ئەگەر زیندووبای و ئەم شێعرەم بۆت بخوێندایەتیەوە

جگەرەیەکت هەڵئەکرد، دووان و سییان بە شوێنیا

من نەمەزانی فەرهاد کە چاوپێکەوتنێک یا دان بە بەر دووکانێکا یا تێپەڕینی نەناسێک لە پاڵمەوە

ڕوانینم تن ئەکاتە گۆشەیەکی چۆڵ لەم دنیا

لە دوای بینینی ئەو نەناسراوە لە پاڵمەوە پێ هەڵئەگرم و خێراتر ئەڕۆم

نازانم بۆ لە دوای ئەو دیمەنانەوە تووندتر ئەڕۆم بە ڕێیا

من نەمەزانی تێپەڕینێکی ئاوا ساکار هێندە قووڵە

تێپەڕین لە لای کەسێکی نەناسەوە بێ سەروشوێنم ئەکات

نازانم بۆ جارێک بێ ڕەحمانە وەک خوگ پرسیم

ئەتوانی جگەرەکانت کەم کەیتەوە

هەستم کرد ئەو پرسیارەم ئەوەندە مەرگی هێناوەتە نزیکمانەوە

مەرگ چاوێکی بەرز کردۆتەوە و بە گومانەوە بۆی ڕوانیوم

ڕوانین و هەناسەکێشانی مەرگ، مەرگ کە تووندتر هەناسە هەڵئەمژێ و ئەیداتەوە دەرەوە، قورس و بێدەنگ ئەڕوانێ

ئەگەر زیندووبایتایە و ئازارەکانت کەمتر بوایەن

ئەمتوانی لە شەهیدانی شۆڕشە بەرینەکە قسەم بۆت کردایە

لەوەی کە کورد لە گەڵاڕێزاندا لە مەرگ کەمتر ئەترسێ

ئەموت کە شۆڕش لەدایکبووی گەڵاڕێزانە و

خاکەلێوە قەبریەتی، کار قەبریەتی

ئەموت کە شەهید ئەگەر وێنەکەی ڕۆژێکیش پێش مەرگی گیرابێت

کۆن ئەبێت ، وەها دوور ئەکەوێتەوە لەو وێنە و قاپی ئەگرێ

کە نازانم چۆن مەرگ لە گونجاوترین شوێنی ئەو ماڵە هەڵیئەواسێ

مەرگی تەمەڵ، مەرگی پیر، مەرگ کە خۆی وێنا ئەکەم پیر دێتە بەرچاوم

ماڵپەڕی ژنەفتن ئەم دەقەی وەک کتێبی ئەلیکترۆنی (فایلی pdf) بڵاو کردووەتەوە. دەتوانن لەسەرەوە لە دوغمەی (داگرتنی کتێب) داوەنلۆدی بکەن.

The post پرسە appeared first on ژنەفتن.

٢

دوای ئەو شەوەی کە ڕۆیشتەوە دایکم وتی ئەم کاسە لێسەی چڵکاوخۆرە سفەت و بەقای بۆ کەس نییە، نانخۆر و سفرەدڕ، وەک پشیلە گوو بە خاوەنی خۆیا ئەکا، ئاخر بێژە تۆ خۆت چیت ئەم هەموو دەمەلاسکێ و دەملارکردنەوەت لە خەڵک، شێتەی بەرەڵڵا. هەر لە دایکە شێتەکەی ئەچێت ئەویش تابوو دەمی لە خەڵک لار ئەکردەوە، ئەوەی وا دەم لە خەڵک لار ئەکاتەوە خۆی دەمی لارە، بوختانچی و کەتم کەرانە، بۆیە خوا سڕی هەڵماڵیون.

