بابام دوێ دەحوێ؛

وەختێ جار بێ یەرەژەمەنە نانەوشکە وەرێ و

من ئاوەزم نەبێ نەبیەی چێشا

عانێچ بە سەد٘ کیلوێوە

نەتاواش وێش بلۆنە قەبرە و تۆو مەلافێوە چەرمەینە

خود٘احافێزیش کەرد جە ئاسمانی

تەرسانا ئیتر نەتاوو شێعرە بنویسوو

قینیم گنۆ کتێبا

تەرسانا کەڕ  بوو و دەنگوو تۆ

هاواروو ژیوای داربەلوەکا

کۆر بوو و سەربەرزی شاهۆی دلێ تەمێنە

عاشق بیەی پیرە‌کناچێوە و خوەو سوخمەیش

تەرسانا تاق‌ و تەنیا تەسادفێنە

فەلەج گنوو و پابڕ بوو کۆیسانەکاو لاشەیتنە

دەساندەسوو سەرکەشانە

خیاباننە؛ وەختێ ونی گڵوەو خۆڵکینە هورمێوە

نەتاوو سەروو تەرموو ئانیشاوە

بیێنێ جەجاڵوو ژەنەکا،

بێ‌خەم هورپڕوو

وەختێ تەقە مد٘ەی بەرەی،

نەتاوو بەو پەیوایتەو بە بازێ و

ڕوانەت‌ کەروو

وەختێوە ڕۆشنایی یانەی

چەماتنە چەنوو وێت بەری

تەرسانا جە وەرمەکام

وەختێ تاتەم بە تەوەرداسێوە ئیناشا چەنە

جە نۆ مانگ‌ و‌ نۆ‌ ڕۆو ئا ئەد٘ایا

چیچێشا،

مەراقوو ڕۆڵە سنیاوەکاشا سیسێ کەردێ

ئا ئەد٘ایا دایم دلێ‌بەرەنە

چەمەڕاو زیننە یام مەردەو کوڕاشانێ.

مەشارووشەو؛

فرەتەر جە گردچیوی

جە مەردەی تەرسوو و جاریچ بیەن

سەراوننوو مەردەیوە،

خۆفناک و مەسخەرە

تەنیا نەوەش‌کەوتەی

تەنیا وتەی

تەنیا نان‌واردەی

تەنیا سەفەرکەردەی و

تەنیا مەردەی تەرسنانا و ئیسە

ئەودیموو دەنگوو چەقەڵا و ڤاگژەینە

دەگایێ دوورەدەسە و تاریکەنە

دوێ چیوا زاڵە ترەکنانا

کەسێوە تەنیا ژیوۆ و حەمامنە مرۆ و

مەڵڵایێ تازە‌‌زەما و عاشق،

 سەباو زەماوننێش

هەر یەرەتەڵاقەش کەوتێبا!

The post تەرسەکێم appeared first on ژنەفتن.

هەنگامێ هەنتەرینی وزێنمێ یۆ

شانە جە شانەیت نەترازیێ و

پەنجێ‌مرووچڵێ سەرچڵات

ئەی‌دەوروو ئەرخەوانوو مردایمۆ

تر بە وەیوڵەواو وەشەسیایی

ئاڵیێنا وەنەمشکوو ئەرەمردایتۆ

کتووپڕ

تە سیروان بێنی پەی ماساوو خیاڵیم

ئەز قەڵاگەور بێنا پەی عەڤداڵیت

هەشتۆمن بێنی پەی ڕووگەو تاڵیم

کوانبەفر بێنا پەی شاباڵوو تەمات

وەرگیر بێنی پەی پەپوو و سۆزیم

کاوە بێنا پەی هەرەسگاو خەمات

قەڵاگاو بیەیم

دێوەو یەسنایت

ماما ڕەزوو چەمام

مەرگەوێز مەرگەوێز پڕێنیرە سیروانو ئەوەنامایمۆ

گر وێرەگیەیچ هارووهاجیم سمۆرە بێ و

وێم خزنێنا وڵەوەنوو دڵیتوو

چ تەسکینێ و چە پەناهێ..

هۆشتەن هەتی واچێنا

تکام ئانەن چیگە چاندێم؟؟

گلەیت با  کوڕە

حەر ئاساناوە حەتا دۆڵی مامەو

بە هەناسەسواری کەلو وەرگیری و

ئنڐەو ئاواتە کۆروەبیەکاو مزگیگەی و

هەماراوو هەرسەکاو هەسارەوشکەی

چەمەڕاییە ئەوەنەبڕیاکاو پاڵوو قەڵاتا

گلەیت با کوڕە.. گلەیت با

واتم هەتی ئی قاپاتە چشەن کەریش

دۆڕنمێش

کەردتوو لات دا و وێت لانەڐا

واتم هەتی

واچە بزانوو کێ چەشتەو ئی لەیڐەبیەیشە کەردی؟

مەر نواتەبێت مروویچ لا مەڐەو

لاڐ دا هەتی بەڐجۆر لاڐ دا

ئێمەیچ ماتوومەردە، ماقپڕا

تەنیا تەپووتڵت دیڐەمانە ورنمێ

تەپووتۆزت گەڵوەمانە قۆزمێوە

واتم هەتی بازە

ئانە پەی کوی  پەشتەقول بازی بەری کوڕە

هاکا قینت خولێوەرۆوەو

هۆرلووشۆ سیاچاڵو چەمات گرڐوو ژیڤای

هەناسەت ژەحڕا و جە هەر هەنگووسیەت نمرە مەرگیە نەچەشتیا پەنگ وەرۆوە

هەر هەنگامیەت شەقیەن گنۆ لاشەو مایینەو نیشتیمانی

شینا ویەس..ویەس.. ئو بەرەنیسکێ ئەوەنەبڕیای

مەر نواچێنی بەدەسوو وێما نەبیەن

جە ئەڐا بیەیما

مرۆ بیەیما و

کورد بیەیما

ئینە هیجویە شۆڕشگەڕانەن

موازمێ شۆڕشگەڕێ بیمێ

تاکەتیەی دەینوو بیەیما، ژیڤایما و مانایما

بەیاگێ بارمێ.

