سارد وەک هەناسەی بەفر، هێلکەدان دەپەستێ

لەوێ کە دار سنەوبەران وەک ئەژدیها گڕ فڕێ دەدەن

داری ژیان و داری ژیان

هەیڤیان بەرهەڵدەدەن، مانگ دوای مانگ، بۆ بێمەبەست

شەپۆلی خوێن، شەپۆلی خۆشەویستییە،

قوربانیدانی ڕەها

واتە: یا من یا کەس،

من و تۆ،

جا، لە گۆگردی شۆخبوونیاندا، لە خەندەیان،

 جوانکیلانە دەچەمێنەوە ئەمشەو

لە میونیخن، 

 لەنێوان پاریس و ڕۆماش لە ساردخانە

ڕووت و کەچەڵ لەناو تووکیان

چلوورەی پرتەقاڵی بە سەری وشکەدارێوە،

بەرگەنەگیراو، بێمێشک

بەفر کولوە ڕەشەکانی خۆی بەردەداتەوە و

کەس دیار نییە،

لە هۆتێلان، 

دەستان دەرگایان دەکەنەوە و 

پێڵاوانێ ڕیز دەکەن بۆ بۆیاخکردن

کە سبەی پەنجەپێی زەبەلاح تێیاندا دەڕۆن

ئای لە ماڵیبوونی ئەم پەنجەرەیلە 

لە کۆچکی* مەلۆتکە، تا نوقڵی هەمیشە سەوز

تا ئەڵمانی پرخەکەری دژە جوو 

پاشان دەسکی ڕەشی تەلەفۆنان لەسەر ڕاگریان

درەخشان

دەدرەوشێنەوە و 

نەبوونی دەنگ هەرس دەکەن

بەفر بێدەنگە

٢٨ی کانوونی دووەم ١٩٦٣

* کۆچک، پەڕۆی تەنکی سپی نەخشدار دەکرێتە کڵاو بۆ مەلۆتکە. 

The post جوانەیلی میونیخ appeared first on ژنەفتن.

پێڵاوی ڕەش

کە تێیدا وەک پێ ژیام

بۆ سی ساڵ، لاواز و ڕەنگ پەڕیوو

بە ئاستەم دەوێرام هەناسە بدەم یان بپژمم

بابە، دەبوایە بتکوژم

تۆ مردیت و بۆم نەڕەخسا

مەڕمەڕی قورس، جانتای پڕ خوا

پەیکەری دێوی قامکێکی پێ ڕەشهەڵگەڕاو

مەزن چەشنی شێری دەریایی فریسکۆ

سەرێکت لەنێو ئەتڵەسیی بێ ئۆقرە

لەوێ کە تۆو دەپڕژێنێ سەوز بەسەر شیندا

لە ئاوە دڵگیرەکانی نۆسێت[I]

