شۆنوو ساڵانێ فرەیرە
کە ئێمە هەر بە جوانی
گەورەتەرین مسیبەت و کارەساتەکێما
بە چەموو سەرەی دیێ‌بێنێ و
فرە چیوێ فاڕیێ بێنێ، دیەمەو!
خوڵک ئیتر پەی تێرکەرد٘ەیوەو لەممێشا
سەروو خیابانەکارە کێش کەرێنێ
ئومێدەکاشا
ڕەنجەکاشا
کیسە هاڵیەکاشا
زلە بیێ‌‌بێ و
ساکەکەشنە دە نۆع قەڵەمێ کڵەو ماتیک پێویێنێ ئیسە!
تا ڕانێش گنێنێ سەروو مزایکەکاو شاری
دووکاندارێ کە سڵتاحیچشا نەکەرد٘ەبێ
پەی شەوێ وتەی چەنەش
حەسێب کتێب و خیاڵ پڵاوێ کەرێنێ
ساڵانێ بێ واران
لووتەش کەردێبێ جە وەڵات و
لچە پڕووزیایەکاما
من ئیتر ڕوێ پاکەتێ جگەرێ کێشێنێ
بە لیسانسێ پووچەو هیچ نەبۆ
شاعێرێوە بێنێ یاگێو هومێد٘ و شانازی
ئاد٘ەیچ خولیاو دە فاڵۆوێرا فرەتەری و
هەزار لایکە حیزانە بێ و
ئیسە پەیش دانشگا
ساڵۆنەو فەشن شەوی.
زەریفیش بەرێ سەروو کەلاسی
کوڕەکێ پەی چەماش جوزوێ نویسێنێ
ئوستادەکێچ پەی خوەکاش
چەپ و ڕاس هەر نمرێ دێنێ!
شێعرەکانە
ڕەفێقوو پەڵە ڤەرڤە ناسکەکاو زمسانی بێ
زیننە بیەیوەو خاکی چەنوو یەکەم وارانی
سەرتەرین بەرزەڵنگ
کۆنی سیروانی و وەی وەی باڵابەرزوو باخەڵەو عوسمانی
دێڕەکانە
شار بە شار و واتە بە واتە گێڵنێبێم
یەک دوێ خەڵاتێ و چن دیمانێم ئیماژەکایچنە
وستێبێنێ کیسەو سوخمەکەیش
شۆنوو ساڵانێ فرەیرە
کە قوربانیو مەرزەکا گرد٘ ڕوێ کۆڵبەرێ و
بەشەمیراتوو زیننانەکا سەرسەعبان
پڕچیای و پڕووکیای هاوارێوە بێ، دیەمەو
هەڵای قژێش کەلەبەروو تەتەی بێنێ
وەختوو چێژ بەردەی یەک ماشینی پێچەکاش‌هور و
کریایشەو دماو نەورۆزی
هەڵای تەنیایی چارەکڵێوە بێ مازیو پیرەژەنێوە
دلەڕاسیو مانتوە ڕەنگ ڕەنگینەکاو شارینە
چاڵە ڤەرڤێ وەرنەکەوتێو کۆساڵانی گەرمەو گەلاوێژی
پەی کەشەوانێوە جە ئاو بڕیا و تەژنە و مانیای
دیەمەو و پەلەپەل هەزار بەکرێ سیاوچەمانێ و کنا لەیلێ
پاییزێ نەخشینوو بێسارانی
بەڵقیسەو نەزار قەببانی
پینک فڵۆید یا عاشقانەکاو ئەمریکای لاتینی
پەلەپەل و پەی پەی[1]
پەی زامێ زەخمێ سەفەرێ مەرگێ وەرمێ باوشێ ماچێ دەساش لچاش
ڕچەماڕەو تازێ، شێعرێ بەیتێ
نەبێ
نەکریا
دێر بێ و ناوەخت!
پێسەو تەوەرگێ بد٘ۆ ملوو هەراڵەیرە
ڕاویارێ نەیاڤۆ تاقە قەتاروو سەفەریرە
زاوڵێوە نیمەڕۆ هایش بۆوە پەی کڵاڕۆچنێ و
زەنگ دای پەی جەنازێوە!