جگەرە و ژێرجگەرەکم هەڵگرت و هاتمە ژوورەکەی خۆم، دایکم هەر لەبەر خۆیەوە ئەیوت، دیانە دەسکردەکانی لە دەمی دەرهانی و خستیە جامێ ئاوەوە، قومێ ئاوی لە دەمی ڕادا و هاتەوە هاڵەکە، جێ و پێخەفەکەیم بۆ ڕاخست، چووم درگای دەرەوەم پشت خست و چراکانم کوژاندەوە، لە سەر دۆشەکەکەی دانیشبوو و جگەرەیەکی داگرساندبوو، پرسیم کە بیانکوژێنمەوە، کوژاندمەوە، مژێکی لە جگەرەکەی دا و لەناو تاریکیی هاڵەکەدا گەشایەوە، هاتمە ژوورەکەی خۆم و درگاکەم پێوەدا، هەر لەبەر خۆیەوە ئەیوت؛ خوایە بێ ئیمان نەمانکوژی، خوایە من چاوم لە هیچۆ نەبووە بە قسەی خەڵک،  ئەو ڕۆژە خۆی پڕی داوەتە ئەو ژنە کرێکارە، شەواڵپیسی دایکەخۆگێ، وەیەک ها بە ناوچاویۆ. نەمزانیبوو کە دایکیشم بیستوویەتی، کاتێ وتی دایکەخۆگێ هێندەی تر لە بەرچاوم پەست بوو، نەمویستبوو بۆ دایکمی بگێڕمەوە، تەنانەت ڕووی گێڕاندنەوەکەیشیم نەبوو، کاتێ زانیم ئەویش بیستوویەتی ئەو کارە و “م” هێندەی تر لە بەرچاو قیزەون بوو. دایکم بریندار بوو بەر خنجێری قسە و ڕەفتار کەوتبوو. لەنێو سەرمدا وەک شیوێکی چۆڵ و هۆڵ وشەی دایکەخۆگێ دەنگی دایەوە و جاریکی تر بیستمەوە، دوو جار خۆگێ هاتەوە ناو سەرم و خەریک بوو بیتەقێنێ.

هێزی دەسبردنم بۆ هیچ شتێک نەبوو، هیچ کتێبێک داڵغەکانمی دوور نەئەکردەوە و خەمەکانمی نەئەڕەواندەوە، تەنیا شتێ کە ئەیتوانی هەموو شتێکم لە بیر بباتەوە و پەردەپۆشی بکا  وەک ئەوەی هیچ شتێک ڕووی نەدابێ خەو بوو، خەوتم.

بەیانی تۆزێک درەنگتر لە جاران خەبەرم بووەوە. لە سەر ئاودەستخانەکە بووم، شێری ئاوەکەم کردبوۆ تا پیسی و گمیزەکەم لەگەڵ خۆی ببات، ماتم کردبوو، ئارام و لە سەرەخۆ خەریکی خۆ خاڵی کردنەوە بووم، ماوەیەک بوو لە بیری ئەوەدا بووم کاتی دانیشتن و پیسی کردنەکانم بخەمە قاوەتوون، سەرەت بەیانی و دوای خەبەربوونەوە وەختێ باش نەبوو و لە ڕۆیشتنە دەرەوە بۆ دەر و دەشت دوای ئەخستم، بەتایبەت دانیشتنەکانی من کە بڕێجار کفنیان بۆ ئەبڕیم تا ئەهاتمە دەرەوە، بە ئاوەکە کایەم ئەکرد و ئەو داحبا چکۆلانەی لە کاسەکەوە هاتبوونە دەر کە لە مچ و مێش ئەچوون جارێکی تر بە دەم ئاوەوەم ئەدان و ئاو ئەیبردن، یا تاڵێک موو کە لە کاسەکە کەوتبوو ئاوەکەم لێ ئەگرت.

  دایکم بەپەلە درگای بەرهەیوانەکەی کردەوە و لەگەڵ کردنەوەیدا وتی؛ ڕاکە شەڕە، ڕاکە. خێرا شلنگی ئاوەکەم لە خۆم گرت، ویستم هەڵسمەوە گوویەکی جێماوی ناوادە یەخەی گرتم، زانیم کاتم زۆر بەفیڕۆ داوە لە ئاودەسخانەکە، ناچار دانیشتمەوە، تەقەی تفەنگێ لە دەرەوە تەکانێکی پێدام، زۆرم کرد و تینم داو خێرا لە کۆڵ خۆمم کردەوە، بەپەلە ڕامکردە دەرەوە، ئەو تکە ئاوانەی بە ناوگەڵمەوە بوون تک تک ئەتکانە خوارەوە، هەر درگاکەم کردەوە لە سەر کۆڵانەکەی خۆمان چەن کەس ئەملاولای ” م” یان گرتبوو و بەرەو ماڵ خۆیان ئەیان بردەوە، یەک چرکە دیم، تەورداسێک لە دەسیا، ڕەنگی سپی هەڵگەڕابوو، بێ قسە لای ئەکردەوە بەرەو شوێنی شەڕەکە، توند هەناسەی ئەدا، خێرا بە پاڵ پێوەنان دووریان خستەوە، ئەینەڕاند بۆ نەمرم ئەو حیزانە زاڵ بن بە سەرما. نەتەزانی لە کێ پرسی چی ڕووی داوە، ” م” شەو تا درەنگ وەخت لە ماڵی ئێمە بوو و بە کەیفەوە دەمی لە خەڵک لار کردبووەو، لەم شیڕەی مەلاژنا ئەم شەڕە بە کویا هەڵگڕاوە.

