١
گەیشتینە دوڕگەی نەزانراوەکان و شوێنپێیەکمان دی
شوێنپێیەک بەسەر لمی ئەو کەنارەوە کە دەستی
شەپۆلەکانی یادەوەریمانی پێ ناگات؛
شوێنپێیەک کە شت بوو، نەک ناو …
گەڕاین و گەڕاین و
تەنیا لە کۆتایی سەفەرەکەدا زانیمان
کە ئەوە شوێنپێی خۆمانە: ئێمە هەمیشە لێرەبووین.
٢
سێو گۆشتی درەختەکەیە مێش تێی نەدابێت
سێو گۆشتی سرووشتە بە خۆیەوە؛
درەختەکە لەوێدا ڕاوەستاوە
مرۆڤێکی لە ژێردا ڕاکشاوە،
سێوەکان بەردەبنەوە
گۆشتی درەختەکە هەڵدەوەرێت
مرۆڤێک ڕەگەکانی ناگەن بە ئاو.
٣
نەدەبوو بە تووتنچیەکان بڵێین کە
لە بری تووتن
لە بەهاردا دەبێت جەرگی خۆیان لە چوارداخ بدەن،
گەر نا
نەدەبوونە تووتنچی.
٤
تاریکی چواردەوری ماڵەکە دەگرێت
پەردەکان دادەدرێنەوە، تا تاریکی نەیەتە ژوور
بەڵام هەر دێت
قەپاڵ قەپاڵ ڕووناکی دەخوات،
مرۆڤەکە
تۆقیو و شپرزە
بە شوێن سووچێکدا دەگەڕێت
کە تاریکی لووشی نەدابێت.
٥
چەخماخسازەکان لە ئێوارەوە قەمەی تیشک
دەهێنن بە هەسانەکانی ئەفسانەدا، لە ترسی شەوێک کە نایەت /
ئاشقەکان لە بەرەبەیانەوە دڵی ئەژدیهایەک
لە مەحاڵەکانی ئەفسانە قەرز دەکەن، بۆ خەنجەرەکانی ئەو یارەی
هەرگیز نەهاتەوە /
ماڵی چەخماخسازەکان پڕە لە پژمەی نوور،
زبڵدانی ئاشقەکان پڕە لە توێکڵی ماچ.
٦
مرۆڤەکە دەگەڕێتەوە بۆ ماڵ، دەزانێت کە هیچ ڕزگاری ناکات؛
نە خۆرنشین: سماقی کوتراو و پەخشێنراو بەسەر قاژەکانی ئەو کەنارەدا کە هەموو شوێنپێی
ئێمەن،
نە شەبەنگ: شمشێرەوانی سەر بە میرنشینی خۆر دەمێک شمشێرە هەتاویەکەی بە نێوان لقەکانی
ئەو درەختەدا دەوەشێنێتت کە سێو خوێنبەربوونیەتی،
نە کێشانی جەرگی تووتنەوانەکان پاش ئەوەی بەهارێکیان لە چوارداخ کرایەوە و هاڕییان و لە
جگەرەیەکدا لوولدرا،
نە شەوانە دادانەوەی پەردەکان: هەڵبەستنی دەربەند لەنێوان ڕوناکی و تاریکیدا / نە شەو خۆی:
بەنداوی بێبنی زوڵمەت کە هەڵدەچێت و لە دەربەندەکانی پەنجەرەوە فیچقە دەکات،
نە لێدانی چەخماخ: هەڵدڕینی پێستی شەو بە قەمە و چەقۆکانی تیشک،
نە قەرزکردنی دڵ لە ئەژدیها: کە ئاشقەکان لە دەستپێکی هەر یارییەکی نوێدا دەیخەنە سنگیانەوە،
نە گەڕانەوەی مرۆڤەکە بۆ ماڵ،
نە نەگەڕانەوەی مرۆڤەکە بۆ ماڵ،
کاتێک
مرۆڤەکە دەگەڕێتەوە بۆ ماڵ
و
دەشزانێت کە هیچ ڕزگاری ناکات.
٢٠٢٠
