زوانم لاڵ
ئەگەر لایەکم لە بناری ئەم ئێوارانە جێ نەمێنێ
ئەگەر ڕێگاکان نەچنەوە سەر بانە و
ئەم قەتارە لە دەرەنجامدا نەگەیێتە کۆتایی،
مەجبورم بنووسم؛
هەرچێ دیت وەچەم شی نەسەفەردا[1]
هەرچێ دیت
شەوێک بوو
درەنگ بۆ خواحافیزی و کاتژمێرێک سەرخۆشی
ناوەخت بۆ دیتەنەوەی خۆم
لەو ئاوێنانەی بە ڕابردوومدا هەڵواسراون و
زامەکانم بۆ دووبارە ئەکەنەوە.
گوێم کە ئێستە
بۆ بیستنی ئەم گۆرانییە نادیارە کەڕ و کاسە و
پێم کە بۆ ئەم سەفەرە ناڕوا و یاس
من کە باوکم لە شەوێکی زەخمیدا جێ دێڵم،
مەجبورم بڵێم خواحافیز!
خواحافیز!
کە ماڵت لە وڵاتێکی ڕۆژهەڵاتی ناوینە و
هەموو بەیانییەک
لەوانەیە بۆمبێک لە شەقامەکەتان داکەوێ
شێعرێکم لە گۆڵدانی بەر پەنجەرەکەت بۆ بەجێ هێشتووی
مزگەوتێک لە نۆستالژی و نوێژەکانم
سەرێک بۆ سەودا
لاشەیەک بۆ تەنیایی
ئەو کاتانەی دڵت ئەشکێ و
هیچ پێخەفێک، بووکەشووشەیەک
باوەش بۆ دەستەکانت ناکاتەوە
دەنگی ئەم دهۆڵە
بەشکم لە دوورەوە خۆش بێ و
چیدی هەناسەکانت سوار نەکا
خواحافیز
کە باوان وێرانی لە چاوەکانتا ئەتکێ و
لە ناکەس کاریا خاکت بە سەر[2]
ڕۆیین بە با ئەو ڕۆژانە
ئیتر لە ئێرەم پاییزێک تەنیایی و
هەندێ هاوڕێ ئەمێنێتەوە…
خواحافیز تەنیایییەکانم!
کە شەو درەنگان دەستان ئەگرت بە زەخمەکانمەوە
دڵخۆشیی دوو پەیک و
قاپەعەکسێک لە هیوا سەربڕاوەکانتان بۆ بەجێ دێڵم
ئاخر مەجبوورم و بەجێ نایێ[3]
ئەبێ ڕوو بکەمە ئاسۆ و شارەزوور
سوێن بۆ شێخانی بیارە و
بەرماڵەکەی دایەم بخۆم
کە مەجبوورم و
چارەنووسم وشترێکە و ئێستە
لە بەردەم ماڵی ئەم شیعرە خەوتووە.
گەلاوێژی ٩٩ی هەتاوی
[2] مەحوی
[3] مەحوی
