The post وەرین appeared first on ژنەفتن.

چقڵ

دوادیداری من و دایکم دە ساڵی ڕەبەقی بەسەردا تێپەڕیوە.

سێ ساڵ دوای ئەوەی سوێندم خوارد جارێکی دی چاوم بە چاوی نەکەوێتەوە.

کاتێک چوومە ماڵەوە، پاڵی بە قەنەفەکەدا دابووە، قاچ لەسەر قاچ، قولەپێی دەلەراندەوە.

سووراوەکەی دەتگوت قنەجگەرەی پرتەقاڵییە بە لالێویدا لکاوە. هەڵمدەژمی ئەڵقە بە ئەڵقەی ئەو دووکەڵەی بە ڕوومدا دەیدایەوە، هەمان ئەو ئەڵقانەم هەڵدەمژی کاتێک خزابوومە هەناویەوە، هەمان ئەو قەفانەی خەرمانەیان بە دەورمدا دەکێشا و تاڤگەئاسا خلۆر دەبوونەوە، بەو تەمەنی چوارساڵییەم گەروومیان هەڵدەگوشی وەک تەنافی سێدارە.

«ها، چییە تۆش فێری جگەرەکێشان بووی؟»

پرسیارەکەی تێ گرتم کاتێک کەنتە ڕەساسییەکەم وەک ئاماژەی هێز لە جانتاکەم هێنایە دەرەوە.

ئەم جارەیان من دیلی دەستی ئەو نیم. نیکۆتین دزەی کردە سییەکانمەوە،

دووکەڵەکەیم بە با کرد. چینی خۆڵەمێشی هاوشێوەی بێدەنگییەکەمان بە دارودیواردا هەڵگەڕا

و لەسەر سەرمان نیشتەوە. پێکەوە ژوورەکەمان بە پەڵەهەوری چڵکن قانگ دا.

هەڵدانەوەی پاشناو

گۆمێکی ئاڵ لە بیلبیلەی دایکمدا خۆی مەڵاس داوە. وردەشووشەیش لە قوڕگی گیر بووە. باوکم کەوچکێک قوڕ هەڵدەقوڕێنێت، منیش ڕابوردووم وەک بەرسیلەی مزر قووت دەدەم. ڕابوردوو. گوێزانێک لە سوورێنچکمدایە. ڕابوردوو. ڕابوردوو کێیە؟ کاک ڕابردووی داگیرکەر، کیشوەر بە کیشوەر ڕەدووم دەکەوێت، ڕووخسارە خورمایییەکان بە دوای خۆیدا ڕادەپێچێت. چاوم بە چڕنووکی هەڵدەکۆڵێت. گوایە خوێن لە ئاو ئەستوورترە. خوێنم تەڕوتازەیە، بەهاراتی ناو و ڕووخساری پێدا پرژێنراوە، دەکوڵێت و بە هەڵم دەبێت، ساڵەکانم لە پاش جێ دەهێڵێت. ئەو ساڵانەی پاڵتۆی تەپوتۆزی پێدا دراوە؛ ئەو ڕووخسارانەی بە خۆڵەمێش داپۆشراوە؛ قردێلەی پێست؛ برینی دەمداچەقاو؛ ئەو کونیلانەی دایکم بە هەشتا جگەرەکەی سیخورمەی تێ دەژەند؛ باوکیشم بە هەشتا جگەرە سیخورمەی تێ دەژەند. ناوێکیش، ناوێک، ناوێک، ناوێک، ناوێک. من و ناوەکەم، ناوەکەم و من؛ هەر یەکێکمان کۆیلەی ئەوەی ترمانین. ناوم دڕکێکی قیرسچمەیە، لەناو دەمارمدایە. سەدەیەک تێپەڕیوە، کەڵبەی ناو لە گەردنم چەقیوە.

بەناخداچوونەوە

نیازمە شیعرێک بنووسم و ئەم لاپەڕەیە بە پەیڤی لەوەوپێش نەگوتراو ڕەش بکەمەوە. قەڵەمەکەم خودائاسا لەناو پەنجۆڵەمدا سنگی دەرپەڕاندووە، فەرمانم بەسەردا دەکات مەرەکەبی سوور بەسەر ڕووخساری خورماییدا بچۆڕێنمەوە. تا لێوارەکان بنەخشێنمەوە و بریکەبریکی چاوەکان ڕزگار بکەمەوە. ئەو ڕووخسارانەی کاڵ بوونەتەوە بەڵام لەسەر دەریا هەڵکۆڵراون، ئاوێتەی خاک بوون. نینۆکی سوورم و قەڵەمەکەم لەسەر مێژووی ئەم ڕەنگە هەڵکەوتەیە وتووێژیانە، ناکۆکییەکەیشیان ئەوەم بیرم دەخەنەوە جارێکیان «ئای خۆزگە فیستیڤاڵی تەماتە هەبووایە تا خەڵک فێر ببن ڕەنگی سوور لەگەڵ شتێکی تردا تێکەڵ بکەن» لە زاری هاوڕێیەکم خلۆر بووە. دانیشتووم لای جامی ئەو پاسەی بەسەر ئەم خاکە نامۆیەدا دەمسووڕێنێتەوە. چاو دەبڕمە جادەوبانی پانوپۆڕ و ڕووخساری گەرموگوڕ و مێژووی بێبنک بەدەم ئەوەی لە خۆم دەپرسم: «کاتێک ڕەنگ کاڵ دەبێتەوە، چۆن دەشێت ببریکێتەوە؟»     

شەڕی ناسڕیە

٢٣ـی ٣ـی ٢٠٠٣

تەمەنم شانزە ساڵ بوو. بەو قرچەی نیوەڕۆیە، تەپوتۆز و چڕەدووکەڵ ئاسمانی تەنیبووەوە. خزابوومە پشتی ئەو پەنجەرەیەی تیپی ئەستووری لێ درابوو و دەمڕوانییە ئەو مووشەکانەی بەسەر خانووی دەرودراوسێدا بەر دەبوونەوە. زرێپۆشێکی ئەمریکی دوو کۆڵان لەولای ماڵمانەوە تەقییەوە. پاشنیوەڕۆ بێدەنگی باڵی بەسەر دنیادا کێشا، وچانێکی درێژ درا. بنجکۆڵ بووم. بۆنی مەرگ لە دەرەوەی ماڵ وەک گسکی کارەبایی هەڵیلووشیم. کەوتمە سەرەتاتکە لە کەلەبەرێکی دەرگاکەمانەوە، حەشاماتێک چاوی قۆستمەوە. گوللەئاسا بەسەر جادەکەدا دەرپەڕیم و سەرم هەڵبڕی بەرەو شورای ئەو منداڵ و مێرمنداڵانەی، ئەو ژن و پیاوانەی گەمارۆی سەربازە ئەمریکییە بێگیانەکانیان لە گۆماوی خوێندا دابوو. ژەنگ و بارووت. پیاوێکی چەقۆبەدەستی بنێس و مردەڵە، بە دسداشەیەکی کرێمیی پەڵەپەڵەوە، گوێی سەربازەکانی دەبڕی و نێزەی شیشی کەبابی تێ دەچەقاندن. خۆم لێ مۆڕ کردەوە، چاومان لەسەر چاوی یەکتر نیشتەوە. گرژینەوە لێوی تەنییەوە بەدەم سمینی گوێچکەیەکی ترەوە.         