دیەمەو و چێرخانوو یانە کۆنێوەنە ئیسە من
پەی وێم و تەنیاییەکام منویسوو
مانگەشەوێ گێروو باوشی و
دژمانی مد٘ەو ساحیب پاساژ و مۆترسوارەکا
پەی تۆ و دەنگیت منویسوو
دنیات و دڵتەنگیەکات
خەمباری و ئا شەواتە یۆتەر دڵش ماڕێنی
تۆریەی جە جبەر و ڕەفێقەکات
جە گوڵدانەئیسە تەژنەکاو وەروو دوودەری
جە واڵەکات وەیوڵەکات
ساڵانێ دماتەر
ئاوەخت هەردوەما کەم‌قسە تەرێنمێ
سبحنە بەرمشمێ جە مەرد٘ەی و
سەیەو قافێزی سەروو قژە چەرمەکاماوە دوور دارمێوە
پیاسە کەرمێ چەنوو ڕەفێقە پاتاڵەکاما و
بە تەسبێحێ هۆشوو مەردەکاما کەرمێوە
زەنگ مد٘ەیمێ یانەو زاوڵەکاما گرد ڕوێ و
خواخوامان سەرما بد٘ۆ وەنە مێمانێ و
تیکێ نانما بد٘ۆ هامسایێ، وینووتەو
ساڵانێ دماتەر
وەختێ کەوتەن نە زەحمەت ئامای نەفەس[2] و
بەرشیەن جە تاقەتوو دەسەکاما دۆعا و دڵداری
ڕوەش کەرد٘ێنە وەڵاتی قەحتی و
پەی ڕەنگ زەردیما هەر خەتابارێ هورمد٘ەیمێ،
وینووتەو…
لاونووتەو
پەنا بەرووە سۆرانیەکات واوەی
هاوار کەرووە مەلایکەکاو سەروو شانات واوەی
وەختوو مەغریبی و ئا خەزانا ڕەنگا هۆشم کەریوە
بەخشووت ترەکوو پاژنەکاتۆ
لەرزای گۆچانەو دەسیت
یا ویلچێرێ و نەوەشیت ئاسایشگاکانە
بەخشووت ماش و برێنجی قژاتۆ
حورمەتوو ئا گۆرانیاوە
هەر دوەما تەنیاییمانە گۆششا مد٘ەیمێ
بەخشووت پەشیمانی و هەرسەکاتۆ
شوو مەردەی و شینەکاتۆ
ساڵانێ دماتەر
کە وەر لەشوو کەوتەیش نیا
ئاسمان پەی ڕۆڵەکاش بێ‌ڕەحما و
منیچ جە تۆ تەنیا چن عەکسێ فەرتووتیێ و
کوچێ تەشبیهێ بە یادگار مەنێنێ لامۆ،
وینووتەو
بە سەرەتانێ ڕیەیوە
بە ساڵانێ زیننان و دەربەدەری و دوور وەڵاتیرە
بە عەمرێ ویەرد٘ە و
ئا ڕوا شۆنیترە ئەسپەردەم کەرد٘ێنێ
چرووت
وەڵ چانەینە بەرزەخ بێ پەیوایمەو و
قەبرکەننێ یەکەم زەنگەن ماڵا پیرشالیاررە
چێرخانوو یانەکۆنێنە هیشتای منویسوو
بیمارەساننە منویسوو
مەرد٘ەشۆرخانەنە منویسوو
مزگینە، تابووتنە
پەی وێم و دیوارەکا وەروو دەمیم
تۆ و دڵمەڕیاییەکات و ئا ڕوەی
جیاو سەروو سینەیت
ملوو تۆ کەفەنی.
[1] جه ئی شێعرێو مامۆسا مه‌وله‌وی:
په‌له‌په‌ل په‌ی په‌ی زامێ وه تیرت
ئازار دابۆ تای زۆڵف زه‌نجیرت
[2] جە ئی شێعرێو مامۆسا مەولەوی:
هەر وە زۆر مەندەن رای ئامای نەفەس
تای ریشەی تاقەت شیەنم جە دەس
