکە، تەنیا مانای دژیەکبوون و دابڕان ناگەیەنێت، ئەوەندەی دەشێ ئاماژەش بێت بۆ مەبەستێکی سیاسی – ئایدۆلۆژیی پەیوەست بە زەمەنی کۆڵۆنیالی. ئەمەش مەبەستێک بووە، ڕێگەی بە ئەوروپا داوە، بە هێمنی و بە شێوەیەکی مەجازییانە بە ئاڕاستەی ڕۆژهەڵات هەنگاو بنێت (یانج، ٢٠٠٢: ٢٩٥-٢٩٦). هومی بابا پێی وایە، لە دەرەوەی ئەم دابەشکردنانەوە، دەشێ چەمکگەلی تر هەبن، پەیوەندییەکان بناسێنن، وەک دووڕەگی و تێکەڵبوون، کە بە دوو خەسڵەتی هەرە بنەڕەتی پەیوەندییە کۆڵۆنیالییەکانیانی دەزانێت، نەک ئەو دوالیزمە توندانەی دەشێ تۆڕی پەیوەندیی نێوان دەستەبژێری خۆجێیی و کاربەدەست و کارگێڕانی ئیمپریالی بشارنەوە (Bhabha, 1994: 88). لەلای خۆیەوە چاترجی جەختی لەوە کردۆتەوە و ڕوونی کردۆتەوە، کە چۆن ناسیونالیزمی دژە کۆڵۆنیالی لە هیندستان گوتارێکی وەرگیراوە و لە ئاکامی ئاوێتەبوونی زانینە کۆڵۆنیالییەکان و نێوخۆیییەکانەوە داڕێژراوە.

ئەم ڕەخنانە بە مانای ئەوەیە توێژەرەکان ویستوویانە جەخت لەسەر پەیڕەوکردنی ئۆنتۆلۆژیایەکی پەیوەندگەرا بکەنەوە، کە چەمکانێکی وەک ناسنامەی شل و کاریگەری و کارتێکردن…تاد لەخۆ دەگرێت. لەم تێگەیشتنەوەیە، چاترجی پێی وایە مەیلی ئێدوارد سەعید بۆ هارمۆنیا لە پەیوەندیدا، جێگەی هەڵوەستە لەسەرکردنە. نموونە بەوە دەهێنێتەوە، کە چۆن ناسیونالیزمی دژە کۆڵۆنیالی لە هیندستان دەستی بەسەر زانین و زانستە کۆڵۆنیالییەکاندا گرتووە و کردوویەتیە ئامرازێکی گوتارییانە (Chatterjee, 1986: 50)، گوتارێک کە ڕەنگ و ڕووی ژێردەستەی هەبووە و پاشکۆیەتی لە نێو ڕەوتی مێژوو بەرجەستە کردووە، نەک دەسەڵاتی کۆڵۆنیالییانە.

لێرەوە تێدەگەین پاشماوەی کولتووری ئێدوارد سەعید و ئامادەییی تێزە هزرییەکانی لە نێو مێژوونووسیی پۆستکۆڵۆنیالی و ”لێکۆڵینەوەی پاشکۆ”، تەنیا چاولێکردنەوەیەکی کوێرانەی ئەو نەبووە و بابەتێکیش نییە لە پەراوێزدا بووبێت. بەڵکوو وەک داڕشتنەوەیەکی ڕیشەیییانەی بیروبۆچوونەکانی ئەو دەبینرێت، بەڵام بە تێپەڕاندنی چوارچێوەی سەنتەر/ پەراوێزی کۆڵۆنیالییانە و وەڵامدانەوەیەکیش بووە بۆ هەژموونی نێوخۆییی نەریتە هزرییەکانی. ڕەوتی هزریی قوتابخانەی پۆستکۆڵۆنیالی، بەردەوامێتی و ڕەخنەگرتن بوو لە ئیپستمۆلۆژیای ئێدوارد سەعید و بۆ کاراکانی نێو قوتابخانەی پاشکۆش ڕیشەداکوتان بوو، لەنێو وردەکارییەکانی مێژووی باشووری ئاسیا، بەتایبەت هیندستان. دەشێ ئەمەش ڕەخنەیەکی بنەڕەتی بێت لە کاری ئەم قوتابخانەیە، کە هزرڤان و مێژوونووسەکانیان نەیانتوانی پانتاییی مێژووی ئەوێ تێپەڕێنن؛ تێز و تیۆرییەکانیان بە چەشنێک بگشتێنن، لەبار بن بۆ تیۆریزەکردنی مێژوویییەکی جیهانییانە.

کۆتایی: ئێدوارد سەعید چی بۆ ئێمە پێیە؟

تەمەنی کتێبەکەی ئێدوارد سەعید لە نیو سەدە نزیک دەبێتەوە. لەو ماوەیەش گۆڕانی گەورە بەسەر کۆی زانستە مرۆڤایەتییەکان، لەنێویشیاندا ڕۆژهەڵاتناسی و مێژوونووسیندا هاتووە. لەگەڵ ئەوەش هێشتا ئەم کتێبە وەک دەقێکی کلاسیکیی ڕەخنەگرتن لە گوتاری کۆڵۆنیالی و هزری ڕۆژئاوایی سەرەدەری لەگەڵدا دەکرێت. ئەمەش دەگەڕێتەوە بۆ ئەوەی ڕەخنەیەکی بنچینەیییانەی مێتۆد و تیۆرییە باوەکانی مێژوونووسینی لەخۆ گرتووە. بەتایبەت ئەوانەی، لەچوارچێوەی سەنتەرگیریی ئەوروپایییەوە، مێژووی مرۆڤایەتیان دەخوێندەوە و دەیان نووسییەوە. بەرهەمەکەی ئەو لاگیریی کرۆکییانەی ئەم مێتۆدانەی دەرخست. بانگەوازێکیش بوو، بۆ پێداچوونەوە و هەڵسەنگاندنێکی ڕەخنەییانە و هەمەگیرانەی توێژینەوەی مێژوویی. ئەم مێتۆدە نێوپسپۆڕییەی ئەو– کە وەک بینیمان جەختی لەسەر سیاسەتی نواندن و سروشتی درووستکراوی گێڕانەوە مێژوویییەکان دەکردەوە – جێکەوتەی زۆری بەسەر لێکۆڵینەوەی پۆستکۆڵۆنیالی و زانستە مرۆڤایەتییەکان بەگشتی هەبوو. چونکە بەرهەم و تێزەکانی چوارچێوەیەکی نوێیان خستە بەردەست توێژەران بۆ ئەوەی مەعریفە لە دەرەوەی کاریگەرییەکانی هزری کۆڵۆنیالی چاو لێبکەن و بەرەنگاری گریمانە نەریتییەکان، لەبارەی چییەتیی مێژوو، ببنەوە. بەتایبەت ئەگەر دەبینین پاڵپشتی تێگەیشتنێکی دادەوەرانە و هەمەگیرانەی بۆ ڕابردووی مرۆڤایەتی دەکرد. ئەو کەرستەی ئەوتۆی خستە بەردەستیان بتوانن بەهۆیەوە، بە گێڕانەوە ئیمپریالییەکاندا بچنەوە؛ هەڵیوەشێننەوە و دەنگ بۆ پەراوێزخراوان بگێڕنەوە. هەرئەمەش بوو وای کرد نووسینەکانی ببنە ئیلهامبەخشی چەردێک قوتابخانەی مێژوونووسی، لەوانەش قوتابخانەی پاشکۆ، کە کەسە دیارەکانی نێوی هاوڕای ئێدوارد سەعید بوون، لە بەرەنگاربوونەوەی چوارچێوە ئەوروپییە سەنتەرگەراکانی گێڕانەوە و نواندنی ڕابردوو و بانگەوازکردن بۆ مێژوویەکی هەمەگیرتر.

لێرەوە، تێزەکانی ئێدوارد سەعید، وەرچەرخان بوون لەنێو زانستی مێژوودا. ئەوەی ئەو کردی مێژوونووسانی بە ئاڕاستەی ئەوە برد مێتۆدی نوێ لە نووسینەوەدا بەکار بهێنن و، لە بواری پسپۆڕییەکەیاندا، پشت بە بنەمای ئیپستمۆلۆژییانەی نوێ ببەستن. ئەو ئەگەر بەوە گەیشت نووسینەوەی مێژوو بەشێکی تەکنیکیی دەسەڵاتدارێتییە، توێژەرانی ناچارکرد ڕیشەیییانە لە مۆدێلە ئەوروپییەکەی مێژوونووسی بکۆڵنەوە. لەوەش گرنگتر چیدی لەو ڕوانگە تاکڕەهەندەوە لە ڕابردوو نەڕوانن، بەڵکوو بە چەشنێک بیبینن، کە دوالیزمە باوەکان تێپەڕێنێت و پەراوێزخراو، نەبینراو و پشتگوێخراویش لەخۆ بگرێت. لەوەش گرنگتر لە دەرەوەی زەینی ئەرشیڤگەرانەوە، کایەی مێژوونووسین دابڕێژنەوە.

سەرباری ئەوەی ناتوانین نکۆڵی لە لێکەوتەی هزری ئێدوارد سەعید بکەین، لەگەڵ ئەوەشدا بەردەنگی مێژوونووسان بۆ تێزەکانی ئاڵۆز بوو. چونکە، ئەگەرچی گوتارە ڕەخنەیییەکەی لەگەڵ ئامانجەکانی مێژوونووسیی پۆستکۆڵۆنیالی بۆ هەڵوەشاندنەوەی گێڕانەوە ئیمپریالییەکان ڕێک هاتۆتەوە، بەڵام  هەندێکجار جیاواز بووە لەگەڵ مێتۆدی ئەزموونگەری و وردی ناوکۆییانە، کە مێژوونووسان وەک یەکەمین هەنگاوەکانی مێژوونوسی دەبینن و پێیان وایە، بەبێ ئەم هەنگاوە، ڕاگەیشتن بەسەر ڕابردووی گێڕدراوە، کەموکورتی زۆری تێدا دەبێت. ئەم جیاوازییە ئەوەمان پێ دەڵێت، ئەگەر دەخوازین مێژوویەکی جیاواز بنووسینەوە، لە چوارچێوەی لێکۆڵینەوەی پۆستکۆڵۆنیالیشدا جێگەی ببێتەوە، ئەوا دەبێت قووڵتر سەرەدەری لەگەڵ هەر مێتۆدێکی نووسینەوەی مێژوودا بکەین کە بەکاری دەهێنین. ئەمەش تا بتوانین خۆمان لە گشتاندنە بەرفرەکان ڕزگار بکەین و لەو ئاڵۆزی و دژیەکییانەش بگەین، کە دیاردە مێژوویییەکان هەیانە و سادەیان نەکەینەوە.

هەرچۆنێک بێت هزری ئێدوارد سەعید تێز و دیدگای لێکۆڵینەوەی پاشکۆ و پەراوێزخراوان تەواو دەکات، چونکە هەردوولایان لەوەدا هاوشێوە بوون، کە بەرەنگاری چوارچێوەی سەنتەرگەرای ئەوروپی بوونەتەوە، بواری ئەوەشیان بە ژێردەستە داوە بڵێت ئێمەش لەنێو ڕووداوە مێژوویییەکاندا هەین و کاراین. ئەو ڕەخنانە بەیەکەوە و لەگەڵیشیدا ڕەخنە و ڕوانگەی چەند ڕەوتێکی هزریی ئەوروپایی، لەوانەش پۆستمۆدێرنە، هاوکار بوون لە شێوەگیرکردنی تێگەیشتنێکی جیاواز بۆ گێڕانەوەی مێژوویی و بواردان بە پێداچوونەوەی وردی چۆنیەتیی گەڵاڵەبوونی ئایدۆلۆژیای ئیمپریالی و بەرهەمهێنانی کولتوور و زانینی مێژوویی لە چوارچێوەیدا. بۆیە ئەگەر بێین ڕوانگەی ئێدوارد سەعید تێکەڵ بە شرۆڤە و لێکدانەوەی قووڵی مێتۆدییانە بکەین، ئەوکات وەک توێژەری بواری مێژوو، دەتوانین ئەو بۆشایییەی لەنێوان ڕەخنەی کولتووری و لێکۆڵینەوەی مێژووییدا هەیە بەرتەسک بکەینەوە. بەمەش بواری مێژوونووسی فراونتر و گرنگییەکەی زێتر دەکەین. بەهای زێدەتریش بە ڕوانگەی مێژوویی، لە تێگەیشتنی ئێستا و جەنجاڵییەکانی، دەبەخشین.

ئەمە لە ئاستە گشتییەکەدا، بەڵام لە زەمینەی کوردی بۆ لێکۆڵینەوەی مێژوو، وەک دەزانین قەیرانەکان زۆرتر و تێگەیشتنەکان هێشتا سادەتر خۆ دەنوێنن. ئەگەر ئێدوارد سەعید باسی کۆمەڵگە کۆڵۆنیالیزەکانی دەکرد، خۆ کورد ژێردەستە و پەراوێزی کۆڵۆنیالکراوەکانە. بۆیە بابەتی گرنگ بۆ مێژوونووسانی ئەم پانتایییە مرۆیییە، هەر ئەوە نابێت چەندە کۆڵۆنیالیزم چەمک و تێگەی هزرییانەی خۆی خزاندۆتە نێو گێڕانەوەدا. بەڵکوو لە زەمینەی ئێمە و نزیک بە ئێمە، چ کاریگەری و کارتێکردنیشی بەدوادا هاتووە. ئەوی تری سەردەستە و ئێمەش کە، لەدوای نەمانی کردەکییانەی کۆڵۆنیالیزمیش، هەر بە ژێردەستەیی ماوینەتەوە، چ کاریگەری هەبووە بەسەر داڕشتنەوەی ڕوانگە و ڕێبازی مێژوونووسیمان. چ جێکەوتەی بەسەر خۆدۆزینەوەی مێژوونووسییانەمان هەبووە، لەو ناوکۆ گێڕانەوەییەی بەسەرماندا، وەک کارەکتەری سەر بە گێڕانەوەی زارەکی و کەم مێژوونووسین، سەپێنراوە و ئێمە بە ئاگایی و بێئاگایی هەوڵمانداوە بە چەمک و تێگەی ئەوانەوە، گێڕانەوەی خۆمان لەو ناوکۆیەدا ببینینەوە و ڕەوایەتی بە هەبوونی مێژوویییانەمان لە چوارچێوەیدا بدەین.

ئەوەمان بیر بێت، بەشی هەرە بنەڕەتی تێگەیشتنی مێژوویییانەمان بۆ خودی کوردانەمان، ئەوی تر درووستی کردووە. جا چ لە قۆناغی پێش مۆدێرنە و چ قۆناغی مۆدێرنە و هەژموونی تێزە کۆڵۆنیالییەکان بووبێت. ئیدی ئەگەر فرانز فانۆن کاتی خۆی گوتی چەمکی جیهانی سێیەم، پڕ بە مانای وشەکە، لەلایەن ئەوروپاوە ئەفرێنراوە (یانج، ٢٠٠٢: ٢٥٩)، ئەوا چەمکی نیشتیمانییانە (عێراقی، تورکیایی، سوری و ئێرانی) پڕ بە مانای وشەکان، لەلایەن ئەوانی ترەوە، بۆ ناساندنی هەبوونی مێژووی ئێمە داتاشراون. گێڕانەوەی مێژووش بەشێکە لە ناسنامەی داڕێژراو، کە لە تێگەیشتنی سەردەستەوە (ئەوروپای کۆڵۆنیالی یان فۆرمی دەوڵەت نەتەوەی پاش کۆڵۆنیال) زانیارییەکانی نێوی مانای وەرگرتووە و پاککردنەوەی لە چەمک و دەستەواژە و تێزەکانی ئەستەم بووە. تۆ تەماشای تێگەیشتنی مێژوویییانەمان بۆ چەمکانێکی وەک کوردایەتی، کوردستان، باشوور، باکوور، جووڵانەوەی نەتەوەیی، بزاوتی نیشتیمانی، شۆڕشی کوردی، ڕاپەڕین…تاد.، بکە. ئەوکات دەزانی چەندە مانا لەوانی تر و لە ناوکۆی هزرییانەوە وەرگیراوە و لەنێو ناوکۆی کوردیدا جێنشین کراوە.

بێگومان ئەوەی گوتم هەرگیز بە مانای دژبوون نایەت لەگەڵ هزری ئەوروپایی و جێکەوتە مەعریفییەکانی، ئەوەندەی مەبەستم ئاوڕدانەوەیە، بە ئاڕاستەی چییەتیی هەبوونمان لەنێو زەمەن، ئینجا دۆزینەوەی تایبەتمەندییەکانی گێڕانەوەی مێژووییمان و جیاکارییەکانی کارایی و سروشتی زانینی مێژوویییانەی خۆجێیی. ڕاگەیشتن بەسەر ئەم بابەتانە بە خۆدابڕینی هزری و دژبوون و ڕەتکردنەوەی هەرچی لە دەرەوەیە نابێت، ئەوەندەی بەئاگابوون و تێپەڕاندن و تیۆریزە و بەرواردکارییەوە دێتە جێ. بەهەمان شێوە بە خۆتەنیاکردن و گومانکردن، لە هەرچی نووسراوە، مەیسەر نابێت. ئەوەندەی بە شرۆڤە و شیکردنەوە، لە ڕەهەندێکی ڕەخنەیییەوە، دەبێت. لێرەوە، ئەگەر خوازیاری نووسینەوەی مێژوویەکی پۆستکۆڵۆنیاڵانە و پۆستدەوڵەتییانە بین، ئەوا دەبێت ورد چەمکگەلی وەک زەمەنی مێژوویی، ڕووداو، نواندن، کارەکتەر، قۆناغبەندی…تاد، بناسینەوە و پێناسە بکەینەوە. نەک پێمان وابێت بە خەیاڵکردنی مێژوو و بەئەفسانەکردنی هەبوونمان، یان گەڕانەوە بۆ قۆناغی پێش کۆڵۆنیالیزە دەتوانین ئەمە بکەین، کە هەندێکجار ئایدۆلۆژییانە وەک سەردەمی زێڕین وێنای دەکەین و جگە لە هەستێکی خۆڕازیکردن و خۆبەزلزانییەکی ساختە، مەعریفەیەکی ئەوتۆی مێژوویی بەرهەم ناهێنێت.

ئەوەی مەبەستم بوو بیڵێم و هەقە ئەهلی مێژوو لای خۆمان لایەکی بەلادا بکەنەوە، گرنگی خۆناسینەوەی مێژوویییانەیە، لە میانەی هەمەچەشنکردنی هزر و مێتۆدی گێڕانەوە و هەنوکەییبوون لە ناساندندا.

سەرچاوەکان

کوردی

سپیڤاک، گایاتری. (٢٠٢٢). ژێردەستە دەتوانێ قسە بکا؟ وەرگێڕانی: سەنگەر حاجی، هەولێر: چاپخانەی ڕۆکسانا.

سەعید، ئێدوارد. (٢٠١٨). ڕۆژهەڵاتناسی؛ ڕۆژهەڵاتی داهێنراو لەلایەن ڕۆژئاواوە، وەرگێڕانی: موحسین ئەحمەد عومەر، هەولێر: ماڵی وەفایی.

عەرەبی

أشكروفت، بيل و آخرون. (٢٠١٠). دراسات ما بعد الكولونيالية : المفاهيم الرئيسية تأليف : ؛ ترجمة أحمد الروبي و أيمن حلمي و عاطف عثمان، القاهرة: المشروع القومي للترجمة.

حسن، مجدي عز الدين (٢٠٢٢). مابعد الكولونيالية ادوارد سعيد نموذجا، المجلة الموریتانية للدراسات الفلسفية، مؤسسة بیت الحکمة، العدد الأول.

حسین، محسن محمد. (٢٠١١). الاستشراق برؤية شرقية، بيروت – بغداد: دار الوراق.

سعید، ادوارد. (١٩٩٦). تعقیبات علی الاستشراق، ترجمة و تحرير: صبحي حديدي، بیروت: المؤسسة العربية للدراسات والنشر.

شاکرابارتي، دیبیش. (٢٠١٦). دراسات التابع والتأريخ ما بعد الكولونيالي، ترجمة: ثائر ديب، مجلة اسطور، العدد (٣).

غاندي، ليلی. (٢٠٢١). نظرية مابعد الکولونیالية؛ مدخل نقدي، ترجمه: لحسن احمامة، الجبيل: دار صفحة.

غراتالو، کریستیان. (٢٠١٨). هل يجب التفكير في تاريخ العالم بطريقة أخرى؟ ترجمة: الهادي التیومي، المنامة: هيئة البحرين للثقافة والآثار.

غها، راناجیت. (٢٠١٩). التاریخ عند نهاية التاریخ العالمي، ترجمة: ثائر دیب، المنامة: هيئة البحرين للثقافة والآثار.

فانون، فرانز. (٢٠٠٤). معذبو الارض، ترجمة: سامي الدروبي و جمال الاتاسي، الجزائر – بیروت: منشورات انبیت و دار الفارابي.

فوكو، ميشيل. (٢٠٠٨). حفريات المعرفة، ترجمة: سالم يفوت، الدار البيضاء–بيروت: المركز الثقافي العربي.

میتشل، تیموثي. (٢٠١٣). استعمار مصر، ترجمة: بشير السباعي و احمد حسان، الطبعة الثانية، القاهرة: مدارات للأبحاث والنشر.

والیا، شيلي. (٢٠٠٧). إدوار سعید وکتابة التاریخ، ترجمة: احمد خریس و ناصر ابو الهيجاء، عمان: أزمنة للنشر والتوزیع.

وولف، دانیال. (٢٠٢١). تاریخ موجز للتاریخ؛ تدوین التاریخ کونیا منذ العصور القديمة وحتی الیوم، ترجمة: حیدر عبدالواحد راشد، بغداد: دار الرافدين.

الیعقوبي، خالد؛ طحطح، خالد. (٢٠١٩). التاریخ من أسفل، القاهرة: رؤية للنشر والتوزیع.

یانج، روبرت. (٢٠٠٢). أساطير بيضاء؛ كتابة التاريخ والغرب، ترجمه: احمد محمود، القاهرة: المشروع القومي للترجمة.

ئینگلیزی

Ashcroft, B., Griffiths, G., & Tiffin, H. (2002). The Empire Writes Back: Theory and Practice in Post-Colonial Literatures (2nd ed.). Routledge. https://doi.org/10.4324/9780203426081

Bhabha, H. K. (1994). The Location of Culture. Routledge.

Burke III, E. and Prochaska, D. (2008) Genealogies of Orientalism: History, Theory, Politics. Santa Cruz: University of California, Santa Cruz. Available at: 

Çelik, Z. (2018). Reflections on Architectural History Forty Years after Edward Said’s Orientalism, Journal of the Society of Architectural Historians, 77(4), pp. 381–386. Available at: https://online.ucpress.edu/jsah/article-abstract/77/4/381/60311.

Chakrabarty, D. (2000). Provincializing Europe: Postcolonial Thought and Historical Difference. Princeton University Press.

Chatterjee, P. (1986). Nationalist Thought and the Colonial World: A Derivative Discourse.

El-Haj, N.A. (2005). Edward Said and the Political Present’, American Ethnologist, 32(4), pp. 538–555. Available at:

Gallien, C. and Jokic, O. (2015). Eighteenth-Century Orientalism in Contemporary British Historiography and Literary Criticism’, Literature Compass, 12(4), pp. 183–194. Available at:

Green, A., & Troup, K. (2016). The houses of history: A critical reader in history and theory (2nd ed.). Manchester University Press.

Guha, R. (1982). Elementary Aspects of Peasant Insurgency in Colonial India. Oxford: Oxford University Press.

Kennedy, V. (2013). Edward Said: A Critical Introduction. Cambridge: Polity Press.

MacKenzie, J. M. (1994). Edward Said and the historians. Nineteenth Century Contexts, 18(2), 229–235. https://doi.org/10.1080/08905499408583378

Mitchell, T. (1988). Colonising Egypt. Cambridge University Press.

Prakash, G. (1994). Subaltern Studies as Postcolonial Criticism’, The American Historical Review, 99(5), pp. 1475–1490.

Roddan, H. (2016). Orientalism is a Partisan Book’: Applying Edward Said’s Insights to Early Modern Travel Writing’, History Compass, 14(1), pp. 12–21. Available at:

Said, E. (1993). Culture and Imperialism. London: Vintage books.

The post ئێدوارد سەعید و مێژوونووسیی دوای کۆڵونیالی appeared first on ژنەفتن.

ئیبراهیمی کوردی گۆرانیی شارەزووری (١٦١٦-١٦٨٩)، یەکێک بوو لە دوایین ئەو حەکیم و زانا کوردانەی قۆناغی درەنگی مێژووی کلاسیک، کە کاریگەریی دوورمەودای بەسەر کۆی هزری ئیسلامییەوە هەبووە. بە ”موجەدید”ی سەدەی حەڤدەمی زایینی دەزانرێ، بەتایبەت لە ڕووتەختی هزری سەنتەری دەرکەوتنی ئیسلام؛ لە وڵاتی حیجاز. بەشدارییەکانی ئەو لە بواری سۆفیزم، کەلامناسی و ڕیفۆرمی ئیسلامی، جێکەوتەیان بەسەر دەستەبژێری زانستی – ئایینییەوە هەبووە، نەک هەر لە حیجاز، بەڵکوو لە زۆر شوێنی تری جیهانی ئیسلامی: هەر لە نیمچە دوورگەی هیندییەوە بگرە تا بە باکووری ئەفریقیا دەگات.

لەم کورتە باسە دەخوازین شرۆڤەیەکی پوخت بۆ کولتووری هزری ئەم زانایەی شارەزوور بخەینە ڕوو، زێتریش بە جەختکردنەوە لەسەر تێزی ”یەکێتیی بوون – وحدة الوجود”ی سۆفییانە، هەروەها ڕۆڵی بەرفراوانی ئەم زانایە لە لێکۆڵینەوەی نەریتییانەی ئیسلامیدا. ئەمەش بە خوێندنەوەی دوایین کتێبێک، کە لەم چەند ساڵەی دوایی، لەلایەن دکتۆر ”ناصر محمد یحیی ضميرية” بە ئینگلیزی لە بارەیەوە نووسراوە. تێیدا، بە کورتی بایۆگرافیای هزری ئەم زانا کوردەی بونیادناوەتەوە؛ ویستوویەتی بیروبۆچوونی گۆرانی لە ناوکۆی مێژووییی خۆیدا بخوێنێتەوە و جێکەوتەی بەسەر پەرەسەندنی هزری ئیسلامی، لە قۆناغی پێش مۆدێرن، دیاری بکات.

کتێبەکەی ناصر ضميرية بە ناونیشانی ”ژیانی هزری لە حیجازی پێش وەهابییەت؛ تیۆلۆژیای سۆفییانەی ئیبراهیمی گۆرانی”[1]، لە ساڵی ٢٠٢١دا چاپ بووە. کتێبێکی گرنگە بۆ خوێندنەوەی هزری ئیسلامی لەم قۆناغە درەنگەیدا، کە سەدەی حەڤدەیە و لە پانتایییەکی گرنگی فەرامۆشکراوی ئەو سەردەمدا، کە حیجازە. نووسەر ویستوویەتی، بە پشتبەستن بە چەندین سەرچاوەی یەکەمینی دەستنووس و چاپکراو، بە لێکۆڵینەوەی وردی ژیان و هزری کەلامناسییانە و سۆفییانەی زانایەکی کۆچکردوو لە کوردستانەوە بۆ ئەوێ، گێڕانەوە باوەکان لەبارەی کەوتنی ڕەوشی هزری ئیسلامی، لە قۆناغی پێش هەژموونی وەهابیزم، هەڵسەنگێنێت. لە هەوڵی ئەوەدا بووە تێگەیشتنێکی جیاواز بۆ ئەو مێژووە بخاتەڕوو، دەریبخات کارایەکی وەک ئیبراهیمی گۆرانی و تێزەکانی، نەک هەر ناشێ لەنێو گێڕانەوە باوەکانی لێکۆڵینەوەکانی تایبەت بەم قۆناغە جێگیر ببن و بە قۆناغی کەوتنی هزر وەسف بکرێت، بەڵکوو دەشێ گێڕانەوەیەکی تەواو جیاوازمان، لەسەر کۆی سروشتی ئەم هزرە بخەنە بەردەست و لە بیرۆکەی شێوەگیربووی ”کەوتن” و ”داڕمان”مان دوور بخەنەوە؛ بمانخەنە بەردەم هزرێکی پڕ لە ژیان، کە لەوێدا و لەو سەردەمدا، لەسەر دەستی ئەم زانا کوردەوە، بەرهەم هێنراوە.

بەستێنی مێژوویی و هزریی گۆرانی

گەشتی هزرییانەی ئیبراهیمی گۆرانی لە کوردستانەوە دەستی پێ کردووە. بەڵام نووسەرەکە کەمتر لای بەلای ئەم بەشەی بایۆگرافیای زاناکە کردۆتەوە. بەمەش جیاوازی لەگەڵ کارەکەی مێژوونووسی گەورە عیماد عەبدولسەلام ڕەئوف (١٩٤٨-٢٠٢١)هەیە، کە لە کتێبێکی سەربەخۆ لەبارەی ئەم زانایە، بەشێکی بۆ خوێندنەوەی ژینگەی کوردستانییانەی پەروەردەبوون و پێگەیشتنی تەرخان کردبوو[2]. دەشێ ئەم نووسەرە، لەبەر کەمی زانیاری و پابەندبوونی بە چوارچێوەی توێژینەوەکەی، کە ڕەوشی هزری و ڕۆڵی گۆرانییە لە حیجاز، گرنگی ئەوتۆی بەم قۆناغەی ژیانی نەدابێت. بەلای ئەو کۆچی گۆرانی بۆ شاری مەدینە لە ساڵی ١٧٤٩، خاڵی وەرچەرخان بووە لە ژیانیدا. هەرواش بوو، ئەو لەوێ زوو تێکەڵ بە کولتووری هزری باو بووە و دەقە گرنگەکانی خۆی نووسیون. مەککە و مەدینە، لەم قۆناغە، شوێنی جڤاکێکی زیندووی زانستی بوون. بۆ زانا کوردەکانیش، لە زوویەکەوە، مەنزڵگای خوێندن و ژیان بووە[3]. لەو سەردەمەشدا، کە ئەو زانا شارەزوورییە چووە، چەندین زانای دی کورد لەوێ دەژیان و لەنێو جڤاکی زانستی – ئایینیدا، کارایانە خۆیان نواندووە و دەستنووسەکانیان شایەتە لەسەر چالاکیی هزری – ئایینییانەیان.[4]

زیندووێتیی جڤاکە زانستییەکە لە گفتوگۆ و مشتومڕە کەلامی و فیقهی و سۆفییانییەکاندا بوو. زانا کوردەکان بەڕێوەبەری گفتوگۆکان و وروژێنەری زۆر لە دۆز و پرسەکان بوونە. زۆری نەبردووە ئیبراهیمی گۆرانیش وەک کارەکتەری هەرە دیاری نێو جڤاکەکە دەرکەوتووە، ئەمەش گرنگیی پاشخانە کوردستانییەکەی ئەو نیشان دەدا لە فۆرمەلەکردنی ئەم کارەکتەرەیدا. لەوێ سەرنجی شاگردان و فێرخوازانی زۆربەی جیهانی ئیسلامی بۆ خۆی ڕاکێشاوە و وانەکانی بە گرنگی وەرگیراون. هەر ئەمەش هۆکار بووە بۆ تەشەنەکردنی تێزە هزرییەکانی ئەو لە جیهانی ئیسلامی؛ کاتێک ئەو فێرخوازانە، هەریەکە و گەڕاوەتەوە وڵاتی خۆی و گۆرانی و بیروبۆچوونەکانیان بە شوێنە دوورەدەستەکان ناساندووە.

