تیرۆژ

عەوداڵی جێیەکە پێی بگات

دوگمەیەک دایبگرێت

وەک داگرتنی گڵۆپی حەمامەکە

یان وێنەیەک بیچرکێنێت؛

وێنەی هێڵ و زاویەکانی جەستەی

لە تاریکیدا

.

جەستە دەیەوێت بەرزبێتەوە 

بەرەو بۆشایییەک کە تێیدا؛ ئاوێنەی گوناهەکان

بە شکاوی

پرشنگی جوانتر دەخەنە سەر دیوار

ئەوکاتەی خۆر دەکەوێتە سەریان

.

من لە دووانەی جەستە و ڕۆح تێنەگەیشتم

تا کاتێک ئازاری ڕووشانی پێستم

لەژێر لفکەی کەفاویدا ڕایچڵەکاندم.

.

ئەمجارە نەک ئاوێنە

بەڵکوو تیرۆژە کە دەبێت پارچەپارچە بکرێت…