ڕۆژانی ڕەش!
ڕۆژانی تەڵخ و غەمناکم، بێ شومار دیتوون.
وای لەو ڕۆژگارە تاریک و نسرمانەی کە بێ پەروا،
قوتار دەبوون/دەبن..
بەڵام چوونکە غەمگینی،
وەک هیچ دەردێکی دی نەبوو/نییە!
ئێستاشی لە تەکدا بێت ژیان،
هەر بە ڕیتمە نەشازەکەی خۆی تێ دەپەڕێت و
ڕۆژەکانیشی وەک عادەتی هەمیشەییان،
هەم تاریکن و
هەم لێڵ!
ڕۆژێک، لەو ڕۆژگارە نامورادانەی عومر.
ڕۆژێک، لەو ڕۆژگارە قەترانیانەی نائومێدی،
لە قاتی پێنجەمی باڵەخانەی ژمارە چلوهەشتی شارێکی
جەنجاڵ و شلۆق، لەبەردەمی ئاوێنەی ئاسانسۆرێکدا،
خۆمم دیتەوە!
هەڵبەت، وا دێتە پێشچاو و ناوزەینیشەوە،
کە هەمان پاش نیوەڕۆی ئەمڕۆ بووبێت!؟
وەڕس و بیمار
بێ خولق و کەمدوو
لە ناو ئاوێنەی ئاسانسۆرەکەدا،
سێبەر و وێنەی پیاوێکی چل ساڵەی هەڵاتووی نیشان دەدا!
بەڵام،
بێ ئەوەی سەیری هیچ کەسێک
یان، هیچ شتێک بکات.
بە چاوەکانیدا، شپرزە و داڕوخاو
بە جەستەش، ماندوو و تەنیا.
کتومت تارماییەک،
کە دەنگی بە هیچ کەسێک ڕاناگا و
سنگیشی پڕە، لە دەردی غەمگینی!
تەنانەت،
هێشتا دەرگای ئاسانسۆرەکە دانەخرا بوو،
کە بە ئاڵمانییەکی تێکشکاو
یەک بە خۆم و
یەک بە ئاوێنە،
هاوارمان کرد:
“Das war das Leben?!”