The post چوار شیعری یەڵدا ئەلعانی appeared first on ژنەفتن.

………..

سێ ساڵیش دەبێ ژەمێک بەتەواوی تێرم نەخواردووە، هەمیشەی خوا برسیمە! شەو و رۆژ قووڕەی زگم دێ!! سەرەتا زۆر خەجالەتیم دەکێشا بەڵام ئێستا بۆم شتێکی ئاسایییە، تەنانەت هاوکەلاسییەکانیشم ئێستا پێکەنینیان پێی نایە!!

*

عیشای خوا شک نابەم! حەفتەی پێشوو لە تاکسیدا کیفەکەم لێ بەجێ ما. ناسنامە و کارتی خوێندکاری و کارتی بانکی و موبایل و ئەوەی هەمبوو و نەمبوو لەوێدا بوو!

دوو سێ جار زەنگم لێدا بۆ شومارەکەی خۆم بەڵام کابرا هەڵینەگرت! جاری ئاخریش کە زەنگم لێدا کووژاندییەوه و ئێستا و ئێستاش هەڵینەکردەوە!!

*

تەنیایی، بێپووڵی، برسێتی و غوربەت دەوریان داوم! پیسم لێ قەوماوە! یەک فلس شک نابەم! تاق و لۆق لەم و لەو جگەرە وەردەگرم! دەڵێم دەمهەوێ تەرکی کەم! ئەوانیش دەزانن بەڕاستم نییە!!

نازانم ئاخرین جار کەی چوومە حەمام! سابوونم نییە و ئەوەم کردووەته بەهانە! پێموا بۆنم گرتووە! لە سەر کەلاس هاوکەلاسییەکانم لێم دوور دەکەونەوە!! ئەو رۆژەش لە تاکسیدا ئەوەی لە پاڵمەوە دانیشتبوو دەستی گرتبوو بە لووتییەوە!!

خۆم زۆر هەستی پێ ناکەم!

*

جاران بە تاکسی هاتوچۆم دەکرد، ئێستا تەنانەت پووڵی تاکسیشم نییه! 100 تمەن و 50 تمەن لە رەفیقەکانم وەردەگرم بە ئوتووبووس دێم و دەڕۆم!

بە ناشوکری ‌نەبێ نێو ئوتوبووسیش قەت جێ نییە بۆ دانیشتن!‌ بە پێوەش ڕادەوەستی لە پاش و لە پێش خۆت پێوە‌ دەنێن!!‌ ئەخر نازانم لە سەر شەڕواڵەوه چ تامێکی هەیە ئە‌و خەڵکە بۆ وا دەکەن؟! ئەمڕۆ دەستم بە مێڵەکەوە گرتبوو و کەوتبوومە فکرەوە، پیاوێک وا لێی جووت کردبووم تەواو هەستم بە هینەکەی دەکرد!! 

پێم عەیب نەبوایە هۆڕ هۆڕ دەگریام!!‌

*

ماوەیەکە لە بەر دەرکەی زانکۆش گیرم پێ‌ دەدەن! بۆ چوونەژوورەوە داوای کارتی خوێندکاریم لێ‌ دەکەن! هەرچی دەڵێم ونم کردووە دەڵێن ئەمانە بە گوێماندا ناچێ بڕۆ یەکی دیکە وەرگره! وەرگرتنی کارتێکی نوێش لانیکەم 20 هەزار تمەنی دەوێ!! زۆر جاران بە دزییەوە دەچمە ژوورێ!

کوڕە وەڵلا حەوسەلەی زانکۆشم نەماوە! دەچییه سەر کەلاس مامۆستا دەست پێ دەکا: تێئۆری مارکس ئەوەیە و وێبێر ئەوە دەڵێ و پارسۆنز ئەوە ناڵێ و … هەیهوووووو! هەرکەس لەولاوە هاتووە قسەیەکی کردووە!‌ باپیرم دەیکوت زۆر کوتن قورئان خۆشه!!

لە زانکۆش ئەوەی باسی لێ نەکرێ دەرسە! یا باسی سێکسە یا باسی سیاسەت! بزووتنەوەی خوێندکاری و دێمۆکراسی و مافی مرۆڤ و مافی ژنان و …! عوسمان چەپە، رەحمان ڕاستە، سوعدا فێمینیستە، غەفوور ناسیۆنالیستە، ئەنوەر پان ئێرانیستە، خدر پان تەڕەماشیستە، هەی هەی!! ئەو بەزمه کوا بۆ من دەبێ؟!

*

بەینێکە سەرم دێشێ، بە خۆم دەڵێم خۆم بکوژم و نەجاتم بێ!! بەڵام زات ناکەم!!

هاتوومە‌وە ژوورەکەی خۆم و دەرگام لە خۆم داخستووە! پەنجێرەکەشم بە پەتوو داپۆشیوه!‌ دەمهەوێ لەمە‌ بەدوا لەم ژوورەدا بمێنمەوە! ئاوا باشترە! چا نییە کەس خۆت پێوە نانێ! یان کەس بە قووڕەی زگت پێناکەنێ! ‌یان کەس لەبەر بۆگەنی لەشت دەست بە لووتییەوە ناگرێ! پاشانیش لە قسەی زل و دروشمی قۆڕ و سیاسەت و تەڕەماشیش خەبەرێک نییە!!

لەم ژوورەدا هەر خۆمم!!

*

برسێتی بڕستی لێ ‌بڕیوم! دەستم کردووە بە خواردنی شت و مەکی وەتاغ! سەرەتا لە کتێبەکانمەوه دەستم پێ کرد، رۆژێ 100 ، 150 لاپەڕەم دەخوارد! ‌ئەووەڵێ مێعدەم هەڵینەدەگرت، پێی قەبز دەبووم! بەڵام ئێستا بە کەوچک و دەورییەکانیش قەبز نابم! هەموو جلەکانمم یەک لە دوای یەک خواردووە! شۆرت و گۆرەوی و شەلوار و کاپشێن  و ئەوەی هەمە و نیمە!!