چێشبی کوڕە؟

واتم هەتی

چیگە مەردەین مدڤۆو وەرە وەرەی ژیڤای گنۆسارا

بە بروسکەو مشتەکۆڵێما

تە ئەر وازی چەمێ پروکنی تاسێ ئی داهۆڵیە تاسنات

حەتا خاس خاس کەری تاسەو تروسکیە

قەراخو ئی زمنە تڕۆینە

ئادەم ترەکنی هەنارو مێروو دڵ‌توەنینا

تە ئەر وازی پەنجێت فڕا

بەجەر نمەکەری گیان

قڕەقڕوو ئی قەڵاوا قڕنۆت

تۆ هەنی نا

ئەزیچ چیگوە مشتەکۆڵیە هەڵسی

دینم ژینم تینم شینم کینما،

کینێم: هەرسێم تک تک سوور سوور هەراڵێ شاهۆی

بەرەنیسکێم ڕۆ ڕۆ جوانڕۆ..

حەر جاریەیچ وەرەشێڵەو برژانگیت

وێش خزنۆ زەمهەریروو بیەیمۆ

تر وازای شووروو قینیم کێشۆ

بڐیە چنڐ تۆڵەسانێو بێڕەحمنا

واتم هەتی

ئاوەختە ناختوە داڵاهۆت ئێسوە

تر مەتاوی “شۆڕش” نەبی

وەختیە ونیت کەرد ئاڵاوەو وەرکەوتی

تر “باز”یە سەرکەشنی

وەختەکاریەیچ کارزانی بەشت بی

تر “ئارگەش”نی..

واچێنی کنا

نیەتم هەن فەرزەن چ مەرمیێشا قەرزەن قەوارەو سینەیمۆ، سمووش تەختوو تەوێڵیشارە.

واتم هەتی

شەرتەم کەردێبێ نەدموو

لەیڐەنا و زووە لێڵیان سەرچەمەو ژیڤای

واچی هەڵای نەدمنایبیش چەمەریێ کرووکپیم؟

نەدمنەیبیش مەنڐی بیەیم، گێژەواو نەبیەیم

نەدمنەیبیش قەڵوەزوو چریەیت، کەڵوەزوو ئەژنیەیمۆ

واچی هەڵای نەدمنەینیش

لافاوەو هەرسیم

سیاوەهەرەسوو برسیم

تاریکەسەڵاتوو غەریبیم

نەحرەتەو تەرسیم؟!!

چێشت بواچوون ئەنەزان، چەنیت بواچوون ئەنەزان؟،

نەدمیەیبی نمەدمنۆت، نە بە دمتا و نە دمنایت..

کۆرنام زوانم لک لک

دەسێ، پەێ، چەمێ، گۆشم،

پلکێ، بڕوێ، پرچێ، مەژگم،

دڵی، ئاخ و هاوار 

هاوار بەماڵم

دەسووئیناوە پەنا کۆ بەروون

یاحەزرەتوو گمەسار کەرڐەی

مرنە، مرنەم با نەمرنام

کۆرنابێتوە:

ئێمەمانا

پەی سیاوی دڵی، وەر

پەی نووروو دیڐەی، مانگە

پەی شیرینی زوانی، هەنگوین

پەی ڤارای ئاوەزی، سەرچەمە

پەی زاخاوو گۆشی، چریکە

پەی پاساوو نەبیەی، ژیڤایما

تاریکنا، کۆر و تاڵ و قڕ و کڕ کەرڐوو مرنا

ئا.. ئا.. زەروو تائامەیمێ وێمارە

جە ئاژەڵ بیەی پەی ئی  فەزێحەتیە لاما دا

مەر جەزەڵ لادەرێ نەویێنمێ کنا

مەر ئا ڕا تۆ واتەبێت وێش لادای نەبێ کنا

مەر گردوو ژیڤایما لەیڐەیی نەبیەن و نیەن

دروێ شیرازەو ژیڤای تەنیەن کنا

مەر نواچێنی ڕەساڵەتوو ئەنەزانی پەی یاوای به ئازاڐی لاداین،

چێشبی کنا؟؟

چێشت بواچوون ئەنەزان، چەنیت بواچوون ئەنەزان،

نەدمیەیبی نمەدمنۆت، نە بە دمتا و نە دمنایت.

سا چێش مەنەنۆ بێژۆ

واتەی تر نمێژۆ

زەرڐەخوە دەنە پەی ئاسۆیە کوو سمۆ هێژایی ژیڤای

هەڵای زوەن کوڕە

ئی چەمەریێ گێڵنیش، گلێرنۆما

گێڵەوە، گێڵەوە پەی گلێنەو چەمەڕاییما

با ئیمان بارمێ بە گلێرگەو هەرسی

ئا وەخته دەسوو ئاخێزی وازۆرە.

بە سێحروو زوانی،

ئادەم چلووسکا و مزگانی وەهاری…

The post هــەتـی! appeared first on ژنەفتن.