بەرەو شوێنی شەڕەکە چووم، کۆتایی پێ هاتبوو، “ح” لە نینۆکی پێیەوە تا تەوق سەری برین و خوێن بوو، خوێنەکەم ئەدی لە سەر کراسەکەی و شان و سینگیەوە قوڵپی ئەدا و ئەهاتە دەرەوە، خوێن تاڵەقژەکانی بەیەکدا لکاندبوو، خوێنەکە زیاتر ڕەشی ئەنواند تا سوور، هەستم کرد تا چرکەیەکی تر بە عەرزدا ئەکەوێ، کەوت. “ح” خرایە ماشینێکەوە و لە دێ دوور خرایەوە و بەرەو نەخۆشخانە بەڕێ کرا.

خەڵکەکە ئارام بووبوونەوە دوای شەڕەکە، ئاشتییان لەگەڵ دەروونی خۆیانا کردبوو، کێ خۆی بە نزیک لە ماڵی شەڕکەرەکان ئەزانی هەرکەسە و چووە ماڵی نزیکەکانی خۆی، لە هەرکەسم ئەپرسی چی ڕووی داوە وڵامم نەئەدرایەوە، وایان ئەزانی من ئاگادارم لەسەر چی بووە، نەئەکرا بڵێم لە ئاودەس بووم ئەم ئاژاوە نراوەتۆ. من و دایکم گەڕاینەوە بەرەو ماڵ خۆمان.

                                                      ٣

ڕاستییەکەی من هیچم نەدیبوو جگە لەوەی ئێوارەیەکی دێر، تاریکان ئەو کچە لەو ماڵە گەڕابووەوە، ئەوەی منی خستبووە گومانەوە دێر وەخت بوون و درەنگ ڕۆشتنەوەی بوو، بە تایبەت کە زانی من بینیومە ماوەیەکی فرە شەرمی لێ ئەکردم و خۆی لێ ئەشاردمەوە، یا کاتێ ئەیدیم ڕێزێکی زۆری لێ ئەگرتم، هیچ بە ڕوویدا نەم دەهانی کە گوایە گومانم لێ کردووە، نەمئەویست لێم بترسێ گەورەترین حەشاری خۆ شاردنەوەی ژن ترسە، نەمویستووە هیچکات ژن بکەمە ئەو حەشارەوە و لە پشتمەوە بیر بکاتۆ و بڕیار بدا. تەنانەت ئەو شەوە ئەم قسانەشم بۆ “م ” نەگێڕایەوە، بۆ دلنیا بوونی پێویستی بەم قسەی منە نەبوو.

   وتی گشتی کاری ئەو ژنەس کۆنەحیز و کۆنەدەڵاڵە، ژن ژێر دەوارەکەس، کێشاویەتییە ڕاو بۆ کوڕەکەی خۆی، تۆ نازانی ژن تەنیا بە ژن حیز ئەبێ، ئەو کچەش خۆی تەوری لەقە، مناڵ و نابەڵەوە، هەستایەوە سەر پێ پزووی پانتۆڵەکەی گرتوو و بە جێی چاکی کەوکەی ئەو لاری کردەوە و وەک خۆی لاسایی کردەوە چۆن سڵاو و هەواڵ پرسی ئەکات، کەمێ قوونی وەک ئەو لار کردبووەوە و دەریپەڕاندبوو، کە گوایە ئەوان هەروا بەڕێز و دەم و لەفز خۆشن، نەرم و نیانییەکەی مار لە کون یەنێتە دەر، ئەو زوانییە نەرمە بڕەی جەرگە بڕەس، کچەکەش تێکەوتووە، گوڵی داوە، خستوویەتیە تەڵەوە، وردە وردە کێشاویەتییە ڕاو، دوو ساڵە بناری داوە و بە چاو و برۆیا هەڵەدا، ژنیش کەرە چوار جار بڵێ جوانی ئەڵێ جوانم و ئەتپەرەستێ، ڕۆژێ دە جۆش کوتەکی لێ بدە و دواییا پێیدا هەڵبدە لە بیری نامێنێ. بە بنەماڵەیی وەهان دەڵاڵی یەکن و هەوسار بۆ یەکدی ئەگرن. کچەش خۆی وەهایە، تەیری گول عاشق بە داری ژەقنەمووتە، وێڵ کراو و هەوسار چڕاوە.