سووچێکی وەتاغم داناوه بۆ گووکردن! ڕۆژ بە ڕۆژ وەکوو تەپۆڵکەیەک کە خۆڵی وەسەر کەن باڵا دەکا!!

*

ئەمڕو ئاخرین لەتی فەڕشەکەشمم خوارد!! ‌هیچی ترم نەماوه! ڕووت و قووت کەوتووم و برسێتی بڕستی لێ بڕیوم!!

*

دوو سێ رۆژە هیچم نەماوە و دەستم کردووە بە گووخواردن!! سەرەتا بێزم هەڵدەستا، تەنانەت یەک دوو جاریش ڕشامەوه! بەڵام ئێستا زۆر فەرقی پێ ناکەم!!

دەمهەوێ زیندوو بمێنمەوە!!

::: بەهاری 1388 :::

The post چیرۆکێک بۆ ئەوانەی وا ئەزانن دنیا فشە نییە!! appeared first on ژنەفتن.

تەمی شەوقێک لە شووشەی پەنجەرەکەم دەدات،

کە هەم جەلادە و هەم پەیامبەر

بەرلەوەی بمرم،

بە تیشکێک دەمکوژێت و

دوای ئەوەی دەبم بە خۆڵەمێش،

بە فوویەکی سارد،

لەنێو شووشەی چاوەڕوانیدا،

دەمژێنێتەوە

من لەم هەرێمە غەریبەدا،

دڵم نەخۆشخانەیەکی چۆڵە و

زمانم،

عیسایەکە لەسەر عارەبانەی کەمئەندامیی وشەکان

دەستەکانی بە تەلەفۆنی بێدەنگییەوە بەستراون و

کاتێک دەیەوێت بڵێت: خۆشمدەوێیت،

جیهان دەبێتە تەمومژێکی چڕ و

دێڕەکان لەژێر پێی هێماکاندا دەپلیشێنەوە

من لێرەم…

لەسەر شەقامێک کە هێڵەکانی درێژکراوەی حەسرەتن

هەر هەنگاوێک،

بزمارێکە بۆ سەر جەستەی ڕێگا

هەر تەماشاکردنێک،

خاچێکی مۆدێرنە لە کۆنکرێت و ئاسن و دووکەڵ

من لەسەر ئەم خاچانەدا،

خوێن نا،

کاتژمێرە مردووەکانی تەمەنم هەڵدەواسم

ئەی ئەو کەسەی لە ناوەوەی مندا بەتاڵیت!

شەوقی تۆ، وەک تیشکی لەیزەر،

پێستی ناوەوەی یادەوەریم دەسووتێنێت و

لۆژیکی یادیشت،

برینەکانم بە خوێی فەرامۆشی ساڕێژ دەکات

ئێمە لە سەدەی سڕبوونی وێنەکاندا دەژین

دڵم عیسایەکە،

بەڵام بێ هەست

خاچەکەشم چوارڕێیانێکی قەرەباڵغە لە نائومێدی

تۆ،

لە یارییەکی ئەلیکترۆنیی بێدەنگدا،

کە تێیدا،

تەنیا کۆدێکی سەرگەردانم لە نێوان مەرگ و مانەوەدا،

دەمکوژیت و دەمژێنیتەوە

The post سێبەرێکی کۆدکراو لەسەر چوارڕێیاندا appeared first on ژنەفتن.

لە ڕوانگەی منەوە ــ هەتا ئێستا ــ ڤەژینبووکس ئابڕوومەند ــ معتبر ــ ترین فەرهەنگی کوردییە.

تا ئێرە خوێنەر وا دەزانێت من ڤەژینبووکس و ڤەژین‌لینکسم لێ تێکچووە! بەڵام وا نییە. لەبەر چاوی من ڤەژینبووکس لە ڤەژینلینکس و هەموو قامووسە کوردییەکانی تر دیکشنرییەکی باوەڕپێکراوترە.

لە فەلسەفەی زماندا دەگوترێت؛ مانای ڕاستەقینەی وشەکان لە بەکاربردن و لە کانتێکست و ڕستەکاندا دەر دەکەوێت. هەر لەبەر ئەم ڕاستییەیە کە لە فەرهەنگە زەنگینەکانی دونیادا کاتێک دەیانەوێت مانای وشەیەک دیاری بکەن وشەکە لە ڕستەیەک یان دەربڕینێکدا بەکار دەبەن و دیاری دەکەن کە فڵان وشە لە فیسار بەستێن و کانتێکستدا چ مانایەک دەدات.

لەگەڵ ئەوەی لە بڕێک لە فەرهەنگە کوردییەکاندا هەوڵ دراوە مانای وشەکان بەپێی بەستێن لێک بدرێتەوە، دەبینین لە بڕێک لەو فەرهەنگانەدا مانای وشەکە بە هەڵە لێک دراوەتەوە. سەیری ئەم نموونەیە بکەن کە لە فەرهەنگی ڕەنگی پازار هەڵم بژاردووە:

له لاپەڕی ۱۱۰۰دا ئەم دێڕە شیعرەی کامەران موکری هێنراوە؛

با هەزار و یەک هۆنراوەی ڕەنگاوڕەنگ

وەکوو کچی گۆشی نازی شۆخ و شەنگ.

گوایە ــ بەپێی تێگەیشتنی فەرهەنگنووس ــ لێرەدا وشەی ڕەنگاوڕەنگ وەک ڕەنگێک بەکار هاتووە. بەڵام لێرەدا وشەی ڕەنگاوڕەنگ پەیوەندی بە ڕەنگەوە نییە بەڵکوو مانای فرەچەشن ــ متنوع ــ دەدات.

بەم دوو پێشەکییەوە دەتوانیت لە گرنگی ڤەژینبووکس تێ بگەیت. ڤەژینبووکس ماڵپەڕێکە کە بەشێک لە ڕەسەنترین دەقە کوردییەکانی تێدایە. هەر کەسێک بیەوێت مانای ڕاستەقینەی وشەیەک لە بەستێنێکی تایبەتدا بدۆزێتەوە دەتوانێت بە گەڕان بۆ ئەو وشەیە لە ڤەژینبووکسدا دەیان نموونە بدۆزێتەوە. لەم ڕووەوە له ڕوانگەی منەوە ڤەژینبووکس فەرهەنگی دێهخودای کوردییە.

دامەزرێنەرانی ڤەژینبووکس ئەم ئامانجانەیان بۆ کارەیان داناوە:

ــ دروستکردنی کۆگایەکی دەق (corpus) لە بەرهەمی نووسەران و شاعیرانی کورد.

