ئەمشەو هیچ نیم.

پەیوەندیم بە دار و دیوارەوە نەماوە،

سەر و دەست و پێی زۆرم بینیوە،

دەنگی زۆرم بیستووە،

بەردەوامی منی لە پەلوپۆ خستووە،

مۆسیقا هەر مۆسیقاکەی جارانە،

هەوایش تەواو چەقی بەستووە.

وێنەیەکی سێلین بە دیوارەکەمەوەیە،

گۆچانێکی پێیە،

سەبەتەیەکی بە دەستەوەیە،

پاڵتۆیەکی زۆر قورس شانی داخزاندووە،

تاڵێکی درێژ بە لاجانگیدا شۆڕ بووەتەوە،

ژیان ئەوی تاساندووە،

سەگەل پەلاماریان داوە،

دیارە زۆر زۆر، 

زۆر زۆر.

ئەم پزیشکە،

ئەم وشەنووسە،

ڕێی دارستانێکی گچکەی وەبەر گرتووە،

ئەوەی گەرەکیەتی هەر مردنە،

نەک هیچی دیکە،

ئەوەتا وێنەکەی بە دیوارەکەوەیە

و مردووە.  

ئەمساڵ ١٩٨٨ـە،

تەواوی ئەم مانگانە

بە ناخۆشی تەنراوە

و پێشتر هەستم پێ نەکردووە.

جگەرەیەک دادەگیرسێنم و

چاوەڕێ دەبم.

سەرچاوە: 

Celine With Cane And Basket, The Last Night of the Earth, Charles Bukowski, Black Sparrow Press – 1992 (Translated into Kurdish by Jiyar Homer) 

The post سێلین بە گۆچان و سەبەتەوە appeared first on ژنەفتن.

بەڵام هەرگیز ئەوەی ئەو جارەیانم بیرناچێتەوە

کە لە (نیویۆرک سیتی) بووم

هێشتا دەستپێکی شەو بوو

لەبەردەم جامخانەی چێشتخانەکەدا وەستابووم

لەناو جامخانەکەدا

بەرازێکی برژاو دانرابوو

چاوەکانیان دەرهێنابوو

سێوێکیشیان ترنجاندبووە دەمیەوە

ئای لەو بەرازە نەگبەتە

ئای لەو بەرازە بەدبەختە

لە پشت بەرازەکەوە،

خەڵکی لەسەر مێزەکان دانیشتبوون

قسەیان دەکرد،

دەیانخوارد و دەیانخواردەوە

بەس من یەکێک نەبووم لەوان

هەستم کرد نزیکایەتییەکم لەگەڵ بەرازەکەدا هەیە:

هەردووکمان لە شوێنێکی هەڵەدا و

لە کاتێکی هەڵەدا، هەڵواسرابووین

هێنامە پێش چاوی خۆم کە من لە جامخانەکەدام

بەبێ چاو، بە برژاوی، سێوێکیشیان بڕیوەتە دەمم

دڵنیام کە ئەو دیمەنە، خەڵکی دنیای لێ کۆدەکردمەوە:

سەیری کەن چەند سووک و لاوازە

بنۆڕن دەستی بە حەواوەیە

قەفەزی سنگی بە دەرەوەیە

لە جامخانەکە دوورکەوتمەوە

چوومەوە بۆ خانەخوێکەم کە لە زیندانێک دەچوو

لە ڕێگا لە خۆمم پرسی

بڵێی بتوانم هەندێک کاغەز بخۆم؟

هەندێک ڕۆژنامە؟

هەندێک قالۆنچە

ڕەنگە بتوانم جرجێک بگرم

جرجێک بە کاڵی

پێستەکەی داماڵم

ناوسکی دەربهێنم

چاوەکانی دەربهێنم

سەر و کلکەی نەخۆم.

نا، ڕەنگە پەتایەک بگرم و بمرم

چوومەوە باڵەخانەکە

بە پلیکانەکاندا سەرکەوتم بۆ ژوورەکەم

گڵۆپەکانم دانەگیرساند، خۆیان چۆن کوژابوونەوە، هەر وا بوون

لەسەر کورسییەک دانیشتم

لە خۆم دەپرسم: بڵێی شێت نەبم

چونکە هیچم نەکرد تا یارمەتیەکی خۆم بدەم.

