هەتی هۆشتەن
هەنگامێ هەنتەرینی وزێنمێ یۆ
شانە جە شانەیت نەترازیێ و
پەنجێ‌مرووچڵێ سەرچڵات
ئەی‌دەوروو ئەرخەوانوو مردایمۆ
تر بە وەیوڵەواو وەشەسیایی
ئاڵیێنا وەنەمشکوو ئەرەمردایتۆ
کتووپڕ
تە سیروان بێنی پەی ماساوو خیاڵیم
ئەز قەڵاگەور بێنا پەی عەڤداڵیت
هەشتۆمن بێنی پەی ڕووگەو تاڵیم
کوانبەفر بێنا پەی شاباڵوو تەمات
وەرگیر بێنی پەی پەپوو و سۆزیم
کاوە بێنا پەی هەرەسگاو خەمات
قەڵاگاو بیەیم
دێوەو یەسنایت
ماما ڕەزوو چەمام
مەرگەوێز مەرگەوێز پڕێنیرە سیروانو ئەوەنامایمۆ
گر وێرەگیەیچ هارووهاجیم سمۆرە بێ و
وێم خزنێنا وڵەوەنوو دڵیتوو
چ تەسکینێ و چە پەناهێ..
هۆشتەن هەتی واچێنا
تکام ئانەن چیگە چاندێم؟؟
گلەیت با کوڕە
حەر ئاساناوە حەتا دۆڵی مامەو
بە هەناسەسواری کەلو وەرگیری و
ئنڐەو ئاواتە کۆروەبیەکاو مزگیگەی و
هەماراوو هەرسەکاو هەسارەوشکەی
چەمەڕاییە ئەوەنەبڕیاکاو پاڵوو قەڵاتا
گلەیت با کوڕە.. گلەیت با
واتم هەتی ئی قاپاتە چشەن کەریش
دۆڕنمێش
کەردتوو لات دا و وێت لانەڐا
واتم هەتی
واچە بزانوو کێ چەشتەو ئی لەیڐەبیەیشە کەردی؟
مەر نواتەبێت مروویچ لا مەڐەو
لاڐ دا هەتی بەڐجۆر لاڐ دا
ئێمەیچ ماتوومەردە، ماقپڕا
تەنیا تەپووتڵت دیڐەمانە ورنمێ
تەپووتۆزت گەڵوەمانە قۆزمێوە
واتم هەتی بازە
ئانە پەی کوی پەشتەقول بازی بەری کوڕە
هاکا قینت خولێوەرۆوەو
هۆرلووشۆ سیاچاڵو چەمات گرڐوو ژیڤای
هەناسەت ژەحڕا و جە هەر هەنگووسیەت نمرە مەرگیە نەچەشتیا پەنگ وەرۆوە
هەر هەنگامیەت شەقیەن گنۆ لاشەو مایینەو نیشتیمانی
شینا ویەس..ویەس.. ئو بەرەنیسکێ ئەوەنەبڕیای
مەر نواچێنی بەدەسوو وێما نەبیەن
جە ئەڐا بیەیما
مرۆ بیەیما و
کورد بیەیما
ئینە هیجویە شۆڕشگەڕانەن
موازمێ شۆڕشگەڕێ بیمێ
تاکەتیەی دەینوو بیەیما، ژیڤایما و مانایما
بەیاگێ بارمێ.
چێشبی کوڕە؟
واتم هەتی
چیگە مەردەین مدڤۆو وەرە وەرەی ژیڤای گنۆسارا
بە بروسکەو مشتەکۆڵێما
تە ئەر وازی چەمێ پروکنی تاسێ ئی داهۆڵیە تاسنات
حەتا خاس خاس کەری تاسەو تروسکیە
قەراخو ئی زمنە تڕۆینە
ئادەم ترەکنی هەنارو مێروو دڵ‌توەنینا
تە ئەر وازی پەنجێت فڕا
بەجەر نمەکەری گیان
قڕەقڕوو ئی قەڵاوا قڕنۆت
تۆ هەنی نا
ئەزیچ چیگوە مشتەکۆڵیە هەڵسی
دینم ژینم تینم شینم کینما،
کینێم: هەرسێم تک تک سوور سوور هەراڵێ شاهۆی
بەرەنیسکێم ڕۆ ڕۆ جوانڕۆ..