ئەم ڕۆڵەی حیجاز لە هەناردەکردنی هزری گۆرانی و هەندێک زانای تری کورد، سەرنجی توێژەرانی ئەم سەردەمەی بۆ لای خۆی ڕاکێشاوە. پێش ضمیریە، مێژوونووس بەشیر موسا نافع جەختی لەوە کردۆتەوە، کە ناوچەکە سەنتەرێکی زیندووی چالاکیی هزری بووە، بەتایبەت لە هەردوو بواری کەلامناسی و تەسەوفەوە[5]؛ ئەو دوو بوارەی دەستەبژێری زانستیی کوردی، بەدەر لە تێگەیشتنە میللییە باوەکەی ئەوەی دووەم، لەم قۆناغە درەنگەدا پێیەوە ناسرابوون و ڕۆڵیان لە زیندووهێشتنەوە و گواستنەوەی گرنگترین تێزەکانی بۆ بنکە زانستییەکانی ئەو پانتایییەدا هەبووە. بەتایبەتیش شاری مەدینە، کە گۆرانی بەشی هەرە زۆری ژیانی تێدا بەسەر بردووە، بەهۆی پێگە ئایینییەکە و ڕەهەندە ڕەمزییەکانییەوە، سەنتەرێتی خۆی لە ئاڵوگۆڕی زانستی پاراستبوو؛ ‌بەردەوام سەرنجی هەم زانا کورد و غەیرە کوردەکان و هەمیش زانستخوازانی سەرتاپای جیهانی ئیسلامی ڕادەکێشا. لەو ژینگە دینامیکییەدا بووە، کە گۆرانی برەوی بە هزری خۆی داوە و زۆرترین کتێبەکانی نووسیوە؛ بواری ئەوەی بۆ ڕەخساوە ڕۆڵی خۆی لە داڕشتنی گوتاری هزریی سەردەمەکە بگێڕێ.

چوارچێوەی بەستێن

کتێبەکە بە خستنەڕووی وێنەیەکی گشتی حیجاز لە سەدەی حەڤدە، دەست پێ دەکات. واتا ئەو قۆناغەی مێژوونووسان وا وەسفی دەکەن قۆناغی پاشەکشەی هزری بووە لە جیهانی ئیسلامیدا. ضمیریە ئەرگومێنتی خۆی لەسەر ڕەتکردنەوەی ئەم تێگەیشتنە بونیاد ناوە. ئاماژەی بەوە داوە، کە سەرباری وەرچەرخانە سیاسی و کولتوورییەکان و کاریگەرییان بەسەر گۆڕینی سەنتەرەکانی بەرهەمهێنانی هزر لەم جیهانەدا، حیجاز هەر وەک سەنتەرێکی جێگیری ئەم هزرە ماوەتەوە. ئەوەی ڕێگەی بەم بەردەوامییەش داوە، چوارچێوە جیهانی و خۆجێیەکەی بووە. پەیوەندیی گرێدراوی بە کارا مێژوویییە زانستییەکانی ناوچە جیاوازەکان و هاتنییان بۆ ئەوێ و دەرکەوتنی دەستەبژێرێکی زانستی – ئایینیی تایبەتمەند، کە ڕۆڵیان لە برەودان بە ڕەوتە هزرییەکانی پەیوەست بە تەسەوف، فەرموودەناسی و زانستە عەقڵییەکانەوە هەبووە.

ضمیریە جەختی لەوە کردۆتەوە، لەم دیمەنە هزرییەدا، زاناکەی شارەزوور ڕۆڵە هەرە سەرەکییەکەی گێڕاوە. ئەمەشی بە فرەجۆری و فرەچەشنی بەرهەمەکانییەوە بەستۆتەوە، کە کەلامناسی، سۆفیزم، فەلسەفە و فەرموودە بوار و بابەتە سەرەکییەکانی بوونە. ئیدی، ئەگەر نووسەر ویستویەتی دەوڵەمەندیی نەریتی هزری لە حیجاز ڕوون بکاتەوە، پشتی بە چۆنیەتیی شێوەگریبوونی سیستمی هزریی گۆرانی و کارە جیاوازەکانی بەستووە. ئەو دەزانێ و ڕایدەگەیەنێ ئەم کەسێتییە، بەراورد بە کەسانی دی، هەقی خۆی پێ نەدراوە لە لێکۆڵینەوە و تەنانەت چاپکردنی بەرهەمەکانیشی. لەکاتێکدا ئەو فرەیییەی لەنێو سیستەمە هزرییەکەیدا هەبووە، نەک هەر دیمەنە گشتییەکەی ڕەوشی هزریی حیجاز دەردەخات، بەڵکوو ئاوێزەیەکیشە بۆ باشتر بینینی ڕەوتە هزرییەکانی کۆی جیهانی ئیسلامی.

جێگەی سەرنجە نووسەر، لە دۆزینەوەی ئەو پێگە گرنگەی زانا کوردەکە، میتۆدێکی تایبەتی پەیڕەو کردووە بۆ دۆزینەوەی ئەم سەنتەرێتییە و ڕۆڵی لە حیجازدا. ئەویش بەدواداچوونیەتی بۆ زنجیرەی گێڕەرەوان و پشتبەستن بە ” الإسناد” وەک ئامرازێکی مێتۆدییانە، بۆ ئاشنابوون بە زنجیرەی گواستنەوەی زانستەکان. لەمیانەیەوە توانیویەتی لە چۆنیەتیی گواستنەوەی زانین لە چوارچێوەی جیهانی ئیسلامی بگات، بەتایبەت ڕۆڵی نێوەندگریی زانا کوردەکان، مامۆستاکانی گۆرانی لە کوردستان، لە گواستنەوەی زانستە عەقڵییەکانی پانتایییە فارسییەکە بۆ پانتاییی عەرەبی و هێشتنەوەی زانستە عەقڵییەکان بە زیندوویی، لە سەردەمانێکدا کە نەفرەت لەم زانستانە کراوە، بەڵام لە زەمینە کوردییەکەدا بروەی پێدراوە و لە چوارچێوەی سیستەمی باوی قوتابخانەییدا خوێنراون، وەک ئەم لە چەند توێژینەوەیەکدا ڕوونمان کردۆتەوە. نووسەرەکە بەدوای دۆزینەوەی ئەو تۆڕە پەیوەندییە هزرییەدا بووە، کە زانا کوردەکەی حیجازی بە ناوچەکانی تر، وەک نیمچە دورگەی هیندی و باکووری ئەفریقیا و ناوچەکانی ژێردەستی ئیمپراتۆرییەتی عوسمانی، گرێدابوو. بەو مێتۆدە توانیویەتی کاراییی حیجاز لە پانتایییە گشتییەکەدا ڕوون بکاتەوە، بەچەشنێک چیتر وەک ناوچەیەکی پەراوێزخراو نەبینرێ، بەڵکوو وەک سەنتەرێکی گرنگی کەلامناسی و هزری فەلسەفی چاوی لێ بکرێ. لەوێشدا ئەوە گۆرانی بووە، کە سەنتەری بەرهەمهێنانی زانستەکان بووە.  

دەزگای فێرکاری و تۆڕە هزرییەکان

 بەشی بنەڕەتی کتێبەکە بۆ دۆزینەوەی ژێرخانی پەروەردەییی حیجاز تەرخان کراوە، کە لەم قۆناغەدا قوتابخانەی ئایینی، کتێبخانە، ڕیبات و گۆشەی سۆفییانەی لەخۆ گرتبوو. ئەم دەزگایانە ڕۆڵێکی گرنگیان لە پاڵپشتیی زانا و شاگردەکانیان و ئاسانی گواستنەوەی زانین لە جیهانی ئیسلامیدا هەبووە. لێرەوە کارەکەی ضمیریە وردەکاری زۆر لەبارەی چۆنیەتیی خوێندنی زانستە عەقڵییەکان و دەقە فەلسەفییەکان لەخۆ گرتووە. کتێبەکەی ئەوە دەریدەخات، کە چۆن زانایەکی وەک گۆرانی بە تۆڕێک لە پەیوەندیی زانستییانە بە قووڵی بە دەوروبەری خۆیدا گرێدرابوو. ئەوەی چنینی ئەو تۆڕەشی سانا کردووە حەج بوو، کە کەناڵێکی گرنگی ئاڵوگۆڕی بیروڕا و دەقە لەبەرگیراوەکان بووە. هەر ئەمەش هۆکاری هەرە بنەڕەتی بووە لەوەی سەنتەرێتیی پانتایییە جوگرافییەکە و زانا هەرەدیارەکەی، لە بواری هزریی فەلسەفی و کەلامناسی، بەردەوام بێت.

دەزگا فێرکارییەکانی ئەوێ، کە لەژێر کاریگەریی گۆرانی و شاگردە کوردەکانی بوون، تەنیا بەخوێندنی زانستە شەرعییەکان نەوەستابوون، بەڵکوو ببوونە بنکەی خوێندنی کەلام و زانستە عەقڵییەکانیش. ضمیریە بە چاودێریکردنی ڕەوشی ئەم دەزگایانە، بە تایبەت مەدرەسەکان، بۆی دەرکەوتووە، بە جەختکردنەوە لەسەر ئەزبەرکردن و گواستنەوەی زارەکی و بەکارهێنانی ئیسنادەوە، زانستەکانیان خوێندووە و دەوریان کردۆتەوە. لەگەڵیشیدا ڕاستی و دروستی ناوەڕۆکی دەقەکانیان سەلماندوە. بە هەمان شێوە نووسەر لە ڕۆڵی گرنگی کتێبخانەکانی حیجاز، لەم پڕۆسێسی فێرکاری و ژیانە هزرییەدا دواوە. کتێبخانەکان سەر بە مەدرەسە و ڕیباتەکان بوون، خەزێنەی گرنگی زانستی بوون، کە ژمارەیەکی زۆری دەقە بنەڕەتییەکانی فیقهناسی، کەلامناسی، تەسەوف و زانستە عەقڵییەکانیان لەخۆ گرتبوو. هەبوونی ئەم دەقانەش زۆر گرنگ بوون بۆ زانای وەک ئیبراهمی گۆرانی؛ پشتی پێ بەستوون، بۆ خوێندنەوەی ڕەوتە هزرییەکانی پێشین و هی سەردەمەکەی.

نووسەر لە لێکۆڵینەوەی ئەم پاشخانە فێرکارییە، ویستویەتی سەرچاوەکانی هزرینی زاناکان، لە سەرووی هەموویانەوە ئیبراهیمی گۆرانی، هەروەها پەیوەندیگرێدانیان بە بەردەنگەکانیان و چۆنیەتیی گواستنەوەی زانین بۆ فێرخوازانیان، بخاتە ڕوو. ئەمەش بۆ سەلماندنی هەم زیندوێتیی پانتایییە جوگرافیییەکە لە بواری هزریدا، هەمیش پیشاندانی چۆنیەتیی گەڵاڵەبوونی ئەو گوتارە هەمەگیرەی زانایەکی وەک ئیبراهیم کاری لەسەر داڕشتنی جومگەکانی کردبوو.

بەرگری هزرییانەی گۆرانی لە ”یەکێتیی بوون – وحدة الوجود”

خاڵێکی بەهێزی کتێبەکەی ضمیریە لێکۆڵینەوەی وردیەتی لە بەشدارییە هزرییەکانی گۆرانی، بەتایبەت هەوڵەکانی بۆ کۆکردنەوەی نەریتە هزرییە جیاوازەکان لەیەک بۆتەی گشتگیردا. نووسەر ڕوونی کردۆتەوە، ڕیشەی کەلامناسی و تێگەیشتنی سۆفییانەی گۆرانی دەگەڕایەوە بۆ هزری موحیەدین ئیبن عەرەبی. بێ ئەوەی ئەمە بەو مانایە بێت ئەم زانایە تەنیا لە چوارچێوەی تێگەیشتن و چەمکەکانی نێو ئەو هزرەدا مابێتەوە. خۆ لە بەرهەمەکانی دەبینرێت، تەواو سەرقاڵی زانستە عەقڵییەکان و نەریتی کەلامناسیی فەلسەفی سەردەمانی پێشین بووە. و ویستوویەتی وەک سیستەمێکی هەمەکییانەی هزری سەرەدەریان لەگەڵدا بکات. ئەم ئاوێتە و کۆکردنەوەی دیسپلینە زانستییە جیاوازەکان، لەو دۆزە میتافیزیکی و خوداناسییانە دەردەکەوێ، کە گفتوگۆی لەبارەوە کردوون، وەک بۆ نموونە: ”بوون – الوجود”، سیفەتەکانی خودا، قەدەر و پەیوەندیی نێوان خالق و مەخلوق…تادوایی.

وەک گوتمان ضمیریە لە گەڕانی بەدوای هزرە میتافیزیکی و گەردوونناسییەکانی گۆرانیدا، جەختی لەسەر پەیوەندیی قووڵی زاناکە لەگەڵ تێزەکانی ئیبن عەرەبیدا دەکاتەوە. بۆی دەرکەوتووە شرۆڤەی گۆرانی بۆ ”بوون” و ڕوانگە فەلسەفییەکان لەبارەی ئەم چەمکە و چەمکە تیۆلۆژییەکانی تری وەک کڕۆک، ئەفرین و سیفەتە خودایییەکان، هەم زۆر قووڵن و هەمیش ئاڵۆز لە تێگەیشتندا. بە کورتی گۆرانی سیستەمێکی تۆکمەی هزری داڕشتووە، تێیدا عیرفانیی سۆفییانەی تێکەڵ بە گوتاری تیۆلۆژییانەی عەقڵانی کردووە. لێرەوە کاریگەرییەکانی ئیبن عەرەبی ڕوونتر دەردەکەون، بەتایبەت لە داڕشتنی ماناکانی چەمکی ”بوون”دا. شرۆڤەی گۆرانی بۆ چەمکەکە ئەوەیە، کە لەخۆیدا جەخت لەسەر ”یەکێتی” دەکاتەوە؛ ئەو بوونەوەرەکان وەک جیلوەی خودایی دەبینێت. لەگەڵیشیدا ڕوونی کردۆتەوە، کە کرۆکی خودا هەر بە جیاوازی و باڵایی دەمێنێتەوە. ئەمەش خاڵێکی سەرەکیی تێزی داکۆکی کردنیەتی لە یەکێتیی بوون. لێرە ضمیریە ئاماژەی بە چۆنیەتیی بەکارهێنانی چەمکی بوون لەلایەن گۆرانی دەدات، لە پێناو گەیشتن بەو سیستەمە خوداناسییەی تێکەڵییە عیرفانی و عەقڵانییەکە فەراهەم دەکات.

داکۆکیی گۆرانی لەم چەمکە ئاڵۆزە، بە دیارترین بەشداریی هزرییانەی ئەو دادەنرێت. ئەمەش پتر بەرگری بووە لە بنەمایەکی پەیوەست بە گەورە سۆفییەکەی ئەندەلوس، کە گریمانەی ئەوە دەکات هەر بوونێک دەرکەوتنێکی تاکە حەقیقەتی ڕەهای خودایە. داکۆکییەکەی گۆرانی دووبارەکردنەوەی ئارگیومێنتەکانی پێشوو نەبووە، لەبارەی چەمکەکە و ماناکانی. بەڵکوو هەوڵێکی ئاڵۆزی خۆی بووە، بۆ ئاشتکردنەوەی ئەم چەمکە میتافیزیکییە عیرفانییە، بە خوداناسیی ئۆرسۆدۆکسییانەی ئیسلامی. بۆ ئەوەی بابەتەکە ڕوونتر ببێتەوە، دەگەڕێینەوە بۆ توێژینەوەیەکی ئەلیکزەندەر کینیش[6] لەبارەی ئیبراهیمی گۆرانی وەک بەرگریکارێک لە وەحدەتی وجود. ئەو لە وتارەکەیدا بە وردی باس لەوە دەکات چۆن گۆرانی هەوڵی داوە ڕوونی بکاتەوە، کە لە کاتێکدا هەموو مەخلوقەکان دەرکەوتنی بوونی خودان، بەڵام جیاوازییەکی ڕوون لە نێوان خالق و مەخلوقدا هەر دەمێنێتەوە. ئەم جیاکارییەش زۆر گرنگە بۆ پاراستنی پاکێتیی تیۆلۆژییانەی یەکتاپەرستیی ئیسلامی، بێ ئەوەی لەخۆگرتنی تێڕوانینە عیرفانییەکە جێکەوتەی خراپی بەسەر ئەم پاکێتییەوە هەبێت.

لەلای خۆیەوە، ضمیریە ویستویەتی ئەو تێگەیشتنە میتافیزیکییەی گۆرانی ڕوونتر بکاتەوە. هاتووە دەریخستووە زانا کوردەکە هەوڵی داوە گونجانێک لەنێوان هزری عیرفانیی ئیبن عەرەبی و تیۆلۆژیای ئیسلامی بدۆزێتەوە، بەتایبەت لە تێگەشتن بۆ ئەم چەمکە ئاڵۆزە. تێگەیشتنی ئەو بۆ بوون لەوە سەرچاوەی گرتووە خودا، وەک تاکە هەبووی ڕاستەقینە، دەتوانێت بە هەر شێوەیەک بێت خۆی دەربخات، بەبێ ئەوەی بەم دەرکەوتنانە سنووردار ببێت. بێگومان ئەو بەم ڕێبازەی، بەرەنگاری هەموو تێگەیشتنە تیۆلۆژی و فەلسەفییەکانی سەردەمەکەی کردووە، بەتایبەتیش لە مەسەلەی پەیوەست بە لێکدانەوەی (هێرمینۆتیکییانە)ی سیفەتەکانی خودا.

بەرگری گۆرانی لە ”یەکێتیی بوون” لەو سەردەم و شوێنەدا گرنگیی خۆی هەبووە. لە زەمینەیەکی ئایینی – هزریی ئەوتۆدا، کە زاناگەلی دیار ڕەخنەی توندیان لێ گرتبوو، بەتایبەت ئیبن تەیمیە. ڕەخنەگران پێیان وابوو ئەم بنەمایە، هێڵی جیاکەرەوەی نێوان خالق و مەخلوق کاڵ دەکاتەوە، ئەمەش هۆکارە بۆ هەرتەقە(بیدعە)، هەڵگەڕانەوە و دەڕچوون لە دین. ئیبن تەیمیە و شوێنکەوتووانی پێیان وابوو یەکێتیی بوون، جیاکاریی بنەڕەتیی نێوان ئەوەی خودایییە و ئەوەیش کە پەیوەستە بە ئەفرێنراوەکانی تێکداوە و بەشێوەیەکی کاریگەر ئەم دووانەی هاوئاست کردووە[7]. ئەوان دەیانگوت بنەما و بیرۆکەیەکی ئاوا دەرگای بەڕووی ئەنتینۆمیزمدا کردۆتەوە، بەچەشنێک دەشێ لەژێر پەردەی یەکگرتنی عیرفانییانە لەگەڵ خودایەتیدا، فەرمانە ڕەوشتی و بنەما بەهاییەکانی ئیسلام پشتگوێ بخرێن.

لە وەڵامی ئەم ڕەخنانە، گۆرانی ئارگومێنتێکی وردی پەرە پێداوە؛ هەوڵی داوە لە یەک کاتدا هەم بنەما سەرەکییەکانی یەکتاپەرستیی ئیسلامی بپارێزێت، هەمیش بەرگری لە ڕەوایەتی میتافیزیکای عیرفانییانە بکات. زاناکە جەختی لەوە کردۆتەوە، کە ئەگەر هەموو بوونەوەرەکان ئاماژەن بۆ دەرکەوتنی بوونی خودا، بەڵام هیچیان هاوبەش نین لە کرۆکە خودایییەکە. کڕۆکی خودایی، وەک ئەو دەیگوت، ناوازە و زاڵە و ناشێ هاوتا بکرێت لەگەڵ هەبوونی هەنووکەیییانەی بوونەوەرە ئەفرێنراوەکان. ڕێبازی گۆرانی لەمەدا بریتی بوو لە جەختکردنەوە لەسەر جیاوازیی نێوان ”بوونی پێویستیی خودا – وجود واجب” و ”بوونی شیاو – وجود ممكن”ی ئەفرێنراوەکان. پێی وابوو لەبەرئەوەی ئەفرین ڕەنگدانەوەی خودایێتییە، بۆیە لە بنەڕەتدا جیاواز دەمێنێتەوە لە ئەفرێنراو.

لە شرۆڤەی ئەم بابەتەدا توێژەر هاوڕا بووە لەگەڵ کینیش، ئەگەر هاتۆتە سەر بەرگری ئیبراهیمی گۆرانی لەم چەمکە بنەڕەتییەی نێو سیستەمی هزریی ئیبن عەرەبی، تیشکی خستۆتە سەر مێتۆدی گۆرانی لە چارەسەرکردنی ئەو ئالەنگارییانەی بنەمای یەکێتیی بوون دەیوروژێنێت. گۆرانی وای بینیە بنەماکە بە ئاڕاستەی گەیشتن بە ئاکامی دژەدینانە نییە، بەڵکوو تێگەیشتنێکی قووڵترە لەبارەی پەیوەندیی نێوان خودا و مەخلوقەکانی؛ تێگەیشتنێکە جەخت لەسەر باڵاییی خودا دەکاتەوە، لەگەڵ داننان بە بەرجەستەی هەبوونی لە جیهاندا[8]. بەمەش بەرگرییەکەی گۆرانی وەک پڕۆژەیەکی پێشکەوتووی بواری خوداناسی خۆی دەنوێنێت، کە – وەک بینیمان – مەبەستی بووە دژیەکیی نێوان میتافیزیکای عیرفانییانە و بنەما چەسپیوەکانی نێو تیۆلۆژیای ئیسلامی نەهێڵێت.

لە کۆی ئەم پڕۆسێسی بیرکردنەوەیەدا، ئیبن عەرەبی بۆ ئیبراهیمی گۆرانی چوارچێوەیەک بووە بۆ تێڕامان و لێوردبوونەوە. هەرچی دەقەکانی ئەم  زانا کوردە بخوێنێتەوە بۆی دەردەکەوێت، کە ڕیشەی ئارگیومێنتە تیۆلۆژییەکانی بیرۆکەکانی ئیبن عەرەبی دان، تا ئەو ڕادەیەی کە ئیبن عەرەبی وەک ژێدەری سەرەکی باسە تیۆلۆژییەکانی گۆرانی وان. لەگەڵ ئەوەشدا، لە هەندێک بابەت لە مامۆستاکەی زێتر ڕۆچووە و شرۆڤەی وردی خۆی بۆ هەبووە. ضمیریە لە بەدواداچوونی بۆ تێگەیشتن و لێکدانەوەی گۆرانی لەبارەی سیفەتە خودایییەکان، قەدەر و ویستیی مرۆڤانە، تێبینی ئەم قووڵبوونەوەیەی گۆرانی کردووە. ئەو ڕایدەگەیەنێ بەشێکی ئارگیومێنتە تیۆلۆژییەکانی ڕەنگدانەوەی بەشدارییە ناوازەکانی خۆیین. ئەمەش بە تایبەتی لە سەرەدەریکردنی لەگەڵ خودا وەک ”بوونی ڕەها  – الوجود المطلق”دا دیارە، کە نووسەر وا ئاماژەی پێداوە لە گفتوگۆ میتافیزیکی و تیۆلۆژییەکانی گۆرانیدا وەک بابەتێکی ناوەندی دەردەکەون و ڕەنگدانەوەی ڕەوتە فیکرییە فراوانەکانی سەردەمەکەین.

هزری ئایینی و سۆفییانەی تری ئیبراهیمی گۆرانی

ضمیریە لە کتێبەکەیدا، هەر بەوە نەوەستاوە بەشداریی گۆرانی لە بابەتێکی هەستیاری وەک یەکێتیی بوون ڕوون بکاتەوە، بەڵکوو بەدوای بابەتگەلی هزریی تریشدا بووە، کە بەشێک بوونە لە کۆی سیستەمی بیرکردنەوەی ئەم زانایە. بەتایبەت ئەو بابەتانەی ئازادیی هزریی ئەو و ڕێبازە ڕیفۆرمیستەکەی نیشان دەدەن. گۆرانی دەستی بۆ زۆر لەو پرسانە بردووە، کە لە کولتووری ئیسلامیدا مشتومڕی زۆریان لەبارەوە کرابوو و دەکرا. لەوانەش پرسی ”ئیمانی فیرعەون” و چەمکگەلی وەک ”فەنابوونی ئاگر” و ”ڕەسەنایەتیی ئایەتە شەیتانییەکان” و پەسنی ”حەقیقەتی کەعبە” بەسەر ”حەقیقەتی موحەممەدی”. لێکۆڵینەوەی ئەم پرس و باسانە ئامادەییی گۆرانی نیشان دەدەن، بۆ بەشداریکردنی کارایانە لەو گفتوگۆ و مشتومڕانەی لە سەردەمەکەیدا باو بوون و هەندێکجاریش تەحەدای بیروبۆچوونە زانستییە – ئایینییە باوەکانی کردووە. لەوانەش بۆچوونی هەردوو بەرەی ئەشعەرییەکان و حەنبەلییەکان. نووسەری کتێبەکە ویستویەتی بە وردی لە مێتۆدی هزرینی گۆرانی بگات، کاتێک هاتووە، بە پاباندییەکی تۆکمەی هزری و ڕێبازێکی نێوەندگیرییانەوە، سەرەدەری لەگەڵ هەریەک لەم پرسانەدا کردووە. ئەمەش بە بۆچوونی نووسەر تەواوکەر و ڕەنگدانەوەی کۆی پڕۆژە هزرییەکەیەتی؛ ئەگەر ویستوویەتی نەریتە جیاجیاکانی هزری ئیسلامی لەبەریەک دابنێت و چەمک و دەستەواژەکانیان ئاوێتەی یەکتر بکات و وەک سیستەمێکی تەواو تەماشای بکات، لەگەڵیشیدا دڵسۆز بووە بۆ بنەما بنەڕەتییەکانی تیۆلۆژیای ئیسلامی.

ئەم چوارچێوە میتۆدییەی کاری ئیبراهیمی گۆرانی لە بابەتێکی گرنگی وەک ”کەلامی خودایی” و شرۆڤەی بۆ مشتومڕەکان لەسەر ئەم چەمکە، بە ڕوونی دیارە. وەک دەزانین، ئەمە پرسێکی هەرە سەرەکیی نێو خوداناسیی ئیسلامییە، کە کاریگەریی بەرچاوی بەسەر تێگەیشتن لە خەسڵەت و سیفەتە خودایییەکان و سروشتی وەحی هەبووە. ڕێبازی گۆرانی لە خوێندنەوەی ئەم پرسە، دیسان هەر ناوەندگیرانە بووە؛ هاوسەنگی لەنێوان بۆچوونی قوتابخانە جیاوازەکانی لا مەبەست بووە، بەتایبەتی لەنێوان ئەشعەرییەکان، کە خۆی سەربەوان بووە و حەنبەلییەکان، کە لە زەمینەی حیجازیدا بەهێز بوون. توانای گۆرانی لە ئاشتکردنەوەی ئەم ڕەوتە جیاواز و دژیەکانە، وەک ضمیریە ئاماژەی پێداوە، ئاماژەیە بۆ تۆکمەییی سیستەمە هزرییەکەی و ڕوانگە هەمەگیرەکەی بۆ پرسە تیۆلۆژی و فەلسەفییەکان، کە تێیدا دۆزینەوەی خاڵی هاوبەش و تێزی چوونیەکی لەلادا گرنگتر بووە لە دژیەکبوون و دوورکەوتنەوە لە یەکتر.

ڕیفۆرم و بوژاندنەوەی سۆفیزم

ئاوەرتەبوونی ئیبراهیمی گۆرانی لە تێگەیشتنی باوی سەردەمەکەی، زیاتر لە بواری تەسەوفدا بووە، کە ڕەهەندێکی گرنگی میراتە هزرییەکەی ئەوی پێک دەهێنا. ضمیرییە تێبینی ئەوەی کردوە نوسینەکانی گۆرانی لەبارەی ڕەوشت و نەریتی سۆفییانە، ڕەگ و ڕیشەی لەنێو بنەما فێرکارییەکانی دەستەی یەکەمی سۆفییاندا هەبووە. بەڵام ڕەنگدانەوەی ڕێبازی ئەویش بوون لە سەرەدەری لەگەڵ ئەم پرسە گرنگانە. بەپێی ضمیریه خەسڵەتێکی هزرییانەی ئەو لەم ڕووەدا، پابەندی توند بووە بە بنەما ڕەفتارییە نەریتییەکان و لەخۆگرتنی نۆڕمە هەرە باڵاکانی سۆفیبوون، لەگەڵ تێکەڵبوونی بەرفرە بە ڕەهەندە میتافیزیکییەکانی هزری عیرفانی. بەمەش خۆی لە خەوش و خاڵی تەسەوفی سەردەمەکەی بەدوور گرتووە و ویستویەتی بیخاتەوە سەر ئەو ڕێبازە بنەڕەتییەی گەورە سۆفییانی پێشوو لەسەری بوون. مەیلی گۆرانی بۆ ڕەهەندە ڕەوشتییەکانی تەسەوف، وەڵامدانەوەیەکی ئەو بووە بۆ زێدەبوونی دەرچوون و لەڕێلادان لەنێو سیستەمی کولتووری سۆفیایەتیدا. گۆرانی ئەم دەرچوونەی بە مەترسی بۆ سەر بنەما ڕەوشتی و ڕەفتارییەکانی کۆی جڤاکی ئیسلامی بینیە. بۆیە ئاوا لە چەندین بەرهەمیدا هەڵوەستەی لەسەر کردوە و ڕەخنەی توندی لێ گرتوە.

تایبەتمەندبوونی بۆچوونەکانی ئیبراهیمی گۆرانی بەو مانایە دێت، ئەو ڕیفۆرمیستانە تەماشای تەسەوف ئیسلامی کردوە. بۆیە دەشێ بەیەکێک لەوانە ئەژمار بکرێ، کە لە ژێر چەمکی ”سۆفییزمی نوێ”دا کۆ دەکرێنەوە. مێژوونووس بەشیر نافع، لە بەدواداچوونی بۆ ئەم چەمکە، دەریخستووە، کە ئاڕاستەیەکی ڕیفۆرمخوازانەی نێو تەسەوف بووە، لە کۆتایییەکانی سەدەی هەژدە زێتر شێوەگیر بووە[9]. کەسانی نێو ئەم ئاڕاستەیە هەوڵیانداوە بگەڕێنەوە بۆ سەرچاوە یەکەمینەکانی تەسەوف و هەوڵ بدەن نەریتە زوڵاڵەکانی ببیننەوە. ئەمەش پتر وەک پەرچەکردارێک بووە دژ بەو فۆڕمە تەریقەتییانەی تەسەوف، کە بە تێگەشتنی ئەم کەسانە چەندین نەریت و ڕێوڕەسمی نەشیاوی تێدا جێگیر کرابوو. یەکێک لەو زانایانەی ڕەوتە نوێیەکە دەیتوانی بۆی بگەڕێتەوە و پشت بە تێزەکانی ببەستێ، گۆرانی بوو، کە لەدوای خۆی کاریگەری و هەژموونی بەسەر کۆی هزری ئیسلامی لەگەرمەی دابووە. ڕۆڵی گۆرانی لەم ناوکۆیەدا گرنگ بوو؛ بنەما هزرییەکانی ئەو بناغەیە بوون، کە ڕیفۆرمخوازەکان دەیانتوانی تەلاری ڕەخنەییانەی خۆیانی لەسەر بونیاد بنێن. سەرباری ئەوەی دواتر، ڕەوتە توندگەراکەی محەمەدی کوڕی عەبدولوەهاب لە حیجاز جێکەوتەی دوورمەودای دەبێ، بەڵام ئەو ژینگە هزرییەی زانایەکی وەک گۆرانی و مورید و شاگردە کورد وغەیەرە کوردەکانی ڕەخساندبوویان، بەشدارییەکی فراوانتری لە گەڵاڵەکردنی ڕەوتی چاکسازیی ئیسلامیدا کردووە. بەتایبەت پڕۆسێسی گونجاندن و ئاوێتەکردنەکە، کە بووەتە ئەو چوارچێوەیەی ڕیفۆرمیستانی دواتر بەهۆیەوە توانیویانە سەرەدەری دروست لەگەڵ تەسەوفدا بکەن، نەک بەتەواوی ڕەتی بکەنەوە، وەک وەهابیەت وای کرد. بەڵکوو ئەوانیش هەوڵیانداوە لەخۆی بگرن، بە چەشنێک لەگەڵ ئامانجە دوورمەوداکانیان لە چاکسازییەکە بگونجێت.

دەشێ کاریگەرییەکانی گۆرانی، لەم ڕووەدا، لە چۆنیەتیی سەرەدەری ڕیفۆرمخوازان لەگەڵ ڕەفتار و نەریتی سۆفییانەدا ببینین. ئەوان هەوڵیانداوە ئەو ڕەفتارانە بپاڵێون و لە خەوشی تەریقەتییانەی پاک بکەنەوە. ئەمەش، هاوشێوەی گۆرانی، لەمیانەی جەختکردنەوەیان بووە لەسەر ڕەهەندە ئەخلاقی و مینۆکییەکانی سۆفیزم. هەروەها سەرەدەریکردن لەگەڵ لایەن میتافیزیکییەکانی هزرەکە. لێرەدا، بەرگرییەکەی گۆرانی لە چەمکی یەکێتیی بوون، بناغەیەکی گرنگی تیۆلۆژییانە بووە، بۆ هەریەکێک ویستبێتی میتافیزیکای سۆفییانە تێکەڵ بە ئامانجە هەمەگیر و بەرفراوانەکانی ڕیفۆرمدا بکەن.