ئیتر برسێتییەکەم نەما

لەو شوێنەدا لێی دانیشتم

پاشان لە ژوورەکەی تەنیشتمەوە

گوێم لە دەنگی گانکردن بوو

تەنانەت دەنگی چرپاکە و ئاهەکانیشیانم دەبیست

هەستام و لە ژوورەکە چوومە دەرێ

گەڕامەوە بۆ سەر جادەکە

بەڵام ئەمجارەیان ڕێگەیەکی ترم گرتەبەر

ڕێگەیەک دوور لەو بەرازەی ناو جامخانەکە

بەڵام هەر بیریشم لێ دەکردەوە

بڕیارم دا

بمرم زۆر باشترە لەوەی ئەو بەرازە بخۆم

باران دایکرد

ڕوانیمە ئاسمان

دەمم کردەوە و نمەبارانەکانم قووت دەدا

ژەمێک خواردنی ئاسمانی…

سەیرکەن ئەو پیاوە چی دەکات؟

گوێم لێ بوو یەکێکیان وای وت.

منیش بیرم کردەوە کە ئەمانە زۆر بێنرخ و گەمژەن

ئاه کە گەمژە و بێفەڕن

دەمم داخست

کەوتمەوە ڕێ.

سەرچاوە:

Kärlek är en hund från helvetet

The post برسێتی appeared first on ژنەفتن.

سواری وشتر بە.

پەرتووکی پیرۆز بخوێنەوە.

ڕەنگی کەوشەکانت بکە بە شین.

ڕدێن بھێڵەوە.

بە بەلەمێکی کاغەزیی جیھان تەی بکە.

ئابوونە بدە بە The Saturday Evening Post*.

تەنیا بە لای چەپی زارت شت بجوو.

ھاوسەرگیریلەگەڵژنێکییەک-لاقبکەوبەشفرەتەراشبکە.

لەسەرقۆڵیشیناویخۆتھەڵکۆڵە.

ددانت بە گازۆلین خاوێن بکەوە.

بە درێژایی ڕۆژ بخەوە و شەو ھەڵگژێ قەد درەختان.

ببە قەشە؛ بەکشۆت** و بیرە بخۆوە.

سەرت نوقمی ئاو بکە و کەمانچە بژەنە.

سەمای ڕۆژھەڵاتی بکە لە بەردەم مۆمە پەمەییەکان.

سەگەکەت بکوژە.

خۆت کاندید بکە بۆ پارێزگار.

لەناو بەرمیلێک ژیان بگوزەرێنە.

سەرت بە تەور بشکێنە و

گوڵەمێلاقە لەژێر باران بچێنە.

بەڵام ھەرگیز شیعر مەنووسە.

ــــــــــــــــــــــــــــــــــــــــــــــ 

*گۆڤارێکی ئەمێرکییە.

**جۆرە خوارنەوەیەکی مەکسیکییە، پێکدێ لە تێکەڵەی: تەکیلا و وێسکی و کرێمی ئیرلەندی و بیبەری ھاڕاو.

The post ئامۆژگارییەکی دۆستانە بۆ زۆرینەی لاوان appeared first on ژنەفتن.

وەک پشیلەیەک

کە خۆی ھەڵدەداتە سەر 

چرپاکە.

گەلێ بەداخم بۆ

ھاوسەرەکەم.

ئەم دیمەنە دەبینێ:

جەستەیەکی 

سپیھەڵگەڕاوی

بێجووڵە.

جارێک ڕایدەوەشێنێ

ڕەنگە جارێکی دیش.

“ھانک!”

ھانک وەڵام ناداتەوە.

ئەوە مردن نییە 

نیگەرانم دەکا،

بەڵکو ھاوژینەکەمە

تۆپەڵێ پووچیی

بۆ جێ دەمێنێ.

دەمەوێ 

ئێستا تێی بگەیەنم

ھەموو ئەو شەوانەی

لە پاڵی دەنووستم

تەنانەت

مشتومڕە بێماناکان

جوانییەکی تایبەتیان ھەبووە.

وشە سەختەکان

ئەوانەی ھەردەم

ترسم ھەبووە لە

دەربڕینیان

ئێستا دەتوانم

بیاندرکێنم:

تۆم

خۆشدەوێ.

The post ددانپێدانان appeared first on ژنەفتن.

باوکە مردبوو.

کەمێک پاش کەوتنەخوارەوەی فڕۆکەکە

گیانی دا.

ماوەیەک سەبریان گرت.

بەفریان بەسەردا باری

ژن و مێردێک بوون.

فڕۆکەوانەکە دوور کەوتبووەوە

بۆ ئەوەی یارمەتی بێنێ

فڕۆکەوانەکە ماوەیەکی درێژ بوو

ڕۆیشتبوو.

بۆیە ئەوان وردە وردە

دەستیان کرد بە خواردنی باوکە،

باوکی ژنەکە بوو.

