ئەگینا، دەژی.

ڕەنگە شتێکی ئەوتۆش لە ژیان هەڵنەکڕێنی، لێ هەر دەمێنی-

شتێک کە دەستی خۆتی تێدا نییە.

کاتێک ئەمە بە منداڵانم دەڵێم

گوێم لێ ناگرن.

خەڵکی پیر، وادەزانن-

ئەمە ئەو شتەیە کە هەمیشە دەیکەن:

باسی ئەو شتانە دەکەن کە کەس نایانبینێ

بۆ شاردنەوەی ئەو خانانەی مێشکیان کە دەمرن

چاوێکیش لە یەکتر دادەگرن؛

گوێ لەو پیرە پیاوە بگرە، باسی گیان دەکات

چونکە ناتوانێ ناوی کورسی بیر بکەوێتەوە.

سەختە تەنیا بیت.

مەبەستم نییە بە تەنیا بژیم-

تەنیا بوون، بە جۆرێ هیچ کەس نەتبیستێ.

من ناوی کورسیم بیرماوە

تەنیا دەمەوێ بڵێم- چیدی خولیام نەماوە.

بە دەم بیرکردنەوە لەوە بە ئاگا دێم

پێویستە ئامادە بیت

بەمزووانە گیان دەستبەردار دەبێ-

هەموو کورسییەکانی جیهان فریات ناکەون.

دەزانم چم پێ دەڵێن کە لە ژوورێ دەچمە دەرێ

کە دەبێ بچمە لای کەسێ، کە دەبێ حەبێکی نوێی خەمۆکی وەربگرم

گوێشم لێیانە، بە چرپە، خەریکی دابەشکردنی نرخن.

منیش گەرەکمە بقیژێنم

هەمووتان لە خەوندا دەژین.

خراپیشە، وا دەزانن، کە دەمبینن لێکدەترازێم

خراپیشە بەبێ ئەو وانانەی ڕۆژانە بۆم دەڵێنەوە

وەک بڵێی مافی من بێ ئەو زانیارییە نوێیە بزانم.

دەی، ئەوانیش هەمان مافیان هەیە.

ئەوان لە خەوندا دەژین و من خۆم ئامادەدەکەم

ببم بە خێو. دەنگی خۆم بگەیەنم.

تەمەکە ڕەوییەوە-

چەشنی ژیانێکی نوێ:

ئێوە هیچ بەرژەوەندییەکتان لە ئاکامەکەیدا نییە؛

خۆتان ئاکام دەزانن.

بیری لێ بکەنەوە: شەست ساڵ دانیشتن لەسەر کورسی. ئێستاش گیانی نائەبەدی

ئاشکرا و بێ ترس دەگەڕێ بەدوای-

لادانی پەردە.

تا بزانرێ ئێوە خەریکن ماڵئاوایی لە چ دەکەن.

ئاڤێرنۆ: لە ناوی دێرینی ئاڤێرنوس وەرگیراوە. دەریاچەیەکی بچووک، دە میل لە ڕۆژئاوای ناپۆلی ئیتاڵیا. ڕۆمانەکان بە دەروازەی جیهانی هەناوی زەوییان دەزانی.

The post ئاڤێرنۆ appeared first on ژنەفتن.

سواری وشتر بە.

پەرتووکی پیرۆز بخوێنەوە.

ڕەنگی کەوشەکانت بکە بە شین.

ڕدێن بھێڵەوە.

بە بەلەمێکی کاغەزیی جیھان تەی بکە.

ئابوونە بدە بە The Saturday Evening Post*.

تەنیا بە لای چەپی زارت شت بجوو.

ھاوسەرگیریلەگەڵژنێکییەک-لاقبکەوبەشفرەتەراشبکە.

لەسەرقۆڵیشیناویخۆتھەڵکۆڵە.

ددانت بە گازۆلین خاوێن بکەوە.

بە درێژایی ڕۆژ بخەوە و شەو ھەڵگژێ قەد درەختان.

ببە قەشە؛ بەکشۆت** و بیرە بخۆوە.

سەرت نوقمی ئاو بکە و کەمانچە بژەنە.

سەمای ڕۆژھەڵاتی بکە لە بەردەم مۆمە پەمەییەکان.

سەگەکەت بکوژە.

خۆت کاندید بکە بۆ پارێزگار.

لەناو بەرمیلێک ژیان بگوزەرێنە.

سەرت بە تەور بشکێنە و

گوڵەمێلاقە لەژێر باران بچێنە.

بەڵام ھەرگیز شیعر مەنووسە.

ــــــــــــــــــــــــــــــــــــــــــــــ 

*گۆڤارێکی ئەمێرکییە.

**جۆرە خوارنەوەیەکی مەکسیکییە، پێکدێ لە تێکەڵەی: تەکیلا و وێسکی و کرێمی ئیرلەندی و بیبەری ھاڕاو.

The post ئامۆژگارییەکی دۆستانە بۆ زۆرینەی لاوان appeared first on ژنەفتن.

جارێک لە هەر دە ساڵدا

دەیکەم

جۆرە پەرجووێکی زیندووە،

 پێستم

درەوشاوە چەشنی سەیوانی گڕسۆزی نازییەکان

لاقی راستم

سوکەڵە

رووخساری بێ رەنگم،

قوماشی جووە

پەچە لە رووم لادە

ئای دوژمنم

بڵێی تۆقیبم؟

لوتم، چاڵی چاوم، تاقمی تەواوی ددانم؟

بۆگەنی هەناسەم

لە رۆژێکدا لەبەرچاو ون دەبن

بە زوویی، بە زوویی ئەو گۆشتەی

چاڵی گۆڕ هەڵیلوشی بوو

لەگەڵم دێتەوە ماڵێ

منیش ژنێکی دەم بە خەندە

تەنیا سی ساڵم.