دۆزینەوەی جێکەوتەکانی هزریی گۆرانی، بەسەر ڕیفۆرمخوازان، لە سەدەی هەژدە و نۆزدە تا سەرەتای سەدەی بیست، پێویستی بە توێژینەوەی وردە. بابەتەکە هەر لە چوارچێوەی سوودوەرگرتنی لە ڕێبازە ئاوێتەییەکەی نەوەستاوە. بەتایبەت، کە کۆی سیستەمە هزرییەکەی لەبەردەستدا بووە و لەبار بووە بۆ لەخۆگرتن. ڕەنگە دۆزینەوەی پەیوەندیی ڕیفۆرمخوازان بە هزری تەسەوف بەشێکی زۆری ئەو جێکەوتانەمان نیشان دا، لە بابەتێک کە تا ئێستا لە گوتاری ئیسلامیدا مشتومری زۆی لەبارەوە دەکرێ.، ئەویش پەیوەندیی نێوان تەسەوف و ڕیفۆڕمە لە هزری ئایینیدا.

بەرهەمەکانی گۆرانی: میراتێکی بەبڕشت

گۆرانی نووسەرێکی بە بەرهەم بووە. بەلای کەمی سەد تێکست بۆ ئەو دەگێڕدرێتەوە، کە زۆربەیان هێشتا دەستنووسن، لە سەرانسەری کتێبخانە جیهانییەکاندا ماونەتەوە. ضمیریه ئەم بەرهەمانەی کەتەلۆگ کردووە و بۆ سێ جۆر پۆلێنی کردوون: ئەوانەی خۆی لێکۆڵینەوەی لەبارەوە کردوون، ئەوانەی لە کەتەلۆگەکاندا ڕیزکراون بەڵام دەستی پێنەگەیشتوون، لەگەڵ  ئەوانەی بە هەڵە دەدرێنە پاڵ گۆرانی. پشکنین و شرۆڤەکردنی هەشتا و شەش لەو بەرهەمانە، فراوانیی هەوڵە فیکرییەکانی ئەم توێژەرە دەردەخات. لەمەشدا ویستوویەتی بەسەر زۆربەی ئەو بوارە زانستییانە ڕابگات، کە گۆرانی تێیاندا مامۆستا بووە، ئەوانیش بریتین لە تیۆلۆژیا، تەسەوف، فەلسەفە، سەرف و نەحو، فەرموودە و فیقهی ئیسلامی.

ئەوەی لە شرۆڤەی توێژەرەکە دەردەکەوێت و سەرنجی ڕاکێشاوە، توانای گۆرانی بووە لەوەی – وەک بینیمان – بوارە زانستییە جیاجیاکان ئاوێتەی یەکتر بکات. ئەو تەنانەت ئەگەر باسی پرسە فیقهییەکان یان زمانەوانییەکانی کردبێت، هەر بە خەمە تیۆلۆژییەکانی خۆی، وەک تێزی بنەڕەتی نێو سیستەمە هزرییەکەی، بەستۆتەوە. ئەمەش نەک هەر تۆکمەییی ئەو سیستەمەمان نیشان دەدا کە بونیادی نابوو، بەڵکوو پابەندیشی بە دەرخستنی هاڕمۆنیای نێوان زانستە عەقڵانی و زانستە نەقڵییە نەریتییەکان، دەردەخات. بەمەش، بەرهەمەکانی لە پەنجەرەیەک دەچن، دەڕواننە سەر ڕەوتی فراوانتری هزری، کە لە دەمی ئەودا باو بوون، بەتایبەتیش ئەوەی پێشتر ئاماژەمان پێدا: دۆزینەوەی هێڵە یەکتربڕەکانی نێوان هزریی عیرفانی و زانستە عەقڵییەکانی نێو سیستەمە هزرییە ئیسلامییەکە.

ضمیریە، گرنگی بەرهەمەکانی گۆرانی، هەر لە کرۆکی بابەتەکاندا چڕ نەکردۆتەوە. بەڵکوو لە دابینکردنی تێگەیشتنێکی گشتگیریش سەبارەت بە  ڕەوشی هزریی جیهانی ئیسلامی لە ماوەی سەدەی حەڤدەدا، سەرەدەری لەگەڵدا کردوون. ئەو وایدەبینێ بەرهەمەکان و هۆکاری پشت نووسینیان و ئەو گوتارە هەمەگیرەی دەریدەبڕن، ڕەنگدانەوەی ئەو مشتومڕ و گفتوگۆ جۆراوجۆرانەن، کە لە ناوچەکەدا دەکران، هەر لەبارەی میتافیزیکای سۆفییانەوە بگرە تا فەلسەفەی عەقڵانی ئیسلامییانە. ئەوە تەنیا ناوەڕۆکی بەرهەمەکان نەبووە سەرنجڕاکێش و ڕچەشکێن بوون، بەڵکوو میتۆدی کارکردنی گۆرانیش تایبەتمەندیی خۆی هەبووە. میتۆدێکی ئەوتۆ، کە بواری بە ئیبراهیم داوە چاودێری چۆنیەتیی گواستنەوەی زانین بەنێو ناوچە و سیستەمی کولتووریی فرەچەشنەوە بکات. لەگەڵیشیدا پارێزگاریکردن لە بەردەوامێتیی نەریتە هزرییە ئیسلامییەکان، تەنانەت بەوانەش کە بڤە بوون و تەکفیر کرابوون و دەکران. ئەمە سەرباری جەختکردنەوە لەسەر ئەو ڕێبازەی بەهۆیەوە ئەم نەریتانە لە چوارچێوەی جیاوازدا گونجێنراون و گۆڕانیان بەسەردا هاتووە.

نەریتی هزریی ئیبراهیمی گۆرانی و جێکەوتەکانی

ناوەندگیریی زاناکەی شارەزوور لەنێوان نەریتی عیرفانیی ئیسلامی و زانستە عەقڵییەکان، بەتایبەت لە نزیکخستنەوەی تێز و نەهێشتنی دژیەکییەکانی نێو هزری ئیبن عەرەبی، هۆکاربوون بۆ ئەوەی ببێتە سەرچاوەیەکی باوەڕپێکراو و لەدوای خۆی ڕیزێک بخاتە سەر دیواری مێژووی هزری ئیسلامی. بەر لە ضمیریە، ئەیکزاندەر کینیش تێبینی ئەوەی کردوە چارەسەری گۆرانی بۆ ئەم دژیەکییەکان، لە میانەی جەختکردنەوە لەسەر تێگەیشتنێکی فرەچین بۆ جیلوەی زاتی خودایی، ڕێگەی بەوەداوە تێزەکانی لەنێو شرۆڤە جیاوازەکان بۆ چەمکی ”یەکێتیی بوون” جێگەیان ببێتەوە، نەک هەر ئەمە، بەڵکوو چەمکەکە بخاتە نێو چوارچێوەیەکی گەورەترەوە[10]. بەمەش نەک هەر ڕەوایەتی بە میتافیزیکای عیرفانی لەنێو نەریتیی ئیسلامی بەخشی، بەڵکو چوارچێوەیەکی بۆ تێگەیشتن لە فرەچەشنی هزری تەسەوفی ئیسلامی دابین کرد. بەشیر نافع بەدواداچوونی بۆ جێکەوتەی ئەم مێتۆدی کارکردنەوەی گۆرانی لە حیجاز کردووە و تیشکی خستۆتە سەر ڕۆڵی ئەم زانایەی شارەزوور لە بوژانەوەی هزری ناوچەکە، بەتایبەت نزیکخستنەوەی تەصەوف و کەلامناسی ئیسلامی. بەچەشنێک، ئەوەی گۆرانی کردوویەتی دەنگدانەوەی لە زۆربەی قوتابخانە وبنکە زانستییەکانی ئەوێ هەبووە.

بەڵام خۆ، وەک لە سەرەتادا ئاماژەمان پێدا، حیجاز بەسەر ناوچەکانی تری جیهانی ئیسلامیدا کراوە بوو و ضمیرییەش ئەوەی سەلماند، کە سەنتەرێکی گرنگی بەرهەمهێنانی هزری ئیسلامی ئەو سەردەمە بوو، کە گۆرانی تێدا ژیاوە. بۆیە چاوەڕێی ئەوە دەکرێ، هزر و بۆچوونەکانی هزرڤانێکی بە بڕشت لە بەرهەمی فرەچەشن سنوورەکانی ئەم دەڤەرە ببەزێنن و بگوازرێنەوە زۆربەی ئەو بنکە زانستییانەی کاراکانی نێویان پەیوندییان بە حیجازەوە هەبووە. لێرەوە یەکێک لە لایەنە سەرەکییەکانی میراتی فیکری گۆرانی، جێکەوتەکانیەتی بەسەر نەوەکانی دواتر لە زانایان. بەتایبەت دوای ئەوەی، لەلایەن شاگردەکانیەوە، بنەماکانی هزرەکەی بۆ ناوچەی جیاجیای جیهانی ئیسلامی گوازرانەوە و بەشداربوون لە فۆرمەلەکردنی گوتاری عیرفانییانە و تیۆلۆژییانە هەبووە. کوردناسی هەرە دیار مارتین ڤان بڕۆینیەسن، لە چەند توێژینەوەیەکیدا، دیڤچوونی بۆ ئەم بابەتە کردووە. بۆی دەرکەوتووە لە باشووری ڕۆژهەڵاتی ئاسیا، بیروبۆچوونەکانی ڕۆڵی سەرەکییان هەبوو لە پەرەپێدانی نەریتە سۆفییە خۆجێییەکان، چونکە فێرخوازەکانی، ئەگەر گەڕانەوە ماڵباتی خۆیان، تێزەکانی مامۆستاکەیان لەگەڵ ناوکۆی کولتووری و فیکری ناوچەکەدا گونجاندووە[11]. کاریگەرییەکانی ئیبراهیمی گۆرانی لە هیندستان زێتر دەرکەوتووە، بەتایبەت بەسەر دەستەی ئەو زانایانەی لە دەرباری شاکانی مەغۆلدا بوون. بەرگری ئەو لە یەکێتیی بوون و بوژاندنەوەی تێزەکانی ئیبن عەرەبی، بەردەنگی زۆریان لەوێدا هەبوو. بەتایبەت لەنێو ئەوانەی سەرگەرمی کۆکردنەوە و خستنەبەریەکی نەریتە فەلسەفییە ئیسلامی و خۆجێییەکان بوون.

کاریگەریی بیروڕاکانی گۆرانی هەر لە سنووری جیهانی ئیسلامی نەماوەتەوە. بەڵکوو زوو بەرهەمەکانی لەلایەن زانایانی ئەوروپیش ناسران، کە لە کاتی پەیوەندیگرێدانیان بە زانایانی موسڵمان و سەرقاڵ بوون بە وەرگێڕانی دەقە ئیسلامییەکانەوە، ئەم زانایەی شارەزووریان ناسیوە. پێشوازیکردن لە بیروڕاکانی گۆرانی لە ڕۆژئاوا بەمانای بەجیهانیبوونی میراتە هزرییەکەی دێت، لەگەڵ گرنگی بەشدارییەکانی، لە مێژووی فراوانتری هزری ئیسلامیدا.

بەهای زانستیی نووسینەکەی ضميريه

ئەوەی کتێبەکەی ضمیریه بخوێنێتەوە لەوە تێدەگات، بەشێوەیەکی ڕەخنەگرانە سەرەدەری لەگەڵ گێڕانەوە ڕۆژهەڵاتناسییە نەریتییە دەقگرتووەکان کردوە. ئەو گێڕانەوانەی هاتوون نەریتی هزری ئیسلامی، لەنێوان سەدەی شازدە بۆ نۆزدە، وەک قۆناغی ”داڕمان” و ”چەقبەستن” دەناسێنن، وەک ئەوەی تێیدا بەرهەم و کەسێتیی ئەوتۆ نەبووبن شایستەی لێکۆڵینەوە و ئاوڕلێدانەوە بن. ئەم گێڕانەوانەش بەڕوونی هەژموونی گەورە ڕۆژهەڵاتناسەکان و گوتارەکەیان، کە زێتر لە سەدەی نۆزدە گەڵاڵە ببوو، دەردەخات. ضمیریە لە کتێبەکەی دەخوازێت ئەم تێڕوانین و وێنا شێوەگیربووانە هەڵوەشێنێتەوە؛ لە ناوکۆی ئەکادیمییانەی ڕۆژئاوایییەوە جەخت لەسەر هەبوونی ڕەوت، ڕوانگە و گفتوگۆی قووڵی زانستی، لەم قۆناغە درەنگەی مێژووی پێش مۆدێرن، بکاتەوە.

کتێبەکەی ضمیریه ڕەخنەیەکی ڕاستەوخۆی ئەو گێڕانەوانەن، کە بەدەوری چەمکگەلی وەک ”کەوتن” و ”نەزانی”ی دەخولێنەوە، کە مێژووی قۆناغەکە، نەک هەر لە حیجاز بەڵکوو هی زۆربەی پانتاییی ئیسلامی، بەو فرەچەشنییەی هەیبووە، پێ وەسف دەکرێت.  توێژەرەکە، بە گرنگیدان بە ژیان و بەرهەمەکانی ئیبراهیمی گۆرانی، بەردەوامێتی و زیندووێتیی زانستە عەقڵانی و تیۆرییەکانی لە حیجاز، لە ماوەی سەدەی حەڤدەهەمدا، پیشان دەدات. دید و شیکارییەکانی گۆرانی لە چوارچێوەی نەریتێکی هزریی فراوانتردا دادەنێت تا ئەوە بخاتەڕوو، کە چۆن حیجاز سەرەڕای گۆڕانی ڕەوشە سیاسی و کولتوورییەکانی سەردەمەکان، وەک ناوەندێکی هزری دینامیکانە ماوەتەوە.

بێگومان کارەکەی ضمیرییە، کە لە زۆر ڕوودا ورد و زانستییە، بەڵام بواری تری پەیوەست بەم زانا کوردە هەن، پێویستیان بە کار و لێکۆڵینەوەی زیاترە. هەر لە چاپکردنی دەستنووسەکانی، کە ئەو پشتی پێ بەستوون و زۆرێکیان تا ئێستا بڵاو نەکراونەتەوە و پێوست دەکات زانستییانە لێیان بکۆڵرێتەوە و چاپ بکرێن، تا گرێدانەوەی زاناکە بە زەمینە خۆجێییەکەی خۆی و دۆزینەوەی ئەو ڕیشە مێژوویییانەی کەسێتییە زانستییە – ئایینییەکەی تێدا شێوەی گرتووە. سەرباری ئەمە، کتێبەکە وەک تازە گوتمان بەرەنگاری ئەو گێڕانەوە ڕۆژەهەڵاتناسییانەی پەیوەست بە داڕمانی هزری دەکات، بەڵام دەتوانێت سوود لە بەراوردێکی وردتر لەگەڵ بزوتنەوە هزرییە هاوچەرخەکانی دەرەوەی حیجازیش وەربگرێت، وەک ئەوانەی ئێرانی سەفەوی یان هیندستانی مەغۆلی یان تەنانەت گەشەسەندنە هزرییەکانی پانتایییە کوردییەکە، بەتایبەت هزری ئایینی – عیرفانییانە لە شێوەی بیروبۆچوونەکانی یارسان، خالیدییەی موجەدیدی…تادوایی. کاری بەراوردکارییانەی ئاوا دەشێ هەم ڕەسەنێتیی هزری گۆرانی و هەمیش چۆنیەتی برەوسەندنی ئەو چەمکانەی لێکی داونەتەوە، ڕوونتر بنوێنێ.

بێگومان گرنگیدانی گۆرانی و نواندنی وەک سەنتەری چالاکی هزریی پانتایییەکە ڕەوایەتی خۆی هەیە، بەڵام شیکارییەکی فراوانتر بۆ زاناکانی دیکەی حیجاز، لە هەمان سەردەم، جا چ کوردەکان بن لە گۆرانییەکانی دی بگرە تا بەرزنجیییەکان یانیش غەیرە کوردەکان، دەتوانێت وێنەیەکی گشتگیرتر لە ژیانی فیکری ناوچەکە بکێشێ. سەرەڕای ئەوەش، قووڵاییی شیکردنەوە و دەوڵەمەندیی سەرچاوە بەکارهێنراوەکان، ئەم کتێبە دەکاتە سەردەستەی توێژینەوە هاوچەرخەکان، لە بواری لێکۆڵینەوەی ئیسلامیدا. لە کتێبەکەدا ئەوە ڕوون دەبێتەوە، کە بەرهەمەکانی ئیبراهیمی گۆرانی سەرچاوەی دەوڵەمەندن و ئاسانکارییەکی زۆر دەکەن، بۆ تێگەیشتن لە ئاڵۆزییەکانی تیۆلۆژیای ئیسلامی و عیرفان و زانستە عەقڵییەکانی سەدەی حەڤدە.

هەرچەندە نووسینەکەی ضمیریە بەشدارییەکی گرنگە لە ناساندنی کەسێتی و هزری ئیبراهیمی گۆرانی، بەڵام ئەمە بە مانای ئەوە نییە خاڵی بێ لە ئاستەنگ و کێماسی. ڕەنگە دیارترینیان ئەوەبێ، وەک پێشتریش ئاماژەمان پێدا، ئەو پاشخانە کۆمەڵایەتی – ئایینییەی هزری ئیبراهیمی گۆرانی تێدا گەڵاڵە ببوو پشتگوێ خستووە. دیارە مەبەستمان زەمینە کوردییەکەی دروستبوونی زانایەکی ئاوایە، زەمینەیەک کە خودان سیستەمێکی هزرییانەی خۆی بووە و گۆرانی لە چەندین شوێنی بەرهەمەکانی بۆی گەڕاوەتەوە و گرنگییەکەی پیشانداوە. هەروەها فۆڕمێکی دیاریکراوی خوێندن و دەزگایەکی فێرکاری، ڕێگەی بە دەرکەوتنی کارەکتەری زانستی – ئایینی وەک گۆرانی داوە.  

ئەوەی لە کتێبەکە و توێژینەوەکانی تریش باسی لێ نەکراوە جێکەوتەی هزری زاناکەیە، بەسەر قەوم و وڵاتەکەی خۆیەوە، لە کاتێکدا هەندێک لە کتێبەکانی لەلایەن زانا و شاگردە کوردەکان لەبەر دەگیرانەوە و دەخوێنران[12]. ڕەنگە عوزرخواییی ئێمە بۆ توێژەر ئەوە بێت، کە بێئاگایە لە نەخشی هزریی کوردستان، بەتایبەت هی ئەو سەردەمەی ئیبراهیمی گۆرانی تێدا دەرکەوتووە؛ نە دەستنووسەکان و نە لێکۆڵینەوەی نوێی ئەوتۆی بەکارهێناوە، وەک چۆن هاوکاری بوونە لە بینینی نەخشی هزریی حیجاز، ئاواش هاوکاری بوونایە لە بینینی زەمینەی پێگەیشتنی ئیبراهیمی گۆرانی لە وڵاتی خۆیدا.

هەڵسەنگێنەرێکی بەرهەمەکە[13] وایدەبینێ، لە ڕووی ڕێکخستن و دابەشکردنی کتێبەکەوە، گرفت هەیە. پێیوایە سەرباری ناسینەوە و ناساندنی بەرهەمە زۆرەکانی گۆرانی، تێکەڵییەک دەبینرێت و ناتەبایی لە ناسینەوەی بەرهەمەکانی بەرچاو دەکەوێت. ئەمەش چەشنێک لە سەرلێشێواوی بۆ خوێنەر دروست دەکات. لەگەڵ ئەوەشدا، ناتەبایی لە پەیکەری کتێبەکە و نادروستی لە سەلماندنی ناو و ناوەڕۆکی هەندێک لە بەرهەمەکانی گۆرانی، کەموکوڕی وردیلەن، لەهەمبەر بەو توانایەی توێژەر لە پێشکەشکردنێکی تۆکمەی بابەتەکە نواندوویەتی. ئەم گرفتانە، لەڕاستیدا ڕەنگدانەوەی ئالەنگارییەکانی سەرەدەریکردنن لەگەڵ دەستنوسەکان و ئاڵۆزییەکانی نێو هزریی ئیبراهیم خۆی.

بەدەر لەمە، کتێبێکە بەشداریەکی پڕ بایەخە لە بواری خۆی، بەتایبەت لێکۆڵینەوە لە کەسێکی ڕچەشکێنی سەردەمەکەی، کە هزر و بیروبۆچوونەکانی مشتومڕی زۆر هەڵدەگرن، بەڵام کتێبەکە هاتووە وێنەیەکی گشتگیری خستۆتە بەر دیدی بەردەنگەکانی و شرۆڤەی قووڵ سەبارەت بە قۆناغێک، کە زۆرجار بە هەڵە تێیگەیشتووین، پێشکەش دەکات. بەچەشنێک باسەکانی ناو کتێبەکە دەروازەیەکی گرنگ بەسەر لێکۆڵینەوەی زیاتری بواری ژیانی هزری و کولتووریی جڤاکی ئیسلامی دەکەنەوە. بەتایبەت لە قۆناغی بەر لە دەرکەوتن و هەژموونی ئەو ڕەوتە توندڕەوانەی، تێز و بۆچوونەکانیان، لەو زەمینەیەی گۆرانی تێیدا کارابوو سەپاند. لە سەرووی هەمووشییانەوە ڕەوتی وەهابی.

دواجار!

ئیبراهیمی گۆرانی، نەک هەر هزرڤانی دیاری سەردەمەکەیەتی، بەڵکوو سەروەتێکی گرنگی هزریی سەروو زەمەنە و بیروبۆچوونەکانی وەرچەرخانێکی نێو هزری ئیسلامین، لە دوایین قۆناغی مێژووی کلاسیکیدا. بۆیە لە ئێستادا دەبینین، چەندین توێژەر، خۆیان بۆ لێکۆڵینەوە لە بەرهەم و تێزە هزرییەکانی، تەرخان کردوە. توێژەرانی وەک ضمیریه و چەندانی تر لە ڕۆژهەڵات و ڕۆژئاوا، بەدوای پیشاندان و دەرخستن و شرۆڤەی ڕۆڵی ئەون لە نەخشی هزری ئیسلامیدا.

مخابن لای ئێمە کەمتر گرنگی بە بەرهەمەکانی دراوە. بەڵام ئەمە بە مانای ئەوە نییە توێژەرمان نین، کاریان لەسەر نەکردبێت. دکتۆر عابد پشدەری، لە زانکۆی سلێمانی، یەکێکە لەو توێژەرانەی بەشی سەرەکی کارەکانی خۆی لێکۆڵینەوەن لەم زانایەی شارەزوور. توانیویەتی هەم دەستنوسی زۆر لە بەرهەمەکانی کۆ بکاتەوە، هەمیش – لە دوتوێی نامەیەکی دکتۆرا – لە بیروبۆچوونە کەلامییەکانی کۆڵیوەتەوە. لە ئێستادا خەریکی لێکدانەوە و ئامادەکردنی کۆی بەرهەمەکانیەتی بۆ چاپ. بەمەش بوارێک بۆ توێژەران دەڕەخسێت، تا بتوانن وردتر لە گوتاری هزرییانەی ئەم زانایە بکۆڵنەوە.

پەراوێزەکان

[1] ناونیشانی کتێبەکە بە ئینگلیزی ئاوایە:

Intellectual Life in the Ḥijāz before Wahhabism: Ibrāhīm al-Kūrānī’s Theology of Sufism.

[2] إبراهيم الشهرزوري الکوراني – حیاته وآثاره، ص ص٦-٢٢.

[3]  توێژەر زیمار خالد حامد، نامەیەکی ماستەری لەبارەی ڕۆڵی سیاسی و شارستانییانەی کورد لە وڵاتی حیجاز، لە سەدەی شەش بۆ نۆ نوسیوە، تێیدا دەردەکەوێت، لە زوویەکەوە زانا کوردەکان ڕویان کردۆتە ئەوێ و کاریگەریی قوڵیان بەسەر نەخشی هزریی ناوچەکە هەبووە. ئیبراهیمی گۆرانی، کە درەنگتر دەچێ، تەواوکەری ئەو مێژووەی کوردەکانە.

[4]  بۆ تێگەیشتن لە بەشداریی زانستی و ئایینی ئەم زانایانە، کتێبەکەی یاسین تەها محەمەد (٢٠٢٣) زانیاری گرنگی لەخۆگرتوە.

[5] Taṣawwuf and Reform in Pre-Modern Islamic Culture, P. 307

[6] Ibrāhīm al-Kūrānī (d. 1101/1690), an Apologist for waḥdat al-wujūd, P. 41.

[7] ئیبن تەیمییە لە فەتواکانی، هەروەها لە چەندین کتێبی خۆی وەک الصواعق المرسلة، درء تعارض العقل والنقل  و چەندانی تر هەڵوێستی توندی خۆی لەسەر ئەم چەمکە و کۆی هزری موحیەدین ئیبن عەرەبی دەربڕیوە.

[8] Knysh A. Ibid.

[9] Nafi, Ibid, P. 308.

[10] Knysh A. Ibid.

[11] Mullas, Sufis, and Heretics, 111-119.

[12] چاوخشاندنێکی خێرا بە بەرهەمەکانی شێخ محەمەد عەلی قەرەداغی لەبارەی دەستنوسی زانایانی کورد ئەم ئامادەییەی ئیبراهیمی گۆرانی بە ڕوونی دەردەخات. بۆ نموونە بڕوانە: کنوز الکرد في خزائن دار المخطوطات العراقية، ج٢، ص ص ٤٥٦-٤٦٣.

[13] Çelik, Şerife Nur. “Intellectual Life in the Ḥijāz before Wahhabism: Ibrāhīm Al-Kūrānī’s (d. 1101/1690) Theology of Sufism, p. 176.

سەرچاوەکان

کوردی

• حامد، زیمار خالد. ” کورد ل وەلاتێ حیجازێ د چەرخێن (٦-٩ مش/١٢-١٥ز)دا – ڤەکۆلینەک ل دۆر ڕۆڵێ وان یێ سیاسی و شارستانی”، نامەی ماستەر، زانکۆیا دهوک، (٢٠٢١).
• محەمەد، یاسین تەها. ناودارانی کورد لە دەستنوسخانەکانی عەرەبستان – ژیاننامە و ناسینی هەندێک لە دەستخەتەکان، سلێمانی: یەکەی دەستنووس و سامانی کولتوری زانکۆی گەشەپێدانی مرۆیی، ٢٠٢٣.

عەرەبی

• رؤوف، عماد عبد السلام. إبراهيم الشهرزوري الکوراني – حیاته وآثاره، اربیل: اصدارات الجمعية الثقافية التاريخية لكردستان، ٢٠١٠.
• القرداغي، محمد علي. کنوز الکرد في خزائن دار المخطوطات العراقية، اربیل: الاکاديمية الکوردية، ٢٠١٤.

ئینگلیزی

1. Çelik, Şerife Nur. “Intellectual Life in the Ḥijāz before Wahhabism: Ibrāhīm Al-Kūrānī’s (d. 1101/1690) Theology of Sufism”. İslam Araştırmaları Dergisi, no. 50 (July 2023): 176-79. https://doi.org/10.26570/isad.1325181.
2. Dumairieh, Naser. Intellectual Life in the Ḥijāz Before Wahhabism: Ibrāhīm al-Kūrānī’s (d. 1101/1690) Theology of Sufism. Leiden: Brill, 2022.
3. Knysh A. Ibrāhīm al-Kūrānī (d. 1101/1690), an Apologist for waḥdat al-wujūd. Journal of the Royal Asiatic Society. 1995;5(1):39-47. doi:10.1017/S1356186300013493
4. Nafi, Basheer M. “Taṣawwuf and Reform in Pre-Modern Islamic Culture: In Search of Ibrāhīm al-Kūrānī.” Die Welt Des Islams 42, no. 3 (2002): 307–55. http://www.jstor.org/stable/1571418.
5. Van Bruinessen, M.. Mullas, Sufis, and Heretics, Istanbul: The Isis Press & Gorgias Press, 2011.

The post کوڕە کوردەکەی موحیەدین ئیبن عەرەبی appeared first on ژنەفتن.

          ئەم دوو ڕووداوە هەر تەنیا بە ڕەوشێکی هەنووکەییانە گرێدراو نەبوون؛ مەسەلەیەکی پرۆتۆکۆڵیانە یاخود ئێستاتیکای دیزاینکردنی درێسێکی وەرزشی نەبوو، بەڵکوو ئاماژەی ڕوون بوون بۆ ئەوەی ئێمە لە سەردەمێکداین چیتر گوتار دەستەبژێرانە نابێتەوە، بەڵکوو گوتاری پۆپۆلیزمی ئەلیکترۆنی دەسەڵاتێکی هەژموونگەرای هەیە و بەرزەفتی زەینی مرۆڤەکانی کردووە، تا ئاستێک کە بە ئاسانی دەتوانێت خۆی بەسەر دەزگای دەوڵەتی و دەستەبژێرەوە بسەپێنێت و ناچار بن لەگەڵ ئەم گوتارەدا ڕێک بێنەوە. پۆزشی پارێزگار، کە لە بنەڕەتدا پۆزشهێنانەوە کردەیەکی باڵای ڕەوشتییە، ماناکانی پووچەڵ کرایەوە و بووە خیانەتکاری. ڕەمزی خۆریش، کە گوزارەی لە ناسنامەیەکی ڕەسەنی ئایینی دەکرد، لە دەلالەتەکانی بەتاڵ کرایەوە و وەک سووکایەتی و هەڕەشە نوێندرا. کەواتە ئەوەی ڕوویدا، بەو لۆژیکە نێوخۆیییەی سۆشیال میدیا کاری پێ دەکات، تیژتێپەڕ نییە، بەڵکو وەرچەرخانێکی هەمەکییە، کە ڕێساکانی ئەم لۆژیکە پێیەوە پابەندە و بە ڕوونی پێمان دەڵێت گوتاری پۆپۆلیستی دیجیتاڵییانە ئەوەندە هەژموونی کردووە، دەتوانێ دەسەڵات و دەستەبژێر ملکەچی خۆی بکات و بەو چەشنە ئاڕاستەیان بکات، کە خۆی سەپاندوویەتی.

          بێگومان ئەم وەرچەرخانە دەشێ لەو چوارچێوە تیۆرییەی بۆ پۆپۆلیزم هەیە وردتر بخوێندرێتەوە. بەتایبەت ئەگەر دەبینین پۆپۆلیزم وەک لۆژیکێکی گوتارییانە دەناسێنرێت، کە جارێکی تر دەمانباتەوە سەر دووانەی کلاسیکی ”جڤاکی ڕاستەقینە” و ”ئەوی تر”ەوە( Panizza & Stavrakakis ,2020). لە ناوکۆ کوردی – ئێزدییەکەدا، ئەو پڕۆسێسی دووانەسازییە وێنەیەک بە جڤاک پیشان دەدات، کە پشت بە ڕەگەزی ئیتنی – ئایینی بەستووە، تێیدا ئێزیدی وەک ”ئەوی ترێکی نێوخۆیی” جێگیر دەکرێت، ئەوی ترێک تەنیا ئەوکاتە خۆماڵی دەبێتەوە، ئەگەر قەبوڵی ڕەمزە هەژموونگەراکانی جڤاکی گشتی بکات. بەڵام هەر کاتێک دەست بە ڕەمزەکانی خۆی بگرێت، بە سانایی وەلا دەنرێت و دەبێتەوە ئەوی ترە نەخوازراو و نەویستراوەکەمان. لەم سۆنگەوە و لە ئاستە پۆپۆلیستییەکەدا، پۆزشهێنانەوە بۆ ئێزیدیان یاخود داننان بە ڕەمزە ئایینییەکەیان، هاوشێوەی کردەی دانپێدانان بە هەبوونیان نییە، بەڵکوو خیانەتکاری و هەڕەشەیە. هەر ئەوەش دەشێ شرۆڤەی ڕەشەبا دیجیتاڵییەکە بکات، کە ئاکامەکەی کشاندنەوەی داوای لێبوردنەکە و سڕینەوەی ڕەمزەکە بوو.