ــ کۆکردنەوەی زانیاریی زیادە (metadata) وەک شێوەزار، ڕێککەوت و … لەگەڵ دەقەکاندا.

ــ دیاریکردنی بەشە تایبەتەکانی نێو دەقەکان وەک تاگی زمان بیانی و تاگی ناوی تایبەت و …

ــ بەهێزکردن و بەرزکردنەوەی پلەی زمانی کوردی لە ناوەرۆکی سەر وێبدا.

ــ دابینکردنی پێگەیەکی ناوەندی بۆ بەژێدەرکردن و ئاماژەپێدان بە سەرچاوە مێژوویی و ئەدەبییەکانی کوردستان.

هەموو ئەو ئامانجانە بەرزن و ڤەژینبووکس هەموویانی پێکاوە. بەڵام لە ڕوانگەی منەوە ڤەژینبووکس بەم ژێرخانەی هەیەتی دەتوانێت ئامانجی گەورەتر و بەرزتر بپێکێت. ئامانجێک کە دەتوانم پێی بێژم؛ ئامانجی کردنی ڤەژینبووکس بە دێهخودای کوردی. ئامانجی کردنی ڤەژینبووکس بە باوەڕپێکراوترین قامووسی کوردی. قامووسێک کە بۆ هەر وشەیەکی کوردی دەیان نموونەی بەکاربردنی ئەو وشەیە بخاتە بەردەست.

ڤەژینبووکس بە گۆڕینێکی بچووکی ژێرخانەکەی لە ئاستێکی تردا دەتوانێت لەخۆگری مێژووی گەشە و گورانی زمانی نووسینی کوردی بێت. وای دابنێ ڤەژیبووکس لەخۆگری ڕەسەنترین و بایەخدارترین دەقە کوردییەکان بێت، دەقەکانیش بەپێی ڕێککەوت و کرۆنۆلۆژیا ڕیز کرا بن. لە کاتی گەڕان بۆ وشەیەکی کوردی نموونە دۆزراوەکان بەپێی مێژووی نووسینی دەقەکان ریز بکرێن، لەم حاڵەتەدا ئێمە تێ دەگەین فڵان وشەی کوردی سەرەتا لە کام دەقی کوردی‌دا تۆمار کراوە. بەمەش ئێمە دەتوانین مێژووی گەشە و گورانی زمانی کوردی بزانین.

ئەوەی بڕێک دەقە فەلسەفییەکانی دیبێت له گرنگیی مێژووی گەشە و گورانی زمان و وشە تێ دەگات. کە باسی بوتیقا دەکرێت دەگەیت بە پۆئتیک و لە پۆئتیکەوە دەڕۆیت تا دەگەیتە پۆئسیس(دروستکردن) لە زمانی یۆنانیدا.

لە باسی وشەی ئەقڵدا دەتبەنەوە بۆ وشەی عوقولی عەرەبی کە پەتێک بووە بۆ بەستنەوەی چوارپەلی وشتر.

هەزاران نموونەی وا هەیە کە گرنگیی مێژوو و گۆڕاوگۆڕ ــ تطور ــ‌ی وشە لە هزر و فەلسەفەدا نیشان دەدەن. مێژووی فەلسەفە هەر مێژووی دروستبوون و گۆڕانی وشەکانە.

ئەوەی ڤەژینبووکس لای من گەورە و بەرز دەکات ئەو ژێرخانەیە کە هەیەتی و دەتوانێت ببێت بە سەرچاوەیەکی باش بۆ  زانینی مێژووی گۆڕان و گورانی زمانی نووسینی کوردی.

لەم ماوەیەدا کتێبی حەوتەوانەی دکتۆر سەلاحەدین خەدیو بڵاو بوویەوە.

ئەو کتێبە دووبارە گرنگیی بوونی سەرچاوەیەک بۆ زانینینی مێژووی وشەی کوردی دەر دەخات. دکتۆر خەدیو لەو کتێبەدا باسی کۆمەڵێک چەمک و وشە دەکات کە کەی و چۆن هاتنە ناو زمان و دونیای کوردەوە. وشەگەلی وەک گەل، نەتەوە، سەربەخۆیی، ئۆتۆنۆمی و هتد. بوونی ژێرخانێکی پتەوی وەک ڤەژینبووکس ئاسانکارییەکی گەورەیە بۆ لێکۆڵینەوە لە مێژووی هزر و زمان و وشەی کوردی.

خەسارناسیی ڤەژینبووکس

ئامانجی چوارەمی ڤەژینبووکس ئەمە بوو:

ــ دابینکردنی پێگەیەکی ناوەندی بۆ بەژێدەرکردن و ئاماژەپێدان بە سەرچاوە مێژوویی و ئەدەبییەکانی کوردستان.

من ئەم دەقەم نووسی چون ڤەژینبووکس بە ژێرخانێکی گەورەی فەرهەنگیی کورد دەزانم و حەز دەکەم بەڕێوەبەرانی پێداچوونەوەیەک بە کارەکەیاندا بکەن کە باشتر خزمەتی کوردی بکات.

سەرەڕای ئەوەی ڤەژینبووکس لەخۆگری بەشێکە لە ڕەسەنترین دەقەکە کوردییەکان، سەیرکردنی لیستی کتێبەکان نیشان دەدات ڤەژینبووکس خاوەنی پرۆگرامێکی تۆکمە نییە. بەشێکی بەرچاوی ئەو دەقانەی لە ڤەژینبووکسدا دانراون دەقی پلە سێ و پلە چواری کوردین، لە حاڵێکدا زۆرێک دەقی ڕەسەنتر و باوەڕپێکراوتر هەن کە دەبوو هەبن و نین.

بە ڕای من ئەوەی پێویستییەکی هەنووکەیییە بۆ ڤەژینبووکس دیاریکردنی بەرجەوەندێکی کارییە بە جۆرێک سەرەتا لیستێک لەو کتێبانەی دەبێ هەبن دیاری بکرێن و دواتر داوا بکرێت له بەشداربووان کارەکە ڕاپەڕێنن نەک ئەوەی کەسەکان بە دڵخوازی خۆیان دەق هەڵبژێرن.