   دایکم لە بەینا وتی بنیام تا بە چاوی خۆی شتێ نەبینێ گوناحە ناوی ببات، کەس دۆس کەس نییە و ئەم خەڵکە لە ناتاشیاو ئەتاشێ، جگەرەیەکی داگرساندوو و بۆڵەیەکی لێوە هات بە دوایا وتی کارمان بەسەر کەسۆ نییە بۆسێ ڕێ پاک بێت خۆمانی پیا بچین، کەس لەم دنیا بە پاک نەماوە. ژێر جگەرەکەی تۆزێ جێبەجێ کرد و توێخڵێ شکاوی چکۆلەی تۆمی لە سەر قاڵییەکە چنییەوە و کردیە ناویەوە.

    تەڵاقم کەوتبێ لەم دنیا تەماحیان پێت نەبێت بمری لات لێ ناکەنەوە، خەڵک یا لەبەر پووڵ یا لەبەر ژنت یا کچت، شتێکت پێوە شک ئەبەن، ئەنا کەسی خاس کەس درگای لێ ناکاتەوە، ئەستەمە بێ تەماح گەرم بیگرن لەگەڵتا، لەگەڵ منا بۆ وانییە، لەگەڵ تۆیا بۆ وانییە، خراوین، یا ژن و کچ جوانمان نییە.

ڕۆژێ دە جار کچە خۆی بە ماڵیانا ئەکا لەبەر چییە، کوڕە کونیەکەشی دایمە وەک دەڵە گورگ لە ماڵۆ خۆی حەشارداوە. کاتێ وای ئەوت بە بیرما چوو کە سڵاوی کورد بێ تەماح نییە، چیرۆکێکە و هەزار قسە وەک قسەکان “م” ئەگێڕیتۆ. وتم کورد و سڵاو، بە خۆمم وت، من هەمیشە قسەکانم بۆ خۆم کردووە، تەنانەت کاتێکیش قسەم بۆ کەسێ کردووە لەگەڵ خۆمم بووە. ئەمە ڕۆژەکەس دێر یا زوو سک پڕیە کات، بە چاوی خۆمان ئەیبینین، ڕۆژێ دوو سەعات هالە باخەڵیا، بەردببارێ هیچ ژنت نەبێ.

    دیار بوو ئێمە تەنیا ماڵ نەبووین ئەو قسانەی تیاگێڕیابێتەوە، دوایین ماڵ بووین، دڵنیام دوایین ماڵ بووین، دوایین شەوێ بوو ئەو قسانەی تیا ئەگێڕیایەوە، لە هەرچی ماڵا کۆن بوو بوو جگە لە ماڵی ئێمە، قسە کەوتە سێ و دوو دیانە ئەکەوێتە سی و دوو ماڵە، بە هەرکە بگەشتایەی قسەیە نەبیستراوی پێ بوو لێیان، بوو بووە جاچکە خۆشەی دەمی هەمووان.

    ئەو شەوە کاتێ بەڕێم کرد وتم داینێین ڕاستیش بن خۆ ئێمە خۆمان هیچمان نەدیوە، وتی دڵنیابە لەم دنیا ئەوەی ئەیبیستی لەوەی ئەیبینی ڕاستتر و زۆرتر و تەواوترە، پشتی تێکردبووم و بە لادا بە پەلەکاندا ئەچوە خوار. وتم سەرچاو هاتی و درگاکەم پێوە دا.

The post زەم appeared first on ژنەفتن.