          هەموو ئەمەش پێمان دەڵێت، وەک توێژەرێکیش دروست بۆی چووە، پۆپۆلیزم کار بۆ داخستنی کۆناسنامە بەسەرخۆیدا دەکات، بەتایبەت ئەگەر دێت ئەو ڕەمزانەی لەگەڵ گێڕانەوەی زۆرینە ناگونجێت توڕهەڵدەدا و وەلا دەنێت (Kaya, 2019). لە ژینگەی دیجیتاڵیشدا ئەم لۆژیکە، بەهۆی دینامیکای سۆشیال میدیاوە، بە ئاسانی گەورە دەکرێت و توڕەیی و ئیرەییی ناسنامەیییانە دەکاتە هێزێکی ئەوتۆی فشار، کە دەستەبژێر ناچار بەوە دەکات گوێڕایەڵ بێت و پاشەکشە بکات لەوەی هەڵوێستێکی هەبێت. لێرەوە، پۆپۆلیزم، هەر تەنیا گوتارێکی دژە کەمینە نییە، بەڵکوو ئامرازی هەژموونی ڕەمزییانەشە، بە ئاسانی دەتوانێت هەر جودابوونێکی ئایینی یاخود کولتووری، وەک مەترسییەک بۆ سەر خەیاڵدانی دەستەجەمعی بنوێنێت.

          سۆشیال میدیا ئەم لۆژیکەی گەورەتر کردووە. وەک گێرباودۆ (2018) ڕوونی دەکاتەوە، “ئاشنایەتییەکی خوازیارانە” لە نێوان پۆپۆلیزم و سۆشیال میدیادا هەیە، چونکە پلاتفۆرمەکان دەبنە فەزای ڕاکێشانی کۆهەستەکان و گوتاری پۆپۆلیستی دیجیتاڵی دۆخی ئاوا بە ئاسانی ئاڕاستە دەکات. لە هەردوو ڕووداوەکەی سەرەوە، چاوخشانێکی خێرا بە پۆست و کۆمێنتەکان، ڕوونی دەکاتەوە چەندە هەڵوێستە ڕەمزییەکان بە زمانێک بارگاوی کرابوون، کە ماناکانی “هەڕەشە”، “خیانەت” و “سەرشۆڕکردن” دووبارە دادەڕێژێتەوە. داوای لێبوردن بە “خۆچەماندنەوەی زەلیلانە” و “ملکەچبوون بۆ کەمینەیەک” وەسف کراوە، ڕەمزی خۆری لالەشیش وەک “خۆرێکی سەیر” یان “وێنەیەکی ناجۆر” لە چوارچێوە دراوە. ئەم زمانە هیچ بوارێک بۆ دانپێدانانی یەکتر ناهێڵێتەوە، هەر هاوسۆزییەک بەرامبەر بە ئێزیدییەکان و جەختکردنەوە لەسەر هاوبەندی، وەک خیانەتکردن لە زۆرینە دەنوێنرێت. ئەمە، لە ڕوانگەی پیێر بۆردیۆ (١٩٩٤)، بەرجەستەی فۆرمێک لە “توندوتیژیی ڕەمزی” دەکات، کە ئەوی تر نەک بە هێزی ڕاستەوخۆ، بەڵکو لەمیانەی داماڵینی ڕەوایەتی لە ڕەمز و هێماکان و بەتاڵکردنەوەیان لە ماناکانیان، دەردەکەوێت. لێرەدا خۆمان لەبەردەم ئەوەدا دەبینینەوە، کە هەر بۆردیۆ بە “توندوتیژیی ڕەمزی” ناوی دەبات: دەسەڵاتێک، نەک لە ڕێگەی سەرکوتکردنی ڕاستەوخۆوە، بەڵکوو بە کۆنتڕۆڵکردنی مانای خودی ڕەمزەکە پەیڕەو دەکرێت. بینیمان بەو زمانەی بەکاری هێنا، مافی نوێنەرایەتیکردنی ئێزیدی لە ڕێگەی ڕەمزەکانیانەوە زەوت کرا و وەک گروپێک دووبارە بونیادنرانەوە، کە بۆ دەرکەوتن و هەبوونیان لەنێو گوتاردا پێویستیان بە ڕەزامەندی و مۆڵەتی زۆرینە هەیە. خۆ شیکارییەکی گوتاری ئەم زمانە بە ڕوونی دەریدەخات، کە بریتییە لە زمانی هەڕەشە (وێناکردنی دانپێدانان وەک هەڕەشەیەک بۆ سەر جڤاک)، زمانی تەخوین (پۆزشهێنانەوە بۆ ئێزیدی وەک سەرشۆڕی و خۆزەلیلکردن) و زمانی وەلانان (سەندنەوەی ڕەوایەتی بە ڕەمزی ئایینی، بە بیانووی نەگونجان و بریندارکردنی هەستی گشتی). هیچ کامێک لەم کردەوانەش هەڕەمەکی و بێ پاشخان نین، بەڵکوو بەشێکن لەو میکانیزمەی پۆپۆلیزم کاری پێ دەکات؛ جیاوازبوونی ”ئەوی تری نێوخۆیی”،  بە بەتاڵکردنەوەی ڕەمز و هێماکانی لە مانا دروستەکانیان و گۆڕینی بۆ بابەتی تۆمەتبارکردن، نەفی دەکاتەوە و دەیانسڕێتەوە.

          لە ڕووی سۆسیۆلۆگییەوە، وەک لەمێژە دۆرکهایم (٢٠١٩) جەختی لەسەر کردۆتەوە، کۆمەڵگەکان لە ڕێگەی ڕەمزە هاوبەشەکانەوە هاوبەندیی خۆیان بنیات دەنێن. بەڵام ئەوەی ڕوویدا دەریدەخات، کە چۆن ڕێ لە کەمینە دەگیرێت ڕەمزەکانی لەنێو کایەی گشتیدا جێگەی ببێتەوە، بەمەش لە بەشداریکردن لە بەرهەمهێنانی مانا دەستەجەمعییەکان دوور دەخرێنەوە. ئەم دەرکردن و وەلانانەش پێکەوەژیان ئاڵۆزتر دەکات، کار بۆ ئەوە دەکات ئێزیدییەکان ڕابهێنێت لە چوارچێوەی ناسنامەیەکدا بژین کە ڕەمزەکانیان بە ئاسایی دانانێت و نایانناسێتەوە، بەڵکوو تێگەیشتنی خۆی بەسەردا دەسەپێنێت و ناچار بەوەیان دەکات ڕەمزە هەمەگیرەکان قەبووڵ بکەن. وەک گێرتز (٢٠٠٩) ڕوونی دەکاتەوە، ڕەمزیش لێرە “چڕکردنەوەی مانا”یە و ڕێگریکردن لە بەکارهێنانی ڕەمزی ئێزیدییەکان، یەکسانە بە بێبەشکردنیان لە توانای چڕکردنەوەی ئەزموونی ئایینی و کولتووری خۆیان، لە کایەی هاوبەشدا.

          لەم دۆخەدا و لە کۆی ئەم هاوکێشە ئاڵۆزانە، ئەوەی دەستەوەستانە و دەستوپێ سپییە، دەستەبژێرە کوردییە ڕۆشنبیرەکەیە. دەستەبژێرێک، کە ئێستا تەنیا خۆدزینەوەی بەدەستەوە ماوە. ئەمانە، لە مێژووی نزیکی خۆیاندا، گوتارێکی دووفاقییانەیان لە هەمبەر بە ئێزیدی بەرهەم هێناوە و بەردەوام بەکاری دەهێننەوە. لەلایەک، لە کاتی دیاریکراو و بۆنەی جیاوازی قسەکردن لە کوردبوون، ئێزیدی وەک ”ڕەسەنێتی کورد” دەردەخەن و وەک ئاماژەی فرەیی نێو جڤاکی کوردی بۆ دەرەوەی جڤاکی دەنوێنن. لەلایەکی تریشەوە، لەنێو گێڕانەوەیەکی ناسیۆنالیستانە جێگیریان دەکەن و هێرمینۆتیکییانە بە چەشنێک دەیانخەنەڕوو، کە سەربەخۆییی ئایینی و کولتوورییان بەرزەفت دەکات، وەک ”کوردێکی بێ ئیسلامەتی” یاخود پاشماوەی ئایینێکی کۆن وێنایان دەکەن، کە بەرجەستەی ناسنامە کوردییە بێگەردەکە بکات. واتا لەم ناوکۆیەشدا داننان بە ئێزیدی داننانێکی مەرجدارە، مەبەست لێی بەخشینی ڕەواییەتی نییە بە جیاوازبوونیان، بەڵکوو بەگەڕخستنی کۆی ئێزیدییە لە چوارچێوەی پڕۆژەیەکی زۆر گەورەتر لە ئێزیدیبوون؛ پڕۆژەی کوردایەتی. ئەمەمان لە نەوەدەکانەوە بە ڕوونی بینیە و لە نێو گوتارە ڕۆشنبیرییەکە، بە هەموو فۆڕمەکانی، جەختکردنەوە لە ڕەسەنێتی کوردانە نەک سەربەخۆییی ئایینی زاڵ بووە. تەنانەت لەنێو سیستەمە دیداکتیکییەکەشدا دەبینین وێنەی لالش وەک ڕەمزێکی کوردی دانراوە، نەک شوێنی هەرە پیرۆزی ئایینێکی سەربەخۆ. واتا لەنێو ئەم گوتارەدا ئێزیدی وەک کەلەپورێکی زیندوو و پاشماوەی ڕابردوو وایە؛ بابەتێکی ئیتنۆگرافییانە، کە جەخت لەسەر ڕەسەنێتی ناسنامە کوردییەکە دەکاتەوە، نەک ئایینێکی زیندوو، کە پێویستی بەوەیە قەوارەکەی لە چوارچێوەی زۆرینەی نەریتگەرای جڤاکەکەدا پارێزراو بێت. ئەمە قۆناغی ماڵیکردنی گوتارییانەی ئێزیدییەکان بوو، ئەوان لەنێو گێڕانەوەدا هەبوونە، بەڵام هەبوونێکی مەرجدار بەوەی نوێنەرایەتی ڕەهەندە مێژوویییەکەی ناسنامە بکەن.

          بەڵام خۆ جێکردنەوەی ئەم تێگەیشتنە کۆنکرێتییە بۆ هەبوونی پەیڕەوکارانی ئەم ئایینە، لە سەردەمی هەژموونی سۆشیال میدیا، بەسەر زەینی دەستەجەمعی، نەک هەر کورتی هێنا، بەڵکوو لەبەر لۆژیکە نێوخۆیییەکەی لە سەرەوە ئاماژەمان پێدا، وای لێهاتووە لەخۆگرتن بووە. هەربۆیە، لەگەڵ هەڵکشانی ئامرازە دیجیتاڵییەکان، قۆناغێکی نوێی پەیوەندی بە ئێزیدی دروست بووە، کە ئەویش قۆناغی وەلانانی دیجیتاڵییانەیە. ئەو دوو ڕووداوە لە سەرەوە ئاماژەمان پێدا، بە باشتریین شێوە وەسفی ئەم لەچوارچێوەگرتنەی ئێزیدی دەکەن. ئەگەر پێشان بە ئاسانی داوای لێبوردن لەو مەیناتییانەی بەسەر ئێزیدیاندا هاتووە دەکرا و جەخت لەسەر مێژوویەک لە هاوخەمی دەکرایەوە، لە ئێستادا کاری ئاوا خیانەتە لە باوەڕی زۆرینە. ئەگەر پێشان خۆری ئەوان شایەتحاڵی ڕەسەنێتی بووبێت، هەنووکە لە پلاتفۆرمی سۆشیال میدیادا، وەک هێمایەکی نامۆ یان ناجۆر وەسف کراوە. ئەم وەرچەرخانە لە نواندن (لە لەخۆگرتن بۆ وەلانان) ڕەنگدانەوەیەکی ئاسایی گۆڕانی سروشتی فەزای گشتی خۆیەتی؛ لە فەزایەک کە حزبە سیاسییەکان بەسەریدا زاڵبوون و بە هاوکاری گوتارێکی ڕۆشنبیری بە ڕووکەش مۆدێرن و لەناوەخن نەریتگەرا وێنە دەرەکییەکەیان دەنەخشاند، بۆ فەزایەکی کراوە، کە جەماوەرێکی دیجیتاڵی بەسیاسیکراو و هەردەم هەڵچوو، ئاڕاستەی دەکات.

          ئەم شیکارییە کرۆنۆلۆژییەی پەرەسەندنی وێنەی ئێزیدی لەنێو گوتاری کوردی، دەمانباتە سەر ڕێڕەوێکی سەخت و دژوار: لە گشتگیربوونی ڕەمزییەوە بۆ وەدەرنانی دیجیتاڵی. بەڵام ئەوەی کە ساتەوەختی ئێستا مەترسیدارتر دەکات ئەوەیە، ئەم گۆڕانکارییە تەنیا لە ژیانی ڕۆژانە و پراکتیزەی پێکەوەژیاندا نییە، بەڵکوو ئالەنگاری مانای زۆر فەلسەفییەکەی دەکات. لەخۆگرتنی ڕەمزییانە، سەرەڕای سروشتە کردەکی و مەرجدارەکەی، لەگەڵ خۆیدا ئاستێک لە دانپێدانانی ناڕاستەوخۆی هەبوونی ئێزیدی لەناو کایەی گشتیدا هێنابوو. بەڵام وەدەرنانی دیجیتاڵییانە، هیچ بوارێک بۆ تەنانەت ئەم نوێنەرایەتییە کەمەش ناهێڵێتەوە؛ بەڵکوو هەوڵ دەدات هێماکانی ئێزیدیبوون وەک کوردبوون بسڕێتەوە و لە ڕووی زمانەوانییەوە هەڵگرانی ئەم گوتارە وەک هەڕەشە بیانبینێ و بە خیانەتکاری تاوانباریان بکات.

          لێرەوە دەشێ ڕەهەندە فەلسەفییەکەی ئەم قەیرانەمان بۆ دەربکەوێت؛ بەیەکەوەبوون تەنیا وەک کردەیەکی سیاسی لە مەترسیدا نییە، بەڵکوو وەک مانایەکی ڕەمزی و ئاکاریش مەترسی لەسەرە. ئەوکاتەی پۆزشهێنانەوە لە دەلالەتەکانی بەتاڵ دەکرێتەوە و مانای خیانەت و دەرچوون لە گوتاری باوی پێدەدرێت، ئەوکاتەی خۆری ئێزدیان لە هەڕەشە و مەترسی بەسەر باوەڕی فەرمی چڕ دەکرێتەوە، مانای ئەوەیە لەم کاتەدا جڤاک توانای بونیادنانی ناسنامەی هەمەگیر، کە کۆڵەگەکانی ڕەمز و مانابەخشینن، لەدەست داوە. لە دۆخی ئاوای دەستەوەستاندا بەیەکەوەبوون تەنیا ڕووپۆشێکی تەنکە، لە ژێریدا هەبوون ناجێگیر و هاوبەندی لەرزۆکە و لەگەڵ هەر قەیرانێکی تری ڕەمزی، دەشێ ئەوەی لەناو خۆی هەڵگرتووە فڕێیداتە دەرەوە و خەڵت و پیسییەکانی ببینرێت. بەو مانایەی ئێستا لەبەردەم مەترسییەکداین لە جۆرێکی تر، چیدی بۆ کەس بەیەکەوەژیان و بەیەکەوەبوون خەمێکی هزری نەماوە و پڕۆژەیەکی ئاکارییانە نییە، بەڵکوو ئامرازێکی گوتارییانەیە، بە ئاسانی دەشێ بە دوو پۆستی سۆشیال میدیایی و لەگەڵ هەر ڕەوشێکی سیاسیی ”هەستیار” کە دێتە پێش، دەستی لێ هەڵگرین. ئەو داخزانە لە بەهاوە بۆ تاکتیک، چەمکی بەیەکەوەبوون لە هەموو مانایەک بەتاڵ دەکاتەوە و دەیکاتە ڕووپۆشە تەنکە ڕەمزییەکە.

          دواجار، پرسی ئەوەی لەگەڵ ئێزیدییان کرا، بێ ئەوەی ئەوان خۆیان هیچ ڕۆڵێکیان لە نمایشەکان گێڕابێت و کارا بووبن لە دروستکردنی ڕووداوەکان؛ نە ویستبێتیان داوای لێبوردنیان لێ بکرێت و نە خواستبێتیان ڕەمزەکەیان بخرێتە سەر درێسێکی وەرزشی، پرسێک نییە تایبەت بەو کەمینەیە لە خۆیدا، بەڵکوو زەنگێکە بۆ ئەو قەیرانە پەردەپۆشکراوەی بونیادی ئاکارییانەی کۆی جڤاک تێی کەوتووە. 

ژێدەرە بەکارهاتووەکان

• بوردیو، بییر (١٩٩٤). العنف الرمزي، ترجمة: نظير جاهل، بیروت: المرکز الثقافي العربي.
• دوركهايم، إميل(٢٠١٩) الأشكال الأولية للحياة الدينية، ترجمة: رندة بعث، بیروت: المرکز العربي للابحاث.
• غیرتز، کلیفورد (٢٠٠٩). تأويل الثقافات، ترجمة: محمد بدوي، بیروت: المنظمة العربية للترجمة.

• Gerbaudo, P. (2018). Social media and populism: An elective affinity? Media, Culture & Society, 40(5), 745–753. https://doi.org/10.1177/0163443718772192
• Kaya, A. (2019). Populism and heritage in Europe: Lost in diversity and unity. London: Routledge. https://doi.org/10.4324/9780429286322
• Panizza, F., & Stavrakakis, Y. (2020). Populism, hegemony, and the political construction of “the people.” In C. Rovira Kaltwasser, P. Taggart, P. Ochoa Espejo, & P. Ostiguy (Eds.), The Oxford handbook of populism (pp. 68–92). London: Routledge.

The post هەژموونی پۆپۆلیزم و بێبەهاکردنی بەیەکەوەبوون appeared first on ژنەفتن.

١

كارابوون یان ناکارابوونی مرۆڤی ئه‌كادێمی

ئێستای ئێمه‌ ئه‌وه‌ند بابه‌تسازه‌ بۆ هه‌ر كه‌سێك، له‌نێویدا بێ یان له‌ ده‌ره‌وه‌ی، به‌رده‌وام بوارێكه‌ بۆ ئەوەی بەرهەمهێنی گوتار بێ. ڕووداوه‌كان، گێڕانه‌وه‌كان، دیار و نادیارەکانی واقیعی کوردی، نائاسایی ده‌ركه‌وتنی حاڵه‌ته‌ ئاساییه‌كانی نێو ئەم واقیعە، خۆنواندن یانیش هەبوونمان له‌گه‌ڵ ئه‌وانیتر و…هتد، زۆر کارەکتەری فەزای‌ ئێمه‌یان به‌ قسه‌ هێناوە. خۆ قسه‌كردن له‌سه‌ر خۆمان و بە گوتارکردنی،‌ نه‌ریتێكە پێشتر زارەکییانە و ئێستاس لە ئاستی نووسینەوە، خزاوه‌ته‌ نێو ئه‌و دابه‌شبوونه‌ کڕۆکییانەی له‌ خودی ئێمه‌دا بوونی هه‌یه‌ و لە نواندنی ناسنامەییماندا بەرجەستە بووە و قسه‌كه‌رانیش به‌سه‌ریدا دابه‌ش بوونه‌. زۆرترینی ئه‌وانه‌شی ده‌رده‌كه‌ون و ده‌دوێن: یان پێیانده‌گوترێ ڕۆشنبیر و نووسه‌ر یانیش مرۆڤی ئه‌كادێمی؛ پسپۆڕ له‌ بوارێكی دیاریكراو و گوتارخوێنی به‌رده‌م بەردەنگەکانیان.

كه‌م تا زۆر، قسه‌ له‌سه‌ر ڕۆشنبیریی كوردی و ستراتیژییه‌تی گوتارەکانی و چۆنیەتی كاركردنی کارەکتەرەکانی و فۆرمی بە میللیی بوونەوەی تێزەکانیان لە فەزای گشتیدا كراوه‌ و لە ئێستادا جێكه‌وته‌كانی بینراوه‌. به‌ڵام كارەکتەرەکەی دی، مرۆڤە ئه‌كادێمییەکە‌، هێشتا كه‌م دان بە کاراییەکەی نراوە و کەمتریش لە فەزاکەدا وەک بەرهەمهێن ناسێنراوه‌. ڕه‌نگه‌ ئه‌مه‌ش له‌به‌ر چه‌ند هۆكارێك بووبێ، له‌سه‌رووی هه‌موویانه‌وه و بە سادەیی دەتوانین بێژین،‌ نه‌یتوانیوه‌ گوتار دابڕێژێ. ئینجا له‌ ناوه‌ندی رۆشنبیرییشدا كه‌متر دانی پێدانراوه‌ و بۆچوونه‌كانی به‌هه‌ند وه‌رنه‌گیراوه، تا ئەو کاتەی زمانە ڕۆشنبیرییەکەی لەخۆنەگرتووە و ئەوەی بەرهەمی هێناوە، لەنێو ئەو چەمکانەدا جێی نەکردۆتەوە کە ئەوان پێی ئاشنان‌. به‌ڵام له‌وانه‌ گرنگتر ئه‌وه‌یه‌ کۆی گرۆی ئەکادیمییان، وەک گرۆیەکی بێ ناسنامه‌ ماوەتەوە و کەمتر توانیویانە‌ پڕ به‌ پێستی ناوه‌كه‌یان بن. ئەگەريش بە دەنگ هاتوون، ئەوا پتر بەدەنگهاتنێكى ميديايى دەبێ و زۆرتريش لە خولگەی گوتارێكى سادەوە دەخولێنەوە. وتارێک، زۆرجار، شەقامييانە مژارەکان بەرجەستە دەكاتەوە، شەقامێک کە بڕیارە پێشینەکان و هەڵوێستی ڕۆژ و پرۆسێسی کۆنتڕڵکارییانەی دەسەڵات (ئەوەی دەدوێ، جا هەر کەس، گرۆیەک بێ و هەرچ پێگەیەکی هەبێ) دەیجوڵێنێ، نەک هزرکردنە مێتۆدییەکە. لە پشت دكتۆرى قسەكەر، پسپۆڕى بوارى قسەلەسەر كراو، هەست بە جياوازيى بير و لێكدانەوە و شرۆڤەكارييەكانى ناكەين، تەنانەت ئەو چەمك و دەستەواژانەى بەكاريشيان دەهێنێ سادەييان پێوە ديارە؛ سادەيى لەو مانايەى بە چەمكەكانى دەدا. زمانى ئاخاوتنيشى زمانێكى ساكارە و درك بەو قوڵاييە مەعريفييە ناكەى كە ئەكادێميبوون دەيخوازێ. زۆرجار تەنانەت دەرەقەتى زمانە باوەكەى ناوەندى رۆشنبيریی كورديش نايەت و دوو ڕستەى لەسەر يەك نييە. ئەرێ بۆ وايە؟ بۆ مرۆڤى ئەكادێميمان ونە؟ ئەگەريش دەردەكەوێ بۆچى خۆى نانوێنێ، ئەوەندەى كەسى تر دەنوێنێ؛ ڕۆژنامەنوس، هەواڵخوێن، نووسەرى نائەکادێمی، بەرجەستەكارى گوتارى باو (بەتايبەت ڕۆشنبيریی و سياسى)؟

مرۆڤی ئەکادێمی، وەک چەمکێک، ئەو مرۆڤە دەناسێنێ، کە پسپۆرە لە بوارێکی زانستی و بەرهەمهێنی زانینە لە چوارچێوەی دیسپلینێکی دانپێنراوی نێو کایەی ئەکادێمی. پسپۆڕێتی و بەرهەمێک، کە کۆمەڵێک بەها و فۆرمی زانین و لێهاتوویی و توانای نواندن لە کەسەکەدا جێدەکاتەوە و لە ڕووی سۆسیۆلۆگییەوە وەک ئەندامێکی سەر بە گرۆیەکی خودان کولتوورێک subculture، دەری دەخات. بەو مانایەش بێ، پسپۆڕێتی و فۆرمی زانستی بەرهەمهێنراو، کەرەکتەری مرۆڤە ئەکادێمییەکە ڕەنگڕێژ دەکەن. ئیدی وەک کۆیەکی خودان فرە لق و پۆپ، دەردەکەون.

مرۆڤی ئەکادێمی، وەک چەمکێک، ئەو مرۆڤە دەناسێنێ، کە پسپۆرە لە بوارێکی زانستی و بەرهەمهێنی زانینە لە چوارچێوەی دیسپلینێکی دانپێنراوی نێو کایەی ئەکادێمی. پسپۆڕێتی و بەرهەمێک، کە کۆمەڵێک بەها و فۆرمی زانین و لێهاتوویی و توانای نواندن لە کەسەکەدا جێدەکاتەوە و لە ڕووی سۆسیۆلۆگییەوە وەک ئەندامێکی سەر بە گرۆیەکی خودان کولتوورێک subculture، دەری دەخات. بەو مانایەش بێ، پسپۆڕێتی و فۆرمی زانستی بەرهەمهێنراو، کەرەکتەری مرۆڤە ئەکادێمییەکە ڕەنگڕێژ دەکەن. ئیدی وەک کۆیەکی خودان فرە لق و پۆپ، دەردەکەون.

ئێمە لەم کورتە وتارەدا، باس لە هەموو مرۆڤێكى ئەکادێمی ناكەين، لەوانەشیان نادوێین سەر بە دیسپلینە زانستییە پەتییەکانن. بەڵكو پتر مەبەستمان ئەو تايپەیانە کە لە کایە و دیسپلینە مرۆڤایەتییەکانەوە کاردەکەن؛ وەک دەزانین ئەوانەی لە بواری زانستە مرۆڤایەتییەکان کاردەکەن، ئەوانەن میتۆدییانە ئیش لەسەر دەق دەکەن، وەک سەرچاوەی حەقیقەتی دەبینن. جا ئەو دەقە پەیوەست بێ بە ڕابردووەوە یان هەنووکە، بەڵگەنامەیەکی فەرمی بێت، یان قەسیدەیەک. یاداشتێک بێ یان ڕۆمانێک.

ئەمانە لەنێو دەزگا زانستیی و ئەکادێمییەكانى ئێمەدان و پێیان دەڵێين مامۆستاى زانكۆ، توێژەر…هتد. بەڵام زۆربەى جار لەو جوڵە سياسى، كۆمەڵايەتى، ئايينى، تەنانەت فەرهەنگیيانەى لە فەزای گشتی هەن، دەرناكەون يان بێدەنگن. خۆ ئەگەر لە ئاستە گڵۆباڵەکەوە و لە ئێستای دونیای ئەکادێمییەوە، چاو ببڕینە ڕەوشی سۆسیۆ مەعریفیی پسپۆڕانی بواری مرۆڤایەتیی، دەبینین بڕێکی باشی ئەو هەژموون و دەسەڵاتە هزرییەی چەند سەدەیەکە هەیانبووە، لەدەستیانداوە. پێشڤەچوونی ڕەهای زانستە سروشتییەکان، ئەو متمانەیەی پێشووتر فەیلەسوف، مێژوونووس، ئاییناس، ئەدەبناس و زمانەوان، کولتوورناس…هتد، لە فەزای گشتیدا هەیبووە، کەمبۆتەوە. تەنانەت بە بەراورد لەگەڵ ئەکادێمیانی پسپۆڕ لە هێندێک کایەی زانستە کۆمەڵایەتییەکان(Kagan, 2009: 222) (سایکۆلۆژیا و چەند لقێکی سۆسیۆلۆژیا) کەمتر کاران. ئەم وەرچەرخانە و کەمبوونەوەی پێگە، لەو تێگە ڕووکەشییەوە دێت، کە چیدی فەیلەسوفان، مێژونووس و مرۆڤناس و هاوشێوەکانیان، ناتوانن لە ڕوونکردنەوەی ڕوانگەمان بۆ سروشتی مرۆڤ و ئاڵۆسکاوییەکانی کۆمەڵگەی مرۆییەوە، بەشدار ببن. ئەمە تێگەیەکە، دەرئەنجامی هوروژمی ئەو شەپۆلانەیە، کە کایەی لێکۆڵینەوە مرۆڤایەتییەکانی خستە بەردەم قەیرانی مێتۆدیی و هزریی خۆناساندنەوە؛ شەپۆلی فێمینیستیی، پۆستکۆڵۆنیاڵی و هاوشێوەکانیان. ئەمە سەرباری ئەو پێداچوونەوە هزرییانەی کۆی کایەی زانستیی – ئەکادێمی گرتەوە، لە نیتشەوە بگرە تا فوکۆ و جێگرەوەکانیان. ئەوانەی حەقیقەتیان وەک سەنگی نێو کایەکان و چەمکی بنەڕەتی ئیشی پسپۆڕەکان، لەو سەنتەرێتییەی پێی درابووە خست و تیمەی ئەو حەکایەتە گەورانەی لەبارەیەوە دەگێڕدرانەوە، هەڵوەشاندەوە.

جیرۆمی کاگان (2009: 226-227)، لە خوێندنەوەی بۆ ڕەوشی هەنوکەییانەی زانستە مرۆییەکانەوە، چوار فاکتەری دیاری کردووە، وەک هۆکاری بنەڕەتیی لەوەی، ئەم کایە زانستییانە ‘متمانە’ لەدەست بدەن. یەکەمیان؛ کاڵبوونەوەی ئەو پێوەرانەی وا لە مرۆڤێک دەکات وەک ئەندامێکی نێو دەزگا ئەکادێمییەکان خۆی بنوێنێ. پێشووتر، کۆمەڵێک پێوەر، پێگەیەکی سۆسیۆ کولتووریی باڵای بەم چەشنە کارەکتەرە بەخشیبوو، کە چیدی لە ئێستادا دانی پێدانانرێ و نەیماوە. دووەمیان؛ بچووکبوونەوەی جیهانبینیی و کوشتنی خەیاڵ، دیارە مەبەستی بە فۆرمە کۆنە دەقگرتووەکەیەتی، لەسەر دەستی تەکنۆلۆژیاوە. کاگان نموونە بە فێرجینیا وۆڵف دەهێنێتەوە، کە لە ساڵی ١٩٢٢دا زۆر بە کەم لە سینەمای ڕوانیوە و وەک ژانرێکی لاوازیی هونەری چاوی لێکردووە. کەچی ئەوەندەی خەڵکی تەماشای فیلمی ‘خاتوو داڵاوا’یان کرد، کە لە ڕۆمانەکەی ئەو بە هەمان ناو وەرگیرابوو، ئەوەندە ڕۆمانەکەیان نەخوێندۆتەوە. هەر ئەمەش بووە، وای لە دەزگایەکی گەورەی ئەکادێمی وەک هاڤەرد کرد، پرۆگرامێکی تایبەتی دکتۆرا، لە بواری ‘لێکۆڵینەوەی فیلم – Film Sudies’، لە ساڵی ٢٠٠٨ەوە بکاتەوە. سێیەمین فاکتەریش لەدەستدانی سیحری پیشەگەربوونە لەم پسپۆڕییە ئەکادێمییانە. تا ئاستێک وایلێهاتووە بڕێک لەوانەی سەر بە ڕەوتی هزریی پۆستمۆدێرنەن ڕایدەگەیەنن – بۆ نموونە –هەر مرۆڤێک بخوازێ، دەتوانێ مێژوو بنووسێتەوە. بەڵام هەمان ئەو مرۆڤە پێویستی بە خوێندن و ڕاهێنانی باشی زانستییە، بۆ ئەوەی لە بواری فیزیکدا کار بکات. دوا خاڵیش، بڕینی مەرزەکانی زانستە مرۆییەکانە لەلایەن پسپۆڕانی کایە زانستییەکانی دییەوە. بۆ نموونە، ئەو دەمەی زانایانی بواری زانستە سروشتییەکان، خۆیان خزاندە نێو کایەی توێژینەوەی فەلسەفی و ئیشیان لەسەر هەمان بابەت و چەمک کرد، کە هی ئەم کایە بوون، پسپۆڕانی بوارەکەیان ناچار بەوە کردووە، لە لێکۆڵینەوە سروشتییەکان دوور بکەونەوە. بڕوانە؛ ئەگەر چەمکی ‘سۆز’ لەلای ئەرستۆ بریتی بووە لە درککردنی خوازراو و ئاگایانە، بە هەر گۆڕانێک لە هەستکردنی فیزیکیی – جەستەییەوە، ئەوا لە ناوکۆیی زانستیی هاوچەرخدا، لای نیۆرۆلۆژیستێکی وەکAntonio Damasio، تەنیا حاڵەتێکە لە حاڵەتەکانی چالاکی مێشک.

   لەدەستدانی پێگەیەی زانستە مرۆڤایەتییەکان، جیهانین. بەڵام شکستی لەناوبەر نین. بە پێچەوانەوە، وای لە تیۆریزەکارانی کردووە، هەر یەکەوە لە چوارچێوەی دیسپلینەکەی خۆیەوە، بەدوای ئاڕاستەی هزریی و مێتۆدی نوێدا بن، بۆ خۆدۆزینەوە و خۆگونجان لەگەڵ ئێستادا؛ ئاوێتەکردنی دیسپلینەکان، لێکۆڵینەوەی کولتووریی، مێژووی گڵۆباڵ…هتد، برەویان سەندووە. بەڵام لەدەرەوەی ئەم وەهمە پێشینیانەی قۆرخکردنی حەقیقەت. ئەمەش لەوێ بوژانەوەیەکی بەم کایە زانستییانە داوە. لێرە هێشتا هیچ لە گۆڕێ نییە.