دوێ نوقتێ

بێ ئینەی گلەییێم جە کەسی با

بەرەکەو خۆڵکی گێروو

یا بەزەیم بێ تەنیاییرە

دوێ نوقتێ وەروو ئی دوودەرینە منیەورە:

ئی ڕوا،

هۆشم ئینا یانەیوە

چن ڕوێ جارێ کونجەکا ئاوی داروو

واق مەنوو سرمیچەکەیرە و

تابووت وینوو،

وێمرە و ئاسمانوو دێوەزناوی.

دلێ لاپەلەکانە گێڵوو پەی هەرچێ و

“هەرچێ” تەنیا دوودەریەکەن

کریاوە

یا مەڕیا پەشتوو دوێ نوقتانە.

۲

ڕفێقەکێو کۆساڵانی

سەروو دەساو شمەنە

ڕوێ مێ و

هەورێ مزانی مارا پەی زامەکاو ورمێ

ئا ساتە مێ

کە هامشانوو کۆساڵانی

نگابانوو ڕۆجیاریندێ و

زەیتوون قژاتاوە شۆڕ بۆوە.

تەموو دەساتاوە

پیرەکەڵێ بە خوەوە هوروەزا و

کەتمانش مەکریۆ

مەلایکێ فرەتەر ئینا سەروو شاناتاوە

کە جیاتی قەڵەمی

تفەنگێش کەردەن قۆڵش و

پەی کڵاڕۆچنا

هامنوو شارەزووریتا پەی مارۆ.

۳

من و تۆ؛ جۆرێ تەر

ئینە مننا

جبەروو ئا کافەیوە تۆ نیشتێنیرە دلێشنە و ماتڵ

دلێ سەفەو ئانیشانە تەوەنێ دەسشانە

دژمانێ دەمشانە و

دڵێوە مەڕیا لاشەشانە؛

فەرقێ فرەن

بەینوو نەچیرێوە کۆرێ، مەنەجیێ جە گەلەی و

پیرە‌ڕاوچیێوە-

یێهەرش کەردەبۆش نیشانێ،

بەینوو کتێوە یانە کەرا نامێشەو و

دەڵێوە پیرێ، دلەڕاسیو ئوتووبانێوەنە

مەقسەدش ئەود٘ەس و

بەچکێوەش ئی‌د٘ەسەو ماشینی کوشتەبۆ.

بە باقێ گوڵێوە؛

تۆ پەی جە‌ئەد٘ا‌بیەی ڕەفێقە سانتیمانتاڵەکات و

من پەی ئا سەروازا

ونی گولکاشانە چکۆرە

تۆ بە پووتینێ و شاڵێوە کاموایی

خەمەوەروو ئاڵامەت و چەنەو دوکترا

سووربیەیوەو ملیت و ئالێرژی،

منیچ شەققێوە

پێکوو و نەپێکوو

جامەد٘انێوەیچ پێچیا دەوروو ملیمنە

تەرسوو خنیکیای و گازی

ئینە مننا؛

باوان تێک‌دەر

ئاژاوەچی

پەشتوو وێمەو زاروڵەییم و حورمەتوو یانەی

چن شێعرێ عاشقانێ و مەحموود دەروێش

خوە و وتەیم ئاستەن جیا

نیێنیم کیسەی چێرینم

مەووە تووڕێ تەوەنێ شانوو و دەمم ئاویر،

کتووپڕ

کیسەم فیشەکێ دڕۆش و دڵیچم.

The post «دوێ نوقتێ» و دوێ شێعرێ تەر appeared first on ژنەفتن.

چێش بی هۆش

واتت تۆ پسەنی هەناسەی

نیەنی دیار

بەڵام پەی ژیڤایم ئینەینا ڕێکێفتەنەو

پەی مانایت سوارمەنی

ئەزیچ سەروەشانە،

جەنگاوەرێوی

چیاو عەشقی  حەیران حەیران پیمێنا

تەم حیچ و وەشت حیچ و

گێژەوا حیچ

تەوەژموو وازای تارنێنەم

شێتانە هۆروەزنێنات وەزنێنیرەم

جاریەو دوێ و یەرێ و هەزار

هۆروەزێنا وەزنێنیرەم

هەسکنێنات فووێنیمۆ

کوا تەسکەتروسکیە تەسکینم دۆ

دمدمە کەلاو دڵیت

دەمدەمانو ئی دۆڕنایۆ

بێتاقەتیم بە دمشا و

قەڵاوەو بەختیم نمەدمنۆ

سا چێش بی هۆش

ئی کتەکۆرەو دەمدەمی بیەیە

کەیوەن دمنەینیشەنە

حاشا زوانم لاڵ سرتنەینیشانەو

زموبێمەیلی شۆشتەنە گرسان

حەر واچەیێوەت ڕچڵێوەن سیاوچیامەنە

هاکا ئارگام بێ ئار بی و گام هاڕیا

چێش بی هۆش

بواچەم باز و بازێودە

بواچە لۆ و بەرەم

بواچ هۆ و شام بە

واچ ئەیر و خڐرم کە

چێش بێ هۆش

چەنی بە گۆش

قاسپەت چریکنو

بە چەم دیڐەت باز دەو

دڵم تۆش تۆتۆ تۆنینو تۆش تۆنی و

تۆنزاو تاونەر و تاودەر و تلوەدەر و تەپاوتل کەر

ئەچا

چرپنات تریشکەو تۆنیەرە

ئانە تۆنی یەرە ژەم ژووژیەی برسیمرەو

تێرنا و خاترجەم

باچا

باچا مەرڐانیچ حەر تۆنی سەربەرەو سەرینیم

ئەچا بیژیەیرە

خاترت جەموو جمەیمەن

چریکەت وەرزوو موریمەن

پەنجەت لەرزوو پووریمەن

هەنگام تەرزوو سووریمەن

ونیت قەرزوو لووریمەن

سەرەت بەرزوو ئووریمەن

زوڵفت عەرزوو شووریمەن

ئۆشیت مەرزوو

دووری، ژووری، نووری، هووری، کووریما

ئەچا!