هێشتا قسەکانمان تەواو نەکردبوو خۆی بە ماڵدا کرد، جۆرێکمان لێ هات وامانزانی قسەکانی بیستووین، ئەگەریش گوێی لێ بووبێ خۆی لێ کەڕ کردبوو، چوون قسەی پێ بوو، لە هەموو شتێک ئەگوزەرا تا قسەکانی بکا، ئەو حازر بوو هەر نرخێک بدا تا قسەکانی بکا. لە تەواوی ژیانما لەگەڵ زۆرینەی ئەو باسانەی ئەیکرد هاوڕا بووم، هەموو کەسێکی لە ڕادەبەدەر ئەناسی بە وردبینییەکی لە ڕادەبەدەر هەڵسوکەوتی گشتی خستبووە ژێر چاودێرییەوە، ئەو وردبینییە کردبوویە جەلادێک بەرامبەر بە گشتی، هیچ کەسێک بێ تاوان نەبوو تا دەست و دەمی لێ بپارێزێ. ئەوەندە زوو هات کە هێشتا شێومان نەکردبووەوە، دایکم ئەڵێ بۆیە زوو یەت تا بزانێ خەڵک چی ئەخوات و چی ناخوات، بەشێکی زۆری ناسینی خەڵک لە ناسینی سەر سفرەکانیانەوە دەست پێ ئەکات. وتم هێشتا شێومان نەکردۆتۆ.

شانی نابووە سەر دوو سەرین و دوو قاچی بە لادا ڕاکێشابوو کە پاژنەی پێیەکیانی نابووە سەر قولاپەی ئەو پێکەی، قەپی بە لێوی سەرووی خۆیدا ئەکرد و ئەیگەست بە دیانی و پێستی وشکی لێ ئەکردەوە، ڕوانینەکانی ماق مابوو بەو شێوە کە ڕوون نەبوو بۆ کوێ ئەڕوانێ.

    وتی ماڵێک ژنی تیا نەبێت ژەم و دەمی مەعلووم نییە، پیاوی بێ ژن وەک گورگ ژەمێک تێرە و دوو ژەم برسی. پیاو بەلای منەوە هەمیشە دووربینە و ژنیش نزیکبین، تۆ لە ڕادەبەدەر دووربینی، ژیان لە پەنجا ساڵی ترا ئەبینی، بۆیە لەم ڕۆژانە و ڕۆژە نزیکەکانت بێئاگای، قەبری تۆ لە ئێستاتدایە و ماڵ و ژیانت لە داهاتووت. دووربینی باشە بەڵام نە وەک ئەوەی تۆ. وتی دووربینی ترسی مرۆڤ زیاو ئەکا، تۆ لە ژیان ئەترسی بۆیە ژن ناهێنی، بە حاڵەتی گاڵتە و شۆخییەوە وتم باااااڵڵێ وایە.

سفرەکەم ڕاخست و لە بەرچاویا دەسم بە نان خواردن کرد، ئەو قسانەی پێی بوون هەڵی ڕشتن، دەسی پێ کرد، خۆی پێ نەگیرا هەستایە سەر پێ، تا جوان حاڵەتەکان دەربێنی، وەها وەک خۆی لاسایی ئەکردنەوە هەم پێئەکەنیم هەم سەرم سووڕ مابوو. دانیشتەوە، درێژەی دا، شی کردەوە، وردی کردنەوە، ڕاستی ئەکرد منیش هەر وەهام بیر ئەکردەوە، جەلاد و بکوژەکان ڕاستگۆترین و وردبینترین مرۆڤەکانن، ڕێک لە ناو چرکەکاندا ئەژین و بڕیارەکان ئەدەن، بڕیاری ئەم چرکە ناخەنە چرکەیەکی تر، وەک شێت لە شوێن و کاتی خۆیدا کاردانەوەیان ئەبێت، لە ڕاستیدا لەو کاتەدا بە مێشکمدا هات کە ئەمە ئەتوانێ وڵاتێکیش بەڕێوە ببات، وتم جەلاد و دیکتاتۆرێکی بەجێگەس.

