پەنجەرەکانم دادەخەم

نامەوێ گوێبیستی گریان بم

کەچی لەودیو دیواری خۆڵەمێشییەوە

ھیچ نابیسترێ گریان نەبێ.

ھەندێ فریشتە ھەن گۆرانیی دەچڕن

ھەندێ سەگ ھەن دەحەپن و

ھەزار کەمان وان لەناو لەپمدا.

بەڵام گریان سەگێکی زلە

بەڵام گریان فریشتەیەکی زلە

بەڵام گریان کەمانێکی زلە

فرمێسکیش “با” دەخنکێنێ.

ھیچ نابیسترێ گریان نەبێ.

قەسیدەی گوڵەکە

گوڵەکە

بە دوای بەیان نەدەگەڕا

لە مانەوەی بەردەوامیدا بوو بەسەر چڵەکەیەوە؛

بە دوای شتێکی تردا دەگەڕا.

گوڵەکە

بە دوای ژیری یان تاریکایی نەدەگەڕا 

سنوورەکانی جەستە و خەونیش نا؛

بە دوای شتێکی تردا دەگەڕا.

گوڵەکە 

بە دوای گوڵ نەدەگەڕا؛

جێگیر لە ئاسمان

بە دوای شتێکی تردا دەگەڕا.

گیتار

گریانی گیتار دەست پێ دەکا.

پەرداخەکانی سپێدە شکاون.

گریانی گیتار دەست پێ دەکا.

بێھوودەیە بێدەنگکردنی.

مەحاڵە بێدەنگکردنی.

بێزارکەرانە دەگری

وەک چۆن ئاویش دەگری 

وەک چۆن بایش دەگری

بەسەر کێڵگە بەفرگرتووەکاندا.

مەحاڵە بێدەنگکردنی.

ئەو بۆ شتە ھەرە دوورەکان دەگری

بۆ خۆڵە گەرمەکانی باشوور

کە بیری گوڵە کەمیلیا سپییەکان دەکەن.

بۆ تیری بێئامانج

ئێوارەی بێبەیانی و

یەکەم باڵندەی مردارەوەبووی سەر چڵ.

ئای، ئەی گیتار!

دڵ لە لایەن پێنج شمشێرەوە

بە سەختی زامدار دەبێ.

The post سێ شیعری لۆرکا appeared first on ژنەفتن.

چون تۆ نایەیت و

منیش یارای بەرەو-تۆ-چوونم نییە

بەڵام ھەر دەڕۆم

گەرچی دووپشکەکانی ھەتاو سەرم دەخۆن

بەڵام ھەر دێی

بە زاری سووتاو بە بارانی سوێرەوە

شەو مەیلی ھاتنی نییە

چون تۆ نایەیت و

منیش یارای بەرەو-تۆ-چوونم نییە

بەڵام ھەر دەڕۆم

گەرچی بۆقی بەڵەکاوی ڕابەرایەتیم دەکەن

بەڵام ھەر دێی

بەناو زێرابی تاریک و ئەنگوستەچاودا

نە شەو، نە ڕۆژ

مەیلی ھاتنیان نییە

چون لە پەرۆشیم بۆت دەمرم و

تۆیش، لەبەر من.

The post قەسیدەی ئەوینی ناکام appeared first on ژنەفتن.

به‌و خه‌یاڵه‌ی هێشتا كچه‌

كه‌چی مێردی هه‌بوو.

شه‌وی سه‌ن ـ ژاك بوو

 ئەو جێژوانەشی وا ڕێكه‌وتبووین له‌سه‌ری

هه‌ركه‌ ڕووناكییه‌كان كوژانه‌وه‌،

سیڕسیڕه‌كان ده‌ستیان كرد به‌ سیڕه‌سیڕ.

 له سووڕانه‌وه‌ له‌‌ سووچی دواكۆڵانه‌كاندا

ده‌ستم بەسەر مه‌مكه‌ خه‌وتووه‌كانیدا خزاند

یه‌كسه‌ر گوڵیان کرد بۆم،

مینا چڵی گوڵه‌نێرگزان.

