پشیلەیەکی زەردی ئاساییە.

لە نزیک مێزی دادوەرەکە دەمیاوێنێ

دادوەر دەفتەرەکەی دەردێنێ،

ژمارەیەکی دیکە، دەخاتە سەر دادپەروەرییەکانی

کوتێك جگەر لە شیشەکەی بەردەمی دەکاتەوە و

بۆی ھەڵدەدات:

«لە پێناو خەڵک».

بازرگانەکە بە پشەپش…

تۆپەڵێک کلێنس بە لوولدراوی،

لە کەچاپ دەسوێ و

لە قاپێک

بە ڕێزەوە دەیخاتە بەردەمی.

زەنگی ئاگاداری نووسەرە عەبەسییەکە

لێی داوە،

کەمێکی دیکە

باڵانسی وشەی دەبێتە سفر

لە کەسانی ئەوێ دەڕوانێ

کە بۆ ئەو ھێشتا ھەوادارن:

بوتڵێک بیرە دەوەشێنێ.

پشیلە، شەلەشەل

دەکەوێتە تۆڕی یووتوبەرێک.

لە کامێرای یووتوبەر

پشیلە ھێڵنج دەدات و

گۆشت و ئێسقانی خەڵک دەتفێنێتەوە

وەرن بەبێ سڵاو…

ھەرکەس، پارچەی خۆی بباتەوە و

بژی.

The post “ئێکسپایەر” appeared first on ژنەفتن.

بووکەڵەیەکی سووپەرمان دەرپەڕی.

بەسەر کێڵگەیەکی وشکدا دەفڕێت

ھەور دەگوشێت، برووسکەیەکی فڕێ دەدات و

ھیچ نابارێت.

لە خوارەوە، جووتیارێک کەوتووە.

زیندانێکی نھێنی دەدۆزێتەوە،

گوریس ھەڵدەدات

زیندانییەکان دەیکەن بە جۆلانە.

لە قاوەخانەکان…

بە ڕەحەتی قاوە دەڕژێننە دەمی پێکەنینەوە،

نەوەك بخەوێت:

دەیخواتەوە و ھێڵنج دەدات

سووپەرمان، پەتۆیەکی پێدا دەدات.

لەناو جامخانە شکاوەکە دەنیشێتەوە،

پارچەشووشەیەك ھەڵدەگرێ قۆڵی ھەڵدەکات، دەماری نییە.

The post بووکەڵەی سووپەرمان appeared first on ژنەفتن.

تەقەتەقی لێ ھەڵدەستا و

یاری زۆرانبازی پێشان دەداین،

باوکم

خۆی لێ دەبووە پاڵەوان،

دەبوو قاپێک شووتیی قەڵەو بخوات.

دایە

سەری شووتییەکانی دەپەڕاند،

ئێسکەکانی شووتیی ورد ورد دەکرد:

زۆرانبازە دۆڕاوەکە بوو.

ئەمن

ناوبژیوانێکی بێ فیکە

بە شۆڕتی خەتخەتەوە دەسووڕامەوە.

کە کارەبا دەکوژایەوە،

دنیا ڕەنگاوڕەنگ دەبوو.

باوکم

قاپی شووتیی بەرز دەکردەوە

بە ڕاستی ببوو بە پاڵەوان.

زۆرانبازە دۆڕاوەکە

سەری لەناو کۆشی و

لە حەمام

پارچەی قاپە شکاوەکانی لە گۆشتی دەردەھێنا.

ئەمن

شەش فیکەی ناو چپسی یانەسیب بە ملمەوە و ناتوانم ئەم یارییە ڕابگرم.

The post زۆرانبازی appeared first on ژنەفتن.

درێژترین پەنجە ھیی جەنگاوەرێکە،

شەڕێک قەوما و شەرەفی نیشتمان

ھاتە گۆڕێ و ئێ..

با دەست بە وشەوە بگرین.

تایەی لۆری زبڵڕێژەکە

قرچەی لە شتێک ھەستاند:

پەنجەی مامۆستای بیرکاریمانە

گەنگەرین پەڕاندی..

تا ئەو وانەی پێ گوتین

پێنج کۆ پێنج نەبوو بە دە.

با فوو لە عەلاگەیەکی ڕەش دەکا

پەنجەی دکتۆری تێدایە

دکتۆر ئالوودەی ھێرۆیین بوو،

سەماعە بە ملییەوە..

بۆ دۆزینەوەی سەرە سیفۆن

ھەناوی تەنەکە زبڵ نەما نەیپشکنێ

مووسێك پەنجەی ژەھراوی کرد.

ئەم کارتۆنە بێ دەرگایە

پەنجەی مێژوونووسی تێدایە

مێژوونووس

لەنێوان وشەکانی (سەرۆك) و (بەرمیل)

فاریزەی لەبیرچوو.

پەنجەی پێنجەم و شەشەم

خاوەنەکەیان لێبووکێکە،

قرتاندی..

کە دەگری و پەنجەکانی دەموچاوی دەشارنەوە،

دەیەوێ لە کونێکی گەورەترەوە

پێکەنینی جەماوەر ببینێ.

The post شەش پەنجە بە دەستێکەوە appeared first on ژنەفتن.

تۆپە قوماش یەکێکمانی لوولدا و

کردی بە بەرگدروو.

ڕۆژانە بە عەلاگە خەون بەسەر ماڵەکەیانی دادەدا،

ئەویش دەیکردنە کراس.

ئەو ساڵەی برادەرەکەم بزر کرد،

سی ھەزار و دوو سەت منداڵ

کەوتنە کۆشی زەوییەوە.

برادەرەکەم مامان بوو،

ژنان لنگیان بۆ ھەڵدەبڕی

ئەویش: مامۆستا، لەحیمچی، نەخۆشەکانی

داھاتووی لێ دەردەھێنان.

من چەند ھەفتە جارێک

بۆ خڕکردنەوەی کەرەستەی شیعری

سەرم لە دەرەوە ھەڵدەکێشا

شەوانیش لە ناو ئارەقەی خەو ڕادەچڵەکیم

بە تەلەفۆن خەونەکەم بە ناو گوێچکەی بەرگدرووەکەدا

دەڕژاند.

دەنگی دەنووسا:

ڕەقە، زۆر ڕەقە

نابێتە کراس

سێ برادەری گچکە بووین..

کە دەمرین،

خانووی بەرگدرووەکەمان

بە پارچە قوماشی ڕەش دادەپۆشرێ

پێم دەڵێن لەوێ بەفر ڕەشە

بە بوتڵێک وێسکی ئەمە بکە شیعر.

سەرخۆش نیم،

قوماشەکەیە ڕەنگیداوەتەوە

نابێتە شیعر.

لەناو تەلەڤزیۆن

منداڵە بۆهیمییەکان

بە چواردەورەی تەرمی مامانەکەمان

پەشیمان..

بە ناوچەوانی سبەینێی خۆیاندا دەکێشن

بێژەرەکە ھاوار دەکات:

گۆڵ ڵ ڵ ڵ ڵ

پەتەکەی ملی منیش

لەناو بۆنی خواردنی گەرمی ماڵان ڕاو دەنرێ

لە شێتخانە، ختووکەی بنی پێی شێتەکان دەدات

حەبی ڤالیۆم لە دەمیان دەپەڕێ، دەگرین:

خەوتووین، کەس بە ئاگامان نەھێنێ خەوتووین.

The post سێ برادەر appeared first on ژنەفتن.