لە شەوقی قسەکانی تام و چێژی چێشتەکە زیاتر بووبوو لە دەمما، پاروویەک لە دەمما بوو، پاروویەک لە دەستما، ڕووی تێکردم و وتی ئەیچی تۆ خۆت بە نووسەر ئەزانی قسەکانی من بنووسە، تۆ من بگێڕەوە بۆ خەڵک، من ئەزانم ئەم خەڵکە چین، کاتێک وای وت بیرم کردەوە کەسێک هەموو ئەم خەڵکە بناسێ و بزانێ چین، گشتی خۆی ئەناسێت و ئەزانێ چییە و کێیە. بۆ ئەوەی هەڵە و کەموکووڕییەکانی خۆت دەرکەوێت تەنیا پێویستە هەڵە و کەموکووڕییەکانی خەڵک ببینیت و زەقی کەیتەوە، ئەو کات تاوانەکانت گەورەتر و زیاتر ئەدرەوشێنەوە.

وتم ئەیانووسم بە زیاوەوە، بڕوای نەکرد و دیسان دەسی پێ کردەوە، بە وردکردنەوە، تا زیاتر دڵنیام کاتەوە کە بیانووسم، وتم ئەیاننووسم، لە سەر داوای خۆی بوو کە نووسیم.

نانەکەم خواردوو و تەواو بووم، هەڵسامەوە و دەسم بە لابردنی کاسە و کەوچک و کۆکردنەوەی سفرەکە کرد، بەدەم کۆکردنەوەوە چاوی ئەگیڕا بە دواما و بۆی ئەگێڕامەوە، لامبردن و هاتم لە شانیەوە دانیشتم و جگەرەیەکم هەڵکرد و وتم دەی ئێستا بەخێر بێی.

دایکم لەوبەرمانەوە پاڵی دابووەوە و تەماشای ئەکردین. ترسابوو لەوەی کە من بڕوا بە قسەکانی بکەم و نەیەزانی من چۆن بیر ئەکەمەوە، لە ڕوانین و چاوەکانییەوە دڵنیا بووم کە ئەیوت بەخوا کە قەبر بە خۆیەوە نایگرێت و تووڕی ئەداتە دەرەوە.

The post   زەم appeared first on ژنەفتن.

شێعر لای من بگرە زیاتر لە ڕۆمان پێویستی بە ئێمە یا هەموومان یا تەواوەتی کۆمەڵگا و ڕووداوەکانی هەیە، شێعر هیچ کات بە تەنیا بەرهەمی یەک کەس یا شاعیر بە تەنیا نییه. شێعر لای من نە تەنیا ئیلهام نییه تەنانەت لە زەمیری ناوشیاری مرۆڤیشەوە سەرچاوە ناگرێ، ئێمە لە دنیا و سەردەمێکدا ئەژین کە هەموو شتێکمان ئەزموون کردووە، بۆیە هەوڵم ئەوە بووە تەنیا ئەو ئەزموونانە لە ناو زمان و نووسیندا ئەزموون بکەم و کەشێکی هونەری پێ بدەم و قووڵتریان بکەمۆ. ئەم شێعرە ئێمەین کاتێک یەکتر ئەناسین، پێکەوە ئەخەوین، قسە ئەکەین، شۆڕش ئەکەین، ئەمرێن، خەیانەت ئەکەین، سیخوڕی ئەکەین، بێتاقەت ئەبین …، شێعر ئێمە یا هەموومانە بەڵام ئەو هیچ ئەزموون و بیرەوەرییەکی خۆی بیرنەچۆتەوە، شێعر ئێمەین، بەڵام خۆمان ناناسینەوە تێیدا، هەست بە خۆمان ئەکەین لە توێی وشەکاندا وەک ڕۆح و تارمایییەک. ئەم شێعرە تارمایییەکە لە گشتمان، لە ژیانێک کە بیرمان چۆتەوە.

عەبوو ڕاوەند

پاژێک لە شیعرەکە:

جگە لە چەن ناو و ڕووداوێک هیچ شتێکی ئەم نووسراوە کوردی نییە و ئەگەر ئەتوانی لە زمانی ڕووسییەوە بیخوێنەوە.