نامیەرە چیا

با نوون و نێرگزی بەیوە گۆ

ئەچیە ژوانەکێ ڕازیاوە

ئەچا!

نوونیەوە چیا

با نوون و نامەڐی تاویۆوە

ئەچیە چیایی هەناسەی بڕەڤۆ

کووجیێ ئامەڐی هۆرکێشا

ئەچا!

هۆروەزە چیا

با هێ و هەیڤی هۆربەی

ئەچیە هەساروو هیوای زیاڐکەرۆ

ئەچا!

ڕەمکەرە چیا

با ڕێ ڕۆجیاری شەبەقی دمنۆ

ئەچیە وەر دمنۆنێ لێڵایی گلارا

ئەچا!

شەرم‌کەرە چیا

با شێ شەوگاری هەسارا لاونۆوە

ئەچیە شەم بۆنێ دێوانەو پەپوولا

ئەچا!

دەسگێرە چیا

با دێ درکوو دەسوامی درکنۆما

ئەچیە قریوەو هۆرپڕای هۆرتەکنۆ پاسارا

ئەچا!

فوونات دڵوو ئۆریۆ

با زموو نەهاتی گا نەگێرۆ

با سموو هاتی فوراتی باز بدۆ

با نموو زاتی ئەردمانە نەڕچنۆش

حەر چەنی ئەچووە وای واتی

هۆروەزە و ئامەیوە فڕای

لەمێ‌کەرە و  ئامەیوەدەسێ

ئەچا،

ڕێک ئەچا

پەنەتا ماچوو

وەچوو وەرگیندێ، یا ئادەم؟

ئا دەمە ئینەیندێ کۆنسێرتنەو

وەش..وەش.. ویاردێش

ئینایندێ بار نەو

پەیکوو نامەڐی هۆرقۆڕندێ

شەوێ درەوسێەی گێرتێندێ

چیامانە پەیجۆروو ونینێ

پەیجۆروو واچەێو کوردینێ

شەڕانە چیێتا

ئامێنێ جریکەو مرووچڵا کپ کەرا

بێ‌هاگا..بێ‌هاگا

ئەچیە سەمفونیاو ئەیر و وای

بەڕابەری بازەکا 

چریکنۆ چیایرەو  ما بە ما چیایشاکەرۆوە

ئەچا

نمەوینی ئەزمان

چڕنووک..چڕنووک جۆگەلەونی گۆنایم؟

مەژنەوی چیا

مەچۆک..مەچۆک قیچێ خنیکیەیم؟

مەکەری ئاوی

بەوش..بەوش بۆش‌بیەی زاڕۆییم؟

ڕێزەرە تەوەن،

ڕێزەرە دار

ڕێزەرە دەلاقە،

بەرە، شەقام، گڵۆپ، میدیا، کارەبا

هۆ..هۆ خوڐا دەمامک‌دارەکا

پەی بیەی نەبیەیتا ئێحـــ

پەی نەبیەی بیەیتا تف..!!

The post ئەچا appeared first on ژنەفتن.

دەنگوو دەسبەن و

تەنیایی دەسا چی‌دیمەو،

بابۆڵێوە وەرم زڕیێ و

ئەڎایێوە یەخە دڕیێ چوو دووراوە.

ناقڵۆکار و نزم، وەراوەرشەو بازجوو

سەوز

بەرز

بێ مدرامان

کۆساڵان و چنارەکێ، خیاڵاشنە.

هەڕەشێ

تەنافە و تەرسنای

پەلێ هاڵی و قەڵەمێ سفڵە سەروو مێزێوە

ئاویر، زوقم 

شیللاخ و شەڕ

چوار کوڵە کونجاو دەوریشنە،

قنج و حازر.

ونی و سیروان

مەرڎەی، وەڵات دلێ چەماشنە

بێدەنگ، خۆفناک، تووڕە و گردچێ!

لچ بە دڎانی مەزانۆ

چوارپایێوە بانگوو سەعبی

تاراننە ترازیۆ

چەنوو وەرکەوتەی و

هەراو پۆلێ قازی قوڵنگا،

داربەلوێ

زاگرۆسنە جە ئەڎا بۆ.

ئارگاو ١٤٠١

The post (گرڎ ڕوێ ڕۆجیار مزیۆ) appeared first on ژنەفتن.