پێشنیاری من بە هاوڕێیان ئەوەیە بەرجەوندێکی کاریی دیاری بکرێت. دەقەکان دەبێت بەپێی بنەماگەلێک کە بەڕێوەبەران دیاری دەکەن هەڵببژێردرێن. پێشنیاری من ئەوەیە لە هەڵبژاردنی دەقەکاندا چەند خاڵ ڕەچاو بکرێت:

ــ گرنگیی ئەدەبی؛ دەبێ ئەو دەقانەی خاوەنی گرنگییەکی ئەدەبین هەڵببژێردرێن. لەم بابەتەدا نابێت تەنیا گرنگی بە دەقی زۆر کۆن بدرێت. زۆر دەقی نزیکی ئەدەبی هەن دەکرێت بە ڕەزامەندی خاوەنەکانیان کە هێشتا زیندوون دابنێرێن. وەک شیعرەکانی عەبدووڵڵا پەشێو، مودریک کەریمی، سەعید عبادەتیان یان ڕۆمانەکانی محەممەد ئوزوون، فەرهاد پیرباڵ، شارام قەوامی، چیرۆکەکانی عەلی غوڵامعەلی و حەمەفەریق حەسەن.

ــ گرنگی زمانی؛ دەبێ ئەو دەقانەی لە مێژووی زمانی کوردیدا گرنگیان هەیە دابنرێن. بۆ ئەم مەبەستە دەکرێت ڕۆژنامە و گۆڤار کوردییە کۆنەکان بە ڕێنووسی ڤەژینبووکس تایپ بکرێنەوە و دابنرێن. ڕۆژنامە و گۆڤارەکان، بە تایبەت ئەوانەی نێوان ۱۹۴۰ تا ۱۹٨۰ بە وردی مێژووی گۆڕانی کوردی و دروستبوونی کوردیی نوێ و کوردیی نووسین نیشان دەدەن. لێرەدا گرنگی گۆڤارەکان لە کتێبەکان فرەترە. چون زۆربەی وشە دروستکراو و نوێیەکان کەسانێک دروستیان کردووە کە ڕەنگە قەد نووسینیان بە شێوەی کتێب بڵاو نەکردبێتەوە.

ئەگەر ڤەژینبووکس بتوانێت گۆڤار و ڕۆژنامە کۆنە گرنگەکان بە ڕێنووسی ئەمڕۆ دابنێت؛ کاری لێکۆڵەران بۆ کۆڵینەوە لە وشەی کوردی ــ تۆ بیخوێنەرەوە بیرکردنەوەی کورد بە کوردی ــ ئاسانتر دەبێت.

باسی یەک نموونە دەکەم. وای دابنێ کەسێک بیەوێت بزانێت یەکەم  نووسەران و بیرمەندانی کورد کە باسی استثمار ــ بە فارسی ــ یان exploitation ــ بە ئینگلیزی ــ یان کردووە چ هاوتایەکی کوردییان بۆ داناوە. بە گەڕان لە ڤەژینبووکسدا بۆ وشەی چەوسانەوە دەگەین بە دەقێکی حەسەن قزڵجی لە کتێبی ” کۆبەرهەمی حەسەن قزڵجی”. پاراگرافێک لەو کتێبە ببینن:

سەرمایەداری ڕژێمێکە بناغەی لەسەر چەوسانەوە و ڕەنجخۆری کاری کرێگرتەیە لە لایەن سەرمایەدارەکانەوە. چەوسانەوە و ڕەنجخۆری یاخود سوود لێکێشانەوە ئەوەیە سەرمایەدارەکان ئەو نرخە زیادەیە بۆ خۆیان هەڵئەگرن کە کارگەر بە ڕەنجی شان و کاری خۆی پەیدای ئەکات.

لەم نموونەیەدا یەکێک لەو یەکەم کوردانەی ویستوویە بە کوردی لەسەر چەوسانەوه بنووسێت؛ سێ هاوتای بۆ ئەو چەمکە داناوە؛ ڕەنجخۆری، چەوسانەوە، سوودلێکێشانەوە. ئەگەر بمانەوێت بزانین نووسەران و بیرمەندانی کوردینووس سەرەتا چەمکەکانیان چۆن کردووە بە کوردی؛ دەبێت سەیری ڕۆژنامە و گۆڤارە کۆنەکان بکەین. ئەگەر ڤەژینبووکس بتوانێت ڕۆژنامە و گۆڤارە کۆنەکان لە خۆی بگرێت، گەڕان و کۆڵینەوە لە بیرکردنەوەی کورد ــ بە کوردی ــ ئاسانتر دەبێت.

بێجگە گۆڤار و ڕۆژنامە کۆنەکان کە سەرچاوەیەکی دەوڵەمەندی کوردین، دەکرێت کتێبی نووسەرانێک دابنێرێت کە زمانی نووسینیان کوردییەکی ڕێک و پێکترە. وەک کتێبەکانی مەسعوود محەممەد، جەمال نەبەز، حەمەسەعید حەسەن، شێرزاد حەسەن، فرات جەوەری، عەبدوڵڵا پەشێو، فەرهاد پیرباڵ.

ــ گرنگی شێوەزارەکی؛ خەسارێکی گەورە ئەوەیە دەقەکان بە شێوەی لارەسەنگ بە سەر ناوچە و شێوەزارەکاندا دابەش بوون. ڕوونە کە ناوچە و شێوەزارەکان له ڕووی ژمارەی دەقی ئەدەبییەوە هاوسەنگ نین. بڕێک ناوچە و شێوەزار دەقیان زۆرترە، سەرەڕای ئەمەش ڕێژەیەکی بەرچاوی دەقی پلە چەندم لە ناوچە و بنزارێکی دیاری کراوە دانراوە لە حاڵێکدا بڕێک ناوچە یەک دەقیان لێ دانەنراوە. ئەم خەسارە وا دەکات زۆرێک وشەی کوردی هەن کە لە ڤەژینبووکسدا یەک نموونەشیان لێ نادۆزرێتەوە، چون لە ناوچەیەک بەکار دەبردرێن کە دەقی لە ڤەژینبووکسدا نییە. بۆ ئەم مەبەستە باشترە ڤەژیبووکس ڕێژەیەکی کۆتا بۆ ناوچە و شارە جیاوازەکان دابنێت تا بە جۆرێک ڤەژینبووکس هەموو وشەی کوردی لهخۆ بگرێت.

با نموونەیەک بهێنمەوە. لە ڤەژینبووکسدا ئەگەر بە شوێن وشەی “جوایەز” ــ جیاواز بە بنزاری دەوروبەری هەولێر ــ دا بگەڕێیت؛ ۳ نموونە دەهێنێت کە هی شاعیرێکە بە ناوی ڕاجی. بەڵام ئەگەر بە شوێن وشەی “جیاواز”دا بگەڕێیت ۲۰۷ جار دەدۆزرێتەوە. لێرەدا دەبینی دیوانی ڕاجی چون هی ناوچەیەکی جیاوازترە ڤەژینبووکسی له ڕووی چەشناوچەشنی شێوەزارەییەوە دەوڵەمەند کردووە.