پلانێکی بە کەڵکبوو:

کاتێک تیمەکانی فریاکەوتن گەیشتن

ئەوان هێشتا زیندوو مابوون.

فڕۆکەوانەکە

کە چووبوو یارمەتی بێنێ

ڕەق هەڵاتبوو.

کاتێک گەڕانەوە

بۆ ناو شارستانیەت

بە ڕۆژنامەکانیان وت کە

ئیزنی خودایان خواستبوو

خودایش وتبووی،

قەیدێ ناکە،

دەشیانزانی کە باوکە

کێشەیەکی نەدەبوو.

شان بە شان، بە ڕاوەستانەوە و

بە بزەیەکی سەر لێوەوە

وێنەیەکیان لێ گرتن.

ڕەنگە منیش

هەمان کارم بکردایە

تەنانەت بێ ئەوەی ئیزنی خودا بخوازم.

بەڵام پێموابێ

پاشماوەکانی جەستەی باوکە

بۆ وێنەکە باشتر دەبوو.

شتێک وەک

قەلەموونەی

پاش خوانی سوپاسگوزاری.

1. https://www.youtube.com/watch?v=1tSBSrLiZd0[min. 13:00]
2. https://bukowski.net/manuscripts/displaymanuscript.php?show=poem1979-05-03-eating_the_father.jpg&w=4672

The post باوکخۆری appeared first on ژنەفتن.

هەزار مایلی ڕەبەقم بە فڕۆکە بڕیوە بۆ ئەوەی بێمە لای

چون داوای لێم کردبوو

“تەنها لەبەر خاتری ئەو هەموو کاتە خۆشانەی ڕابردوو”

شەومان پێکەوە بەسەر برد و

سبەینێکەی لەکافە ئاریزۆنا

نانی بەیانیمان دەخوارد

شوێنێکی ئارام و دڵڕفێن بوو

خۆرەتاو خەریک بوو بەسەر قوماشە شەترەنجییە

سوور و سپییەکەی

سەر مێزەکەدا هەڵدەگەڕا

لە پڕ وتی:

“نانم بۆ ناخورێ!”

فرمێسکەکانی بە گۆنایدا بەربوونەوە خوارێ

وتم:

“قەیدێ ناکا، بەشەکەی تۆش دەخۆم، با خەسار نەبێ!”

شان و ملی قیت کردەوە،

هەناسەی هەڵکێشا و

یەک بە خۆی قیژاندی!

خزمەتکار و ئاشپێزەکە بە هەڵەداوان هاتنە دەرەوە

 ژنە خزمەتکارەکە پرسی: “هەموو شتێک باشە؟”

وڵامم داوە: “ئا، ئا. ئەرێ”

هەردووکیان ڕۆیشتنە ژوورەوە و لە شووشەی دوکانەکەوە

تەماشایان دەکرد

لە بەرامبەرمدا

فرمێسکەکانی هێشتا دادەوەرین

پێم وت:

“لەتێک لەو کەیکە بخۆ،

حاڵت باشتر دەبێ!”

نەڕاندی:

“دەمت داخە، بەس تۆ دەمت داخە!”

وتم:

“بڕوانە، ئەمڕۆ بەجێت دێڵم”

وتی:

“با شەوێکی‌تریش پێکەوە بین،

دەتوانین قسە بکەین”

بەشەکەی ئەویشم خوارد،

حیسابم کرد،

پاشان ڕۆیشتین.

شەوەکەی

خواردمانەوە و

قسەمان کرد

دواتر نووستین.

سەعات نزیکەی سێی بەرەبەیان

بە دەنگی ناڵەناڵی خۆم خەبەرم بووەوە

چنگی لە هەردوو هێلکەگونەکانم گیر کردبوون و

ڕایدەوەشاندن.

هاوارم کرد: “قەحپەی بێ مێشک! ئەوە بۆ وا دەکەی؟”

وتی:

“تێت نەنام! تێت نەنام!”

هەڵستام و

جلەکانم یەک بە یەک لە بەر کردنەوە

پرسی لێم:

“ئەوە چی دەکەی؟”

وتم:

“چ دەکەم؟ چ دەکەم؟

“خەریکم پانتۆڵەکەم هەڵدەکێشمەوە،

دەبێ تەکسیەک بگرم بۆ فڕۆکەخانە!”

ئەوەم وت و

کەوشەکانم لە پێ کردن.