حەر جاریەیچ وەرەشێڵەو برژانگیت
وێش خزنۆ زەمهەریروو بیەیمۆ
تر وازای شووروو قینیم کێشۆ
بڐیە چنڐ تۆڵەسانێو بێڕەحمنا
واتم هەتی
ئاوەختە ناختوە داڵاهۆت ئێسوە
تر مەتاوی “شۆڕش” نەبی
وەختیە ونیت کەرد ئاڵاوەو وەرکەوتی
تر “باز”یە سەرکەشنی
وەختەکاریەیچ کارزانی بەشت بی
تر “ئارگەش”نی..
واچێنی کنا
نیەتم هەن فەرزەن چ مەرمیێشا قەرزەن قەوارەو سینەیمۆ، سمووش تەختوو تەوێڵیشارە.
واتم هەتی
شەرتەم کەردێبێ نەدموو
لەیڐەنا و زووە لێڵیان سەرچەمەو ژیڤای
واچی هەڵای نەدمنایبیش چەمەریێ کرووکپیم؟
نەدمنەیبیش مەنڐی بیەیم، گێژەواو نەبیەیم
نەدمنەیبیش قەڵوەزوو چریەیت، کەڵوەزوو ئەژنیەیمۆ
واچی هەڵای نەدمنەینیش
لافاوەو هەرسیم
سیاوەهەرەسوو برسیم
تاریکەسەڵاتوو غەریبیم
نەحرەتەو تەرسیم؟!!
چێشت بواچوون ئەنەزان، چەنیت بواچوون ئەنەزان؟،
نەدمیەیبی نمەدمنۆت، نە بە دمتا و نە دمنایت..
کۆرنام زوانم لک لک
دەسێ، پەێ، چەمێ، گۆشم،
پلکێ، بڕوێ، پرچێ، مەژگم،
دڵی، ئاخ و هاوار
هاوار بەماڵم
دەسووئیناوە پەنا کۆ بەروون
یاحەزرەتوو گمەسار کەرڐەی
مرنە، مرنەم با نەمرنام
کۆرنابێتوە:
ئێمەمانا
پەی سیاوی دڵی، وەر
پەی نووروو دیڐەی، مانگە
پەی شیرینی زوانی، هەنگوین
پەی ڤارای ئاوەزی، سەرچەمە
پەی زاخاوو گۆشی، چریکە
پەی پاساوو نەبیەی، ژیڤایما
تاریکنا، کۆر و تاڵ و قڕ و کڕ کەرڐوو مرنا
ئا.. ئا.. زەروو تائامەیمێ وێمارە
جە ئاژەڵ بیەی پەی ئی فەزێحەتیە لاما دا
مەر جەزەڵ لادەرێ نەویێنمێ کنا
مەر ئا ڕا تۆ واتەبێت وێش لادای نەبێ کنا
مەر گردوو ژیڤایما لەیڐەیی نەبیەن و نیەن
دروێ شیرازەو ژیڤای تەنیەن کنا
مەر نواچێنی ڕەساڵەتوو ئەنەزانی پەی یاوای به ئازاڐی لاداین،
چێشبی کنا؟؟
چێشت بواچوون ئەنەزان، چەنیت بواچوون ئەنەزان،
نەدمیەیبی نمەدمنۆت، نە بە دمتا و نە دمنایت.
سا چێش مەنەنۆ بێژۆ
واتەی تر نمێژۆ
زەرڐەخوە دەنە پەی ئاسۆیە کوو سمۆ هێژایی ژیڤای
هەڵای زوەن کوڕە
ئی چەمەریێ گێڵنیش، گلێرنۆما
گێڵەوە، گێڵەوە پەی گلێنەو چەمەڕاییما
با ئیمان بارمێ بە گلێرگەو هەرسی
ئا وەخته دەسوو ئاخێزی وازۆرە.
بە سێحروو زوانی،
ئادەم چلووسکا و مزگانی وەهاری…