لە کۆتاییدا بە ڕاوێژی کابرا کە گوتی “شێخە گیان تۆ خۆ دوعاکە دەکەی با کوڕ بێت” بە ستافی دڵسۆزی ڤەژینبووکس دەڵێم؛ ئێوە کە زەحمەتەکە دەکێشن، خۆزگە بە پلان و بەرنامەیەکی تۆکمەتر بیکەن. حەیفە هێشتا سەدان بەهەمی پلە یەکی کوردی لە ڤەژینبووکسدا دانەنراوە کەچی ڕێژەیەکی بەرچاو بەرهەم لە ڤەژینبووکسدا دانراوە کە لە هیچ ڕوویەکەوە گرنگییان نییە. نە لە ڕووی ئەدەبییەوە، نە لە ڕووی زمانییەوە، نە لە ڕووی مێژوویییەوە، نە لە ڕووی شێوەزارییەوە.

The post فەرهەنگی دێهخودای کوردی appeared first on ژنەفتن.

The post شەرابی خەونەکان appeared first on ژنەفتن.

لەسەر کورسییەکی دارین دانیشتووم؛

کتێبەکەم دەکەمەوە و

خەریک ئەم شیعرەی خۆم

(کە ئێستێ تۆش دەیخوێنیتەوە)

دەخوێنمەوە!

ڕێک لەو کاتەی خەریکم

یەکەم قوم لە قاوەیەکی قەزوان دەدەم،

خەیاڵم دەبێتە ئەو باڵندانەی

ڕۆژانێ نیشتەجێی بان داری

کورسییەکەی ژێرم بوون،

بزەیەک دەمگرێ و لە دڵەوە دەڵێم:

نها کە سەرم لانەی ئەم خەیاڵاتانەیە،

ڕۆژێ دێ منی سەر-دار-یش

تەوری مەرگ (کوشتن) دەمبڕێتەوە…

بەڵام، ئاخۆ ئێسکوپروسکی منی شاعیر

دەبن بە کورسیی کام ستەمکار یان

چی جڕوجانەوەرانێک؟!

The post گەمەی قەزوان و تەور appeared first on ژنەفتن.

کرانەوە

موحسین عیمادی

لە ئیسپانییەوە: ژیار هۆمەر

دەهزریم لە ژوورۆچکەیەکی هێلسنکیین و خزاومەتە ئامێزتەوە؛ حوزەیرانی ساڵێکی نەزانراوە. ئەسپی سرک لەسەر دیوارەکانی سمکۆڵانیانە. کەشەکەیشی هەر هاوینە. ڕۆژانە لەو ژوورەدا وەرز دەگۆڕا: ئەو ڕۆژەیان پاییز بوو و ڕامدەمووسییت. لێوت تامی خۆکوشتنی دەدا و هەناسەیشت بەرامەی ماڵاواییی ئێجگار دوورودرێژی دەدایەوە. دەستم دەژەندە هەموو شتێک و تینووی لاواندنەوە بووم. باڵاخانەکە بووە بنکی زەریایەکی کەیلی کەشتیی نوقم. ئەم کەڤری هەڵدەگرت، ئەو چەکی کەونارا، ئەویدی بارووت. دەهزریم لە ژوورۆچکەیەکی هێلسنکیین. ماچومووچ، وێنەی زەریای سڕاوەی سەر نەخشەیش لە ناخمدا دەنەخشایەوە. شوێنێک بانگی دەکردین. کەس پێ ناخاتە سەر هیچ خاکێک مەگەر خاکەکە بانگی بکات. ئەوەی لەو ژوورەدا بانگی دەکردین دەشێت زەریایەکی نەناسراو بووبێت. دەشێت منداڵیم بووبێت و دەستلەناودەست لای کەنداوەکەوە هەنگاومان هەڵهێنابێت. دەشێت ئەو شوێنە سڕاوەیە لە کەنداوێکی هێلسنکیدا بەرەو لامان هاتبێت. دەشێت شەوگار بووبێت، ڕەنگیشە ڕۆژێکی نەبووی مانگی حوزەیرانی ساڵێکی نەزانراو بووبێت.

کەنداوەکە بە لاشەی نەورەس تەنرابوو. دەستلەناودەست لەگەڵ منداڵیمدا هەنگاوت هەڵدەهێنایەوە، منداڵیشم مەلیچکێکی لۆقدرێژ. نزم دەفڕی. سڵی لە مرۆ دەکردەوە. بەرەبەیان هێلانەکەی جێ دەهێڵا و تاریکان دەگەڕایەوە. دەچوو لە قەراغی ئاوەکە دەنیشتەوە. تینوویشی بووایە لێی نەدەخواردەوە. نەیدەویست ئاوەکە کەم ببێتەوە. تا تینووتر با، زیادتر دەڕسکا. ڕۆژێک هێندە زەبەلاح بوو تا سێبەرەکەی باڵی بەسەر هەموو ئاوەکەدا کێشا. خۆی لەناو ئاوەکەدا بینییەوە. ئەو مەلە مڵۆزمە ئێمەی لە سێبەرەکەیدا دەشاردەوە. بەبێ‌ ڕووخسار، بەبێ دەنگ. باڵی فش دەکردەوە و ڕووناکییەکەی دەشاردەوە. بەو ڕێژنەیە، چاوی دەترووکاند و ڕێی لە بارانەکە دەگرت. دەستی گرتییت و فرمێسکی گەشت هەڵوەراند. هەر لە مەلێکی هەڵنیشتووی سەر هەژگەڵ دەچوویت و دەتچریکاند. هێندە پەلت فرتاند تا ئاورنگی پەڕوباڵت بەر هەژگەڵەکە کەوت و ئاگری تێ بەر دا. خۆت لە ئاگرەکەوە دەرهاویشت، منیش بوومە خۆڵەمێش. هێلکەیەک لەناو خۆڵەمێشەکەدا بوو؛ مەلێکی تێدا زا کە ئەسرینەکەی کۆنەبرینی پێ ساڕێژ دەکرا. هەر کاتێک دەستوپلت دەلاوێنمەوە، ئەو مەلە لەسەر هەژگەڵەکە هەڵنیشتووە.