        بەگەڕانەوە بۆ زەمینەی کوردیی، تێبینی ئەوە دەکەین مێژووی مرۆڤی ئه‌كادێمی له‌و زه‌مینه‌یه‌دا، مێژووییه‌كی ساكاره‌ و ئاڵۆزییه‌كی ئه‌وتۆی تێدا نابینرێ کە ئه‌سته‌م بێ بتوانین تێیبگه‌ین. ته‌مه‌نی ئه‌كادێمیا لای ئێمە زۆر كورته‌. له‌ به‌شێكی زۆری ئه‌و ته‌مه‌نه‌ كورته‌شدا، ئه‌كادێمیا هی خۆمان نه‌بووه، بەمانای بەرجەستەکاری گرفتەکانی فەزای کوردی لەنێو دەزگاکەدا‌. به‌ڵكو به‌شێك بووه‌ لەتێگەیشتنە کلاسیکییەکەی ڕۆژئاوا بۆ مرۆڤی ئەکادێمی، بەتایبەت پسپۆڕانی زانستە مرۆڤایەتییەکان، وەک لەپێشدا ئاماژەمان بە هێندێک خەسڵەتی دا. ئەم تێگەیشتنە، له‌ پرۆسێسی به‌ ده‌زگاییكردنی ده‌وڵه‌تییانه‌ی خوێندن و فێربوون لەو سیستەمە دەوڵەتییانەی کوردیان تێدا بووە، جێگەی کراوەتەوە. ئەمەش پرۆسێسێكی ته‌واو سه‌نته‌رگیر و به‌ عه‌قڵییه‌تێكی تژی بە ئامرازی كۆنتڕۆڵكردن. كاتێكیش له‌ نه‌وه‌ده‌كانی سه‌ده‌ی بیسته‌وه‌، ئه‌و ده‌زگایانه‌ خۆماڵی ده‌كرێن و ژماره‌یان زیاد ده‌كرێ – تاڕاده‌ی گواستنه‌وه‌ی له‌ ده‌زگایه‌كی په‌یوه‌ست به‌ شاره‌وه‌ بۆ ده‌زگایه‌كی نزیك به‌ گونده‌وه‌! – ئه‌سته‌م بووه‌ به‌ ئاسانی له‌و پاشخانه‌ی لەسەری دامەزرابوو ده‌ربازی ببێ؛ له‌و سه‌نته‌رگیریی و كۆنترۆڵكارییه‌ ده‌ربچێ و بتوانێ ته‌ماهی له‌گه‌ڵ سیسته‌مه‌ گڵۆباڵه‌كه‌دا بكات. بۆیه‌ كه‌ بمانه‌وێ ئه‌و ده‌زگایانه‌ی خۆمان بخوێنینه‌وه‌، هه‌رگیز ناتوانین، كه‌مترین به‌راورد له‌گه‌ڵ سیسته‌مه‌ گڵۆباڵه‌كه‌دا ساز بكه‌ین، چونكه‌ ده‌مێكه‌ ئه‌و وێنه‌یه‌ی دەزگای ئەکادێمی ئێمه‌ هه‌یه‌تی، له‌وێدا نه‌ماوه‌. به‌ڵام ئه‌گه‌ر موكوڕ بین له‌سه‌ر دۆزینه‌وه‌ی هاوشێوه‌ی ئه‌م ده‌زگایانه‌، ئه‌وا ده‌شێ بگه‌ڕێینه‌وه‌ بۆ مێژوو، بۆ ده‌ستپێكەکە: سه‌ره‌تاكانی ترادیسیۆنی ئه‌كادێمی، وه‌ك چۆن له‌ سیسته‌می خوێندنی ئه‌وروپاییدا ده‌ركه‌وتووه‌. به‌تایبه‌ت له‌ماوەی درێژی سەدەکانی ناوەڕاست بە قۆناغبەندییە ژاک لۆگۆفییەکەیەوە، کە دەمی ڕێنیسانس تا دەستپێکی مۆدێرنەش لەخۆ دەگرێ. سه‌ده‌كانی ناوه‌ڕاست؛ سه‌ده‌كانی زاڵبوونی مێنتاڵێتی باوەڕییانە و ناساندن و نواندنی كۆنترۆڵكاریی وه‌ك ئازادی و سەرخۆبوون.

٢

پاشخانی مێژوویی ده‌زگای ئه‌كادێمی – نه‌ریتی ئه‌وان و دۆگمای ئێمه‌

ئێمه‌ ده‌زانین، كولتوورێكی مێژوویی كه‌ڵه‌كه‌بوو هه‌یه‌ له‌ كرده‌ی پێداگۆگیانه‌، توێژینه‌وه‌سازی و به‌ ده‌زگاییكردنی پرۆسێسی مه‌عریفه‌دا. ڕه‌نگه‌ گه‌ڕانه‌وه‌ بۆ سه‌ره‌تاكانی سیسته‌می زانكۆیی، له‌وه‌دا سوودمان پێ بگه‌یه‌نێ، كه‌ ئه‌و سه‌ره‌تایه‌ به‌ ڕه‌گه‌زه‌ بنه‌ڕه‌تییه‌كانی بونیادی ئه‌و سیسته‌مه‌مان ئاشنا بكات. ئه‌مه‌ له‌لایه‌ك، له‌لایه‌كی تره‌وه‌ چه‌شنێك له‌ هاوشێوه‌یی له‌نێوان ئه‌و سه‌ره‌تا مێژووییه‌ و سیسته‌مه‌ زانكۆییه‌ كوردییه‌كه‌دا ده‌بینرێ، كه‌ هێشتا له‌نێو سه‌ره‌تای بووندا ده‌خولێته‌وه‌ و نه‌یتوانییوه‌ له‌ نه‌ریته‌كانیدا، هاوئاستی سیسته‌مه‌ زانكۆییه‌ جیهانییه‌كه‌ ببێته‌وه‌. ئه‌وه‌شمان له‌ بیر نه‌چێ زۆر له‌ ئیشكالییه‌ته‌كانی مرۆڤی ئه‌مرۆ، ریشه‌كه‌ی بۆ سه‌رده‌می ده‌ركه‌وتنی زانكۆ و گه‌ڵاڵه‌بوونی ناسنامه‌كه‌ی ده‌گه‌ڕێته‌وه‌.

به‌ هه‌رحاڵ، وه‌ك ده‌زانین، خه‌سڵه‌تی سه‌ره‌كی سه‌ده‌كانی ناوه‌ڕاست له‌ ئه‌وروپا، له‌ ڕووی خوێندن و فێركردندا، قۆرخكردنی ئه‌م كایانه‌ بوو له‌لایه‌ن كڵێساوه‌. ده‌زگایه‌ك،‌ وه‌ك ماكس ڤیبه‌ر ده‌مێكه‌ گوتویه‌تی: جه‌سته‌یه‌كی كه‌هه‌نوتی بووە، سامانی ڕزگاركردنی مرۆڤی بۆ خۆی قۆرخ كردبوو. به‌ ده‌سته‌واژه‌یه‌كی دی، توانیبووی ئه‌و باوه‌ڕه‌ له‌ زه‌ینی مرۆڤه‌كان بسه‌پێنێ، ئیدی ڕێكخستنی ژیان و كاروباره‌كانی ته‌نیا له‌توانای ئه‌ودایه‌. بۆیه‌ هه‌ر ده‌زگایه‌كی فێركردن و به‌رهه‌مهێنانی مه‌عریفه‌، ئەگەر‌ هه‌بووە، ئەوا له‌و ژینگه‌یه‌ی بیركردنه‌وه‌دا دروست ده‌بوو. مه‌حاڵیش بووە بتوانێ له‌ عه‌قڵییه‌تی ده‌زگا ئایینیه‌كه‌ ڕزگاری ببێ (مینوا، ٢٠٠٥). ڕێك وه‌ك ئه‌و ڕوانگه‌یه‌ی له‌ زه‌مینه‌ی ئێمه‌دا باوه‌ و ده‌زگا به‌رهه‌م و موڵكی عه‌قڵییه‌تی زاڵی ده‌سه‌ڵاتێكه‌‌ و له‌وه‌وه‌ ئاراسته‌ی كاره‌كانی دیاری كراوه‌.

خۆ ئه‌و كات، سێ چه‌شنی ده‌زگای فێركردن هه‌بووه‌: قوتابخانه‌ی دێره‌كان، قوتابخانه‌ی شاره‌كان و زانكۆ. هه‌ریه‌ك له‌مانه‌ له‌ ناوكۆیه‌كی سۆسیۆلۆژی دیاریكراودا سه‌ریان هه‌ڵدابوو. ده‌ركه‌وتنی زانكۆ دوابه‌دوای ئه‌و شێوه‌ ڕێنیسانسه‌وه‌ بوو، كه‌ ئه‌وروپای سه‌ده‌ی دوانزه‌ به‌خۆیه‌وه‌ بینی؛ كۆمه‌ڵێك نه‌گۆڕی كۆمه‌ڵایه‌تی و ئابووری جوڵان، كه‌ واده‌هاتنه‌ به‌رچاو له‌سه‌رووی هه‌ر گۆڕانێكه‌وه‌ بن: شكانی شكۆی فیوداڵیزم له‌ هه‌مبه‌ر به‌ سیسته‌مه‌ پادشاییه‌ گه‌نجه‌كان، له‌دایكبوونی شار، كۆچكردنی ژماره‌یه‌كی زۆری نه‌داری گوند بۆ شار، شه‌ڕی خاچیی، كرانه‌وه‌ به‌سه‌ر زانست و زانینی ئیسلامی و سه‌ره‌تاكانی ده‌ركه‌وتنه‌وه‌ و ئاشنابوونه‌وه‌ به‌ مه‌عریفه‌ی سه‌رده‌مانی كلاسیك (فه‌لسه‌فه‌، ئه‌ندازه‌، یاسای ڕۆمانی، ماتماتیك…هتد). هه‌موو ئه‌مه‌ شۆكێك بوو بۆ ده‌زگاکە؛ کڵێسای قۆرخكاری به‌رهه‌مهێنی مه‌عریفه‌. قوتابخانه‌ ئایینییه‌كان، نه‌یانده‌توانی كایه‌ زانستییە‌ نوێییه‌كان له‌خۆ بگرن، ته‌نانه‌ت ستراتیژییه‌تی كاری ئه‌وان له‌بری داهێنان، چۆنییه‌تی ڕه‌تكردنه‌وه‌ و پوچه‌ڵ كردنه‌وه‌ی هه‌ر زانستێكی ناخوداییانه بووە. زانستگەلێک ده‌شێ له‌ كۆنتێكستێكی ژیارییانه‌ی جیاوازدا ده‌ركه‌وتبێ‌. لێره‌وه دەگوترێ، كڵێسا وای به‌ باش زانیوە ده‌زگای دی زانستی بكاته‌وه‌، كه‌ زانكۆ بوو‌. نەک بۆ فراوانکردنی سنوورەکانی زانین، بەڵکو بە مەبەستی داخستنی ئەم سنوورانە و تۆکمەکردنیان لەبەردەم هەر پێشڤەچوونێکی زانستییانە. واتا به‌ مه‌به‌ستی كۆنترۆڵكردنی زانسته‌كان و بره‌وپێدانی ئه‌م ستراتیژییه‌ته‌. كڵێسا ده‌یویست زانكۆ چوارچێوه‌یه‌كی تۆكمه‌ بێ بۆ كۆنتڕۆڵكاری. ئیتر زۆرترین ئیمتیازی به‌ نزیكه‌ی ئه‌و هه‌شتا زانكۆیه‌ داوه‌، كه‌ له‌و قۆناغه‌دا، له‌ به‌شی زۆری ئه‌وروپادا دامه‌زرابوون (Haskins, 1957).

ڕه‌نگه‌ ئه‌و پرسیاره‌ بكرێ،  ئاخۆ ده‌بێ له‌ فه‌زایه‌كی ئاوادا مرۆڤه‌كانی نێو زانكۆ، ستافی ئه‌كادێمی، چه‌نده‌ ئازاد بووبن له‌ كردار و بیركردنه‌وه‌ و دواجار به‌رهه‌مهێنانی زانستیدا؟ چه‌نده‌ توانیویانه‌ ئاڕاسته‌ بگۆڕن و كاراییه‌ك بنوێنن له‌ده‌ره‌وه‌ی هه‌ر میکانیکایەکی پێداگۆگی باودا بووبێ؟ كێشه‌ی هه‌ره‌ بنه‌ڕه‌تی خوێندن، له‌ زانكۆی ئاوا كۆنتڕۆڵكراودا، له‌وه‌دا بوو كه‌ قه‌ناعه‌تێكی گشتی هه‌بوو،‌ زانسته‌كان چه‌سپاون و گه‌یشتونه‌ته‌ خاڵی كۆتایی. ئه‌سته‌مه‌ مرۆڤه‌كان، چه‌نده‌ تێگه‌یشتوو بن، بتوانن سنووره‌كانیان ببه‌زێنین، ئەمەش لەوەوە دەهات کەوا هیچ باوه‌ڕێك به‌ پێشكه‌وتنی زانستی، جیا لەوەی تیۆلۆژیا دیاری کردبوو، نه‌بوو. باوەڕی هەرە باڵا ئەوەبوو ئەقڵ دەبێ لە خزمەتی حەقیقەتی ئایینیەوە بێ. بۆیە ئیشی مامۆستا و فێرخوازیش جه‌ختكردنه‌وه‌ بوو له‌سه‌ر ئەم حه‌قیقه‌تە ڕه‌ها پیرۆزکراوە. حه‌قیقه‌تێكی زانراو، كه‌ ئه‌وه‌نده‌ ده‌گوتراوه‌ و دووباره‌ كرابۆوه‌، ببووه‌‌ به‌شێك له‌ سیسته‌می باوه‌ڕداریی. هه‌ر هه‌وڵێك بۆ ده‌ستكاری یان تێپه‌ڕاندنی كوفر و له ‌ڕێ لادان بوو‌.

بەگوێرەی ئەم حەکایەتە بێ؛ له‌ فه‌زایه‌كی ئاوادا، بابه‌تی بیرلێنه‌كراوه‌ زۆر زیاتر ده‌بێ له‌ بیرلێكراو‌. ئیدی ئاسایی بوو مرۆڤه‌كانی ئه‌وێ، تواناكانی خۆیان لەمانەدا چڕ بکەنەوە: سه‌لماندنی گوتراوه‌كان، شرۆڤه‌كردنی، جه‌ختكردنه‌وه‌ له‌سه‌ر گوتراو، ستایشكردنی به‌رده‌وامی پێشین، به‌تایبه‌ت له‌ بواری تیۆلۆجیا و میتافیزیكەوە. خۆ كه‌می سه‌رچاوه‌ زانستییه‌كانیش یانیش یاساخبوونی بەشێکی ئەوانەی هەبوون، وێنایه‌كی بۆ مامۆستا دروستكردبوو،‌ تا ئێستا له‌ یادەوەری کولتوورییانەی ئێمه‌دا ماوەتەوە و لە ئاڕاستەکردنی پەیوەندی نێوان مامۆستا و فێرخوازەوە، زوو زوو دەردەکەوێ‌. ئه‌ویش بریتییە لەوەی‌‌ حه‌قیقه‌ت ته‌نیا لای ئەوی مامۆستایه‌ و هەر ئەوە هه‌ڵگری گوتارەکان‌ و تاكه‌ سه‌رچاوه‌یه‌ بۆ هه‌ر شتێك کە فێرخواز بیه‌وێ فێری ببێ. چاودێری هه‌ر زانستێكی تر ده‌كرا كه‌سێك بیویستایه‌ له‌ ده‌ره‌وه‌ی زانكۆوه‌ شتێكی لێ بزانێ. نه‌ك هه‌ر ئه‌مه،‌ ته‌نانه‌ت چاودێری جوڵه‌ و بزاوتی جه‌سته‌ش ده‌كرا و ده‌بوا ڕێك له‌ سنووره‌ كۆنترۆڵكراوه‌كه‌دا بمێنێته‌وه‌ و به‌ موو لێی ده‌رنه‌چێ. یه‌كێك له‌ پیاوه‌ ئایینیه‌كانی ئه‌وكات، كاتێك دێته‌ سه‌ر باسی چاكه‌كانی زانكۆ ده‌ڵێ: “زانكۆ ژیانی مرۆڤه‌كان له‌و فه‌وزایه‌ی تێیدایه‌ بۆ جۆرێك له‌ دیسپلین و چه‌شنێك له‌ گوێڕایه‌ڵێ ده‌گوازێته‌وه‌. زانكۆ وا له‌ تاكه‌كان ده‌كات پابەند بن”(Haskins, 1957). له‌وێدا ئه‌وه‌ ده‌گوترا، كه‌ سه‌ره‌تای هه‌موو حیكمه‌تێك گوێڕایه‌ڵییه‌ بۆ كڵێسا و ئەو مامۆستایانەی فەلسەفە پێداگۆژییەکەی پەیڕەو دەکەن. هه‌رچی بابه‌ته‌كانی خوێندن و بیركردنه‌وه‌ن، ئه‌وه‌ حیكمه‌تی پله‌ دوون.

لێره‌وه‌ ده‌گه‌ڕێینه‌وه‌ سه‌ر كارەکتەری هه‌ره‌ دیاری نێو ده‌زگای ئه‌كادیمی؛ مامۆستاكان. ئه‌وانه‌ی سه‌رپه‌رشتی ده‌زگاكه‌ ده‌كه‌ن. ئەوانەی زانستكارن‌. هه‌ر له‌ ده‌سپێكه‌وه‌، ده‌زگای كڵێسایی جه‌ختی له‌سه‌ر ئه‌وه‌ كردۆته‌وه‌،‌ ده‌بێ پیاوه‌كانی ئه‌و له‌ زانكۆدا مامۆستا بن. ئه‌وانه‌ باڵاترین پله‌ی ئایینیان له‌نێو كڵێسادا هه‌بووه‌؛ تۆمای ئه‌كوینی و ئه‌لبێرتی مه‌زن و سانت بۆناڤنتۆرا، له‌وانه‌ بوون (مینوا، ٢٠٠٥). ئه‌وكاته‌ سه‌رده‌می زێڕینی باڵاده‌ستی و هه‌ژموونی مامۆستا بووە، به‌سه‌ر زانكۆوه‌. زانكۆ كۆمه‌ڵگەی مامۆستایان بوو و فێرخواز میوانێكی نه‌ویستراو و نەخوازراو بووه؛ یان له‌ باشترین حاڵه‌تدا شاگردێك بووه‌ بۆ هاوكاری و پاڵپشتیكردنی مامۆستاكانی‌. كاری مامۆستاش، تا ئه‌وكاته‌ی حه‌قیقه‌ت ڕه‌هایه‌، شرۆڤه‌كردن بووه‌. گه‌وره‌ترین و ناودارترین مامۆستای نێو دەزگای ئەکادێمی، گه‌وره‌ شرۆڤه‌كاره‌كان بوون.

له‌گه‌ڵ ئه‌وه‌شدا، ئیشكردن له‌سه‌ر فیكر، ڕێگه‌ی به‌وه‌ داوه‌ كه‌سانێك ده‌ربكه‌ون، له‌ده‌ره‌وه‌ی نەریتە‌ باوه‌كان بن. ته‌نانه‌ت كڵێساش نه‌توانێ كۆنتڕۆڵیان بكات. ئه‌وان له‌ ده‌ره‌وه‌ی سنووره‌كانی كڵێسا بیریان كردۆته‌وه‌ و پێیان وابووه‌ مه‌عریفه‌ له‌ ده‌ره‌وه‌ی هه‌موو چه‌شنه‌ قۆرخكردنێكه‌. ڕه‌نگه‌ به‌ناوبانگترین كه‌سێكیش پیێر ئه‌بیلاری  دامه‌زرێنه‌ری زانكۆی پاریس بێ. ئه‌و توانی فێرخواز له‌ خۆی كۆبكاته‌وه‌، نه‌ك بیانكاته‌ مێگه‌لێكی گوێڕایه‌ڵی كلێسا. ڕوانگه‌ گومانكارییانه‌كه‌ی، ته‌نانه‌ت له‌ هه‌ندێ مه‌سه‌له‌ی تیۆلۆجییانه‌شدا، به‌و ئاڕاسته‌یه‌ی برد، كه‌ پێی وابێ ده‌بێ عه‌قڵ له‌ پێش باوه‌ڕهێنانه‌وه‌ بێ. میتۆدی وانه‌گوتنه‌وه‌ و گه‌یاندنی مه‌عریفه‌ی له‌ ته‌لقینكارییه‌وه‌ گۆڕی بۆ پرسیار. دواجار ئه‌بیلار له‌ ناوچوو و ڕێبازی وانه‌وتنه‌وه‌ی كلێسایی به‌ ڕه‌وا زانرا.

هه‌ر ئه‌مه‌ وایكردووه‌، كه‌ جۆره‌ چه‌قبه‌ستنێك به‌ ته‌واوی هزری ئه‌وكاته‌وه‌ دیار بێ. باشترین مامۆستاكان، ئه‌وانه ‌بن كه‌ زۆرترین پابه‌ندییان به‌ سنووره‌ داڕێژراوه‌كان هه‌بووه‌. ئه‌وه‌ مه‌سه‌له‌یه‌ك بووه‌، بڕێك له‌ كه‌سانی ئه‌وكاتیش دركیان پێ كردووه‌. جۆنی سالسبری دوانزه‌ ساڵ پاریسی جێهێشت. كه‌ گه‌ڕایه‌وه‌، بینی هه‌مان ئه‌و گفتوگۆ و مشتومڕه‌ زانستییانه‌ له‌ ئارادابوون، كه‌ به‌ر له‌ سه‌فه‌ركردنی هه‌بوون.

ئه‌و مێژووه‌ له‌ زۆر له‌ جومگه‌كانیدا، بۆ هه‌ر كه‌سێك ئه‌زموونێكی له‌نێو ده‌زگای ئه‌كادیمی خۆماندا هه‌بێ، نامۆ نییه‌ و واتێده‌گات باس له‌ ئێستای ئه‌و ده‌كه‌ی له‌ سه‌رووی زه‌مه‌نه‌وه‌. ڕه‌نگه‌ بۆ كارایه‌كی ئه‌كادیمی ئه‌وروپایی خۆدۆزینه‌وه‌ی له‌نێو ئه‌م ئه‌زموونه‌ مێژووییه‌ ئه‌سته‌م بێ، تا بتوانێ ستراتیژییه‌تی ئیشكردنی نه‌بینراوی زانكۆ له‌سه‌ر داڕشتنی هزری خۆی ببینێته‌وه‌. به‌ڵام بۆ ئێمه‌مانان بینینه‌وه‌ی ئه‌م چه‌شنه‌ كاره‌ زۆر سانایه‌ و كاتێكی زۆر ناخوازێ تا دركی پێ ده‌كه‌ین. هه‌مان كۆنتڕۆڵكاریی، كۆمه‌ڵێك سنووری سیاسی و كۆمه‌ڵایه‌تی بۆ ڕوانین و ئاراسته‌كردنی بیركردنه‌وه‌، پیرۆزكردنی ده‌قه‌ سواوه‌كان، خۆپیرۆزكردنی مامۆستا، به‌ میكانیك بوونی پرۆسێسی دروستكردنی مرۆڤی ئه‌كادێمی و پرۆفێشناڵ و…هتد.

٣

مرۆڤى ئەکادێمی و تەماهيكردن لەگەڵ وێناى ڕۆشنبير

بۆ ئەوەى بزانين بۆچى لە زەمينەى ئێمەدا مرۆڤى ئەکادێمی هه‌مان ئه‌و خه‌سڵه‌ته‌ مێژووكردانه‌ی پاراستووه‌، له‌وه‌ش گرنگتر بۆ له‌به‌رده‌م ئێستای به‌ بابه‌تبوونماندا بە نەبينراوى دەمێنێتەوە. پێموايە وا پێويست دەكات لە سۆسيۆلۆژياى ڕۆشنبيرى كورد و لەو شێوە گوتارە بگەين، كە لە پانتاييە مرۆيى – ميدياييەكەدا بەرهەمى هێناوە و وەك تاكە مۆدێلى باو و ويستراو سەپاندويەتى.

گوتارى باوى ڕۆشنبيریی ئێمە له‌وه‌ تێگەيشتووە، ئەو فۆرمەى بيركردنەوە كە ڕووكەشييە و بڕياردانى تێدايە (بەتايبەت بڕيارى پێشينە)، كاريگەرى زۆر زياترە لە هه‌ر بيركردنەوەيەكى پەتى و سیستەماتیک و مێتۆدييانە، كه‌ بابەتی قسه ‌له‌سه‌ركراو بە كراوەيى بەجێدەهێڵن.

گوتارى باوى ڕۆشنبيریی ئێمە له‌وه‌ تێگەيشتووە، ئەو فۆرمەى بيركردنەوە كە ڕووكەشييە و بڕياردانى تێدايە (بەتايبەت بڕيارى پێشينە)، كاريگەرى زۆر زياترە لە هه‌ر بيركردنەوەيەكى پەتى و سیستەماتیک و مێتۆدييانە، كه‌ بابەتی قسه ‌له‌سه‌ركراو بە كراوەيى بەجێدەهێڵن. ڕۆشنبيرانى سەر بەم گوتارە – لەگەڵيشياندا مرۆڤە ئەكادێمييە بێ ناسنامە زانستييەكان – لەو باوەڕەدان بيركردنەوەى ڕووكەشى و بڕياردەر، ڕێگەى ئه‌وه‌ی پێدەدا لە ناوەندى كۆمەڵايەتى و لە تێگەيشتنى كارپێكراوى نێو كايەى سياسيیدا (بێ جياوازى نێوان بكەرەكانى ئەم كايەيە)، وەك دەستەبژێرى باوى ڕۆشنبير خۆى بنوێنێ. چونكە ئەو پەرچەكردارەى لە “بڕياردان”دا دێتە ئارا، هاوشێوەى ئەوەيان دەبێ كە لە زەمينەى كۆمەڵايەتى ناجێگير و خودان ناسنامەى ناڕوونى سياسى بوونى هەيە.

 بۆ سەپاندنى فۆرمە پەيڕەوكراوەكەى بيركردنەوە “ڕۆشنبير – ئەکادێمی” بەردەوام گشتگيرانە دەدوێ؛ بۆ نموونە دياردە لۆكاڵييەكان لە دوتوێى چەمك و دەستەواژەى گشتييەوە بخوێنێتەوە ( تەماشای سەرەدەرییەکانی بکە لەگەڵ ديموكراتيزەكردن، گەندەڵى، نەيار، دەسەڵات، هەرێم، حزبى كوردى، ئۆپۆزسيۆن، ئافرەت، ئایين، ستەمكارى و…هتد). بەمەش ئەم تەرزەى ڕۆشنبير، لەڕووى سۆسيۆلۆژيەوە، ناسنامەيەكى گرۆییانە دروست ناكات، ئەوەندە لەگەڵ هەنوکەی “بەردەنگ”ى گوتارەكەیدا خۆى دەگونجێنێ و به‌ گوێی ده‌كات. به‌ده‌سته‌واژه‌یه‌كی تر تەماهى لەگەڵ ئەو تێگەيشتنەدا دەكات، كە لە ئاستە كۆمەڵايەتیيەكەدا بوونى هەيە. ئەوە نەبێ، ئەو لەڕێگاى گەمەى زمانەوانى و شارەزابوون لە بە سيستەماتيك نيشاندانى بۆچوونەكان – بێگومان لەمەشدا گشتگيربوون هاوكارى زۆرى دەكات – ئەم دياردانە لەنێو گوتارەكەى خۆيدا بەرهەمدەهێنێتەوە و بە ئاسانى سنوورى قەبوڵكردنى بڕيارەكانى لەبارەيانەوە فراوان دەكات.

مرۆڤى ئەكادێمى ئێمه‌، بە پشت بەستن بە گشتگيركردنەوەی دياردەكان دەخوێنێتەوە و خۆى دوورخستۆتەوە لەوەى ميتۆدييانە لێيان بدوێ و ئامانجى ئەوە نەبووە تيۆريزەيان بكات. چونكە بەمە ستانداردە ئەكاديمييە کلاسیکییەکان، کە کەسێتییە زانستییەکەی لەسەر بونیادنراوە، تێدەپەڕێنێ؛ (ميتۆدگەرايى، دياريكردنى تێز و ئەنتى تێز، گرفت و چارەسەر و ئەنجامگيرى و…هتد). ڕێك ئەمەيە كارى ئەو و لەنێویدا میکانیکییانە کوڵاوە، با بەرهەمی ئەم کوڵینەش، کەمترین جێکەوتی هەبێ. كاتێكیش ئەنجامى نادات، ئيدى گوتارى ئەو لەمەڕ كێشە هەنوكەييەكان ئاوا دەردەكەوێ، كە لە ڕاگەياندنەكاندا دەيبينين: “بەكاردەبردرێ” و نازناوى شارەزا و پسپۆڕ دەخرێتە پاڵ ناوەكەى. بەمەش لە تێگەيشتنى باودا مەرج نابێ ئەم مرۆڤە وەك توێژەرى زانستى بناسێنرێ، تەنانەت زۆر گرنگيش نابێ ئەوەى دەيڵێ پشت بە ريفرێنس ببەستێ و ستاتیک و شيكارى وردى داتاكان و دۆكيومێنتەكان و شرۆڤەكردنيان بێ. لەسەرووى هەموو ئەمانەشەوە مەرج نييە بيركەرەوە بێ، تەنيا مەرجى قسەكەريى گرنگە؛ ئەو شتانە بڵێت، كە باون و زانراون. ئەمە گوتارێکە گفتوگۆى عاميی– ميديياييانە، چۆنيیەتى گەڵاڵەبوون ئاراستەكانى دياريكردووە. ئەو وێنەيەك دەبێ بۆ چوارچێوەيەكى دياريكراو؛ مرۆڤێكە لە ناوەڕۆك ميديایى و بە بەرگ ئەكاديمیست، نووسەرى ڕۆژنامە، ستون نووس و …هتد. تا واى لێهاتووە – لە فەزاى گشتيدا – بەدەگمەن گوێگر و خوێنەرى ئەم تەرزە مرۆڤە ده‌زانن پسپۆڕيی دروستیان لە چ بوارێكدا هەيە و كەمتريش كەسانێك دەبينى كارى ” زانستى – ئەکادێمی” ئەوانى خوێندبێتەوە.

          كاتێك مرۆڤى ئەکادێمی بەو وێنەيە ڕازى دەبێ كە بۆى دەكێشرێ، ڕاستەوخۆ دەست لە ناسنامەى هەڵدەگرێ و ئەو ناسنامەيە قەبوڵ دەكات كە لە پانتايى ئێمەدا بۆ “مرۆڤى ڕۆشنبير” چێ كراوە. بەڵام لەوێدا ناتوانێ ڕووبەڕووى ڕۆشنبير ببێتەوە؛ كە ئەو خۆى ئەو فەزايەى بيركردنەوە و خستنەڕووى بابەتى داڕشتووە و چەمك و دەستەواژەكانى – لە پەيوەندييەكى ديار و ناديار بە دەسەڵاتەوە – داهێناوە و بە جۆرێك كۆنترۆڵى كردوون، كە بە سانايى دەتوانێ هەر گەمەيەكيان پێ بكات خۆى و پەيوەندييەكە دەيخوازێ. بۆيە مرۆڤى ئەکادێمی ناسنامەيەكى شێواوى دەبێ و ناتوانێ بەقەد “مرۆڤى رۆشنبير” بەردەواميى بە كارايى خۆى بدات و کارەکتەر بێت. تەنيا ئەو كاتە نەبێ، كە تا بۆى بكرێ، خۆى لە ئەكادێميبوون دادەماڵێ و هەمان سيستەمى داڕشتن و گوزارە بەكاردەهێنێ و خۆى وەك مۆدێلى باوى رۆشنبير، پێ قەبوڵ دەبێ.