وەختێو کە

ئێتر سێبەروو مەرحەباو

باخەوانێو پیری

سەرمەنزڵوو گرد ڕایێوی و

بەهانەو بلۆقەو پایانە…

ئێتر پەی شیشێ دلاقەی

ئا وەرمە دیەبێش

دەمەتەقێ وێش و کووجیێوە

بە تەوەنی و ترەکێ

تەعبیر نمەبۆ…

ئێتر کناچێوە

شاروو هاوارە عەقیمانە

پەوکای منویسۆ

شەفاو شێعرێش

خەڵاتوو

جەڕاحەتی بێدەنگوو

مانگێ کەردەبۆ…

ئێتر شەوە

شکۆ و شەوکەتش

تاڵکێش بۆ و

تەماو تەڵقینەو تاریکی

نمازۆ

ڕۆجیار

ویرەوەڕی هەسارانە

ماشیۆوە…

ئێتر گرد کەس یاوۆنە

لاولاو

پەوکای دار و بەردهۆر

ملۆ سەر

کە نۆسخێوە

جە هەرسەکاو چەوسەریش

یاونۆ

هەنووی پەڕوو

ئاسمانوو ئی باخی…

ئێتر

هیچ چەمەڕایێوە

وەرهەیوانوو گرەوەی

نمەوینۆ و

سەروو زەردەخوەو زاڕۆڵاوە

پەپوولێوە نیشۆوە

کە باڵێشۆ

ڕەدیف ڕەدیف

پلوورەوارانێ

ڕەوانێنێ…

ئێتر

تەرانەو تەژنەلچانە

ئەرکوو مریچیڵا

تەسنیفوو

خۆڕەو ئاوێن و

هاژەو قڵوازی…

ئەد٘ام ئێتر هۆمێد٘یش

پەشتوو نماکاشنە

نمەشارۆوە و

بە دەموو یا کەریمیوە

نمەواچۆ؛

ڕۆڵە هەینا

نەدرکنی حەزەکات

حەزێو کەوت سی دد٘انێ

گنۆ سی یانێ…!

ئێتر تاخێ

“جە من

مشتێو سمەریچ نەمەناوە

پەی وای

هەر چایەکەیم

بێ داڵغە نۆشوو…!”٭

وەختێو مێ…

وەختێو

کە تۆ بەی

ڕاشاو من!

هامنوو/ ۲۷۲۱

٭ئاماژە بە شێعرەو نیمای

The post وەختێو مێ appeared first on ژنەفتن.

وەڵچانەینە

مەزامیروو هەناسات

گڵوەو 

داود٘یتەرین عەزرەتیمنە وازیۆوە

بێ سنووریت

-هەو کۆڵە حەقیقەت!-

قرۆڵوو باڵاو

مریچیڵێ شێعرێنە

تامش دابێوە

من لیپ جه تۆ و

تۆ 

شەمیموو شەوقی،

تووکێ مەخمەڵی و

عەرووقێ واژەینە

ڕەواننی ڕاشا!

زەردەخوەو زەمانی؛

                            عەسر و

زەردەخوەو ساڵێ؛

                             پاییز و

زەردەخوەو پاییزی؛

                             هەنار

زەردەخوەو تۆ بەڵام

هەناراویتەرین عەسروو پاییزین!

وەختێو جاریە بوو باوشیتنە

یاوونە

تەرموو ئاوێشا

کامە گۆڕستاننە 

ئەسپەرده کەردەن و

ئینە کە ماچوو 

من جوە و

من ڕۆخانەنا

ئێتر شەرعەو خێڵوو بەڕینە

ئەنەلحەق و شەتحیات نیا…

وەختێو سەرە منیەینە دانەم

ڕیتموو ڕەستاخیزی

ڕۆح ڕۆح

گوڵاو گجیەکەیمۆ

یاوۆرە

گۆرە جەمعیەکاو 

سنووروو گەرمیانی تا بادینان

و من

بوو ئەد٘او

 هەزاران هەناسە چنیایا…

نیشەرە ڕاشا!

نیشەرە پاڵوو هاوارە ڕووتەکام

من حزوروو تۆنە یاخیەنا

من حزوروو تۆنە

بۆوەو ساوێ جە کیمیای و

ڕەنگێ سوورێ

 جە ون مجیای

گێرووە و

سوورە ساوەو ئەشقی

خەڵاتی مد٘ەو 

بە یەهوودیێوە

ئۆردووگاو ئاشویتسینە

بێهۆ شۆنەو خود٘ایرە گێڵێ…!

من حزوروو تۆنە

لوولێ گردوو تفەنگا

 کەروو شمشاڵە،

مێد٘انە مینەکانە پوونە منیەو و

 پەی دنیایێوە هاڵی جە دیکتاتۆرەکا

بۆخۆروو گوراڵە حاجیانا مرمانوو…

من حزوروو تۆنە

 زرێبارەو ڕۆیایوە

مشتێو زۆڵاڵی ژیوای

یاونوو کناچە ئەفغانێوە

کە چێروو چنگوو ڕەشە مەرگینە

دەسدرێژیش کریان پەنە…

من تەنیا حزوروو تۆنە

تاوو نەتەرسوو،

تاوو

تەلاوەتوو تارێخینە

بێ سانسۆر

بێ چارشوە

بێ بۆرقەع

وێم بوو،

من تەنیا حزوروو تۆنە

تاوو بێ تەرس

کناچێ بوو…

هامنوو ۲۷۲۱

The post حزوروو تۆنە… appeared first on ژنەفتن.

هەنگووری عەترێ بێ تا شەراب

خەمی هۆرفلێقنا و قۆڕنا

گومە بییا قووڵاییەکا مۆدێرنەینە

ژەنێ قووڵ قووڵ

به زەخمێ دوورینی درێژۆ

بە پەرزنای تەنیاییشۆ ملوو باڵەخانا

ئی عەسریرە

تا تەکنای کەتانەکەیش تووڕەیی تەنافێوە

تا ئەگریجەش وە بان پەڕەکەی دڵ – بۆ

ژەنێ\

فەقیانەکێش بە مۆچیاریی عیزرایلی لکە دێنێ

ژەنێ\

مەمێش بە تەوقیتوو نەریتی، وشک شارێنێ

ژەنێ\

مەمێش بە تەوقیعوو شاری، تەڕ زنیێنێرە

ژەنێ\

چەمێ مننە بە زەخمێ موحتەرەمانەوە

بە دڵێ سۆڵۆ

قژێش جەنگ پەی سوپاو هەوای کەرا

جەنگ فێعلێ قۆڕی وەشا

دڵداری فیعلێن فێڵەنە فی فیش مێ وەنە

ژەنێ …..