ڕاهاتبووم نزا بۆ چاکبوونەوەت بخوێنم

ئاخ لە تۆ

بە زمانی ئەڵمانی لەو شارۆچکە پۆڵەندییە

کە تەخت کرابوو بە باگردانی

شەڕ، شەڕ، شەڕ

بەڵام ناوی شارۆچکەکە باوە

هاوڕێ پۆڵەندییەکەم دەڵێ

هەر بەو ناوە دەرزەنێ یان دوو شارۆچکە هەن

بۆیە هەرگیز نەمدەزانی

پێت لە کام سەرزەمین دەنێی و ڕەگت دادەکوتی

هەرگیز نەمدەتوانی لەگەڵت بدوێم

زمانم لە شەویلاگم گیر دەما

لە تەلی دڕکاوی دەما

من، من، من، من

پەیڤێکم بۆ نەدەهات

وامدەزانی هەر ئەڵمانییەک تۆی

بەو زمانە دزێوەوە

مەکینەیەک، مەکینە

وەک جوو ڕاپێچم دەکا

جووی ئاوشڤیتز، داخاو، بێڵسن

دەستم کرد بە قسەکردن وەکو جوو

پێموایە دەکرێ جوو بم

بەفری تایڕۆڵ، بیرە سازگارەکەی ڤییەننا

هێندە بێگەرد و ڕاستەقینە نین

من کە لە دایکمەوە قەرەج و بەم بەختە سەیرەمەوە و

بە چارەنۆڕەکانی[II] دەستم، چارەنۆڕەکانی دەستم

پێ دەچێ کەمێ جوو بم

من هەمیشە لە تۆ ترساوم

بە جلی سەربازی و زمانە ئاڵۆزەکەتەوە

قەفی سمێڵ و

چاوی ئاریانیشت، شینی ئاسمانی

پیاوی شەڕ، پیاوی شەڕ

ئای لە تۆ

خوا نا بەڵکوو خاچە[III] شکاوەکەی نازی

هێندە ڕەش کە قیژەی هیچ ئاسمانێ نایبڕێ

هەموو ژنێ شەیدای فاشیستێکە

پۆستاڵ لەسەر ڕووخسار، دڕندە

دڵی ڕەقی دڕندەیەکی وەکو تۆ

لەبەردەم تەختەڕەشێ وەستاوی، بابە

لەو وێنەیەتدا کە هەمە

قڵیشێک لەسەر چەناگەتە لەبری پێت

بەڵام ئەوە ناتکاتە کەمتر لە شەیتان، نا نەخێر

ناتکاتە کەمتر لەو پیاوە ڕەشپۆشەی

دڵە سوورەکەمی کردە دوو کوتەوە

دە ساڵ بووم کە تۆیان ناشت

بیست ساڵ بووم هەوڵمدا بمرم و

بگەڕێمەوە، بگەڕێمەوە، بگەڕێمەوە لات

پێموابوو ئێسکەکانیشم وایان دەویست

بەڵام منیان لە تورەکەکە دەرکێشا

بە چەسپ پێکەوەیان نامەوە

ئەوجا زانیم دەبێ چ بکەم

وێنەیەکی تۆم کێشا

پیاوێکی ڕەشپۆش بە ڕووخساری مێینکامپف[IV]

ئەڤینداری چەکوچ و بزمار

بەخۆمم گوت ئەمە خۆیەتی

کەوایە بابە، دواجار ڕزگاربووم

تەلەفۆنە ڕەشەکە لە ڕیشەوە پچڕا

چیدی خشەی هیچ دەنگێکی لێوە نایێ

ئەگەر پیاوێکم کوشتبێ، دوانم کوشتووە

ئەو خوێنمژەی گوتی تۆیت و

ساڵێکی ڕەبەق خوێنی مژیم

حەوت ساڵ، گەر ڕاستیت دەوێ

بابە، ئەرخەیان پاڵی لێ دەوە

سنگێک[V] لە دڵی گۆشتنی ڕەشتدایە و

گوندییەکان قەت چارەی تۆیان نەدەویست

وا لەسەر گۆڕت هەڵدەپەڕن

هەمیشە دەیانزانی ئەوە تۆ بووی

بابە، بابە، هەی زۆڵ، لێت ڕزگاربووم

پەراوێزەکانی وەرگێڕ:

[I]  نۆسێت: کەناراوی نۆسێت لە شارۆچکەی ئۆرلینز- ویلایەتی ماساچوسێتس، ئەمریکا

[II] چارەنۆڕ: کارتی بەختگرتنەوە

[III]  خاچە شکاوەکە: مەبەستی لۆگۆی نازییەکانە

[IV]  Mein Kampf: ئەو کتێبەی هیتلەر نووسی و دواتر بووە مانیفێستۆی نازییەکان

[V] سنگ: مێخ، ئەو ئاسنەی دادەکوترێ و پەتکی وڵاخی لێ قایم دەکرێ. یان کەتەداری پێ دەقڵیشنێدرێ.

The post بابە appeared first on ژنەفتن.