مرۆڤى ئەکادێمی ئاوا دەكات، بۆ ئەوەى لەنێو فەزاى كورديدا وەك مرۆڤى كارا ببينرێ. ئاوا، نەك هەر گشتگيرانە دەدوێ، بەڵكو خۆشى گشتگير دەكاتەوە و ڕێگە بە هەموو كەسێك دەدات – بەبێ هيچ پێوەرێك و ئەتەكێتێكى ئەکادێمی و زانستى – بير لە ئەكادێميی بوون بكەنەوە؛ وەك پايەيەكى كۆمەڵايەتى، وەك فۆرمێكى دەسەڵاتدارێتى، وەك مۆدێلێكى ويستراوى كۆمەڵگەى سياسى. ئيدى بكەرەكانى نێو ئەم كۆمەڵگەيە، تەواوى ئەندامانى حزبەكان، دەخوازن بەرگى ئەم جۆرەى مرۆڤ بپۆشن (بڕوانە ڕێژەى ئەو كەسايەتيیە سياسيیانەى لە دواى ڕاپەڕين تا ئێستا هاتنە نێو دەزگا ئەكادێمييەكان و بوونەتە هەڵگرى بڕوانامەى باڵا). مرۆڤە ئەكادێمييە ناسياسييەكانيش، بە ئاسانى دەتوانن لە بازاڕى كارى سياسيدا، پلەوپايەى باڵايان دەست بكەوێ (تەماشاى هەڵگرانى بڕوانامەى ئەکادێمی باڵا، لەنێو تەواوى ليستە پەرلەمانييەكانى ئەم چەند خولەى دوايى پەرلەمانى هەرێمى كوردستان بكە). لەو پرۆسەيەشدا، مرۆڤى ئەکادێمی وەك توێژەرێك پێويست نيیە و توانا زانستييەكانى هيچ دەرناكەوێ. ئەم توانایانە نه ‌بۆ خۆی و نه‌ بۆ به‌كاربه‌ره‌كه‌شی بابه‌ت نین. بەڵكو وەك يەكەيەكى خۆنواندنى ڕەوتە سياسييەكان دەمێنێتەوە، نەک هيچى دی. ژمارەيەك، ناوێكى بێ ناوەڕۆك لە ليژنەى ئەوتۆ دادەنرێ و كارى ئەوتۆى پێ دەسپێرن، كە پەيوەندى بە پسپۆڕييە زانستييەكەى ئاسمان و رێسمانە ( بۆ نموونە – هيوادارم نموونەكەم دروست ئاوا نەبێ و کەسێکی ئاوامان نەبووبێ– پسپۆڕ بێ لە ئەدەبى کلاسیکی كوردى و بكرێتە ئەندامى لێژنەى چاودێرى يەكەكانى نيشتەجێ كردن، يان نەوت و غاز!!) .

٤

مرۆڤى ئەکادێمی له‌نێوان وتاردانی ڕۆشنبیرانه‌ و توێژينەوەى زانستیدا

دەبێ چ شتێك بێ مرۆڤى ئەکادێمی لە مرۆڤێكى  ترى قسەكەر لەناو كۆمەڵگە جيابكاتەوە؟ چ شتێك، لە‌و كارا كۆمه‌ڵایه‌تییه‌ی پێی ده‌گوترێ ڕۆشنبیر جيای دەكاتەوە؟ بەكورتى وەك كەسانى پسپۆڕیش گوتوويانە، جياوازى مرۆڤى ئەكادێمى لەگەڵ ئەوانيتر ئەوەيە: ئەوان سەرەدەرى لەگەڵ بزاوتى ڕووكەشييانەى بابه‌ت و دياردەكان دەكەن. ئەويش مێتۆدییانە– لەميانەى خوێندنەوەى بزاوتى بونيادە قووڵەكانەوە- دەخوازێ حەقيقەتى ئەم بابه‌ت و دياردانە بدۆزێتەوە و شرۆڤەيان بكات. ئەمە ئەو ڕووەى مرۆڤى ئەكادێمييە لەزەمينەى ئێمەدا کە تاڕادەيەكى زۆر نەبينراوە. توێژينەوەى زانستى وەک بەرهەمی پیشەی ئەم چەشنە مرۆڤە، نە ڕاپۆرتە و نە وتار و نە ستوونێكى ڕۆژنامە. هەڵوێست وەرگرتن یان پێداهەڵدانيش نييە. خۆ پەيوەنديشى بە گەورەكردن و بچووكردنەوە و بە شانوباڵ هەڵداگوتن و بێبەهاكردنيش نييە، وەک لەناو کۆی گوتاری ڕۆشنبیریی ئێمەدا باوە، تا ئاستێک هێندێکجار وا زەن دەکەم، ئەم چەمکە ئایدۆلۆژییانە، تەواوی گوتارەکە بەڕێوە دەبەن. لە هەمووشى گرنگتر، بەرهەمی مرۆڤی ئەکادێمی، زمانى خۆى هەيە و پشت ڕاستە بە بنەما ئێتیکییەکانی ڤەکۆڵین. توێژينەوەى زانستى، ئەگەر بخوازين لە سنووری پێناسەيەكى فەرهەنگييانەى بمێنینەوە، بريتييە لە لێكۆڵينەوە و ئەزموونكارى بۆ گەيشتن بە کۆمەڵێک فاکتەوە، يان پێداچوونەوە بەوەى بە حەقيقەت زانراوە بەمەبەستی فراوانكردنى تێگە و دەوڵەمەندكردنى خەزێنەى مەعريفی (تيۆرى و پراكتيكى) كۆمەڵگە لەبارەی بابەتی لێکۆڵراوەوە. دۆزينەوەى حەقيقەت! داهێنان و بيردۆزيى، تيۆريزەكردن، پێداچوونەوە بە تيۆر و ياسا و ڕێسا قەبوڵكراوەكان، بەپێى تێگەيشتنى نوێ و خوێندنەوەى ئەزموونى ئەم تيۆر و ياسايیانە لە بوارى كردەكيى و دياريكردنى خەوش و كەموكوڕييەكانى. كەواتە چالاكييەكى زانستى سیستەماتیکە، شێوازێكى بيركردنەوە و گەڕانى ورد و بەرنامە بۆ داڕێژراوە. ئەمە پێناسەيەكى تابڵێی سادەى توێژينەوەى بەرهەمهاتووە لەسەر دەستی مرۆڤی ئەکادێمی.‌ نامەوێ بچمە نێو ئەو بوارانەى دی پەيوەست بەم مەسەلەيە، وەك پێگەى عەقڵ له‌ توێژينەوە و مەبەست لە ميتۆدى بابەتگەرايى و شێوازى زانستى خستنەڕووى بابەت و چییەتی چەمكى حەقيقەت و…هتد. چونكە لە بابەتى بنەڕەتيمان دوور دەخاتەوە كە بريتييە لە بينينەوەى سۆسیۆلۆگییانەی ئەو ڕەهەندەى كارى مرۆڤى ئەكادێمى ئێمە، كە توێژينەوەيە.

ئەم كايەيە، لاى ئێمە، سێ بەربەستى لەبەردەمە، يەكێكيان قەوارەی دەزگاى ئەكادێمى خۆی و تێگەيشتنییه‌تی بۆ ڤەکۆڵین. ئەوەيتر: تواناى مرۆڤى ئەکادێمی ئێمە بۆ توێژينەوە و ئاستى ئێپستمۆلۆژییانەی کارەکەی. سێيەميش قەيرانى بەهاكانه‌ لەم توێژينەوەسازيیەدا.

ئەم كايەيە، لاى ئێمە، سێ بەربەستى لەبەردەمە، يەكێكيان قەوارەی دەزگاى ئەكادێمى خۆی و تێگەيشتنییه‌تی بۆ ڤەکۆڵین. ئەوەيتر: تواناى مرۆڤى ئەکادێمی ئێمە بۆ توێژينەوە و ئاستى ئێپستمۆلۆژییانەی کارەکەی. سێيەميش قەيرانى بەهاكانه‌ لەم توێژينەوەسازيیەدا.

پێشتر، له‌ شوێنێكی دی، هەر لە ژنەفتن، ئه‌و بۆچوونه‌مان دەربڕیوە‌، كه‌ دەزگاى ئەکادێمی ئێمه‌ هەر لەدەستپێكییەوە، توێژەری خستۆتە ژێر باری سيستەمى پەيوەندييەكانى خۆيەوە (توێژەر و دەزگا، توێژەر و وانەبێژى پسپۆڕ، توێژەر و سەرپەرشتيار، توێژەر و بنەما دۆگماكانى مێتۆدۆلۆژیای لێكۆڵينەوەى پەيڕەوكراو). ئەو پەيوەندييانەش لە سادەترين هەڵسەنگاندندا دەردەكەوێ، ڕێگە بە سەرهەڵدانى “تاكگەرایى ئەكادێمى” نادات. ئەگەر وا ئەو فۆرمەى تاكگەرايى بناسێنين، مەبەست لە دروستكردنى توێژەرى ئەكادێمی، کاری تیۆریی و بيركردنەوەى ڕەخنەگرانەيە لە چوارچێوەیەکی سیستەماتیکانەوە. ئەمە ئەوەیە مەودای ئەوە دەڕەخسێنێ ئەم توێژەرە، كەسێتى زانستى سەربەخۆى هەبێت. چاوەڕێى ئەوەى لێبكرێت، جياواز لە هاوپسپۆڕييەكانى لەو دیسپلینەی پسپۆڕييەتی بدوێ و تيمە و سەبژێکت و پرسيارەكانى دابڕێژێ. كەچى ئەوەى لەو دەزگايانەدا تێبينى دەكرێ، جەختكردنەوەيە لەسەر “هاوشێوەبوونى ئەكادێمى” توێژەران لە بوارە پسپۆڕييە هاوشێوەكاندا. بە تايبەتيش كە ميتۆدى پەيڕەوكراو، ئەم تێزە تۆکمە دەنوێنێ. تاوای لێدێت بەهاى زانستى توێژينەوەكان لەو هاوشێوەييە دابێ. چونكە پێوەرەكانى هەڵسەنگاندنى ئەو كارانە نەگۆڕن. عەقڵيەتى ئەكادێمى دەزگاییانە كۆنتڕۆڵى كردوون. بێگومان ئەم لێكچوونە دەگەڕێتەوە بۆ ئەو باوەڕەى سيستەمە ئەكاديمييەكە هەیەتی. تێیدا بيركردنەوەى عەقڵی و ڕەخنەییانە، پرسى سەرەكى پەيوەندييەكانى توێژەر، بە دەوروبەرەكەى نييە. بەڵكوو پابەندبوون و پاراستنى چوارچێوەى پەيوەندييەكان پرسە بنەڕەتييەکەیە. ئيدى بيركردنەوە دەبێ گەواهيدەرى ئەو پابەندييە بێت، نەک پرۆسێسێکی سیستەماتیکانەی سەربەخۆ.

لە تێگەیشتنێکی ئاوا بۆ مرۆڤی ئەکادێمی ئێمەمانان و ئەو پێناسە کۆنکرێتییەی کارەکتەرەکەی، بەرهەمى ئەو –لەئاكامدا– جۆرێك لە كەڵەكەبوونى پێوە ديارە. بەڵام –تا ئەو ڕادەيەى ميتۆدى پەيڕەوكراو ڕێگە دەدا– زێتر بريتييە لە كەڵەكەبوونى زانيارى لەبارەى كايەی زانستيی ئەو دیسپلینە بەرتەسکەی بڕوانامەکەی لەبارەوە وەرگرتووە. چونكە ئەمجۆرە پەسەندكراوەى توێژينەوە، زێتر بريتييە لەپۆلێنكردن، وەسفکاریی و فۆرمبەندكردنى زانيارييەكان. هەر لەبەرئەوەيە زۆرجار لەپشت ئەو زانيارييە پۆلێنكراوەنەدا، كڕۆكى بابەت پەنهانە و قەوارەى سەربەخۆ وەرناگرێ و پرۆسەى ناسينى دياردەى لێكۆڵراوە لەدەرەوەى تواناى عەقڵى و ميتۆدييەكانى توێژەر دەبێ، با بە باشيش پابەندى “ڕێساكانى مێتۆدۆلۆژیای زانستى” بەو فۆرمە کلاسیکییەی تا ئێستا باوە، بووبێ. خۆ كاركردن لەسەر ئەو ناسينە بە ئەركى ئەو نەزانراوە و دەزگاى پەيوەنديدار داواى لێناكات بچێتە ئەم ئاستەوە. دەزگای ئەکادێمی ئێمە هەرگیز ئیش لەسەر پەروەردەکردنی ڕەهەنەدی تیۆریزەکاریی کارەکتەرەکانی خۆی ناکات و بەهەندی وەرنەگرتووە. هەر بۆيە توێژەرى هەرە باش و زانستیی ئەوەيانە كە پڕ لە زانيارييە، نەك توێژەرى ئافریدەکاری پرسیار و پەيڕەوكارى مێتۆدى سەربەخۆ، كە ڕوانگەى ئیپستمۆلۆژییانەی خۆى هەيە و ڕێگە بە خۆى دەدات بابەتى لێكۆڵراوە بناسێ و تيۆريزەى بكات. ئەم كەسانەى دوايى ئەگەر هەبن، زوو – لەلايەن دەزگاكەوە – کۆمەڵایەتییانە هەوڵى كۆنتڕۆڵكردنيان دەدرێ؛ يان بە لەڕێلادەر و دەرچوو لە “عورفى ئەکادێمی” تۆمەتبار دەكرێن، يانيش لەنێو ئەو تۆڕە ڕۆتينەى دەزگاكە پێيەوە پەيوەستە، ون دەکرێن. ئاساییشە ئەگەر هێندێکیان وەک شێت و نەخۆش وێنا بکرێن. ئيدى توێژەرى تەندروست ئەوەيانە كە بە پابەندييەكەى خۆيەوە، پلەكانى توێژەرى دەبڕێ تا دەبێتە پسپۆڕى هەرە باڵای ئەكادێمى لەو كايە زانستييەی بە مردوویی لە فەزای ئێمەدا دێت و دەچێ.

له‌ ئێستادا، ئه‌م چه‌شنه‌ ده‌زگایه‌ی به‌رهه‌مهێن و به‌كاربه‌ری مرۆڤی ئه‌كادیمی ئێمه‌؛ به‌رهه‌مهێن بۆ ئه‌وانه‌ی لێره‌ ده‌خوێنن و پسپۆڕی وه‌رده‌گرن و به‌كاربه‌ر بۆ ئه‌وانه‌ی له‌ ده‌ره‌وه‌ دێنه‌وه‌ له‌ كه‌مترین ماوه‌دا، ئه‌گه‌ر نه‌گه‌ڕێنه‌وه‌، ماڵی ده‌كرێن، ده‌زگایه‌كی خۆكوژه‌. له‌وه‌ش مه‌ترسیدارتر ڕێگا به‌ گوتاره‌ باوه‌ پڕ لە ئیگۆیە ڕۆشنبیرییەکە ده‌دات، به‌رده‌وام بێ له‌سه‌ر ڕه‌وایه‌تی قۆرخكردنی قسه‌كردن له‌بارەی جیهانی ئێمه‌. ڕۆشنبیرییه‌ك، لەزۆربەی کاتدا، ئاستی ناسراوێتییه‌كه‌ی سنووری شار و هه‌رێمێك بڕ ناكات و گوتارێكی پڕ له‌ ئایدۆلۆژی به‌رهه‌مدێنێ. گوتارێک كه‌ پێویستی به‌ چه‌ندین ده‌زگای ئه‌كادێمی پرۆفێشناڵ و خودان ستانداردی باوه‌ڕپێكراوه‌، بتوانێ هه‌ڵیبوه‌شێنێته‌وه‌ و چه‌مك و ده‌سته‌واژه‌ مینڕێژكراوه‌كانی بته‌قێنێته‌وه‌. جارێكی دی تێگه‌ی باوی بەردەنگەکانی لە ئاستی تاک و کۆ (خزانی بۆ نێو سیستەمی خوێندن) دابڕێژێته‌وه‌. له‌ ئێستادا، كێ ئه‌م كاره‌ ده‌كات؟ هیچ كه‌سێک.

سەرچاوەکان:

Haskins, Charles Homer (1957)

– The Rise of Universities, Cornell University Press

Kagan, Jerome (2009)

• The Three Cultures – Natural Sciences, Social Sciences, and the Humanities in the 21^st Century, Cmabbrudge University Press.

مینوا، جورج (٢٠٠٥)

–        الكنیسة والعلم – تاریخ الصراع بين العقل الديني و العقل العلمي، ترجمة: موریس جلال، دمشق: المؤسسة العربية للتحديث الفكري.

The post وەهمی مرۆڤی ئەکادێمی له‌ زه‌مینه‌ی ئێمه‌دا appeared first on ژنەفتن.

دەروازە

   لەدواى هاتنى ئيسلام و بوونى بە ئايينى باڵادەست لە كوردستان، زمانى كوردى خۆى لەبەردەم باوەڕێك و پيرۆزييەكدا دۆزييەوە كە پەيوەستە بە جيهانبينیی و هێزى دەلالەتييانەى زمانى عەرەبييەوە؛ زمانێك كە ئيدى دەروازەى بە گەردوونبوونى بەسەردا كرابۆوە. بۆيە بۆ كوردى و زمانەكانى تريش گوزارشت كردن لە باوەڕدارى و پيرۆزييە ئايينيیەكان جۆرێك لە ڕووبەڕووبوونەوەى تێدا بوو. لێرەوە ئەو توانايەى بە زمانى دەسەڵات درابوو، هەروەها خۆنواندنى دەسەڵاتييانەى كورد لە پانتايى خەلافەتى ئيسلامى و ئەو گۆڕانە مەزهەبييانەى لە زەمينەى كوردى ڕوويانداوە، لەگەڵ پێكهاتەى كۆمەڵايەتیى كورد و ئاستى تێگەيشتن لە ئايین و باوەڕدارى بەگشتى، كەم تا زۆر ڕۆڵيان لە پێگەى زمانى كوردى لەو گوتارە ئايينيیەدا هەبووە. بێگومان تێگەيشتن لە تەواوى ئەم گۆڕاوانە و ئەم پێگەيە دەتوانێ بەشێك لە مێژووى گەشەسەندنى زمانى كورديمان بۆ دەربخات، بەتايبەت كە لەوێ بەدواوە بەرەبەرە ئايينى ئيسلام جيهانبينى زۆرينەى كوردانى دادەڕشت و دەبووە ئەو كەناڵە باوەڕييەى لەميانەيدا و لەماوەى درێژى مێژووييدا سيستەمە كولتوورييەكەيانى پێكدەهێنا.

  تێگەيشتن لەو پەيوەندييەى نێوان ئايينێكى دەرەكى لەگەڵ زمانێكى نێوخۆيى وەك كوردى بە هانامانەوە دێت بۆ تێگەيشتن لە فۆرمەكانى باوەڕدارى و ئەو دەركەوتە لۆكاڵييانەى دەشێ ئايينێكى هەمەگير هەیبێ و لەئاكامدا سێكتى ئەوتۆى لێ دەربكەوێ، يان كاريگەرى بەسەريانەوە هەبێ، كە تايبەتمەندبوونى خۆيان لە شوێن و كات و زمانەكەوە وەردەگرن و لەنێوياندا دەژين. لێرەوە دەخوازين، لەم توێژينەوەيدا، لەوە بگەين كە چۆن زمانێكى لۆكاڵى وەك كوردى، بە زارە فرەجۆرەكانیيەوە كار دەكات بۆ خۆدۆزينەوە لەنێو باوەڕى ئايينى غەيرە زماندا، كە ئيسلام و عەرەبييە. بۆ ئەمەش دەبێ هەر لە قۆناغى ڕووبەڕووبوونەوەوە دەست پێ بكەين؛ ئەو قۆناغەى زمان لە ئاكامى ژێركەوتن و لەدەستدانى مافى بەكارهێنان لە كايەى ئايينى، خۆى لەگەڵ دراوە نوێيیەكانەوە دەگونجێنێ، تا ئەوكاتەى لەنێو ئايينەكەدا ئاراستەيەك دەدۆزێتەوە لەگەڵ پێكهاتەى ئەو و قسەپێكەرەكانى ڕێك دێتەوە و ئەو هێزە بە زمانەكە دەبەخشێ، كە بتوانێ ديدى ئايينیی و پيرۆزييەكانى ئەوان لەخۆ بگرێ، يان لايەنى كەم لە زەمينە كۆمەڵايەتييەكەدا تێگەيشتراو بێت.   بينينى ئەم وەرچەرخانە لەنێو زمان كارێكى ئەستەمە، بەتايبەت ئەگەر زمانەكە پتر لە ئاستى زارەكيیدا مابێتەوە و نەيتوانيبێ لە سەنتەرە شارستانييەكاندا پێگەى ئەوتۆ بۆ خۆى دروست بكات، كە دەقى نووسراوى پێ بەرهەمبهێنرێ. كاتێك دەقى نووسراويش نەبێ، ئەوا ئەو زانيارييەى هەيە، تەنيا ئەوە دەبێ، كە لەنێو دەقى غەيرە كوردييەوە ياداشت كراوە. لە سەدەكانى ناوەڕاستيشدا ئەو دەقانە پتر عەرەبى و فارسين. ئيدى لەوێشدا زۆر بەدەگمەن لايان بە لاى زمانى كوردى كردۆتەوە. هەر ئەمەش وا دەكات نەتوانين تێگەيشتنێكى ڕوون لەبارەى وەرچەرخانە زمانييەكان لە پانتايى كورديدا گەڵاڵە بكەين. خۆ ئەم ناڕوونيیەش بەشێكە لە پرۆسەى وەرچەرخانەكە و دەكرێ وەك دەرئەنجامێكى بەريەككەوتنى زمانى كوردى و باوەڕێكى ئايينى غەيرە زمان بێت.

The post پيرۆزكردنى زمان<br>كوردیى لەنێوان زمانى ڕەشەخەڵك و زمانى ئاييندا (سەردەمی کلاسیک) appeared first on ژنەفتن.

كوردناسى وەك سيستەمێكى سەربەخۆ

  تێگەيشتن لە كورد و دياريكردنى خەسڵەت و تايبەتمەندييەكانى، ئەو پێناسە گشتييەيە، كە بە بيستنى چەمكى “كوردناسى” بيرى لێ دەكەينەوە و ڕايدەگەيەنين ئەمە ئەو چوارچێوەيەيە كە تيايدا دەتوانين بەسەر كورددا ڕابگەين و لە دووتوێى “نواندن – Representation”مان بۆ گروپە مرۆييەكان و لێكدانەوەمان بۆ ڕەوتى ڕووداوەكان پێگەيان بخەمڵێنين. بەڵام تێگەيشتنێكى ئاوا كورت دێنێ، ئەگەر پێمانوابێ تەنيا بريتييە لە خوێندنەوە و لێتوێژينەوەيەكى پەتى و سەربەخۆ، كە دەخوازێ لەڕێگەى دياريكردنەكەوە وەسفى كوردمان بۆ بكات. بەڵكوو بريتييشە لە بينينى كورد لەخۆيدا و لەنێو جيهاندا، بێ ئەوەى تەنيا پرسى ڕاستى و دروستى ئەو بينينە بەهەند وەربگرين، بەڵكو ئەو قەوارەيە بۆ ئێمە گرنگە كە بەهۆى پرۆسەى بينينەوە بۆ كورد دادەڕێژرێ و دەستنيشانى مەرزەكانى هەموو تێگەيشتنێك و دياريكردنێك و تەنانەت نواندێك دەكات.  

 بۆيە ئەگەر بخوازين پڕ بە مەوداى ئەو گشتگيرييەوە جارێكى تر پێناسەى “كوردناسى” بكەينەوە، دەبێ ئەوەمان لەبير بێ كە كورد وەك دياردەيەكى مرۆيى، بۆچوون و تێڕوانين و وێنا و تەنانەت خەياڵى فرەچەشنى لەبارەوە بەرهەمهاتووە، بە چەندين چەمك و دەستەواژە و دەلالەتى زمانى گوزارشتى لێكراوە. بە كۆى هەموو ئەمانە “كوردناسين” وەك سيستەمێكى سەربەخۆ گەڵاڵە بووە و لەنێو جيهاندا لەسەرەدەريكردن لەگەڵ ئەم دياردەيەدا كارى پێ دەكرێ. لە داڕشتن و چێكردنى ئەم سيستەمەشدا هەم كورد و هەم “ئەوانيتر” بەشدار بوون و كۆمەڵى كوردى – ئەگەر تێزەكەى “كورنەليەس كاستۆرياديس – Cornelius Castoriadis” بەكاربهێنين – خەياڵيانە خۆى بەرهەمهێناوە و ئەوانيتريش بەرهەميانهێناوەتەوە، بە جۆرێك كە ناسينەكە بەم خەياڵەوە بەند دەبێ و ناوكۆيە مێژوويى و كۆمەڵايەتييەكان لەگەڵ پێكهاتە ڕەمزييەكان تێكەڵ بە يەكتر دەبن و سروشت و دەركەوتەكانى سيستەمەكە بەرزەفت دەكەن و ئاڕاستەى دەكەن، تا بەهۆيانەوە “كوردبوون” و ئينتيماى تاكەكان بۆ ئەو بوونە، لەو ڕووتەختەى تێيدان، ماناى خۆى هەبێ و ڕەوايەتى پێبەخشرابێ.

 بەهەرحاڵ، وەنەبێ ئەو سيستەمەى كوردناسين ساكار بێت و بتوانين بە سانايى بيگۆڕين يان هەوڵبدەين دەستكارى دەركەوتەكانى بكەين، بەڵكوو بەحوكمى بەردەوامێتى مێژوويى و ئامادەيى هەنووکەييانەى دياردەكە، كۆمەڵێك خەسڵەتى نەگۆڕى وەرگرتووە و ڕەهەندى ديار و ناديارى ئەوتۆى بۆ دروستبووە، كە هەموو هزرێكى سنووربەند كردووە ويستبێتى لە دياردەكە ڕابمێنێ و تێزەكانيشى نەگۆڕ دەردەكەون، ئيدى بيركردنەوە لەنێو ئەو ڕەهەندانە پەرش دەبێتەوە و ناسێنەرى كورد ناتوانێ خۆى كۆبكاتەوە؛ هەندێكجار پێى وايە تەواو كوردى ناسيوە، كاتێك – بۆ نموونە – باس لە سروشتى كۆمەڵايەتييانەيان دەكات و بە ئاسانى و بە گەڕانەوە بۆ ميتۆدى بەراوردكارييانە، بە سروشتگەلى هاوشێوەيان دەچووێنێ و وەك سيستەمێكى ديار بەرجەستەى ناسنامەكەيان دەكات. هەندێكجاريش وا هەست دەكات شوناسى كوردانە پڕيەتى لە ڕەگەزى ناديار و دابڕانى ئەوتۆ لەگەڵ دەورووبەر كە بە ميتۆدە ناسراوەكانى بيركردنەوە و توێژينەوە تێگەيشتنێكى دروستى لەبارەوە چێ نابێ، بەتايبەت كاتێك لە كايەى ئايينیی كوردى دەكۆڵێتەوە و ڕەگەزى ئەوتۆى تێدا دەبينێ كە دەگمەن و كەم هاوتان، يان لەنێو سيستەمى كولتوورى باوەڕى ئەوتۆى ئايينى هەن كە لە ئێستادا سۆراخێكيان نييە، يانيش تەنانەت داڕشتنەوەيەكى تەواو جياوازى جيهانبينى باوەڕە ئايينيیە باو و ناسراوەكانن.

 لەلايەكى ترەوە، ئەو چەمك و دەستەواژانەى يەكەكانى سيستەمەكەيان بە يەكەوە گرێداوە، هەموو بيركردنەوە و تێڕامانێكى جياواز و هەمەچەشن لەخۆدەگرن و لەنێو سيستەمەكەدا وا دايدەڕێژنەوە كە ڕەوايەتى ببەخشيێتە ناسينە هەمەگيرەكەى كورد. بەمەش ئامێرييانە كار بۆ وەلانان و نەهێشتنى دژايەتى لە بۆچوون و تێڕامان و هاوشێوەكردنى بيركردنەوەكان، تەنانەت ئەگەر هى دوو ئاڕاستەى تەواو پێچەوانەى نواندنى كورد بن، دەكەن. بۆ نموونە: لەنێو ئەو سيستەمەدا خەسڵەتى ڕووبەڕووبوونەوە لە كەسێتى كورد و ئەو توانا نێوخۆييەى بۆتە بەشێكى شوناسيان، لەلاى هێندێك – بەتايبەت ئەوانيترى نەيار بە بوونى كورد – وەك ياخيبوون، ڕێگرى و جەردەيى (لە كۆندا) و ئەنارشيەت و دەرچوون لە دەسەڵاتى شەرعى (لەم سەردەمە) و…هتد دەخوێنرێتەوە، بەڵام لەلاى كەسانى تر – زياتر كورد خۆى و دۆستانى – بريتييە لە ڕۆحى شۆڕشگێڕى و هەوڵى ڕەوا لەپێناو سەربەخۆيى و جەختكردنەوەى لەسەر قەوارەى نەتەوەيى و بونيادنانى و…هتد. 

 ئەم دوو تێزە – كە لە ڕووكەشدا وەك دوو ناسينى تەواو جياوازى كورد دەردەكەون – لە كرۆكى سيستەمەكەدا، تەنيا يەك ڕاڤەن بۆ ئەوەى پێى دەڵێن سروشتى كۆمەڵگاى كوردى و دەخوازن شرۆڤەيەك بۆ ئەم سروشتە بكەن كە لەگەڵيدا ڕەوايەتى ببەخشێتە وێناى دياردە مرۆييەكە لەنێو يادەوەرى چەسپيوى ناسێنەردا، بۆيە دوو تێزەكە هەمان ئاكامى ناديارييان هەيە، كە لەنێو يەك ناوكۆى زمانى و يەك سيستەمى دەلالەتكردندا دەردەكەوێ، ئەوەتا لەهەر دوو باردا وێنەى كورد وێنەى مرۆڤێكى توندوتيژ و نائارام و سەرڕەقە. بەمەش هەردوو تێز كە دەبنە گوتارى سەربەخۆ ئەم خەسڵەتانە وەك نەگۆڕى ناسنامە دەسەپێنن و لەبەر پابەندبوونيان – ديارە مەبەستم گوتارەكانە – بە بەرجەستەكردنى ناسينە نەگۆڕەكەى كوردەوە، دەبن بە يەك. پرۆسەى ناسينيش لە خولگەى خۆيدا دەخولێتەوە و وێناكان دەچنە سەرووى زەمەن و لەنێو كولتوورە هەمەچەشنەكان بەردەواميان پێدەدرێ، تۆ تەماشاى دەقە ئەرمەنى و سريانى و عەرەبى و فارسى و تورك و ميللەت و گروپە ئيتنييەكانى ترى دەوروبەر بكە، هەر لە سەدەكانى ناوەڕاستەوە تا ئەم سەردەمەمان و بە جياوازى ئەو دەسەڵات و گروپانەى لەگەڵ كورددا بەريەككەوتنيان هەبووە، كورد وەك ڕێگر بۆتە حەكايەتێكى ئەزەلى، كە بە بێ جێكردنەوەى لەنێو دەقە نووسراوەكاندا، كوردناسين ماناى دروستى خۆى وەرناگرێ. بەهەمان شێوە شانازى كردن بە ئازايەتى كورد و “بزوتنەوەى نەپچڕاوەى ڕزگاريخوازیی كوردى” سەردێڕى دەقى كوردييە و بۆتە ناسنامەيەك كە تيايدا هەم جۆرى دەق و هەميش ناوكۆييەكەى سنووربەند كردووە و لە هەندێك باردا چۆتە سەرووى ماقوڵيەتى مێژوويى و دان بە زەمەنى مێژوويى و تايبەتمەندى و دەركەوتەكانى نانێت، تا واى لێ دێت مرۆڤى ئەشكەوتى شانەدەريش هەمان ئەو تێڕوانين و هەڵوێستانەى هەبووە كە ئێستا هەمانە!!