پیریی چرچەکاش کەرۆ پەلکێ

زەمەن زایمەرنە زەماشا، زایفێ .. تف فف

/دم زم یاخوا موبارەکی بێ/

سلێمانیوە تا سنە ساوی ورەشۆ

ساوییاوێ و ناما لیمۆ!

ژەنێ پەنجەرەی کەوەش پەشتەو بازاڕین

و

نەڎێنەشا کەسی و وازش ئاردەن

ئجۆ، شۆنێ unfollow کەردێنە

ئجۆ جبەروو نازوو زەمینیۆ زیێنە       تەنیا

تەنیاییش پەڕ مەبۆوە جە تاقەتوو

شاعێرێ

پیایێ

مەلایێ

مەلا بانگ دە و لووە

مەلا بانگ دە و ماره

[-فەرماومێ شیرینییەکەیما کەرمێ قوزەڵقورتما.

-کاروو خێری هەر نەکریۆ خاستەرا]

مەلا تەنیایی مسقاڵێ چن کەرۆ جە عەیارە ویسوسەڎی

ویسوپەنجای

ویسوتەڵاقی؟

ژەنێ وەرنیشتشۆ… پیا

ژەنێ وەرکەوتشۆ… پیا

ژەنێ گۆش پەی مجیای وێش گێرۆ، گریای وێش، گرەوای وێش، گۆرانییێ عوسمانەینەیان تارا جافێنە، ماچۆ خوڎایا چن غەریب ئی دڵتە چراوی کوشنانێ، چن سەوز ئی پایزتەڕەق کەرداوە، دنیا چن سەرێع خولیاوە و چۆپیم– خوڎایا مەمێم کە دیوانێ عەشق بێنێ لوێ، کە چەمێم کتێبێ عەتر بێنێ خوێ و دزیێشا، بازاڕ جمەش ئێ چەنەم و هیچ..باخ پەڕ بێ پەیکەروو پایام، شارگۆشێش کەڕێ و من شاری چڕوو و ئاڎ گۆشێش پەڕێنێ بانگ.. زەڕ.. سیاسەت، زوانوو شاری زوانوو زەڕین و زوانوو ژەنێ زوانوو شیعرێ، ئاڎێ شاعیرەکێشا بە زەهایمەرڕسم کێشتێ و شارشا دا دەسوو جەنگاوەرەکاوە، ئانێ زەڕ مجارە بازاڕ، لوورنوو لوووور لوووووور تاااا پڵنگێ / تاااااا   وەرگێ .. تااااااا     …

تایانەوەی دزش گێرت دز بی بە شاعێر

دز بی بە،….

مەمێم عەترنە کزیێوە و نامای

خەمێم شیعرەنە

سەرپەنجەمڕەشتەن پەی خەفەتبازی

شار وەرگەو دڵی پەڕیمش نەگێرت

شار ملەوانەکێمش بە تمەنێ

شار ژەنانەییمش بە ..

                      مەغریب شەوێنە

                        م

      ‌                   ج

   ‌                      ی

                       ۆ

                        رە

                    ماکسیم

               ڕۆنە مانتۆیم

فەڵەک تەختوبەختوو کێت نەتەڵاقنا !

دڎانش منیەو پۆرە

نەهەم بێوەختەنە بڕیا

دڎانش منیەو پۆرە

بێوەختی گردوو وەختیم بێ

بێوەختی=بێوەژەنی

ئجۆ ژەنی و وەخت هەوێنێ

ئەی ….وَالْعَصْرِ ✬إِنَّالْإِنسَانَ …

پەراوێز:

ئی شیعرێ: پێسه واچی عەترێنە، لاملوو ژیوایۆ خەفەت قەڎ کەرۆ.

ژەنی: مانگێ تازێنە (۲) و (۱۰) و (۱۲)شنەڕۆچێ گێروو.

تەنیایی: جوملێوەن شاعیرێ پەی خوڎاڵەی ئاردەنۆ، تا دۆعایەکاش …

بەرزەڵنگ: شار پەڕا و ناموونیشانوو شیعرەکێچا.

پێشکەش پانیشا:

۱- وەرم به بەهەشتیوە وینا و وەرمەکێشا شیعرێنە، وڕاویا.

۲-ئانێ کە شیعرە و شۆڕش و شەراب و ژەنییەک قومنە وەراوە.

The post “کووڕ، تا عەرشی ئەعلا/قامەت” appeared first on ژنەفتن.

کە ئێمە هەر بە جوانی

گەورەتەرین مسیبەت و کارەساتەکێما

بە چەموو سەرەی دیێ‌بێنێ و

فرە چیوێ فاڕیێ بێنێ، دیەمەو!

خوڵک ئیتر پەی تێرکەرد٘ەیوەو لەممێشا

سەروو خیابانەکارە کێش کەرێنێ

ئومێدەکاشا

ڕەنجەکاشا

کیسە هاڵیەکاشا

زلە بیێ‌‌بێ و

ساکەکەشنە دە نۆع قەڵەمێ کڵەو ماتیک پێویێنێ ئیسە!