ناتوانم بە «ئەڤین» ناوت بهێنم چونکە ئەم وشەیە لە سنووری لەشولارتدا هیچ ئاماژەیەکی ژینی تێدا نییە: چەشنی هەژدیهای سەر جامی شەرابە. توێکارییەکەی کەیلی واقوڕمانە، کەچی ئەمێستا هەموو ئەندامەکانی بەبێ هیچ مەترسییەک بەرچاوە. لاقت دەکەیتەوە، دەستبەجێ شوێنەکە لە هەوا و ئەو پەیڤانەی لە زارمەوە ناگەنە گوێت بەتاڵ دەبێتەوە. گشت پەیڤێکی دڵداری وەک منداڵێکی زۆڵە کە دایکی لە ترسان دەیهاوێتە ناو بیرەوە. تاساو، خۆم هەڵدەدەمە ناو بیرەکەوە تا منداڵەکە بدۆزمەوە. چاو هەر لە ڕەهەندی تاریکیدا دەکرێتەوە. بەبێ ئاسۆ، بەبێ بنک. لە ناختدا نیشتەجێ دەبم وەک ئەو کەسەی لە مەڵبەندی کپی و نووتەکیدا نیشتەجێیە. من لەناو دڵی مردووەکەدام و نەمردووم. ناتوانم بە «مردن» ناوت بهێنم.

تاریکی لە دژی ڕووناکی یەک دەگرێت. کاتێک دواگڕ لە بێکەڵکیی چاودا، لە ناواخنی شێتیدا دەکوژێتەوە، تێکڕای پیاوانی ڕابوردووت دێنە ناوتەوە: ئەوانەی ڕەنگێنراون بە چێژ و تۆڵەسەندنەوە. دەکەومە چاڵێکی ناو زەریاکەوە، تا بگەمە پێش‌مێژووت. چاوی پێستی گریاوم خۆی لە بنکی چاڵێک هەڵدەسووێت کە سترانی بە هەموو زمانێک لێ هەڵدەقووڵێت. کاتێک باران دادەکات، هیچ سترانێک نابیسترێت. ئەوسا پێل قووڵاییی زەریایەکی مەنگ هەڵدەقڵیشێنێت. زەریا پیاوەکان هەڵدەلووشێت و ئێسکوپرووسکیان دەگەڕێنێتەوە. ئەوسا زەریاکە چاڵێکە. گەر ئاوەکەی جوێ بکەنەوە، دەبێتە خوێن و گەر خوێنەکە دوورتر بخەنەوە، دەبێتە کەڤر. ئەوسا زەریایەکی مەندە بە کەناراوی بەبەردبووەوە. هەر شتێک بکەوێتە ناو ئاوەکەوە، چڵێسانە لەسەر بەردەڵانی کەناراوەکەی بەرەنگاری دەبێتەوە. بە بانگکردنێکی بێ‌زایەڵە، شوێنێک لە ناو تۆدا بانگم دەکات. لەو شوێنەی یەکەمین مرۆڤ درکی بە ڕووتییەکەی کردووە؛ ئەوەی نیوەی لە ئاوەکەدا و نیوەی لەسەر خاک نێژراوە. ڕووتوقووت لە گۆڕەکەیدا، لە ناخی چوار توخمەکەدا، چاو هەڵدەهێنم. ئەفسانەیەک لە زەمەندا حەقیقەت هەڵدەلووشێت. هیچ چیرۆکێک باسی گۆڕەکەی حەوا ناکات. ئەو قەت نەمردووە. من ئادەمم: هەڵماڵینی ڕووتییەکەی تۆ واقی وڕ ماندووم.

ڕووناکی لە تاریکیدا دەزێت. ئەوە تاریکییە وشە بۆ فۆڕمی خۆی دەگەڕێنێتەوە. من ئاژەڵێکی فۆڕمم؛ فۆڕمی ڕامووسین، فۆڕمی لاواندنەوە. ناوی واتایی و ڕاناو لە زماندا دەتوێنەوە. چوار توخمەکە لە ژوورۆچکەیەکی هێلسنکی گەمارۆیان داوم، کەچی من چاو لە چاوت ناترووکێنم. گۆڕەکەی ئادەم لە پێخەفەکەتدا شی دەبێتەوە. ناتوانم بە «ئەڤین» ناوت بهێنم. ناتوانم لە مانگی حوزەیرانی ساڵێکی نەزانراودا بە «مردن» ناوت بهێنم. ڕاتدەمووسم و لێوت ڕەنگەکان لە ناخمدا دەتەقێنێتەوە. هەوا دیار دەبێت. گەردیلەی هەوا لەسەر پێستمان. گەردیلەی هەوا لەسەر زارمان. گەردیلەی هەوا لە نێوان پەیڤەکان. چاوت هەڵدەهێنیت. پێکەوە گەیشتووین. منداڵییت دەستی منداڵیم دەگرێت. بارانی بەخوڕە و هەژگەڵەکە تەڕوبڕە. مەلێک لە بزەتدا ئاو دەخواتەوە. مەلێک لە بزەتدا نسێ دەبەشێتەوە. مەلێک لە بزەتدا ڕۆندک هەڵدەڕێژێت. خۆشەویستم، گشت جارێک مەل لە بزەتدا دەزێت.

سەرچاوە:

Obertura, Mohsen Emadi, Sonata en la ceniza (Una égloga), P: 9-15, Olifante Ediciones de Poesía – 2022 (traducido al kurdo por Jiyar Homer)

The post کرانەوە appeared first on ژنەفتن.

پەنجەرەکە

بڕیار دەدەی ساڵی داهاتوو

لۆکە بچێنیت،

کە هاوین دێت، هەندێک هەور

دەدزیت و بە دەمبووس،

بە ئاسمانی ناو تابلۆی سەر دیوارەکەدا

هەڵی دەواسیت..

یەکێک لە کراسەکانت با دەیبات

لە ساڵڕۆژی شکستی پاشا

لەبەری کرێکارێکی شارەوانیدا

دەیناسییتەوە،

لە ترسی پیسبوونی شەقامەکان،

ناتوانی هاوار بکەیت..

چونکە بە منداڵی وێنەیەکت

بە دەمانچەکەی باوکتەوە گرتووە

پۆلیسەکان گەڕان و

دەستێکی تۆیان بە بڕاوی لەژێر

سەرینی کچێکدا دۆزییەوە..

هەمیشە لە نیشتنەوەی باڵندەیەک

دەترسی،

نەک لەبەر ئەوەی ساڵەکەی گرانییە و

دانەوێڵە دەست ناکەوێت،

دەترسی کۆترێک بێتە ناو

خەونەکانتەوە و چاوەکانت بە دەنووک

هەڵبکۆڵێت..

دەتەوێت بە خواردنی گڵۆپێک

 لاساییی دەروێشەکەی کۆڵانی ماڵی

داپیرەت

بکەیتەوە،

تا شەڕێ ناوخۆ هەڵدەگرسێت،

شارێک بە تاریکی دەمێنێتەوە..

کاتێک بەسەر قاپی میوەکەدا

بەردەیتەوە،

دایکت لەناو ئەلبومێکی کۆندا

هاواری لێ هەڵدەستێ

دراوسێکان لەجیاتی خۆت، بۆڵێک

ترێی زامدار دەبەن بۆ

نەخۆشخانە..