 بێگومان ئيشكردنى ميتۆدييانە لەسەر ئەو سيستەمە تۆكمەيە و وردكرنەوەى مانا و گوزارشتەكانى پشت چەمك و دەستەواژەكانى ناساندن، كارێكى فرە ئەستەمە؛ زۆربەى جار نە كورد خۆى و نە ئەوانيتريش قەبوڵى ئەم جۆرە ئيشە ناكەن، پێيانوادەبێ ئەمە نەك هەر هەڵوەشاندنەوەى سيستەمى كوردناسينە، بەڵكو ڕووخاندنى شوناسێكيشە كە بوونى كوردى لەنێو جيهاندا پێ ديارى دەكرێ، بوونێك كە خراوەتە نێو بۆتەى ئەو حەكايەتانەى جومگە بنەڕەتييەكانى سيستەمەكە پێكدێنن و كەسێتى وەرگرى ناسينەوەكەى پێ داڕێژراوە‌، تا ئاستێك كە گێڕانەوەى ئەو حەكايەتانە بۆ كوردان و بۆ ئەوانى تريش قەبوڵكراو و ئاسودەبەخشە. دەستپێك و كۆتايى و ڕووداوەكانيان ڕوون و ئاشكران، لەبەر ئەوەشە بەردەوام دەگێڕدرێنەوە، بەڵام نەك بۆ دروست كردنى هۆشيارييەك لەبارەى كوردەوە، بەڵكو بۆ هێشتنەوەى گوێگر لەو حاڵەتى متبوونەى لە بەرامبەر بە ناسينى كورددا هەيەتى و پارێزگاری كردن لە سيستەمى ناسينەكە. ديارە كە كورد بە جۆرێك و ئەوانيتر بە جۆرێكى تر دەيگێڕنەوە، بەڵام هەموويان ئەوەندەيان گێڕاوەتەوە كە بوونەتە ئامرازى خەواندن و بێئاگاكردن، ئەمەش وادەكات مەبەستى پشت حەكايەتەكان، جا گێڕەرەوەكەى كورد بێ يان عەرەب يان فارس يان…هتد، بێتەدى. تا ئەوكاتەش حەكايەتەكانى ناساندنى كورد وەك خۆيان بمێننەوە ئەوا سيستەمەكە وەك خۆى دەمێنێتەوە و كاريگەرى دەبێ بەسەر هێشتنەوەى ڕەوتى ڕووداوەكان بە چەقبەستوويى، كە – بۆ نموونە – لە پەيوەندى گرێدانى نەتەوەكانى دەوروبەر بە كوردەوە بريتى دەبێ لە ڕووبەڕووبوونەوە؛ ڕووبەڕووبوونەوەيەكى كلاسيك كە هەمان ئەو بيانوو و بەهانانەى لەپشتە پێشتر هەبووە و تا ئەوكاتەى گێڕانەوەى كورد وەك خۆى بمێنێتەوە ئەگەرى سەرهەڵدانەوەى دەمێنێ، چونكە دوورە لەو مانايەى لە جيهانى مۆدێرندا ڕووبەڕووبوونەوەى گروپە ئيتنييەكان هەيەتى. هەر بۆيە هەر گۆڕانكارييەك لەم گێڕانەوەيە، لە دەستپێكەكەى، ناوەڕۆكەكەى، ئاكامەكانى، وێناى پاڵەوانەكانى و ئەو حەماسەتەى بەرهەمى دەهێنێ و…هتد، ڕاستەوخۆ گوێگرە خەوتووەكان بێدار دەكاتەوە، بێزاريان دەكات و دووچارى دەردە بێخەوييان دەكات. بۆيە تا نەتوانى حەكايەتێكى تر دابڕێژى و بە جۆرێكى تر كورد بناسێنێ، ئەستەم دەبێ گۆڕانەكانى نێو حەكايەتە ئۆرگيناڵەكە قەبوڵ بكرێ. خۆ داڕشتنى حەكايەت بە مەبەستى ناسين و ناساندن كارێكى ئاسان نييە، زەمەنێكى دوور و درێژ و هەڵوەشاندنەوەى خەياڵدانێكى كەڵەكەبووى پێويستە، لەمەش گرنگتر سڕينەوەى وێناكان و وردكرنەوەى چەمك و دەستەواژەكانى پێويستە. كە ئەمە تائێستا نەكراوە، ئيدى كوردناسى لە چوارچێوەى ئاڕاستە باوەكانەوە خۆى هێشتۆتەوە و زنجيرەى پەيوەندى بە زەمينە كۆمەڵايەتييەكان نەپساندووە. 

ئەگەر تيۆر بريتى بێت لە تۆڕێكى ڕێكخراو و تێكچڕژاوى بيروڕا، كە هەوڵى شرۆڤەكردن و ڕاڤەكردن و تەنانەت وێناكردنى حەقيقەت دەدا، ئەوا بێگومان تيۆريزەكردنى كورد خۆى لە داڕشتنى تۆڕێكى ئاوا دەبينێتەوە، كە هەوڵدەدا لە ميانەى گرێدانى تێز و بۆچوونە جياوازەكان لەبارەى ماهيەتى كورد بەيەكەوە، مانايەك بە حەقيقەتى ئەم گروپە ئيتنييە لەخۆيدا بدۆزێتەوە.

 بە گەڕانەوەى بۆ بابەتى بنەڕەتى دەڵێين ئەو ئاڕاستانەى تا ئێستا لەبوارى كوردناسيدا چاڵاك بوونە زۆرن و سەرچاوە و پاشخانى جياوازيان هەيە، بەشێكى كەمى بەرهەمەكە نێوخۆييە و بەشە زۆرەكەى پەيوەستە بەو جوگرافيا مرۆيى – كولتوورييەى كوردى تێدا دەژى و لەنێويدا پەيوەندييە تێكچڕژاو و هەمەچەشنەكان، بەتايبەت پەيوەندى نێوان سەنتەرێك كە خۆى بە پێشكەوتوو دادەنێ لەگەڵ كەنارێك كە وەك تەنێكى ناجێگير دەركەوتووە، پرۆسەى وێناكردن و نواندنى يەكترى فراوانكردوە. بەڵام كە لەتەواوى كولتوورى بەرهەمهاتوو لەسەر كورد ورد دەبينەوە، درك بەوە دەكەين كە دەشێ تێز و بۆچوونەكان لەنێو دوو ميتۆدى زۆر گشتيدا جێگەيان بكرێتەوە، يەكێكيان قسەكردن بووە لەسەر كورد لەنێو كورددا يان ئەو بازنەيەى تێيدا كوردێتى هەژموونگەرايە، كە دەخوازێ لەميانەى بينينى ئەم دياردە مرۆييە و ژيان لەگەڵى و تەنانەت بەهۆى ئينتيماى ناسێنەر بۆ كوردبوون و تێبينى كردنى بزاوتى لەنێو شوێنكاتەوە، بيخوێنێتەوە، ئەمەش بە هەوڵى تيۆريزەكردنى كورد ناو دەبەين. ئاڕاستەكەى تر ويستويەتى – يان واى نيشاندەدا – لە دەرەوەى كوردبوونەوە چاودێرى ئەو دياردە مرۆييە بكات و مەبەستيەتى حەقيقەتيان بزانێ، بۆيە واخۆى دەردەخات كورد لەلاى ئەودا تەنيا بابەتێكە، وەك هەر بابەتێكى تر، جێگەى بيرلێكردنەوە و بەرهەمهێنانەوەيە.

تيۆريزەكردنى كورد

  ئەگەر تيۆر بريتى بێت لە تۆڕێكى ڕێكخراو و تێكچڕژاوى بيروڕا، كە هەوڵى شرۆڤەكردن و ڕاڤەكردن و تەنانەت وێناكردنى حەقيقەت دەدا، ئەوا بێگومان تيۆريزەكردنى كورد خۆى لە داڕشتنى تۆڕێكى ئاوا دەبينێتەوە، كە هەوڵدەدا لە ميانەى گرێدانى تێز و بۆچوونە جياوازەكان لەبارەى ماهيەتى كورد بەيەكەوە، مانايەك بە حەقيقەتى ئەم گروپە ئيتنييە لەخۆيدا بدۆزێتەوە. بە دەستەواژەيەكى تر، تيۆريزەكردن دۆزينەوەى ئەو ڕەگەزە پێكهێنەرانە دەبێ، كە بە هۆيانەوە كوردبوون وەك جياوازى مانا دەبەخشێ و پرۆسەكە لە خوێندنەوە و بەيەكەوەگرێدانى ئەو جياوازيیە و تايبەتمەندييەكانى، وەك – بۆ نموونە – لە ئاستى زمان، بوون لەنێو مێژوودا، سروشتى خێڵەكييانە، دەركەوتەى باوەڕييانە، تێگەيشتن لە دەسەڵاتدارێتى، ململانێى نێوخۆيى وەك ڕاڤەكارى ڕەوتى مێژووييان، فرەچەشنى لە يەك چەشنيدا و…هتد، دەردەكەوێ. بەمەش لەبەردەم بە حەقيقەتێك خۆمان دەبينينەوە كە پێشتر لە زۆربەى كاتدا، بەهۆى نوێنەرايەتيكردنى ئەوانيتر بۆ كورد، يان تەنانەت ونبوونى دەركەوتەكانى بەهۆى گواستنەوەيان – لەچوارچێوەى گوتارێكى هەژموونگەراوە – بۆ پانتايى بيرلێنەكراوە، ئەمەش لەڕێگەى جەختكردنەوە لەسەر پەراوێزێتى كورد بۆ چەندان سەنتەرى دەسەڵاتى و ئيتنى ترەوە، پەنهان و شاردراوە بووە. 

 بێگومان كە دەڵێين جياوازى و جوێكردنەوەى كورد، مەبەستمان دابڕينيان نييە لەو دەوروبەرە جوگرافى – كولتوورى – مرۆييەى ئەوانى تێدايە و لەگەڵ ئەوانيتردا تۆڕێك پەيوەندى تێكچڕژاويان چنيوە، ئەوەندەى مەبەستمان درك كردنى ئەو خەڵكەيە بە مانا ديار و ناديارى جياوازبوونيان، كە دەشێ هێندێك لەو مانايانە ڕەگەزپەرستانە بێت و هەندێكيشيان پەيوەست بن بە خۆناسين و ئەويتر ناسين و پەيوەندى نێوانيان. ئيدى لێرەوە – بە بۆچوونى ئێمە – تيۆريزەكردنى كورد بريتى نابێ لە دياريكردنى سنوورەكانى جياوازى و بێهاوتايى ڕەگەزە پێكهێنەرەكانى بوونى كوردى، ئەوەندەى ناساندنەوەى ئەم گروپە ئيتنييە دەبێ لەنێو جيهاندا، لەگەڵ دەستنيشانكردنى كاراييان لە چوارچێوەى بەردەوامێتى مرۆڤانەدا. 

 بێگومان ئەمە كارێكى سانا نييە، بەڵكو ئاڵۆز و تەنانەت لەلاى هێندێك لەوانەى ڕووكەشيانە كاريان لەسەر كردوە ئاكامى سامناكى لێكەوتۆتەوە، وەك بە كوردكردنى چەندان شارستانيەت و ژيارى جيهانى كۆن! خۆ بەگشتيش، بە تێڕوانين لە ئەزموونى ئەوانيتر و بێ جياوازى لەنێوان كولتوورە ديناميك و كولتوورە ميكانيكييەكانەوە، دەردەكەوێ خوێندنەوەى ئاوا بەرەو ڕەگەزپەرستى و بەئايدۆلۆژيبوونى گوتارى بەرهەمهاتوو دەڕوا، تا ئاستى سەنتەرگيرى ڕەگەزيى يان ناوچەيى. بەڵام ئەوكاتەى مەبەست لە تيۆريزەكردن هەم ناسينەوەى حەقيقەت و هەميش پێگە دياركردن و قەوارە بەخشين و بەبابەتكردنى جياوازييەكان بێ، ئەوا بوار دەڕەخسێ بۆ خوێندنەوەيەكى جێگير بەڵام ڕەخنەگرانە، بەرهەمهێنى هزر بەڵام نائايدۆلۆژييانە، گوتارێكى هەمەگير بەڵام ناهەژموونگەرا.

 هەرچۆنێك بێت، تيۆريزەكردنى كورد لەپێناو ناسينى پرۆژەيەكى نوێ نييە، بەڵكو مێژووييەكى هەيە و لە سەرهەڵدانى گوتارى نوێى سياسى – ڕۆشنبيرىی كوردى لە كۆتاييەكانى سەدەى نۆزدەوە كەم تا زۆر ئيشى لەسەركراوە؛ بەڵام لەخوێندنەوەى ئەو ئەزموونەى خۆناسيندا، شتگەلێك دەبينين كە دەريدەخەن پرۆژەى ئاوا ئەگەر هێڵە بنەڕەتييەكانى دادەڕێژرا، لە زۆربەى كاتدا لە دەرەوەى خوێندنەوەى دروستى كايەى كوردیيەوە بووە، وەك هەوڵدان بۆ ڕەوايەتى بەخشين بە ناسنامە يان جێكردنەوە لەنێو ناسنامەى هەمەگيردا ( ئارى بوون، هيندۆئەوروپى بوون، زەردەشتيبوون). بەڵام هێڵى هاوبەشى نێوان پرۆژەكان، بڕيارێكى پێشينەيە، ئەويش داكۆكيكردن – زانستى و نازانستى – لەوەى كەوا “كوردبوون” بريتييە لە “ئەويترنەبوون”، بەتايبەت ئەويترێكى هاوسێ كە سەرەدەرييەكى سياسى و كولتووريمان لەگەڵدا هەيە و پتر ململانێ لەگەڵ پرۆژەى خۆناسينى ئەو ڕەنگرێژى دەركەوتە و كاراييەكانى مێژووى مۆدێرنمانى كردووە، ديارە كە مەبەستمان پرۆژەى هەر يەك لە تورك و فارس و عەرەبە. زۆربەمان ئەو چڕكردنەوەى ناسين لە ئەويتر نەبوون، لەنێو دەقە نووسراوەكانى سەدەى بيست لە دەسپێكييەوە بينيوە، بەتايبەت دەقەكەى محەمەد ئەمين زەكى كە بۆتە سەنگى هيستۆريۆگرافياى هاوچەرخى كوردى و تاڕادەيەكى زۆر ميتۆد و ئاڕاستەكانى مێژوونووسيى ديارى كردوە، كاتێك دەڵێ: (( كە لەجێگەى تەعبيرى عمووميى (عوثمانى)، لەفزى (تورك) و (تۆرانى)، لە توركيادا باوى سەند، بە طەبيعەت، وەك ئەفرادى ميللەتەكانى تر، منيش لەناو ئەو كۆمەڵەدا غيرەتى خۆم چاكتر حيس كرد، وە غروورى قەومى مەجبورى كردم كە لە هەموو فرصەتێكدا ئەم حيسسەى خۆم ئيظهار بكەم. بەڵام دەرحەق بە ئەصڵ و تەئريخى قەومەكەم هيچم نە ئەزانى، چونكە تا ئەو وەقتە نە لە مەكاتبدا فكرێكى وامان درابوويەو، نە لەدواييشدا ضڕوڕەتى تەدقيقى تەئريخى كوردمان دىبوو، وە كەليمەى جاميعەى (عوثمانلى)، ئەعصابى قەومييەى هەموومانى تا دەرەجەيەك خاوكردبووەوە)). بێگومان ئەم دەقەى باوكى دووەمى مێژوونووسانى كورد قسەى زۆر هەڵدەگرێ، كە دەشێ لە بۆنەى تردا بچينەوە سەرى، لێرە تەنيا ئەوەندە دەڵێين كە نووسەر دەخوازێ بڵێ ئەو كاتە كوردناسيى بوونى دەبێ كە ئێمە بتوانين لەو ئەويترانە دابڕێين و لەوێوە بە گەڕان بەدواى ناسنامەى پێچەوانە بگەڕێينەوە سەريان. بێگومان ئەمە ڕێگە بۆ هەمەگيرى خۆشدەكات، نەك بەماناى هەمەگيركردنى ڕەگەزیی كوردى، بەڵكو بەماناى ڕاگەيشتنى كورد بەسەر شوێن و كاتێكى جياوازەوە؛ شوێنێك كە خەسڵەتى ئەزەلى وەردەگرێ و دان بە گۆڕانە سروشتييەكان (بۆ نموونە گۆڕانى ديمۆگرافى ويستراو يان نەويستراو) نانێت ( كوردستان)، لەگەڵ كاتێك كە شكۆمەندى و نەگۆڕى ڕەگەزەكان و ستەمكارى هەميشەیی ئەويتر و…هتد، ڕوخسارەكانى ديارى دەكەن ( مێژووى كورد). 

 لەڕاستيدا تائێستاش ئەم ديدگايە بەشێكى ئەو گوتارە ڕۆشنبيريیە كلاسيكييە پێكدێنێ، كە دەسەڵاتى سياسى – بەبێ جياوازى لەنێوان ئاڕاستەكانى و ئاست و جۆرى دەسەڵاتدارێتييەكە – خۆى لەپشتدا ونكردوە و لە ڕووبەڕووبوونەوە نێوخۆييەكانى – ئەوكاتەى پێويستى بە بەيانكردنى ناسنامە بۆ هەڵگرانى هەيە – دەگەڕێتەوە سەرى. ئەمە پەيوەستە بە زەمينەيەكى دەسەڵاتييانە كە دەخوازێ ڕۆڵى يەكلاكەرەوەى لە ئاڕاستەكردنى خەياڵى كۆمەڵايەتيدا هەبێ، بۆ ئەوەى وەك هێزێكى فشار بۆ سەر ناوەندە كۆمەڵايەتييەكە و ئەوانيترى ململانێكار بەكاربهێنرێ. بۆيە ئەم تێگەيشتنە لە خۆناساندن كەمتر ڕێگە بە بەخۆداچوونەوە و هەڵوەشاندنەوەى توێكڵە پێكهێنەرەكانى ناسين دەدات، تەنانەت ئەگەر ناچار ببێ تەنيا ڕووپۆشى دەرەوەى دەگۆڕێ يان ڕێگە بەو ئاستەى گۆڕين دەدات. 

هەر پرۆژەيەكى ناسين، ئەگەر بخوازێ ڕەگەزە ديار و ناديارەكانى ناسێنراو بخاتە ژێر ڕكێفى خۆى، پێويستى بەوە دەبێ لە هەنگاوى يەكەم ئەو بازنە ميتۆدييەى بۆ بدۆزێتەوە كە لەنێويدا دەشێ ناسێنراو سيستەمە تۆكمەكەى خۆى شل بكاتەوە، تا هەر دوو جۆرە ڕەگەز و يەكە پێكهێنەرەكانيان مانا دروستەكانى خۆيان بەدەستەوە بدەن، ئەمەش ئەو كاتە دەبێ كە مەودايەك لەنوان ناسێنەر و ناسێنراو هەبێ و ڕێگە بۆ بابەتگەرايى لە پرۆسەى لێتوێژينەوە خۆشدەكات، دواتريش ناسێنراو دەبێتە ئەو بابەتەى پەيوەندى بە لێكۆڵەر پەيوەستە بەو ويستى زانينەى پێناسەى لێکۆڵیاری پێداوە

  ئەمە لەكاتێكدا هەڵسەنگاندێكى سەرپێييانەى ئەو پرۆژەيە پێماندەڵێ، جەختكردنەوە لەسەر ئەويتر نەبوون هاوكار نەبووە لە ناسينەوەى كورد ئەوەندەى ئەويترى پێناساندووين (بڕوانە وێناى تورك و فارس و عەرەب لەنێو خەياڵە كۆمەڵايەتييەكە)، كە لە زۆربەى كاتدا ناسينێكى پەرچەكردارانە و كرچ و كاڵە و تەمبەڵى عەقڵى پێوە ديارە، بەڵام بووەتە پێوەر بۆ قسەكردن لەسەر خود. بەمەش ماهيەتى كورد پەنهان بووە لەبەردەم خوێندنەوەيەكى ميتۆدييانە، كە بخوازێ لەدەرەوەى ئەويتر نەبوون لە ڕەگەزەكان بدوێ و وردەكارييەكانى كەڵەكەبوونى ئەم خودە بدۆزێتەوە.

ناسينى دەركييانەى كورد يان بە بابەتكردنيان

 بێگومان هەر پرۆژەيەكى ناسين، ئەگەر بخوازێ ڕ ڕەگەزە ديار و ناديارەكانى ناسێنراو بخاتە ژێر ڕكێفى خۆى، پێويستى بەوە دەبێ لە هەنگاوى يەكەم ئەو بازنە ميتۆدييەى بۆ بدۆزێتەوە كە لەنێويدا دەشێ ناسێنراو سيستەمە تۆكمەكەى خۆى شل بكاتەوە، تا هەر دوو جۆرە ڕەگەز و يەكە پێكهێنەرەكانيان مانا دروستەكانى خۆيان بەدەستەوە بدەن، ئەمەش ئەو كاتە دەبێ كە مەودايەك لەنێوان ناسێنەر و ناسێنراو هەبێ و ڕێگە بۆ بابەتگەرايى لە پرۆسەى لێتوێژينەوە خۆشدەكات، دواتريش ناسێنراو دەبێتە ئەو بابەتەى پەيوەندى بە لێكۆڵەر پەيوەستە بەو ويستى زانينەى  پێناسەى لێکۆڵیاری پێداوە.

 بە بابەتكردنى كورد بۆ ناسينەوەى، كردەيەكى كۆنى نوێيە؛ كۆنە چونكە لەگەڵ بوونى مێژوويياندا دەستى پێكردوە، بەڵام لە زۆربەى بار و كاتدا پرۆسەيەكى ناتەواو و پەيوەست بووە بە پاشخانى كولتوورى و ئاستى تێگەيشتن و پێگەيشتنى بەرهەمهێنەرانى ناسينەكە، بۆيە دەبينين دابڕاو و پچڕپچڕە، هێندێك جار تەواو ونە، هێندێك جاريش – بەتايبەت لە ساتى بەريەككەوتن لەگەڵ پانتايى كوردى – دەردەكەوێتەوە و گوزارشت لە هەڵوێستە ئاشكرا و پەنهانەكان دەكات.

  بەڵام لەسەردەمى نوێ، بە حوكمى ئامادەيى كارايانەى كورد – نێگەتيڤ يان پۆزەتيڤ –  و دروستبوونى بابەتێك لەنێو گوتارى سياسى نوێ و هاوچەرخ بەناوى “دۆزى كورد”، لەو پانتاييە جوگرافييەى ئەوانى تێدايە، هەروەها بە حوكمى جێكردنەوەى لەنێو تێگەيشتنى ڕۆژئاواى مۆدێرن بۆ ڕۆژهەڵاتى كلاسيك، دوورايى فرە چەشنى بۆ پەيدا بووە و قسەكردن لەسەر كورد جۆرێك لە بەرداوميى پێوە ديارە، بێ ئەوەى ئەمە بەماناى گەيشتن بە ئاستێكى بەرزى بابەتگەرايى بێت، كە بە هۆيەوە كوردناسى مۆدێرن توانيبێتى لە بڕيارە پێشينەكان و پاشخانە كولتوورييە كۆن و نوێييەكان داببڕێ و ميتۆدە هاوچەرخەكانى بوارى زانستە مرۆڤايەتييەكان تەواو تاقەتيان بەسەر پرۆسەى بە بابەتكردنەكەدا شكابێ.

 ڕەنگبێ بەشێكى ئەو كەمايەتييە بگەڕێتەوە بۆ مانەوەى كورد لە دەرەوەى دەقى نووسراو، چ دەقى خۆماڵى بێ يان هى ئەوانيتر. بە بابەتكردنيش، تا ئەو كاتەى پەيوەستە بەو ميتۆدە فيلۆلۆژييەى تا ئێستا لە ڕۆژئاوا هەژموونى بەسەر خوێندنەوەى پانتايى ڕۆژهەڵاتيدا كردوە، سەرەدەرى لەگەڵ دەقە نووسراوەكاندا دەكات و تەنيا لەنێو دەقدا حەقيقەتەكان دەناسێتەوە. كە كورديش كەمترين دەقى نووسراوى هەبێ، ئەوا دەركەوتنى لەنێو گوتارى ڕۆژهەڵاتناسيدا – بە بەراورد لەگەڵ دەوروبەرەكەى – سنووردار دەبێ، ئەوەى كە هەيە پتر سەرنج و بينينى گەڕيدەييانەيە، ئەمەش وادەكات ئەو كايە زانستييەى زاڵ دەبێ، ئەتنۆگرافيا و ئەنثرۆپۆلۆژيا بێ، بە هەموو ئەو قەيرانە بونيادييانەى وەك زاستى سەربەخۆ لەخۆيان گرتووە. 

 ئەو كولتوورە زارەكييە دەوڵەمەندەى كە كورد هەيەتى و بەشێكى بنەڕەتى ناسنامەكەيانى تێدا جێگير بووە و لەلاى بەرهەمهێنەرانيدا پارێزراوە و يادەوەريانى پێكهێناوە و لە هەندێ شوێنيشدا بووەتە دەقى ئايينى و پيرۆزكراون، زۆركەم لە ناسينەوەى بابەتييانەى كورد سوودى لێ بينراوە. تەنانەت لەنێو گوتارى ڕۆشنبيریی كورديدا بە بێبايەخ زانراوە و مەداى ئيشكردنى ئەم گوتارە كەمترين جێگەى بۆ كراوەتەوە. چونكە كاتێك ئەم گوتارە بانگەشەى بە بابەتكردنى كورد دەكات، كارەكەى پتر تێبينيكردنى سەرپێيى دياردە ئێستاييەكانە و ناگەڕێتەوە سەر يادەوەرييە زارەكييەكە، تەنانەت هەندێكجار ناگەڕێتەوە سەر كولتوورە نووسراوەكەش. بۆيە خەسڵەتى سەرەكى ئەم گوتارە حەماسەتێكى زاتييانە دەبێ و بريتى دەبێ لە هەوڵى خۆناسين (خودگەرايى)، بەڵام بە بيانووى كوردناسييەوە (بابەتگەرايى). تا ئەوكاتەش حەماسەتێكى ئاوا لە پشت خوێندنەوە بێت، كەمتر هزر وەك سيستەمێكى پەتى گوتارى بەرهەمهێنراو لەخۆ دەگرێ. هەر بۆيە دەبينين تێز و هەڵوێستەكانى ئەم دەستەبژێرە لە ناسين هەنووکەییە و ڕەنگە بەيانى – لەلايەن خۆيانەوە – بە ئاگايى و بێئاگايى بونيادەكەى هەڵبوەشێننەوە، نەك بۆ دووبارە داڕشتنەوەى بەڵكوو بەهۆى لاوازى كەرەستەكانى بونيادەكەيان، بۆيە دەبينين ئەم گوتارە بە ئاسانى دەبێتە گوتارى سياسى، ميديا، جەماوەر، بەڵام گوتارى ئەكاديمى پێ دروست ناكرێ. بەمەش كوردناسين لەو ناوەندەدا كەڵەكەبوونێكى نابێ و ئەگەر گوتارێكى نوێ سەرهەڵبدات دەبێ لە خاڵى سفرەوە دەست بە ناسينەوە بكات، ئەگەرنا دەبێ لەنێو هەمان بازنەى حەماسەتييانە بخولێتەوە و هەمان چەمك و دەستەواژەش بەرهەمبهێنێتەوە و چاوەڕێى ئەوەى لێناكرێ ڕوانگەيەكى نوێ بخاتە سەر كوردناسييەوە. 

  بێگومان ئەو شوێنەى لەنێوخۆدا چاوەڕێى ئەوەى لێ دەكرێ لەچوارچێوەى گوتارێكى ئەكاديمى سەرەدەرى لەگەڵ كوردناسيدا بكات؛ سيستەماتيكانە لە كورد بكۆڵێتەوە و ميتۆدێكى ڕوون بيركردنەوەى و تێڕامانەكانى ئاڕاستە بكات، ئەوەيە كە پێى دەگوترێ دەزگاى ئەكاديمى كوردى (زانكۆ، پەيمانگا، ئەكاديميا، سەنتەرى توێژينەوەى زانستى و…هتد)

  ئەو كاتەى خوێندنى ئەكاديمى لە زەمينەى كورديدا سەرهەڵدەدا و بە پشتبەستن بەو كولتوورە ئەكاديمييە ڕۆژئاواييەى لە پانتايى ڕۆژهەڵاتيدا – بە تێگەيشتنێكى جياواز – دادەڕێژرێتەوە، دەست بە كارى توێژينەوەيى دەكات، بەتايبەت لە بوارى زانستە مرۆڤايەتييەكاندا، پشت بەو پاشخانە ميتۆدييە دەبەستێ، كە لەو قۆناغى گواستنەوەيەدا باو بوو. ديارە مەبەستمان هەمان ئەو ميتۆدى فيلۆلۆژييەيە كە پێشتر ئاماژەمان بۆ كرد و كۆڵەگەى بنەڕەتى كاركردنە لەسەر دەق و توێژينەوەى چۆنييەتى پێكهاتن و شێوەگيربوونيەتى.

 لە كايەى ئەكاديمى ئێمەدا، لە زوويەكەوە ئەم ميتۆدە – بە كۆمەڵێك كەم و كوڕييەوە – پەيڕەوى لێ كراوە، بەڵام لە قۆناغى سەرهەڵدانيدا و تا درەنگانێك پتر كارى تاكەكەسييانە و پەيوەست بوو بە كۆمەڵێك توێژەرەوە، كە ئەگەرچى زۆربەيان دەرچووى قوتابخانەى سۆڤييەتى بوون و پاشخانى ئايدۆلۆژى ئەم قوتابخانەيە و تاڕادەيەك حەمەساتێكى نەتەوەگەرا، لەچوارچێوەى باوەڕبوون بە دروشمى بزووتنەوەى ڕزگاريخوازى گەلانى ژێردەستە، زۆربەيانى بەيەكەوە كۆدەكردەوە، بەڵام دەزگايەكى سەربەخۆى ئەكاديمى كۆى نەدەكردنەوە و پاشخانەكە بەشى هەرە زۆرى – ئەگەر نەڵێين تەواوى – حەقيقەتى كوردى لە زۆربەيان پەنهان كردبوو، بە جۆرێك كە باسيان لە كوردێك دەكرد، تەنيا لەنێو ئەو پاشخانەدا دەناسرێتەوە و ماناى هەبوو. هەر بۆيە ئەو كاتەى ئەم پاشخانە ئايدۆلۆژيیە خۆى لاواز بوو يان بۆ  هێندێك لەو كەسانە ڕەونەقى جارانى نەما، ئەو حەقيقەتەى بە كورد درا بوو، لاى چەند كەسێكيان نەبێ كە تا ئێستا كوردناسى خەمى زانستييانە، ماناكانى پێشووى نەما.

هەرچۆنێك بێت، قوتابخانەى سۆڤييەتى بۆ كوردناسى خوێندنەوەى زۆر لەمە قووڵترى پێويستە، كە لێرە دەرەقەتى نايەين. ئەوەندە دەڵێين، كە كاتێك سيستەمى ئەكاديمى كوردى، لە نەوەدەكان، لەم بەشەى كوردستان برەودەسەنێ، ئەم كەسانە زوو لەنێويدا جێگەيان دەبێتەوە و دەبنە بەردێكى بنەڕەتى كايەى كوردناسى ئەكاديمیی كوردى و تاڕادەيەكى زۆر دەستنيشانى هزر و ميتۆدى ئەم كايەيان كردووە. بەڵام لەنێو ئەو دەزگا تازە دامەزراوانە، هەر لەبوارى كاركردن لەسەر كورد، پاشخانە گشتييەكە زياتر پشت ئەستور دەبێ بە گوتارێكى سياسى كە دەخوازێ ببێتە گوتارێكى هەژموونگەرا و حەماسەتێكى نەتەوەگەرا – بەدەر لە ڕاستى و ناڕاستى تێگەيشتن لە نەتەوە – بۆ دۆزينەوەى كورد لەنێو زەمەن و دەركەوتەيان لە چوارچێوەى كايە هەمەچەشنەكانى بوارە مرۆڤايەتييەكان (زمان، ئەدەب، مێژوو، جوگرافيا، ياسا، سۆسيۆلۆژيا، ئەنثرۆپۆلۆژيا، سايكۆلۆژياو…هتد). بەهەمان حەماسەت توێژەرانى سەر بەو دەزگايانە هانايان بردە بەر ميتۆدە باوەكە (فيلۆلۆژى)، تا لە ڕووى تەكنيكييەوە هەوڵە كوردناسييەكانيان فۆرمى ئەكاديمى وەربگرێ، لەڕووى ناوەڕۆكيشەوە بتوانن جێگيرييەك لەنێو پرۆسەى دامەزراندنەوەى شوناسى كوردى، بەپێى تێگەيشتنى پابەند بە گوتار و حەماسەتەكە، بدۆزنەوە. ديارە مەبەستمان لەمەش دۆزينەوەى قەوارەى كوردە لە دووتوێى شرۆڤەكردنى دەقەكانى پەيوەست بەو كايە زانستيانەى ناومان هێنان. بەڵام شرۆڤەكردنى دەقەكانى بەردەست هەر تەنيا بۆ دۆزينەوەى “تاكە ماناى ڕاستەقينە”ى پشت دێڕەكانيان نييە، وەك لە ميتۆدى فيلۆلۆژيدا باوە و كڕۆكى ميتۆدەكە پێكدێنێ، بەڵكو مەبەستێكى تريشيان هەيە، ئەويش خۆماڵى كردنى دەقەكانە؛ تا بوونە مێژووييەكەى ناسێنراو بچەسپێ و لە ناوكۆى گشتيدا ڕەوايەتى هەبێ. بێگومان ئاكامى ئەمەش هەر پابەندبوونە بە ميتۆدەكە، بەوەى جەخت لەسەر سەروەرى و بێهاوتايى كولتوور و گرۆيە مرۆييەكان دەكاتەوە، بە پشت بەستن بە دەركەوتنيان لەنێو دەقدا.