گەر شەڕیشت کرد ئەتوانی بە چەکی ڕووسییەوە بیکەی

هیدایەتی عەبدووڵڵاپوور پیش ئەوەی چەکدار بکرێ بە چەکی ئامریکایی و دواتر بە چەکی عەرەبستانی و نێوی عەرەبستانییەوە شەڕی کرد و کوژرا

ڕامینی حسەین پەنایی بە چەکی بریتانی و ناوی فارسییەوە شەڕی کرد و کوژرا

بەڵام هاوخەمەکانی حەزیان ئەکرد و ئەیانویست بێژن ڕامین چەکی ڕووسی پێ بووە و شەڕی پێ نەکردووە و کوژراوە

ڕامین کە مرد ناوە فارسییەکەشی کردە ناوێکی مردووی کوردی

تکایە کردت بە چەکی ڕووسییەوە بیکە، بە ناوی ڕووسییەوە بیکە

ئەگەر مردی بە چەکی ڕووسییەوە بمری سەربەرزترە، بە ناوی ڕووسییەوە بمری نەمرترە

وەک من مەبە کە هەر وڵاتێکی بەخشەندە چەکی دامێ شەڕی پێوە ئەکەم. شەڕێکی بەخشەندە، چەکێکی بەخشەندە

وەک من مەبە کە هەر شاعیرێکی بەخشەندە شێعرێکی دایتێ بیخوێنیەوە

خوێن کە ئامیانی شێعرە و لە هەر زمانێکدا بگرسێ ئەیکاتە زمانی کوردی

فیشەک کە لە هەر جەستەیەک بدات ئەیکاتە جەستەیەکی کوژراوی کوردی

***

ماڵپەڕی نەفتن ئەم دەقەی وەک کتێبی ئەلیکترۆنی (فایلی pdf) بڵاو کردووەتەوە. دەتوانن لەسەرەوە لە دوگمەی (داگرتنی کتێب) داوەنلۆد بکەن.

The post گیانبازی appeared first on ژنەفتن.

“ئەدەبی ڕاستەقینە لەبارەی دۆڕاوەکانە، براوەکان گەمژەن” ئۆمبێرتۆ ئێکۆ

ئەم ڕۆمانە لەبارەی نووسەرێکی دۆڕاو، کرێکارێکی دۆڕاو، گێڕەرەوەیەکی دۆڕاوە، بەڵام ناترسن لە گێڕانەوەی. بە گێڕانەوەی ئەو بەشە دۆڕاو و تاریکە ڕووناک دەکەنەوە. نووسەر و گێڕەرەوە دەچنە نێو زمانی کرێکارەکەوە و بە زمانی ئەو تەعبیر لە خۆیان و لە خودی کرێکارەکەش دەکەن. زمان دەچێتە ژێر ڕکێفی شێوەزارێکەوە و وا دەردەکەوێ نووسەر بە ئەنقەست و بە مەبەست بۆ تۆڵەکردنەوەی دۆڕاوی کارەکتەرەکانی هەڵیبژادبێت و کردبێتیە بەشێک لە دۆڕانەکانی خۆی و گێڕەرەوە و کرێکارەکە.

کۆمەڵێ حاڵەتی دەروونی بێ کات و شوێن، بۆ بەردەنگێکی قووڵ و تێگەیشتوو و، وەک لە بڕگەیەکی ڕۆمانەکەدا هاتووە: “هەمیشە سەرەتای هەر پەیوەندی و هاوڕێیەتی و ناسینێکی تازە جیاواز و چێژبەخشە، ناسینی هەر بیر و فکرێک، هەر کتێبێک، هەر شێعرێک”، ئێمەش بەهیواین ئەم ڕۆمانەش بگاتە بەردەنگەکانی خۆی و بۆیان جیاواز و چێژبەخش بێت.

ماڵپەڕی ژنەفتن ئەم رۆمانەی وەک کتێبی ئەلیکترۆنی (فایلی pdf) بڵاو دەکاتەوە، بە دوو شێوە دیزاین کراوە، یەکەمیان بە شێوەیەکە کە بکرێ لەسەر موبایل و کۆمپیوتەر بخوێنرێتەوە، دووەمیان بە شێوازێکە بۆ ئەوانەی دەیانەوێ پرێنتی بکەن تا کاغەز و پەڕەی کەمتر سەرف بکرێت.

هەروەها هیوادارین کە چاپەمەنییەک بە تیراژێکی کەمیش بێت چاپی بکات. یان خەمخۆرێکی ئەدەب و هونەر سپۆنسەری چاپەکەی لە ئەستۆ بگرێ.

دەتوانن لە سەرەوە دوگمەی (داگرتنی کتێب) ئەم ڕۆمانە دابگرن.

The post گول appeared first on ژنەفتن.