تەپڵەکێکی جگەرە لەسەر

مێزەکەیە،

جگەرەکێشەکە بە ئەگەرێکی زۆرەوە

هێشتا لە خەوێکی قوڵدایە ..

قاوەکەی بەردەمم کەمێک تامی

فرمێسک دەدات،

لەسەر مێزەکەی تەنیشتم

خاتوونێک ملوانکەیەکی شین

بەناو دەستیدا پساوەتەوە و

چاوڕێمە..

لەبەر خاتری ژەمێک قارچک

لێوی خۆت بە بڕاوی لەناو تاوەیکدا

لێ جێ دەمێنێت،

 بەیانی بە ئارامی دەنووی

ئیتر ناتوانی ئەو گۆرانییانە بە دەنگی

بەرز بڵێیتەوە

کە شەوان

خەوی لە چاو دەتۆراندی..

The post “نەوسن” appeared first on ژنەفتن.

ڕۆبێکی قەرزکراو بەسەرتدا هەڵواسرابوو: زۆر فەرمی، زۆر دیار بوو. لە دەرەوەی دادگا، باڵەخانەی دادوەری بە خۆڕاگرییەکەیەوە سەیری دەکردیت، شێوە هەڵكەوتنەكەی وا دەدوا ناوت نازانێت، وەلێ هەر لە منداڵییەوە بینیبووی کە بەم شەقامانەدا دەڕۆیت و وا خۆت نیشان دەدا کە لەگەڵ سێبەرەکاندا دەمەداڵێ و چەند و چون دەکەیت، ئەویش لە دواوە سەیری دەكردیت.

بە خۆتت وت ئەمە تەنها فایلێکی ترە. بە شێوەیەکی پیشەیی ئەم درۆیەت گوت.

لەناو سەرتدا سێ دەنگ بە هاوتەریب و بە یەکجار گفتوگۆی توندیان لەسەر دۆسیەکەیە.

دەنگی یاسایی پێشینەکانی دەخوێندەوە وەکوو ڕستەی گوێڕایەڵ. دەنگی ئەو خەیاڵە تەواونەکراوەی هی ژوانێكی كۆنتر، یان بردنەوەیەكی مسۆگەر.

دەنگی تایبەت پرسیاری کرد کە بۆچی دەستت دەلەرزێت.

دەنگی شار هیچی نەدەگوت، ئەمەش خراپتر بوو.

بە شێوەیەك ڕاوەستایت. یانژی وەستانت بیر چووبێتەوە. یان ڕەنگە خەیاڵی ڕێکردنت، هێشتا لێرە بێت.

ناوی بریگرتەکەت.. موەکەلەکەت بە ڕوونی نووسرابوو، بەڵام هەر جارێک کە دەیخوێنیتەوە، دەگۆڕا. هەندێک جار هی باوکت بوو. كەمێك فایلی دۆسیەكەت كێشایە ژێر قۆڵی ڕۆبەكەت، بینیت بوو بە ناوی خۆت. هەندێک جار هی کەس نەبوو، تەنێ بۆشایییەكی سپی بوو کە دەبوو شتێكی لێی بێت.

بە وریایییەوە دەدوایت. گفتوگۆکانت، لێوەکانتی وەکوو ئاژەڵە ڕاهێنراوەکان دەجووڵاند، لەو شوێنەی کە پێویست بوو کڕنۆشیان بکێشا، دەیانبرد. دادوەر بە دەربڕینی پیاوێک کە پێشتر سازشی كردووە، لاری نەبوون و كێشانەوەی داواكەی كردبوویە ئاشتی. بە کۆتایییەکی جیاوازەوە گوێی لێ بوو.

کاتێک لە باسی دادپەروەری، وشەکە زۆر بە دەنگی بەرز دەنگی دەدایەوە، وەک ئەوەی لە پشت ئەو دیوارەوە دڕێلێک شتێک کون بکات.

هەستت کرد شارەکە کز بووەتەوە. ئێرە ڕێگایەکی هەیە بۆ چوونە ژوورەوە بەبێ کردنەوەی دەرگا. تۆز، مێژوو، لەسێدارەدانی نیوە لەبیرکراو، گرێبەستە واژۆکراوەکان لە ژێر فشاردا، بەڵێنەکان لە یەكەم پلیكانە بە واژووەوە تا دوا پایە دەبن بە هەڵم لە پلیکانەکاندا چرپەیان دەکرد. هەموویان لە تەنیشتتەوە لەسەر کورسییە دارەکە دانیشتبوون. یەکێکیان دەستێکی خستە سەر شانت. ڕووت لێ نەکرد بزانی کامیانە.

بیرت هاتەوە کە خوێندکار بوویت، پێت وابوو یاسا ئەندازەیییە، هێڵی ڕوون، گۆشەی سەلمێنراو. بیرت هاتەوە پێکەنین بە پارێزەرە بەتەمەنەکان کە دەیانگوت، فێردەبیت چی نانووسرێت.

دادوەر دەدوا. یان ڕەنگە کارمەندەکە بووبێت. یان ڕەنگە ئەو دەنگە بووبێت کە دواتر گوێت لێ دەبوو، ئەم ساتەوەختەت دووبارە دەژەندەوە تا هەموو لێوارە تیژەکانی لەدەست دا. بڕیارەکە بە نەرمی کەوتە خوارەوە، وەک تۆز. هەموو شتێك وەستاو و سارد.

کاردانەوەت نەبوو، چەشنی پارێزەری ڕام و ڕاهێنراو. سەر و چەناگەت نەوی بوو، کاغەزەکانت کۆ کردەوە، ڕێوڕەسمی ئارامگرتنت ئەنجام دا. لە ناوەوە شتێک بە هێمنی خۆی پێداچوونەوەی بۆ کرد، ڕستەیەک کە ساڵانێک بوو باوەڕت پێی هەبوو.

لە دەرەوە خۆر بە بێباکییەوە خۆی هەڵخستبووە سەر دیوارەکانی دادگا. لە ژووری دادبینییەكەی تر، پارێزەرێکی دیکە خەریکی بردنەوەی دۆسیەیەک بوو.

بە پێ ڕۆیشتیتەوە ماڵەوە، چیرۆکەکەش بەدوات داهات.

ئەو شەوە، فایلێکی نوێت کردەوە.

چۆڵ بوو.

بۆ یەکەمجار نەتزانی کە ئایا بڕیارە بەرگرینامەیەك بنووسیت، یاخود دانپێدانانێک.

The post فایلی سپی appeared first on ژنەفتن.