ئه‌وه‌نده‌ی سه‌رنجم داوه‌، ئه‌وه‌م له‌ تێکڕای ئه‌و ئاژه‌ڵ، په‌له‌وه‌ر و باڵندانه‌ش دیتووه‌، که‌ به‌خێوم کردوون، یان له‌ ئه‌زموونی ژیاندا [هه‌تا ئه‌مڕۆ]، هاتوونه‌ پێش چاوم. مرۆڤیش له‌و ڕووه‌وه‌ جودا ناکرێته‌وه‌.

ئه‌وه‌ ئاسایییه‌.

له‌ ماوه‌ی نێزیکه‌ی هه‌شت ساڵی ڕابردوودا، که‌ لێره‌ ده‌ژیم [به‌ هه‌زار ده‌ردی سه‌ر و شه‌ڕه‌شه‌ق، نه‌ک ململانێ] تێبینیم کردووه‌ که‌ پیاو نابێ نیواونیویش پیاو بێ، ژنیش هه‌روه‌تر. بۆ ئه‌وه‌ی بیسه‌لمێندرێ ژن، هاوتا، خۆشه‌ویست و ته‌واوکه‌ری پیاوه‌ [به‌ پێچه‌وانه‌شه‌وه‌]، پیاو ده‌بێ به‌ هه‌موو جۆرێک به‌ خۆی بسه‌لمێنێ و ده‌ری بخات و واش بنوێنێ، ژن و پیاو یه‌کسانن، ئه‌و یه‌کسانبوونه‌ش کاتێک ده‌سه‌لمێندرێ، که‌ هه‌ردووکیان [به‌ تایبه‌تی پیاو] سه‌ره‌تا له‌ تێگه‌یشتن، کردار و ده‌ربڕینیدا ڕه‌نگ بداته‌وه‌، هه‌ر جۆره‌ بیرکردنه‌وه‌ و ڕوانین و تێگه‌یشتن و پێگه‌یشتنێکی دیکه‌، بکه‌وێته‌ ده‌ره‌وه‌ی ئه‌و بازنه‌ کێشراو و داخراوه‌وه‌، وه‌ک هه‌ڕه‌شه‌ بۆ سه‌ر “ئازادی” و “ماف” و په‌یکه‌ری داتاشراوی “ژن”، به‌ هه‌ڵه‌بوون، تێکده‌ر، شێوێنه‌ر، ناڕێک و دواکه‌وتوو، لێکدانه‌وه‌ی بۆ ده‌کرێ و هه‌موو هێز و فشارێکیش وه‌ک په‌رچه‌کرداری به‌رابه‌ر، دژایه‌تیی پێویست، ئه‌وڕۆیی و پێشکه‌وتووخواز له‌ هه‌مبه‌ری ده‌گیرێته‌ به‌ر؛ پان-ڕۆشنگه‌رانه‌ وێنا ده‌کرێ؛ پێشوازیی لێ ده‌کرێ و ته‌نانه‌ت وه‌ک وانه‌ی لکێندراو به‌ ڕاهێنان و دیدێکی ئایینیی نائایینی به‌ ئاینوئۆین و جوان و ئه‌وڕۆیی، ده‌خرێته‌ چوارچێوه‌ی جێبه‌جێکردنه‌وه‌.

پیاو هیچ بوارێکی نییه‌ هه‌ستی تایبه‌تی هه‌بێ، بیپارێزێ و هه‌ستیش به‌ پیاوه‌تیی خۆی بکات، ته‌نانه‌ت له‌ ڕێی چووکه‌‌وه‌، چونکه‌، ژن، خه‌یاڵپڵاوییه‌کی بۆ دروست کراوه‌/ ده‌کرێ، له‌ ئاراسته‌ی جۆراوجۆره‌وه‌، له‌ هزر و بیرکردنه‌وه‌ی ده‌ئاخنرێ، تا دواجار ده‌بێته‌ واقیعێکی بێ پێشمه‌رج و سه‌روو واقیع. ئه‌گه‌ر ئه‌و خه‌یاڵه‌، دوو یان چوار قاچیشی هه‌بێ وه‌ک هه‌ر مرۆڤ، یان ئاژه‌ڵێکی دیکه‌، قه‌ت پێیه‌کی ناگاته‌ سه‌ر زه‌وی. له‌ شێواوییه‌کی نه‌بڕاوه‌دا عندلعۆپ ده‌کات. پایسکیله‌که‌ [به‌ خه‌یاڵ] له‌ هه‌وادا په‌یدانی لێ ده‌درێ. به‌ پاڵپشتیی ئه‌و خه‌یاڵه‌ بابرده‌ڵه‌یه‌، ژن/ پیاو له‌ ڕێی وێناکردنه‌وه‌ ده‌توانێ ببێته‌ پیاو/ ژن، له‌ بارێکدا ژن/ پیاو چیدی خۆی نییه‌.