تا ڕانێش گنێنێ سەروو مزایکەکاو شاری

دووکاندارێ کە سڵتاحیچشا نەکەرد٘ەبێ

پەی شەوێ وتەی چەنەش

حەسێب کتێب و خیاڵ پڵاوێ کەرێنێ

ساڵانێ بێ واران

لووتەش کەردێبێ جە وەڵات و

لچە پڕووزیایەکاما

من ئیتر ڕوێ پاکەتێ جگەرێ کێشێنێ

بە لیسانسێ پووچەو هیچ نەبۆ

شاعێرێوە بێنێ یاگێو هومێد٘ و شانازی

ئاد٘ەیچ خولیاو دە فاڵۆوێرا فرەتەری و

هەزار لایکە حیزانە بێ و

ئیسە پەیش دانشگا

ساڵۆنەو فەشن شەوی.

زەریفیش بەرێ سەروو کەلاسی

کوڕەکێ پەی چەماش جوزوێ نویسێنێ

ئوستادەکێچ پەی خوەکاش

چەپ و ڕاس هەر نمرێ دێنێ!

شێعرەکانە

ڕەفێقوو پەڵە ڤەرڤە ناسکەکاو زمسانی بێ

زیننە بیەیوەو خاکی چەنوو یەکەم وارانی

سەرتەرین بەرزەڵنگ

کۆنی سیروانی و وەی وەی باڵابەرزوو باخەڵەو عوسمانی

دێڕەکانە

 شار بە شار و واتە بە واتە گێڵنێبێم

یەک دوێ خەڵاتێ و چن دیمانێم ئیماژەکایچنە

وستێبێنێ کیسەو سوخمەکەیش

شۆنوو ساڵانێ فرەیرە

کە قوربانیو مەرزەکا گرد٘ ڕوێ کۆڵبەرێ و

بەشەمیراتوو زیننانەکا سەرسەعبان

پڕچیای و پڕووکیای هاوارێوە بێ، دیەمەو

هەڵای قژێش کەلەبەروو تەتەی بێنێ

وەختوو چێژ بەردەی یەک ماشینی پێچەکاش‌هور و

کریایشەو دماو نەورۆزی

هەڵای تەنیایی چارەکڵێوە بێ مازیو پیرەژەنێوە

دلەڕاسیو مانتوە ڕەنگ ڕەنگینەکاو شارینە

چاڵە ڤەرڤێ وەرنەکەوتێو کۆساڵانی     گەرمەو گەلاوێژی

پەی کەشەوانێوە جە ئاو بڕیا و تەژنە و مانیای

دیەمەو و پەلەپەل هەزار بەکرێ سیاوچەمانێ و کنا لەیلێ

پاییزێ نەخشینوو بێسارانی

بەڵقیسەو نەزار قەببانی

پینک فڵۆید یا عاشقانەکاو ئەمریکای لاتینی

پەلەپەل و پەی پەی[1]

پەی زامێ زەخمێ سەفەرێ مەرگێ وەرمێ باوشێ ماچێ دەساش لچاش

ڕچەماڕەو تازێ، شێعرێ بەیتێ

نەبێ

نەکریا

دێر بێ و ناوەخت!

پێسەو تەوەرگێ بد٘ۆ ملوو هەراڵەیرە

ڕاویارێ نەیاڤۆ تاقە قەتاروو سەفەریرە

زاوڵێوە نیمەڕۆ هایش بۆوە پەی کڵاڕۆچنێ و

زەنگ دای پەی جەنازێوە!