وەک پشیلە دەتوانم نۆ جار گیان بدەم

ئەمە سێیەم جارە

چ قەشمەرییە

دە ساڵ جارێک لەناوبچی

ملیۆنان تاڵ و چین

قەرەباڵخی دەم پڕ لە قرچە قرچی باوی

خۆیان بە ژووردا دەکەن تا ببینن

دەست و قاچی ڕووتم

خانمان و پیاوانی بەرێز

سەماکاری ورووژێنەری مەزن ببینن

ئەمانە دەست و ئەژنۆی منن

ڕەنگە تەنیا پێست و ئێسک بم

لەگەڵ ئەوەشدا، هەر هەمانم، ژنی بێوێنە.

یەکەمجار کە ڕوویدا دە ساڵ بووم

ڕووداوێکی نابەخۆ بوو

دووەم جار مەبەستم بوو

لەنێو بچم و هەرگیز نەگەڕێمەوە

لە هۆش خۆ چووم

وەک گوێچکە ماسی

دەبوایە هەر هاوار بکەن و

چەشنی مرواری لکاو کرمم لێ بکەنەوە

مردن

هونەرە، وەک هەموو شتێکی دی

من تابڵێی لێی شارەزام

جۆرێ دەیکەم هەست دەکەی دۆزەخە

جۆرێ دەیکەم هەست دەکەی ڕاستەقینەیە

پێموایە دەکرێ بڵێی وابەستەییم

هێندە ئاسانە دەتوانی لە ژوورێکدا بیکەی

هێندە ئاسانە دەتوانی بیکەی و هەر وەک خۆت بمێنی

چ شانۆیەک،

گەڕانەوە بە ڕۆژی رووناک

بۆ هەمان شوێن، هەمان ڕووخسار، هەمان دڕندەیی

هاوارێکی سەرسام:

”پەڕجوو”

لێمدەدا و دەمخا

کرێی خۆی هەیە

بۆ بینینی برینانم، کرێ دەدەی

بۆ گوێهەڵخستن بۆ دڵم، کرێ دەدەی

کە ترپەی دێ

کرێ هەیە، کرێی گران

بۆ وشەیەک، بۆ دەستلێدانێک

یان دڵۆپێ خوێن

یان تاڵە مووێکی سەر جلانم

ئاوایە ئاوا جەنابی دکتۆر

ئاوایە جەنابی دوژمن

من شاکاری تۆم

من پڕبەهاترینی تۆم

من ئەو خنجیلە زێڕینەی تۆم

کە شین و ڕۆڕۆی لێوە دێ

دەسووڕێم و دەسووتێم

وانەزانن نیگەرانی ئێوەم لەبەرچاو نەگرتووە

.

سوتماک، سوتماک

دەستی تێ دەخەی و تێکی دەدەی

گۆشت، ئێسک، هیچی لێ نییە هیچ

پارچە سابوونێک و

ئەڵقەی هاوژینی و

ددانێکی زێڕین

جەنابی یەزدان، جەنابی ئیبلیس

ئاگادار بن

ئاگادار بن

لە خۆڵەمێشەوە

بە پرچی سوورەوە هەڵدەستمەوە و

پیاوان وەک هەوا هەڵدەلووشم

پەراوێز:

لازاروس؛ ئەو کەسە بوو کە عیسای مەسیح زیندووی کردەوە.

The post خاتوو لازاروس appeared first on ژنەفتن.

من کەسێ نیم! ئەی تۆ کێی؟

تۆش کەسێ نیت؟

دەی ئەوەتا ئێمە جووتێکین- بە کەس مەڵێ

دەمانتۆرێنن، خۆت دەزانی

چ دەردەسەرییە کەسێ بیت

چ بێ پەردە! چەشنی بۆقێ

تا ئێوارە ناوی خۆت بڵێیەوە! بۆ زەلکاوێکی دۆشداماو.

***

٢

سەرەتا، دڵ داوای چێژ دەکات

دواتر خۆبواردن لە ئازار و

 دواتر ئەو دنکە وردانەی

ئازار دەڕەوێننەوە

 دواتریش خەو بیباتەوە و

 دواتر، ئەگەر

پشکنەر مەیلی لە سەر بێ

ئازادانە بمرێ.

***

٣

مردن گفتوگۆیە لە نێوان

گیان و خۆڵ

مردن دەڵێ: ”بپڕژێ”

گیانیش: ”گەورەم، بەڵێنی دیکەم داوە”

مردن گومان دەبا و، دەبێتە دەمەقاڵێیان

گیان سەری خۆی هەڵدەگرێ

تەنیا وەک بەڵگەیەک

کەوای گڵینی ڕادەخا.

***

٤

هیوا ئەو شتەیە پەڕی پێوەیە

کە لە سەر گیان هەڵدەنیشێ

بێ وشە ئاوازی خۆی دەچڕێ و

هەرگیزیش دەم لێک نانێ و

شیرینترین ئاوازە لە ڕەشەبا ببیسترێت

و دەبێ ئەو زریانە دڵتەزێن بێ

کە توانی ئەو باڵندە چکۆلەیە بتۆرێنێ

کە زۆر کەسی گەرم کردبووەوە

من لە ساردترین سەرزەمین و

سەر نامۆترین دەریا دەنگیم ژنەفت

هێشتا، هەرگیز لەوپەڕی برسێتیشدا

داوای تیکە نانێکی لێ نەکردم.

The post چوار شیعری ژنە شاعیری ئەمریکی ئێمیلی دیکنسن appeared first on ژنەفتن.