با چاوه‌ڕێی ژنپیاو بین. یان با جۆرێکی دیکه‌ی ناو بدۆزینه‌وه‌ بۆ ئه‌و نه‌خۆشییه‌ درێژخایه‌نه‌ی [به‌ پێداگریی کوێرانه‌وه‌] شایه‌ن و شیاوی شانازییه‌ و ده‌یه‌وێ ئه‌و په‌نده‌ کوردییه‌ سه‌ره‌وبن بکاته‌وه‌: “که‌س به‌ خه‌یاڵ، نه‌بووه‌ به‌ ماڵ.”

فڵان، یان فیسار، ده‌توانێ ئۆتۆمبێڵ بئاژوا، بێ ئه‌وه‌ی ئۆتۆمبێڵێک له‌ ئارادا هه‌بێ!

نه‌شتوانێ ده‌ڵێ ده‌توانم.

عه‌نته‌ره‌!

وێنای ده‌که‌م: من، ئه‌گه‌ر ژن بم و ببم به‌ پیاو، ئیدی پیاو بۆ هه‌یه‌؟ بایه‌خ و ڕێزی چییه‌؟ بۆ ده‌بێ هه‌یبێ؟ بۆچی له‌باتیی ده‌ربڕین و خستنه‌ڕووی ڕێز و خۆشویستن، ته‌نیا بیر له‌ خۆم نه‌که‌مه‌وه‌ و خۆپه‌رست نه‌بم؟

ئه‌وه‌ کڕۆکی تێکه‌وتنه‌ ناو چاڵی ناساغی، ناته‌ندرووستی، نه‌خۆشیی ده‌روونی، جه‌سته‌یی و گه‌لعۆبوونیشه‌.

ئه‌و سه‌رلێشێواندنه‌ به‌ مه‌به‌ست و خه‌سێنه‌ره‌، داوده‌رمان، حه‌شیش، کۆکاین و دارحه‌سای دیار و نادیاری به‌رنامه‌ ڕێکخراو و په‌رتکراو و په‌تکراوه‌ حکوومییه‌کانه‌‌، تاکوو مرۆڤ ته‌نیا لاساییی یه‌کدی بکه‌نه‌وه‌ و کۆمه‌ڵ، هێز و پێزی هه‌بێ؛ تاکه‌که‌سیش نه‌ک به‌ ئاسانی، به‌ڵکوو به‌ هه‌موو هێز و سه‌ختگرییه‌ک، بۆی نه‌لوێ به‌ ته‌نیا، بۆ خۆی، له‌ پێناو خۆی و دواتر ئه‌وانی دیکه‌، سه‌رپه‌رشتیی ڕێڕه‌و و گۆڕانه‌ تاکه‌که‌سییه‌کان، بیرکردنه‌وه‌ و تێگه‌یشتن و نوێبوونه‌وه‌ی خۆکرد بکات و به‌ چه‌پۆکی ڕه‌مزی، هاوڕوانینه‌ په‌سه‌ندکراو و ڕێزلێگیراوه‌کانی ده‌وروپشت، که‌ پشتئه‌ستوورن به‌ گرووپه‌ نه‌رمووک، تێکه‌ڵه‌، تووندڕه‌و، هاوبه‌ش و جودا-جوداکانی ناو کۆمه‌ڵگا و ئه‌وانی دیکه‌ی نێزیک و دوور، به‌ زوویی له‌ په‌لوپۆ بخرێ، ئه‌و ده‌مه‌ش‌ له‌ په‌لوپۆش ده‌که‌وێ، وه‌ک نه‌خۆش، ناساغ، بێکه‌ڵک، ناحه‌ز و ناقۆڵا و دژه‌ژیان تڕۆ [له‌وانه‌شه‌ تیرۆر] بکرێ و ئه‌گه‌ر نه‌مرێ [ته‌نیا چونکه‌ هه‌ناسه‌ ده‌دات] خۆزگه‌ بخوازێ که‌ ‘هه‌رگیز ئه‌و گووه‌ی نه‌خواردبا’، له‌ بارێکدا “بیرکردنه‌وه‌ی گشتی” که‌ هه‌ر چوارده‌ور، سه‌روو، خواروو، بن و هه‌موو بیرکردنه‌وه‌یان لێ به‌ گوو ده‌رخوارددان ته‌نیو‌‌ه‌، ده‌یخنکێنێ.

The post نه‌ پیاو به‌، نه‌ ژن، نه‌ خۆت.<br>چی؟! appeared first on ژنەفتن.