دیەمەو و چێرخانوو یانە کۆنێوەنە ئیسە من

پەی وێم و تەنیاییەکام منویسوو

مانگەشەوێ گێروو باوشی و

دژمانی مد٘ەو ساحیب پاساژ و مۆترسوارەکا

پەی تۆ و دەنگیت منویسوو

دنیات و دڵتەنگیەکات

خەمباری و ئا شەواتە یۆتەر دڵش ماڕێنی

تۆریەی جە جبەر و ڕەفێقەکات

جە گوڵدانەئیسە تەژنەکاو وەروو دوودەری

جە واڵەکات    وەیوڵەکات

ساڵانێ دماتەر

ئاوەخت هەردوەما کەم‌قسە تەرێنمێ

سبحنە بەرمشمێ جە مەرد٘ەی و

سەیەو قافێزی سەروو قژە چەرمەکاماوە دوور دارمێوە

پیاسە کەرمێ چەنوو ڕەفێقە پاتاڵەکاما و

بە تەسبێحێ هۆشوو مەردەکاما کەرمێوە

زەنگ مد٘ەیمێ یانەو زاوڵەکاما گرد ڕوێ و

خواخوامان سەرما بد٘ۆ وەنە مێمانێ و

تیکێ نانما بد٘ۆ هامسایێ،  وینووتەو

ساڵانێ دماتەر

وەختێ کەوتەن نە زەحمەت ئامای نەفەس[2] و

بەرشیەن جە تاقەتوو دەسەکاما دۆعا و دڵداری

ڕوەش کەرد٘ێنە وەڵاتی قەحتی و

پەی ڕەنگ زەردیما هەر خەتابارێ هورمد٘ەیمێ،

وینووتەو…

لاونووتەو

پەنا بەرووە سۆرانیەکات واوەی

هاوار کەرووە مەلایکەکاو سەروو شانات واوەی

وەختوو مەغریبی و ئا خەزانا ڕەنگا  هۆشم کەریوە

بەخشووت ترەکوو پاژنەکاتۆ

لەرزای گۆچانەو دەسیت

یا ویلچێرێ و نەوەشیت ئاسایشگاکانە

بەخشووت ماش و برێنجی قژاتۆ

حورمەتوو ئا گۆرانیاوە

هەر دوەما تەنیاییمانە گۆششا مد٘ەیمێ

بەخشووت پەشیمانی و هەرسەکاتۆ

شوو مەردەی و شینەکاتۆ

ساڵانێ دماتەر

کە وەر لەشوو کەوتەیش نیا

ئاسمان پەی ڕۆڵەکاش بێ‌ڕەحما و

منیچ جە تۆ تەنیا چن عەکسێ فەرتووتیێ و

کوچێ تەشبیهێ بە یادگار مەنێنێ لامۆ،

وینووتەو

بە سەرەتانێ ڕیەیوە

بە ساڵانێ زیننان و دەربەدەری و دوور وەڵاتیرە

بە عەمرێ ویەرد٘ە و

ئا ڕوا شۆنیترە ئەسپەردەم کەرد٘ێنێ

چرووت

وەڵ چانەینە بەرزەخ بێ پەیوایمەو و

قەبرکەننێ یەکەم زەنگەن ماڵا پیرشالیاررە

چێرخانوو یانەکۆنێنە هیشتای منویسوو

بیمارەساننە منویسوو

مەرد٘ەشۆرخانەنە منویسوو

مزگینە، تابووتنە

پەی وێم و دیوارەکا وەروو دەمیم

تۆ و دڵمەڕیاییەکات و ئا ڕوەی

جیاو سەروو سینەیت

ملوو تۆ کەفەنی.

[1] جه ئی شێعرێو مامۆسا مه‌وله‌وی:

په‌له‌په‌ل په‌ی په‌ی زامێ وه تیرت

ئازار دابۆ تای زۆڵف زه‌نجیرت

[2] جە ئی شێعرێو مامۆسا مەولەوی:

هەر وە زۆر مەندەن رای ئامای نەفەس

تای ریشەی تاقەت شیەنم جە دەس

The post مەرگ سەفەرێ، نویستەی هەمیشەی appeared first on ژنەفتن.

هەی هوو.. های چەندەن نامان خەبەرێ و

چەنی واچوو؟

تای تاقەت بڕیان[1] و مەردەی هەزار جۆرێن

ئی ڕوا ویەردەنە کەفەن کریەو

چێرزگارەکەیچ گرد شەوێ

پەڕ کەروو جە دماڕۆی و ئا شێعرا نەنویستێنێم

توویچ هەمیشەی دەمت

بوەو ماتیک و گلەییا مدۆ

هەورامی نەبیەیت موسیبەتا بڕێ جارێ!

دەسەکێت تەنبوورەکانە مەنێنێ جیا و

لچ بە دد٘انی/ بە لچات زانۆ یا نا

مانیفێستەکاو مافوو ژەنێ و

سازمان ملەل

تەنیا جە زەریفیو تۆ کەم کەراوە

سیروانێ تۆنە هەن        خوڕەش مێ

زمسانوو ژاڵانێوە دیارا چەماتۆ       گیریان

دارسانێ لەشتۆ سەوزا       گوڵە هەنار

قژەکێت

وێرەگا هامنوو دەربەنی و بەزمێ عوسمانەی

نۆتشیانە و ڕیک و ڕاس:

یەرە تەڵاقەم کەوتەبۆ

تۆ نە ژەنوو یانەینی

نە کارەکەرەو و هەرمان‌بەرە

مشۆ تەماشە کریەی تەنیا

بلی تەتە و خجڵیا تۆنە سەروازەکێ

ئاوەخت ئیتر

کۆڵبەرەکێچ بێ خەم

بێنێوە کەل و چەمشا گنۆوە کۆساڵانی..

دوێ:

هەڵای بە زوانی ئەداییم

نەواتەبێم وەشم مسیەی

ڕوەت کەردە ئەسمانی و

هەرسەکێت خنیکنێنە گۆرانیێ شەوانێ

هەڵای نەواتەبێم ئێمە

گولتەرین یاگێو دنیاینە

کەوتێنمێرە/ وەستێنمێرە

دەست نیا بەرەکەیوە

 ئی شارە نە پەی من جارێوە تەر سەوز بۆوە:

نە تۆ ئەر من جلەکام وەژوو

شاعێرێ خاست چەنە بەر مێ!

هەڵای وەرم بە نیمەو چەپوو دنیایوە وینێنمێ

گەمەی زوانی پا کەلیما کەرێنمێ

نە تۆ واتێ بێنێت و  نە من

گۆرانیەکاو عوسمانینە

              توششا ئاما بێنێ

کە چڵاکیایمێرە

سەروازەکێ لایێ شاریشا بەردەبێ و

جەنگ کەوتەبێ بەینما..

پاسە کە کەس نەپەردەچیاش

 ڕادیۆکا کوشنۆوە…

یەرێ:

پێسەو بابایم

چەم بڕۆ عەکسەکەو شێخی و

مات و گونابار گۆرانیێ شێخانێنە

تەلیلەو چاوەڵوو خانەقاکا بێوە هۆشش

مەیوە هۆشم

کتووپڕانەو نیمەشەو

پێسەو ئەد٘الێم

گرد سەعبانێ دانێ مد٘ۆ بە مریچیڵەکا و

چارەکڵەکەشۆ ڕەحم چکۆرە

کتەکا بێ دزیێ بابایم لاونۆوەو

قوربان و سەد٘ەقەشا بۆ

ساد٘ە و دڵتەنگ خەمت وەروو!

ئاشکرای عاڵەم گردکەس وینۆ

گۆش بەراواز و ماتڵ

پەی خەبەرێت چا دووراوە

جگەرێ وەروو

یانەم گزی دان و ڕازنانۆ

جارێ ئەگەر فیشەکێ بازا

پەی کۆڵبەرە کوشیایەکاو

دەرد٘ا وێمۆ

گەرەکما ئێشەو تلێ وەروو!

[1] مەولەوی

The post یەرێ شیعرێ appeared first on ژنەفتن.