لە تەختەکەوە بازی دا،

هاتە نێوان هەردوو ئەژنۆم و

زیپەکەمی داکێشا

وتی:

“گەرەکمە لاما بمێنی” و

سەری دانەواندە سەر ناوپام

وتم:

“زۆر چاکە!”

وەکچۆن تریفەی هاوینان

لە پەردەکەوە تێخزایە ژوورەوە

“تەنها لەبەر خاتری ئەو هەموو کاتە خۆشانەی ڕابردوو”

https://www.youtube.com/watch?v=1tSBSrLiZd0 [min. 35:00]

The post من پیاوێکی ماقووڵم appeared first on ژنەفتن.

ا

باڵندەی شین

باڵندەیەکی شینکەڵەم له دڵدایه

که دەیهەوێ بێته دەرێ

بەڵام من لەگەڵیا زۆر دڵڕەقم،

پێی دەڵێم، لەوێدا بمێنەوە، نایەڵم کەس چاوی پێت بکەوێ.

باڵندەیەکی شینکەڵەم له دڵدایه

که دەیهەوێ بێته دەرێ

بەڵام من ویسکیی بەسەردا ڕۆ دەکەم و

به دووکەڵی جگەرەکەم قانگی دەدەم

سۆزانی و باڕمەن و دوکاندارەکان

هەرگیز نازانن

ئەو لەوێیه.

باڵندەیەکی شینکەڵەم له دڵدایه

که دەیهەوێ بێته دەرێ

بەڵام من لەگەڵیا زۆر دڵڕەقم،

پێی دەڵێم،

مەیه دەرێ، به تەمای شێتم بکەی؟

دەتەوێ کاروبارم تێکوپێک دەی؟

بە هیوای دەسکەوتی فرۆشی کتێبەکانم له ئەورووپا به بادا دەی؟

باڵندەیەکی شینکەڵەم له دڵدایه

که دەیهەوێ بێته دەرێ

بەڵام من ئێجگار ژیرم

بەس شەوانه، جاربەجارێ

کاتێک هەمووان نوستوون

لێی دەگەڕێم بێته دەرێ.

پێی دەڵێم: دەزانم کە لەوێدای،

کەوایه

خەمگین مەبە.

دواتر دەیخەمەوە سەر جێگای خۆی،

هێشتا دەنگی جریوەی دێ،

نەمهێشتووە تەواو بمرێ

بەمجۆره پێکەوە و بەپێی گرێبەسته نهێنیەکەمان

بۆی دەخەوین،

هێندە خۆشه فرمێسک له چاوی پیاو دێنێ،

بەڵام ئەمن ناگریم

ئەدی ئەنگۆ؟

٢

کێشە

بە کامێراکەی دەستمەوە

ڕووەوە پەنجێرەی فرۆشگەیەک، وێنەیەکم گرت

ژنێکی درێژی ناشیرین

ملی بەرەو پێشەوە لار کردبووەوە و

لە فرۆشگەکەوە بە بازدان هاتە دەرێ.

پرسی لێم:

“ئەوە چ دەکەی،

خەریک بووی وێنەی چیت دەگرت؟”

وتم:

“وێنەیەکی ئەو مانکەنە ڕووتەم گرت.”

ژنە وتی:

“هیوادارم وێنەیەکی‌ترت نەگرتبێ”.

وتم “نا” و بە کامێراکەی دەستمەوە

بە شەقامەکەدا داگەڕام

ژنەش لە دواوە چاوی تێبڕیبووم.

هەستی تاوانباری و خەمگینی بەرۆکی پێگرتم

خەمگین بووم

هەرچەند بەڕاستی کارێکی وام نەکردبوو

ناشایست بێ.

زۆر جاران شتی وام لێ دەقەوما

لانیکەم ڕۆژێ جارێک.

ئاوڕم لێ داوە، چۆکێکم دادا،

سیلەم لێ گرت و وێنەیەکیم کێشا.

دەستی ڕاوەشاندن و قیژاندی

وێنەیەکی دیکەشم کێشا.

کێشەی کەسانی لەم جۆرە

ئەوەیە کە شارەکانیان هیچ کات بۆمباران نەکراوە

کەسیش هەرگیز بە دایکیانی نەوتووە: دەمت داخە.

1. https://www.youtube.com/watch?v=GDv4LDj3w_I

• https://bukowski.net/manuscripts/displaymanuscript.php?show=poem1979-09-12-trouble.jpg&w=3776

The post دوو شیعری چارڵز بوکۆفسکی appeared first on ژنەفتن.