جارێک لە هەر دە ساڵدا

دەیکەم

جۆرە پەرجووێکی زیندووە،

 پێستم

درەوشاوە چەشنی سەیوانی گڕسۆزی نازییەکان

لاقی راستم

سوکەڵە

رووخساری بێ رەنگم،

قوماشی جووە

پەچە لە رووم لادە

ئای دوژمنم

بڵێی تۆقیبم؟

لوتم، چاڵی چاوم، تاقمی تەواوی ددانم؟

بۆگەنی هەناسەم

لە رۆژێکدا لەبەرچاو ون دەبن

بە زوویی، بە زوویی ئەو گۆشتەی

چاڵی گۆڕ هەڵیلوشی بوو

لەگەڵم دێتەوە ماڵێ

منیش ژنێکی دەم بە خەندە

تەنیا سی ساڵم.

وەک پشیلە دەتوانم نۆ جار گیان بدەم

ئەمە سێیەم جارە

چ قەشمەرییە

دە ساڵ جارێک لەناوبچی

ملیۆنان تاڵ و چین

قەرەباڵخی دەم پڕ لە قرچە قرچی باوی

خۆیان بە ژووردا دەکەن تا ببینن

دەست و قاچی ڕووتم

خانمان و پیاوانی بەرێز

سەماکاری ورووژێنەری مەزن ببینن

ئەمانە دەست و ئەژنۆی منن

ڕەنگە تەنیا پێست و ئێسک بم

لەگەڵ ئەوەشدا، هەر هەمانم، ژنی بێوێنە.

یەکەمجار کە ڕوویدا دە ساڵ بووم

ڕووداوێکی نابەخۆ بوو

دووەم جار مەبەستم بوو

لەنێو بچم و هەرگیز نەگەڕێمەوە

لە هۆش خۆ چووم

وەک گوێچکە ماسی

دەبوایە هەر هاوار بکەن و

چەشنی مرواری لکاو کرمم لێ بکەنەوە

مردن

هونەرە، وەک هەموو شتێکی دی

من تابڵێی لێی شارەزام

جۆرێ دەیکەم هەست دەکەی دۆزەخە

جۆرێ دەیکەم هەست دەکەی ڕاستەقینەیە

پێموایە دەکرێ بڵێی وابەستەییم

هێندە ئاسانە دەتوانی لە ژوورێکدا بیکەی

هێندە ئاسانە دەتوانی بیکەی و هەر وەک خۆت بمێنی

چ شانۆیەک،

گەڕانەوە بە ڕۆژی رووناک

بۆ هەمان شوێن، هەمان ڕووخسار، هەمان دڕندەیی

هاوارێکی سەرسام:

”پەڕجوو”

لێمدەدا و دەمخا

کرێی خۆی هەیە

بۆ بینینی برینانم، کرێ دەدەی

بۆ گوێهەڵخستن بۆ دڵم، کرێ دەدەی

کە ترپەی دێ

کرێ هەیە، کرێی گران

بۆ وشەیەک، بۆ دەستلێدانێک

یان دڵۆپێ خوێن

یان تاڵە مووێکی سەر جلانم

ئاوایە ئاوا جەنابی دکتۆر

ئاوایە جەنابی دوژمن

من شاکاری تۆم

من پڕبەهاترینی تۆم

من ئەو خنجیلە زێڕینەی تۆم

کە شین و ڕۆڕۆی لێوە دێ

دەسووڕێم و دەسووتێم

وانەزانن نیگەرانی ئێوەم لەبەرچاو نەگرتووە

.

سوتماک، سوتماک

دەستی تێ دەخەی و تێکی دەدەی

گۆشت، ئێسک، هیچی لێ نییە هیچ

پارچە سابوونێک و

ئەڵقەی هاوژینی و

ددانێکی زێڕین

جەنابی یەزدان، جەنابی ئیبلیس

ئاگادار بن

ئاگادار بن

لە خۆڵەمێشەوە

بە پرچی سوورەوە هەڵدەستمەوە و

پیاوان وەک هەوا هەڵدەلووشم

پەراوێز:

لازاروس؛ ئەو کەسە بوو کە عیسای مەسیح زیندووی کردەوە.

The post خاتوو لازاروس appeared first on ژنەفتن.