په‌ڕه‌كانی ته‌نووره‌كه‌ی له‌نێو گوێمدا

خشه‌خشی بوو

شامانێ پارچه‌هاورشمێك یەکڕا

به‌ دوانزه‌ چه‌قۆ له‌توپه‌ت كه‌ی.

نوكی چڵەداره‌كان بێ هیچ ڕووناكییه‌ك

تا ده‌هات بەنێو ڕێگەدا ده‌كشان

له‌ ئاسۆشه‌وه‌ سه‌گه‌كه‌كان

دوور له‌ ڕووباره‌كه‌ ده‌وه‌ڕین

له‌ولای تۆڕكه‌ كێوییه‌كان

له‌ودیو دڕك و داڵه‌كان

لای پرچی په‌خشانكراوی

چاڵێكم له‌سه‌ر خاكی لای ڕووباره‌كه‌ هه‌ڵكه‌ند

 كاتێ بۆینباخه‌كه‌م کردەوە

 ئه‌و ته‌نووره‌كه‌ی داكه‌ند

من نیتاق و ده‌مانچه‌كه‌م دانا،

ئه‌ویش بەنی پشته‌وه‌ی جله‌كانی ترازاند

 نه‌ بۆنی گۆڵه‌سۆته‌ك و گوێچکه‌ماسیی

ناسكییه‌كی وایان هه‌بووه‌

نه‌ كریستاڵیش ئاوابریسکانەوە و شەنگییەک.

ڕانه‌كانی له‌ ده‌ستمدا ده‌خلیسكان

وه‌ك چۆن ماسییه‌ك كه‌وتبێته‌ داو

نیوه‌ی بڵێسه‌ی سەندبوو

نیوه‌كه‌ی تریشی سارد.

ئه‌و شه‌وه‌م به‌ سواری ماینێكی جوان

 بێ هیچ ئاوزه‌نگی و هه‌وسارێك

پێوا

من پیاوم نامه‌وێ بڵێم

ئه‌و شه‌وه‌ چی به‌ گوێمدا ده‌چرپاند

چرای ئاوەز

وشه‌كان په‌رده‌پۆش دەکەن.

نوقمی ماچ و لم، ئه‌وم بۆ دیوی ڕووباره‌كه‌ گه‌وزاند

 له‌و ده‌مه‌ی وا شمشێری لاولاو دژی با دەجەنگان.

هه‌روه‌ك قه‌ره‌جێكی ڕاسته‌قینه‌ كه وام

ئه‌وه‌م كرد وا ده‌بوو بیكه‌م

سه‌به‌ته‌یه‌كی حه‌سیری چنراوم

به‌‌ دیاری پێ دا

نه‌مده‌ویست ئەڤینداری بم

چونكه‌ وتبووی كچه‌،

كه‌چی مێردی هه‌بوو

ئه‌وده‌مەی هێنام بۆ لای ڕووباره‌كه‌.

[1]تێبینی : ئه‌م وه‌رگێڕانه‌م له‌ چه‌ند وه‌رگێڕانێكی جیاوازی فره‌نسییه‌وه‌ كردووه‌، زمانه‌كه‌ی له‌ ئیسپانییه‌كه‌دا لاكێشییه‌، له‌ دوو وه‌رگێڕانی فره‌نسیدا هه‌وڵدرابوو ئه‌و بینای زمانه‌ شیعرییه‌ بپارێزرێت ، له‌وانی تر كێشی حه‌وت بڕگه‌یی ڕه‌چاو كرابوو، له‌ هه‌ندێكیان ناونیشانه‌كه‌ی “بووكی بێ وه‌فا” بوو له‌وانی تریش “ژنی بێ وه‌فا” كه‌ من ئه‌مه‌ی دووه‌مم هه‌ڵبژارد، سه‌باره‌ت به‌ بینای شیعرییه‌كه‌ش هه‌وڵمداوه‌ به‌ شێوه‌یه‌ك ئازاد دایڕێژمه‌وه‌ و پابه‌ند نه‌بم به‌وه‌ی لۆركا وه‌ك فۆرم و ئه‌وانه‌شی كه‌ له‌ فره‌نسییه‌كه‌ پێی پابه‌ند بوون.

The post ژنی بێوه‌فا[1] appeared first on ژنەفتن.