زێدە زۆر

زێدە کەم

یا، نە بە ئەندازە

زێدە قەڵەو

زێدە لەڕ

یا هیچ کەس

پێکەنین یاخود

فرمێسک

یا ڕەهایی

ڕووت

ڕق‌ئەستوورەکان

ئەویندارەکان

پۆلی عەسکەران بەسەر شەقامی خوێندا قەڵەمباز دەدەن

شووشە شەڕابەکانیان ڕادەوەشێنن

ڕمبەکۆڵەیانە و دەکوتنە کچانی تازەپێگەیشتوو

یا پیرەپیاوێک لە ژوورێکی هەرزان‌بایی‌دا

بە وێنەیەکی مێرلین مۆنڕۆوە

کۆمەڵێک پیرەپیاو لەچەند ژووری هەرزان‌بایی‌دا

بێ هیچ وێنەیەک

تەنهاییەکی ئێجگار قووڵ ئەم جیهانەی تەنیوە

لە جووڵەی خاوی میلی کاتژمێرەکاندا

بەدی دەکرێ

تەنهاییەکی ئێجگار قووڵ ئەم جیهانەی تەنیوە

کە لە تابلۆ نیۆنەکانی

ڤێگاس و باڵتیمیۆر و میونیخ‌دا

چاو دەترووکێنێ

خەڵکانێک هەن،

بە هۆی ئەوینەوە یا لە بەر بێ‌ئەوینی

ئێجگار ماندوو، ئێجگار بریندار و ئێجگار داڕماون

کە کڕینی قووتوویەک ماسیی توونا

لە فرۆشگەیەک

مەزنترین ساتەوەخت و

گەورەترین سەرکەوتنیانە

چ پێویستمان بە دەوڵەتانی نوێ و

شۆڕشی نوێ نیە

چ پێویستمان بە پیاوانی نوێ و

ژنانی نوێ نییە

چ پێویستمان بە شێوازی نوێ نییە

سەربەسەرە

نوێنی سەر ئاو

کۆکی چاکی

کۆلۆمبیایی

پایپی ئاوی

دیلدۆ

توولە پلاستیکی قەف خواردوو

ئەو کاتژمێرانەی ڕێککەوت پێشان دەدەن

خەڵک لەگەڵ یەکتری باش نین

یەک لەگەڵ یەک.

مارکس بە نەفرەت بێ

تاوان گشتایەتیی سیستەمە دیاریکراوەکان نییە.

مەسیحیەت بە نەفرەت بێ

تاوان کوشتنی خودایەک نییە.

بەس خەڵک لەگەڵ یەکتری باش نین.

ئێمە دەترسێین و

پێمان وایە ڕق و قین بە واتای هێز و توانایە

پێمان وایە نیو یۆرک سیتی مەزنترین

شاری ئەمەریکایە.

ئەوەی پێویستمانە زیرەکیی کەمترە

ئەوەی پێویستمانە فەرمانی کەمترە

ئەوەی پێویستمانە شاعیری کەمترە

ئەوەی پێویستمانە بوکۆفسکیی کەمترە

ئەوەی پێویستمانە بیلی گراهامی کەمترە

ئەوەی پێویستمانە

بیرەی زیاتر و

ماکینەی تایپە

سەیرەی زیاتر و

قەحپەی چاوکاڵی زیاترە،

ئەوانەی دڵت وەک دەنکە حەبێکی ڤایتامین قووت نادەن

ئێمە تێنافکرێین لە هەراسی کەسێک

کە لە شوێنێک ئازار دەکێشێ

بە تەنێ

بێکەس

بێ ئەوەی بدوێنرێ

ئاو لە بن گوڵێک دەکا،

بێ‌تەلەفۆنێک کە هەرگیز لێنادا

لەبەر ئەوەی نییە.

ڕق‌ئەستوور پترن لە ئەوینداران

لەت و کوتی قەدەر وەک خامەک

خەڵک لەگەڵ یەکتری باش نین

خەڵک لەگەڵ یەکتری باش نین

خەڵک لەگەڵ یەکتری باش نین

دەنکە موورووەکان دەلەرێنەوە و هەورەکان وڵات ڕەش هەڵدەگەڕێنن

سەگەل بەسەر گوڵەکاندا هەڵدەمیزن و

بکوژێک سەری زاڕۆڵەیەک دەبڕێ

وەک قەپاڵ لە تۆپەڵەی ئایس‌کریمێک بگرێ

ئوقیانووس بەر و دوا دەکا

لە ژێر تریفەی مانگێکی بێ‌هەستدا

بەر و دوا دەکا و

خەڵک لەگەڵ یەکتری باش نین.

The post کرتە <br>(نوسخەی یەکەم) appeared first on ژنەفتن.