پێكهاتەى دەزگاى ئەكاديمى وەك بەربەستێكى كارى كوردناسى

  بۆ تێگەيشتن لە بەرهەمى كوردناسى دەزگاى ئەكاديمى، هەر ئەوەندە بەس نييە ستراتيژيەتى ميتۆد لە داڕشتنى ناسينەكە بخوێنينەوە، بەڵكو ئەوەى هاوكارێكى زۆر باشمان دەبێ، تەكنيكى دروستكردنى توێژەرى كوردناسە لەلايەن ئەوانەوە، چونكە – وەك كەمێكى تر دەبينين – هەمان ئەو تەكنيكانەن كە بۆ كوردناسييەكە دەزگاكە پەيڕەويان لێ دەكات، تەنانەت بۆ دەرەوەى خۆشى  گوزارشتى خەسڵەتەكانى ناسينەكەى پێ دەكات.

 دەزگاى ئەكاديمى، هەر لە دەستپێكەوە، توێژەر دەخاتە ژێر بارى سيستەمى پەيوەندييەكانى خۆيەوە (توێژەر و دەزگا، توێژەر و وانەبێژى پسپۆڕ، توێژەر و سەرپەرشتيار، توێژەر و بنەما دۆگماكانى ڕێبازى لێكۆڵينەوەى پەيڕەوكراو)، كە ئەو پەيوەندييانەش، لە سادەترين هەڵسەنگاندندا دەردەكەوێ، ڕێگە بە سەرهەڵدانى “تاكگەرايى ئەكاديمى” نادات، ئەگەر وا ئەو فۆرمەى تاكگەرايى بناسێنين كە مەبەست لە دروستكردنى توێژەرى ئەكاديمیى داهێنانى زانستى و بيركردنەوەى ڕەخنەگرانەيە، كە وادەكات ئەم توێژەرە كەسێتیى زانستیى سەربەخۆى هەبێ و چاوەڕێى ئەوەى لێ بكرێ جياواز لە هاوپسپۆڕييەكانى لە بابەتى پسپۆڕييەكەى بدوێ و تيم و پرسيارەكانى دابڕێژێ. كەچى ئەوەى لەو دەزگايانەدا تێبينى دەكرێ جەختكردنەوەيە لەسەر “هاوشێوەبوونى ئەكاديمى” توێژەران لە بوارە پسپۆڕييە هاوشێوەكاندا، بە تايبەتيش كە ميتۆدى پەيڕەوكراو ئەم تێزە پشت ئەستور دەكات، تا واى لێ دێت بەهاى زانستى توێژينەوەكان لەو هاوشێوەييەدا بێ، چونكە پێوەرەكانى هەڵسەنگاندنى ئەو كارانە نەگۆڕن و عەقڵيەتى ئەكاديمیى دەزگا كۆنتڕۆڵى كردوون. هەر ئەمەيە وادەكات، ئەو ئاكام و دەرئەنجامانەى توێژينەوەكانى بوارى كوردناسى لە كايە هەمەچەشنەكاندا پێى دەگەن، زۆر لەيەكتر بچن و بە دەگمەن نەبێ هەست بە جياوازى كەسێتى توێژەرەكانيان نەكرێ. 

 بێگومان ئەم لێكچوونە دەگەڕێتەوە بۆ ئەو باوەڕەى سيستەمە ئەكاديمييەكە، كە بيركردنەوەى داهێنەرانە پرسى سەرەكى پەيوەندييەكانى توێژەر بە دەوروبەرەكەى نييە، بەڵكو پابەندبوون و پاراستنى چوارچێوەى پەيوەندييەكان پرسە بنەڕەتييە، ئيدى بيركردنەوە دەبێ گەواهيدەرى ئەو پابەندييە بێت.

 هەرچۆنێك بێت، بەرهەمى توێژەرەكان – لە ئاكامدا – جۆرێك لە كەڵەكەبوونى پێوە ديارە، بەڵام – تا ئەو ڕادەيەى ميتۆدى پەيڕەوكراو ڕێگە دەدا – بريتييە لە كەڵەكەبوونى زانيارى لەبارەى كوردەوە نەك ناسينيان. كۆكردنەوەى زانياريش بە ماناى گێڕانەوەى ميتۆدييانەى هەواڵى كوردانە (هەواڵى جوگرافى، مێژوويى، سۆسيۆلۆژى، ئەدەبى و…هتد)، چونكە ئەم جۆرە پەسەندكراوەى توێژينەوە پتر بريتييە لە پۆلێنكردن و فۆرمبەندكردنى زانيارييەكان، بۆ ئەوەى بخرێنە سەر ناوكۆيەكى ئەوتۆ، كە تەواوكەرى هەمان ئەو پرۆسەى حەكايەتكردنەى كوردە كە پێشتر باسمان كرد. هەر لەبەر ئەوەيە زۆرجار لە پشت ئەو زانيارييە پۆلێنكراوەنەدا كڕۆكى بابەت پەنهانە و قەوارەى سەربەخۆ وەرناگرێ و پرۆسەى ناسينى دياردەى لێكۆڵراوە لە دەرەوەى تواناى عەقڵى و ميتۆدييەكانى توێژەر دەبێ، با بە باشيش پابەندى “ڕێساكانى ڕێبازى لێكۆڵينەوەى زانستى” بووبێ. خۆ كاركردن لەسەر ئەو ناسينە بە ئەركى ئەو نەزانراوە و دەزگاى پەيوەنديدار داواى لێ ناكات بچێتە ئەم ئاستەوە. هەر بۆيە توێژەرى هەرە باش و زانستى ئەوەيانە كە پڕ لە زانيارييە، نەك توێژەرى ڕەخنەگر و پەيڕەوكارى ميتۆدى سەربەخۆ، كە ڕوانگەى فەلسەفى خۆى هەيە و ڕێگە بەخۆى دەدات بابەتى لێكۆڵراوە (كورد) بناسێ و تيۆريزەى بكات. ئەم كەسانەى دوايى زوو – لە لايەن دەزگاكەوە – هەوڵى كۆنترۆڵكردنيان دەدرێ؛ يان بە لەڕێ لادەر و دەرچوو لە “عورفى ئەكاديمى” تۆمەتبار دەكرێن، يانيش لەنێو ئەو تۆڕە ڕۆتينەى دەزگاكە پێيەوە پەيوەستە، وندەبن. ئيدى توێژەرى تەندروست، ئەوەيانە كە بە پابەندييەكەى خۆيەوە پلەكانى توێژەرى دەبڕێ تا دەبێتە پسپۆڕى ئەكاديمى كايە زانستييەكە، ئەمەش بەو كۆمەڵە توێژينەوەيە دەبێ كە زۆرترين زانيارى نوێ لەبارەى كورد لەخۆ دەگرن.

 لێرەدا – بەر لەوەى قسەمان لەسەر كوردناسى ئەكاديمى تەواو بكەين – دەبێ ئاماژە بەوە بدەين ئێمە قسە لەسەر ئەو توێژەرانە دەكەين، كە لەنێو دەزگا ئەكاديمييەكان ويستى زانين پاڵنەرى كاركردنيانە و بەو ڕووتەختە كەمەى بۆ بيركردنەوە ڕەخساوە، خەريكى توێژينەوەن و دەخوازن كەسێتى ئەكاديميان – بەدەر لە ڕازيبوون يان ڕازينەبوونى ئێمە بەو كەسێتييەيان – سەنگى هەوڵەكانيان بێت، نەك ئەوانەى لە ڕەحمى دەزگاكانەوە بە شێواوى لەدايك بووينە و بوونەتە بارێكى زۆر قورسى سەرشانى ئەكاديميایى كوردى و كارە توێژينەوەكانيان! دوور و نزيك پەيوەنديان بە كوردناسييەوە نييە، ئەوەندەى بەكاربەرى كەمە زانيارييەكى سەرپێیى و كرچ و كاڵن و لەگەڵ سادەترين بنەماى ميتۆدى زانستى پسپۆڕييەكەيان ئاشنا نين، ئەگەرچى هەندێ جار “تەئليفەكانيان” – بە حوكمى پێگەى وەهميانە و سەرمايەيەكى ڕەمزى ساختە لە ناوەندى ئەكاديمى و سياسيدا – وەك بەرهەمى گەورە و ناوازە بانگەشەيان بۆ دەكرێ و ” دەخرێنە بەر باس و لێكۆڵينەوە!” و “بەرز دەنرخێنرێن!”، بەڵام دواى بەكارهێنانى وەك ئەو سەرمايەيە بۆ بەرژەوەندييەكى دياریكراو، ئەو “شاكار”انە زوو وندەبن و ئەوەى دەمێنێتەوە هەڵوێستى ڕۆژانەى ئەم كەسانەيە نەك تێز و بيروبۆچوونەكانيان. ئيدى بە مانەوەى ئەم بارە قورسە، چارەنووسى زانستى زۆرێك لەو دەزگايانە لە ناوەندى ئەكاديمى ناوچەيى و جيهانيدا بە ناديارى دەمێنێتەوە و كولتوورى كوردناسيش كەمدەكات و زياد نابێ.

  دێينەوە سەر پابەندى توێژەرى ئەكاديمى بە دەق و ئەركى كۆكردنەوە و پۆلێنكردنى زانيارييەكان و دەڵێين كە ئەو ميتۆدە جۆرێك لە غرورى نائەكاديمى بۆ بڕێك لە توێژەرانى ڕيزى پێشەوە لە بوارى كوردناسى، دروستكردووە و واى لێ كردوون شانازى زانستييان لەوەدا چڕ ببێتەوە زانيارى تازەيان دەستكەوتووە، يان كتێبێكى دانسقەيان هەيە، ياخود بەڵگەنامەيەكى ناوازەيان بۆ هاتووە، يانيش دەستنووسێكى نەبينراويان بينيوە!، كە ئەمەش دەبێتە دەركەوتەى سەرەكى كەسێتييە ئەكاديمييەكەى، ئيدى ئەو دەستنووس و بەڵگەنامە و كتێب و زانيارييانە دەبنە سەرمايەى زانستى – ڕەمزى ئەو لە ناوەندەكەدا ( تەنانەت زۆرجار دەبينين بە توێژەر و پسپۆڕانى ترى بوارەكەى نادەن، ڕەنگە پێيان وابێ بەمە ڕازى پسپۆڕێتيان ئاشكرا دەبێ!)، كە بوونى خۆى لەنێوياندا دەبينێتەوە، پتر لەوەى چەندە توانيويەتى ڕەهەندە هەمەچەشنەكانى دەقەكان شرۆڤە بكات. بێگومان ئەم قۆرخكردنەى دەقيش جەختكردنەوەى توێژەر و لە پشت ئەويشەوە دەزگا ئەكاديمييەكەيەتى بۆ قۆرخكردنى حەقيقەت و ئەو پانتاييەى دەيخولقێنێ بۆ دەرخستن يا شاردنەوەى ئەم حەقيقەتە.

 لە حاڵەتى ئاوادا، جۆرێك لە پيرۆزى بە بەر دەق و زانيارييەكان دادەبڕێ و هەموو كەس بە شايستەى ئەوە نازانرێ قسە لەسەر بابەتەكانى نێوياندا (دەركەوتەكانى كوردبوون) بكات. ئيدى “باوەڕ”ێكى نائاسايى، ئايكۆنێك بۆ كوردان لە خەياڵدانى ئەكاديمييدا دادەتاشێ، كە ڕەنگە پتر وێناى كورد بێ نەك حەقيقەتەكەى بەپێى ئەو ستراتيژيەتەى لە گوزارشت كردن لەوێدا حەقيقەت پەيڕەو دەكرێ. ئەمەش ئايكۆنێكى پيرۆزە و كاتێك دەچێتە ئاستە ميللييە بەسياسيیكراوەكەى ناسين، دەپەرسترێ و (بەماناى قەدەغەبوونى پرسياركردن لە ماهيەت و چۆنييەتى خۆنواندنى) كەمترين گفتوگۆى نائاسايى بۆ ناسينێكى ترى كورد حەماسەتە ميللييەكە دەوروژێنێ، چونكە دەقەكان دەبنە گەواهيدەر و ڕەوايى بەو سيستەمە دەبەخشنەوە كە كوردى تێدا داناسێنرێ و، ناسينى جياوازيش دەشێ وەك تێكشكاندنى پيرۆزى و “كوفر” چاوى لێ بكرێ.

 لەلايەكى ترەوە، كێشەى ئەو ميتۆدە، بۆ توێژەرانى نێو دەزگا ئەكاديمييەكانى ئێرە، لەوەدايە كە كەمى دەق – تەنانەت نەبوونيان لە هەندێ بواردا – ڕێگە بە بينينى هەمەگيرانەى ئەوەى لە ميتۆدەكەدا پێيدەگوترێ “بەردەوامێتى پێشكەوتنگەرا” نادا، كە ئێستاى قەوارەى كوردى – ديسان دەڵێين بە پێى بەرجەستەبوونى لە چوارچێوەى سيستەمى پێكهێنەرى كايە زانستييە جياوازەكان – لەنێو دوێنێيدا دەدۆزێتەوە. بەڵام ئەگەر توێژەر دێ و دەخوازێ بەهۆى پابەندبوونى بە ميتۆدەكە ئەم كارە بكات(يان دەيكات!)، دەبينێ ئەم دوێنێيە جومگە هەرە بنەڕەتييەكانى ناديارە و كەمترين دەركەوتەى دەقانەى هەيە، نەك هەر نائومێد دەبێ بەڵكو لە گێژاوى ميتۆدەكەدا خۆى وندەكات و لە برى ئەوەى كوردناسێكى لێ چێ بێت، بێئەوەى دركى پێ بكات جۆرە وەهمێكى تر دەخاتە سەر وەهمەكانى ناسينەكە.

 لەبەر ئەوەى حەماسەت و ڕوانگەيەكى سياسييانە هاندەرى كاركردنى توێژەرى بوارى كوردناسييە، بۆيە ئەگەر دەقى خۆماڵى لەبەردەستدا نييە، لە دەقەكانى ئەوانيتردا بەدواى وەسفێكى قەبوڵكراوياندا دادەگەڕێ، بە هەموو ئەو بڕيارە پێشينە و پاشخانە كولتوورى و زەمينە سياسى و كۆمەڵايەتى و هزرييەى كۆنتڕۆڵى وێناى ئەم “ئەويتر”ەى بۆ كورد كردووە. لێرەدا كەمجار توێژەر شرۆڤەى ئەم پاشخانە دەكات، ئەوەندەى خەريكى هەڵاوێردكرنى زانيارييەكان دەبێ، تا ئەوەيان هەڵبژێرێ، كە وێنەى جوانى كورد دەنەخشێنێ و گەرەنتى بەردەوامى پێشكەوتنگەرايان دەكات، لەكاتێكدا پرۆسەيەكى ئاوا ڕێگە بە تێگەيشتن لە زەينى ئەويتر و تواناكانى خەياڵكردنى كورد لە كولتوورەكانى تر نادات، هەروەها توێژەر دەخاتە حاڵەتى پەرچەكردارانە و ناجێگيرى بيركردنەوە بە حوكمى ڕێكنەهاتنەوە – بەڵكو دژ بوونى ڕەها – ى ئەو وێنايەى ئەو بۆ كوردى هەيە لەگەڵ باسى ئەوانيتر بۆيان.

ڕەخنەگرتن لە ميتۆدى فيلۆلۆژى بەماناى بێبەهاكردنى نيیە، بەڵكو دەبێ بزانين كە ئەمە ميتۆدێكى پێويستە بۆ دۆزينەوە و بينينى چينە كەڵەكەبووەكانى سەر ئەوەى ناومان نا قەوارەى كوردى، چونكە تا ئەوكاتەى بوونى كورد لە زۆر ڕەهەندييەوە لەنێو زەمەندا ناديارە، ئەوا ميتۆدەكە هاوكارێكى باشمان دەبێ لە بينينى هێندێك لە يەكە پێكهێنەر و بنەڕەتييەكانى ئەم بوونە

 لەلايەكى تر هەندێ لە توێژەران، لەبەر پسپۆڕييەكەيان يان كارنەكردنى ئەوانيتر لەسەر كورد لەو بوارەدا، دێن خۆيان دەق دروست دەكەن، ئەمەش لەڕێگەى هانابردنە بەر تەكنيكى تايبەتمەندكردنى گشتگيرەوە؛ بۆ نموونە تايبەتمەندكردنى تيۆرە ئەدەبى، زمانەوانى، سۆسيۆلۆژى، سايكۆلۆژييەكان، بۆ ئەوەى ڕێك لەگەڵ قەوارە كوردييەكەدا بگونجێ، يان لايەنى كەم ماقوڵيەت و ڕەوايەتى ببەخشێتە خوێندنەوەى ئەم قەوارەيە.

 بێگومان ڕەخنەگرتن لە ميتۆدى فيلۆلۆژى بەماناى بێبەهاكردنى نيیە، وەك هزرڤان محەمەد ئەرگون ڕايدەگەيەنێ، بەڵكو دەبێ بزانين كە ئەمە ميتۆدێكى پێويستە بۆ دۆزينەوە و بينينى چينە كەڵەكەبووەكانى سەر ئەوەى ناومان نا قەوارەى كوردى، چونكە تا ئەوكاتەى بوونى كورد لە زۆر ڕەهەندييەوە لەنێو زەمەندا ناديارە، ئەوا ميتۆدەكە – ئەگەر دروست و لەچوارچێوەى تراديسيۆنێكى تۆكمەى ئەكاديمييەوە بەكاربهێنرێ – هاوكارێكى باشمان دەبێ لە بينينى هێندێك لە يەكە پێكهێنەر و بنەڕەتييەكانى ئەم بوونە؛ ڕەهەندى ئەوتۆمان بۆ كەشف دەكات كە لە بەرهەمەكانى قۆناغەكانى پێشووترى كوردناسيدا نەبينراو بوون و كاريگەريشيان بەسەر داڕشتنى ئەو گوتارەوە نەبووە كە لە ئاكامى ناسينەكەدا بەرهەمدەهێنرا و كارى پێ دەكرا. ئەمە سەربارى ئەوەى – وەك بينيمان – ميتۆدەكە جێنشينكردنى كوردى لەنێو دەقەكانى ئەوانيترەوە بۆ خستينەڕوو و ئەگەر توێژەر كەمێك پابەند دەبێ بەو فەزا ڕەخنەييەى ميتۆدەكە دەيڕەخسێنێ (ڕەخنەى دەرەكى و ناوەكى دەق)، ئەوا دەشێ وردەكارييەكانى ئەم جێنشينكردنە ببينێ و چاودێرى كاريگەرييەكانى بڕيارە پێشينەكان و چۆنييەتى كاركردنى سيستەماتيكانەى پاشخانە كولتورييەكان لە وێناكردن و هێشتنەوە يان نەهێشتنەوەى ڕەگەزەكانى شوناس لەنێو يادەوەرى دەستەجەمعى و نووسراودا بكات.

لەبەردەم ئەگەرى دامەزراندنى دەزگاى ئەكاديمیی نوێ بۆ كارى كوردناسى  

 لە ئێستادا هەڵوەشاندنەوەى ئەو سيستەمەى ئەكاديمى كوردى بەقەد هەڵوەشاندنەوەى سيستەمى كوردناسى ئەستەمە، بەهەمان شێوە داڕشتنەوەيشى زەحمەتە؛ ئەزموونى چەند ساڵەى ڕابردوو دەريخست ئەو سيستەمەيە ئەوەند تۆكمەيە و لەنێوخۆيدا دەژى و مانايەكى بۆخۆى داڕشتووە، كە هەر پڕۆژە و تەنانەت بيروبۆچوونێكى دەركى – ئەگەر لە سەرووى خۆشيەوە – بەسەريدا بسەپێنرێ، زوو ماڵى دەكات و لەگەڵ ئەو پێكهاتەيەى خۆيدا دەيگونجێنێ، بەڵام دواى ئەوەى لە ناوەڕۆكەكەى بەتاڵى دەكاتەوە و دەيكاتە فۆرمێكى بێ ناوەڕۆك و وا ئاڕاستەى دەكات كە خۆى دەيخوازێ، تاڕادەيەك كە نەك هەر بۆ ئەندامانى نێو سيستەمەكە، بەڵكو بۆ چاودێرى دەرەكيش وەك پرۆژە و بيروبۆچوونى بێ بەها دەبينرێن و پيادەكردنى بە زياد دەزانرێ.

 ئەگەر ئەم لەخۆگرتنە و دواتر نامۆكردنە لە ئاستى تەكنيكى و لەچوارچێوەى پێناسى دەزگاكە (وەك شوێنى بەرهەمهێنى زانست) ئاوايە، ئەوا لە ئاستى كردارى ئەو بەرهەمهێنانە و كارێكى توێژينەوەيى پەتى وەك كوردناسيدا، زۆر زەقتر دەردەكەوێ و قەبوڵكردنى گۆڕين – هەم لە ميتۆدى بيركردنەوە و هەميش لە شێوازى ئيشكردن – ئەستەمتر و لەبەردەم هەوڵى نوێدا بەرنگاربوونەوەى زياتر و بڕێكجار توندوتيژ دەنوێنێ (وەك ئەوەى ئەم تەرزە توێژەرە مەبەستێكيان هەيە و دەيانەوێ لەبەرژەوەندى نەتەوەيى بدەن!).

 بەڵام خۆ لە دوا وێستگەدا، هەردەبێ پێداچوونەوە بە كارى كوردناسى بكرێ و وەك كايەيەك لەنێو دەزگاى ئەكاديميدا بخرێتە چوارچێوەى سيستەمێكى زانستى، كە تيايدا ڕێگە بە گۆڕينى ميتۆدە باوەكە و ئەزموونكردنى ميتۆدى نوێ و گونجاو خۆشبكرێ. ئەگەر بمانەوێ دەست بە شتێكى ئاوا بكەين دەبێ بير لە جێگرەوەيەكى دەزگاكانى ئێستا بكەينەوە؛ ئەرگومێنت لەبارەى سەنتەرى ئەوتۆى لێكۆڵينەوەى كوردناسييانە بخەينەڕوو، تا بزانێ چۆن و بە چ پێوەرێك لەم بوارەدا كار دەكات. بە بۆچوونى ئێمە پرۆژەى ئاوا ئەوكاتە ئاكامى دەبێ كە دابڕانێكى تەكنيكى و مەعريفى و تەنانەت وجودى لەگەڵ سيستەمى پێشوودا هەبێ و بە تێگەيشتنى جياواز و تەكنيكى جياوازەوە بونياد و پاشخانە هزرييەكەى دابڕێژرێ. بەڵام لەو كاتەشدا پابەندبوون بە بنەما كلاسيكييەكانى دروستكردنى كەسێتى توێژەر و كوردناس (وەك ئێستا باوە)، تەنانەت كەسێتى ئەوانەيش كە لە دەرەوەى دەزگاكانن، بەڵام زادەى فەزاى باوى ڕۆشنبيریی كوردين، بەو هەموو ناجێگيرييە ميتۆدييەى ئەو فەزايە لەخۆى گرتووە بێ جياوازى نێوان ڕەوتە باو و ناباوەكانى، ئەوا بەرهەمى دەزگاى تازە دامەزراو و تەنانەت پرۆژە تاكەكەسييەكانيش هەمان ئاكاميان دەبێ كە دەزگا و پرۆژەكانى تر هەيانبووە.

 بۆيە بەر لەهەموو پرۆژەيەك و بەرنامەيەكى ڕەونەقدار كە تێيدا بانگەشەى گۆڕينى ميتۆد و تێز و بۆچوون لەبارەى ناسينى كورد بكەى، تا كارەكە نامۆ نەيەتە بەرچاو و وەك تەنێكى بێزراوى پانتاييە گشتييەكە سەرەدەرى لەگەڵدا نەكرێ، پێويستت بە داڕشتنەوەى كەسێتى ئەكاديمى و ماناكانى دەبێ. ئەگەرنا وەك فۆرمە كۆنەكانى ئەم كەسێتييە زوو بە پشت بەستن بە مەعريفەى بەرهەمهێنراو دەسەڵاتێكى ئەوتۆ پەيدا دەكەن، ڕێگە بەخۆيان بدەن جارێكى تر كوردناسى لەقالبێكى تر بدەن و چەقبەستووى بكەن و خۆيان وەك تاكە لايەنى ڕێگەپێدراوى ناسينەكە بنوێنن، وەك دەبينين پتر هەندێك لە دەستەبژێرى ڕۆشنبيرى، بە حوكمى ئاگادارييەكى زانياريگەرايانەيان بە ميتۆدە هاوچەرخەكان بەردەوام جەختى لەسەر دەكەنەوە و ئەوانيش سەرمايە ڕەمزييەكەيانيان لەسەر بونيادناوە. بەڵكو ئەو كەسێتييە نوێيە دەبێ بتوانێ كوردبوونى خۆى و ئەو بڕيارە پێشينانەى ئەو فۆمەى بوون بەسەريدا دەسەپێنێ، لە دەروەى كورد لە خۆيدا و وەك دياردەيەك ببيبينێ و ببێتە بابەتێك بۆ بيركردنەوەيەكى پەتى و پرۆژەى توێژينەوەكانى، لەسەرووى هەموو گوتارێكى دەزگايى – سياسييەوە. واتا تاكە پێوەرى توێژەر بوون ويستى بەرهەمهێنانى مەعريفە بێت، ئەگەر كورديش دەشێ مەعريفەى لەسەر بەرهەمبهێنرێ، ئەوا لەلاى ئەودا شياوى بەبابەتكردن و تەنانەت تيۆريزەكردن دەبێ. 

  ئەوكاتە ئەگەر دەزگاى ئەكاديمى دەخوازێ بە سيستەمێكى نوێ لە كورد تێبگات و ببێتە سەرچاوەيەك بۆ ئەو چەمك و دەستەواژانەى هاوكارمان دەبن لەو تێگەيشتنە، ئەوا دەبێ بەسەر ئەو گەشەسەندنە ميتۆدييەدا كراوەبێ كە لە دەزگا هاوشێوەكانى، لەجيهاندا ڕوويانداوە، بەتايبەت گۆڕانە بەردەوامەكانى ميتۆد لە كايە مرۆڤايەتييەكاندا، تا بەمە ڕێگەى تيۆريزەكردن بۆ توێژەران خۆشببێ. ئەگەرنا تا ئەوكاتەى ئيشى كەسى ئەكاديمى جێكردنەوەى كورد بێ لە چوارچێوەى سيستەمى باوى بيركردنەوەى زانستييەوە، ئەوا كوردناسى بە چەقبەستوويى دەمێنێتەوە و كەينونەى كوردى ڕووبەڕووى پرسيارى جيددى نابێتەوە و لەو تۆڕە پەيوەندييە ناگەين كە بەهۆيەوە كوردبوون (لە ئاستى تاك و كۆمەڵدا) مانا بەخۆى و بەجيهان دەبەخشێ. ميتۆدى كاركردن ئەوكاتە كارايە كە بتوانێ وامان لێ بكات دووراييە ديار و ناديارەكانى عەقڵييەتى كوردى و چۆنيەتى ئيشكردنى ببينين، ئەمەش لەميانەى پەيوەندييەكانى ئەو عەقڵييەتە بە هەريەك لە يادەوەرى و خەياڵكردن كە لە هەردوو كولتوورى زارەكى و نووسراوى كورديدا هەژموونگەرايانە ئامادەن و لەنێو هەموو چاڵاكييەكى عەقڵى – بە دەر لە كايە و ڕووتەختى چالاكييەكە – كەم تا زۆر بەرجەستە دەبن و ئاڕاستەى دەكەن. ئەمە ماناى داهێنانى ميتۆدى نوێ نيیە بۆ خوێندنەوەى كورد، ئەوەندەى دابڕينى ميتۆدە باوەكانە لە پاشخانەكانيان و گونجاندنيانە لەگەڵ پاشخانى كوردى. ئەگەر وابكەين، بەجۆرێكى تر شوناسى كوردى دەبينين و لەسەرووى هەموو وێنا و بڕيارێكى پێشينەى ئەم و ئەوەوە ئەم دياردە مرۆييە دەناسرێتەوە.

The post قەيرانى ميتۆد لە كوردناسيدا appeared first on ژنەفتن.

ڕەنگە ئاسان نەبێ بتوانین لەو پەیوەندییە نهێنییە تێبگەین كە لەنێوان دەسەڵات و مەعریفەیەكدا هەیە، لەكەسێكدا كەوا هەردووكیانی لەخۆیدا ئەزموون كردوە. كەسێك بەشی هەرە زۆری تەمەنی لە حوكمڕانی و شەڕ و ململانێكاندا سەرف كردبێ بەشەكەی تریشی بۆ بەرهەمهێنانی مەعریفەی مێژوویی. ئاخۆ چەندە جۆری مەعریفە بەرهەمهێنراوەكە گوزارشت لە كەسێتی دەسەڵاتدارانەی وی دەكات؟ چەندە ئەو كەسێتییەش چییەتی و سنوورەكانی مەعریفەكەی دەستنیشان كردوە و چ كۆنترۆڵێكی بەسەر كردەی بەرهەمهێنانیدا سەپاندوە؟ پاشان دەبێ چەندە مەعریفەكە لاگیری لە ناساندن و خستنەڕووی دەسەڵاتدارێتی كردبێ و لە كوێدا وەك ئامرازێك بۆ بەخشینی ڕەوایەتی هەبوون و بەردەوامێتیی بەكارهێنرابێت؟ بێگومان كەسێك ئەو پەیوەندییە نهێنییەی لەنێو خۆیدا كۆكردبێتەوە، شایستەی تێڕامانە و دەشێ بەرهەمە مەعریفییەكەشی ڕاڤەی جیاجیا و خوێندنەوەی فرە لایەنانەی بۆ بكرێ.

لێرەوە – بە بۆچوونی ئێمە – هەر هەوڵێك بۆ خوێندنەوەی “شەرەفنامە”ی میر شەرەفخانی بەدلیسی (م. ١٦٠١)، دەمانخاتە بەردەم ئەو پرسیارانە و چەندانی دی. وەڵامدانەوەیان، یاخود لایەنی كەم ڕاڤەكردنی وەڵامەكانیان، ئەو كەسایەتییەمان لە مێژوونووسێكی ئاسایی بۆ سەروو ئاسایی و مێژووە نووسراوەكەش لە زانینێكی مێژوویی ساكارەوە، بۆ ئاستێكی بەرزتر دەگوازێتەوە. ئە‌وەی كە ڕەنگە ئەو حاڵەتە نائاساییە قووڵتر بكاتەوە ئەوە بێ زانینی مێژوویی بەمجۆرە پێشتر كەسێكی تر بەرهەمی نەهێناوە. یان با بڵێین زانینەكە بەو گشتگیرییە شوێنكاتییە نەخراوەتە ڕوو و ئەو میتۆدەی لە نووسینەوەدا پەیڕەوی لێ كراوە نەبووە. ئە‌وە شەرەفخانە ڕچەكە دەشكێنێ و لە  نووسینەوەی مێژووی كورد و وڵاتەكەیاندا، كارێك دەكات پێشتر – وەك خۆشی ئاماژەی بۆ دەكات – نەكرابێت.   ئەوەی شەرەفنامە لە كتێبەكانی دی هاوشێوەی جوێ دەكاتەوە، ڕێبازی  نووسین و چۆنییەتی گێڕانەوە نییە. هەروەها بەرهەمهێنانی مانایەكی جیاواز بۆ “مێژوو لەخۆیدا“، نییە. بەڵكو تایبەتمەندێتی ناوەڕۆكە، ئەو تایبەتمەندێتییەی وادەكات تێگەیشتنی جیاوازمان بۆ هه‌م ڕێباز و هه‌میش گێڕانەوە هەبێت. هەروەها بە دوای مانایەكی مێژوو گونجاو لەگەڵ ناوەڕۆكە نووسراوەكەدا بگەڕێین، كە مێژووی كوردە. ئەگەر لەلای ئەوانیتردا مێژووەكە بەشێكی تەواوكاری ئەو زنجیرەبەندییە بووە، كە مێژوونووسەكە لە كۆنتێكستی مێژوویی گشتیدا كاری پێ دەكات، ئەوا لە شەرەفنامەدا مێژوو دەقێكە لە كۆنتێكستی تایبەت بە ناوەخنی مێژووەكە، كه‌ مێژووی كورده‌. بۆیەشە چاوەڕوان دەكرێ ماناكانیشی جیاواز بێت، لەوەی لە سنووری مێژووی گشتیدا دەیبێ. بەجۆرێك، كە لەگەڵ شەرەفخاندا هەموو ماناكانی مێژوو لە كورد و ئەزموونە مێژووییەكەیەوە دەبینرێ.

The post مێژوو وەک دامەزرێنەری ناسنامە لەشەرەفنامەدا appeared first on ژنەفتن.