هەرسێ ئا شەویمە شایەتنێ
بڕیارم جۆڕیارە سەروو سینەیمرە
ئو ئەپی جۆرە سماش دڵم:
یۆوەم ژیڤانۆ
بە ئینانا چریەیش
وەڵێ ئانەینە ژیڤۆ مرنۆت و
چنڐهەزار ساڵێ لێڵنات
نەزان چووزانۆ تۆ ژیڤانۆنی ئاواڵم
ڕابڕانەنە مەژگت دەلاقەو چەماتۆ بەخشان سیاوەی
دڵت کەرڐەن شەمێرانوو شەمەشی و
کۆمساینە ولانە ژیڤیۆ
وینوو شۆڵێوی ئەیریمەنڐی ئەیرگاو پەنجاتۆ
سەرمڕ پژگنۆ سوورەولێ وەشەسیایی
تۆ ژیڤانۆنی ئاواڵم
هێژایی هەنگامێت ئەو هومبابەی مشۆ
بڵوو واتەیت پاکوەکەرۆ زاوزێ بیەیما
تۆ بێخەمبە کاکە قڕما ئامە بەتوون
قێڕەما دەروازەو ئەژنیەی مەکووۆ
سرنجما دەلاقەو تەماشای مەبڕۆ
بێخەمبە کاکە با قلەت زەنگوڵەو ئەژنیەیم زڕنۆوە و
تەپڵو شێتیما ئی گۆموو گومانیە شڵەژنۆ
تر موینی حەر ماساوو زمنیاو
لەواواو مەنڐاوو مەژگیۆ تەپاوتل
گیانکەنشت گیانکەنشت گنۆنێ چەرمەیرەو
وڕینەو سەرچەمەی گێرۆنێ
بێخەمبه کاکە
جگەرەکەیت گریسنەرە
با قانڐ دەیمێ زامی پەترۆک نەبەستە
با مارو دومانی گەزۆ شۆشویەهەرما
با ژاراوو نەبیەی ژەرەژوو قاسپەی تاسنۆ
با تەمتەمەو هەناسەی سوار بۆ و خیاڵی هەسپانە غارنۆ
با تریشکەو لووتیرە هەسارە هەسارە هەرسێ لاروەبا پیمانەو دڵیۆ
با چەمێما گلێراو هەنگام هەنگام پیممێ هەڕەو هەماراوو ئاواتەو بێمرازا
با قووت دەو ژێڵەکەیش
داتۆ گێڵەپەیش
با گڕ بنیەو ئی خەرمانەیۆ
داتۆ گۆشەده ئی فەرمانەیۆ
با بفڕۆ ئی قاڵاوە کۆچۆ
داتۆ جمەرە بەڵکوو سۆچۆ
ڕەڤا.. ئیشتەنم ئەژکا ڕەڤوو
تۆ بێخەمبە کاکە
خەم شینەی هەرمانوو وێش کەرۆ
تەم ڕاویارو زنارێویا ماڵیۆشەنە
شەم لێوەو پەپوولێویا ئاڵیۆشەنە
زەم گەڕاڵی ئەردیڤیا سرتنۆشەنە
جەم ئەڤداڵو تەمیرێویا دمنۆشەن
چەم هێلیانەو بازێویا پەرۆش، حەر بەرۆش دوور بەرۆش، دوور و دوور و ، ژوور
حەتا پاڵو ئاراسی و زەروو وینوو بازێوی گەنم ڕەنگا و فڕایش ئەو زەینەبی مشۆ
سۆزش حەر ئەو سۆزو ڤیانی
شیرینانە هۆروەزۆ کەزیو وەرەتاویرە و
ملۆ و ملۆ و ملۆ گڕاگڕ تۆپەڵێوی سوورا و
کتوپڕ ژ هەیبەتو ئاگرینە گنۆ سارا
کاکە باوان چەمت پۆوەن
توەن توەن کۆوەن
ڕۆ ڕۆ ڕۆخانە و
دار دار دارسان و
هەنگام هەنگام ڕا
باڵ بە باڵ فڕای و
تک تک واران و
مرۆ بە مرۆ کۆمەڵگا
چەمت پۆوەن چێشما سەر ئامەن
گۆشت پۆوەن
گولەو دژمانی چەنی گۆشی سمۆ
شیرو نەفرەتی تەخت و سینەی مشکاوۆ
چەقۆو زوانی دڵی قڵیشنۆ
مەردەی نەک جارێوی
بە هەر واتەیێو سەڐ جار مرنۆما
چای حەر گفتێوی چەشمێ
دەم سۆچۆ و زوان جە واتەی سڵەمیۆوە
موینی تاک کەوتێنمێ و
شک مەبەروو ئەز
حیچ مەرەیە. بژیڤنۆما..
کاکە باوان هۆرزە
حەرچیە بنیشمێرە
کاروانو حەقێقەتی دوورە بۆوە
هەردوێ پەیم هەنگامیەت
هەردوێ دەسێت مەرحەبایەم
هەردوێ چەمێم تەماشایەت
هەردوێ گۆشێت قریوەیەم
گردو لاشەیم ئەرەلاونایەت
با یارە شامارە موراڵی خزنۆوە دەمارەکامارە
با ئەڐالە دێوە بێشکێ ئەردیۆ دمنۆما
با ماماڕەزە بە مەیو مەماش مەس مەس ڕەسنۆما
با داڐا ئەیرە مەنڐی ئۆشیش دما پەناگامابۆ چی زەمهەریرو نەفرەتیۆ
تر سڕ و کاس، مەردە مەردە،
ئەهوەن ئەهوەن
غەریبی تەن بازانە بازی بەرۆ و
نەمدرۆوە حەتا شەمێرانو قەندیلی و
عەڤداڵانە سەرکەلاوە ژیڤۆوە