تاوێ دادەنیشم مێشکە ئیسفەنجییەکەت دەگوشم. جا گەر ڕەشاوی لێ بچۆڕێ، گلەیی مەکە، مەترسە، ئەمە ئێمەین -مرۆڤ- کەواتە دڵگیر مەبە، گوێ بدێ.

پێت گوت «جوانە!» ئەو کەسەی بە تەنیا، بۆ چەند سەعاتێک لەسەر کەرەوێتە یا لە ڕۆخی شۆستەیەک دانیشت لە ڕۆمانەکەدا. کە لە فیلمێکیش دەرکەوتەوە، لە دڵەوە خۆزگەت خواست ژیانت بڕێ تاڵتر بووایە هاوتای وی- لە کەشێکی سارد و، کەلوپەلی ڕەنگمردوو لە دەوروبەر و، قاوەیەکی ساردبووەوە لەناو جەزوەیەکی کۆن و، باڕەش قۆڵی کراسێ بە تەنافەوە بگرێ و بە ئەرزی دادا و، پاشان بێدەنگی و، پاشانی دواتر فڕینی پۆلێ کوکوختی و، پاشانەکانی دواتر سۆڵۆی پیانۆیەکی خەمناک، کە لات وایە پڕ بە پێستی وێنەکەیە. هەمان کەس، ئێستا وا لەناو ماڵەکەتە. پەیکەرێکی تۆزاوی. پەیکەر ئیتر ناتوانێ لەناویدا ئەستێرە هەڵگرێ و لەناویدا بکشێ.

گڵۆپ دەکوژێنیتەوە. چاوت دادەپۆشی. کە دەکەوێ، ڕووگرژی و چیڕکردنەوەی ددانت. لە کەلێنی دوو پەنجەی ناوەڕاستەوە دزەنیگا دەکەی و دەچرپێنی: «پیاح! لەو ژیانە بێزەوەرەی.» حەز دەکەی سەراپای لەشت لاق بێ، بۆ ئەوەی تێی هەڵدەی، لێی هەڵبێی.

بەدیار گرتە درێژەکانی تار و تارکۆڤسکی و ئاکەرمان دانیشتی. لەو جۆرانەی جگەرەیەک یەک قوومی ماوە بگاتە ئاغزەکەی و بە دەست کەسایەتییەکەوەیە و ئەو بە نیو سەعات مژی لێ دەدا. لەو نێوەندەدا مێشێکی سەرگەردان ناتوانێ دەرچەیەک بدۆزێتەوە، سەرلەئەخیر بە کپی لەسەر سۆتەک وڕ دەکەوێ. 

تۆ نەتتوانی بێدەنگیی پەیکەرەکە هەزم بکەی. کە دیتت کڕ و ماتومەلوولە، بە توانجەوە قسەت فڕێ دا. لەسەر مێز کردتە نوکتە، تا سەرسەرییەکان بە پێکەنین بێنی یا بۆ ئەوەی مارئاسا سەعاتێ بخزێیە نێو نوێنی یەکێکەوە.

سەرنجت دا کارەکتەرە دەمبەبۆڵەکانی ناو ڕۆمانەکان. گفتوگۆی هەرچیوپەرچیی ژن و پیاو و ئاژەڵانی ناو شانۆگەرییەکان بە سەعات گوێیان پێ کوڵ کردی. چامە بێسەروبەرەکانت لە دووەم لاپەڕەوە جێ نەهێشت و تا کۆتایی دەسیانت گرت.

بۆ نەتتوانی قسە هەلەقوپەلەقەکانی پەیکەرەکە قبووڵ بکەی؟ کە باش دەتزانی وەختێ کردوویە…

دادەنیشت. زەردەپەڕ توابووەوە لە چاوی. ئێسکی کرمێ ببوو. مێشکی دەجوویی خەمۆکی. لە شاڕێ لایدابوو. خەڕەکەشکاوێک؛ کەوتبووە سەر خۆڵەکە. 

دوایە ئەو قسانەت لەسەری کردە ماڵ.

یەکەم جار کە ناوی فەیلەسووفێکت بیست چۆڕێ ژاری خواردۆتەوە و ملی لار بووەتەوە، سەرسامی بە یەک بە یەکی خانەکانتدا گەڕا. سەربردەکەی مووڕەپی کردی. گوتت من لێی تێدەگەم. لە تارماییی هەڵکوڕماوی سەر دڵت پرسی: ژیان چییە جگە لە کارلێکی کیمیایییانەی تاڵاوی حەقیقەت و ترس و پەرێشانی، کە دەتگەیەنێتە تەقینەوەی مێشک؟

کەچی پەیکەرەکەت دیت، بەرامبەرت دانیشتبوو. نان نەبوو دەیخوارد، خەمۆکی بوو بە گەرووی هەڵپەنماویدا دەچووە خوار و دەبووە بۆمبێکی پووچەڵەوەبوو. ئاوی نەدەخواردەوە، ژار بوو لە خوێنیدا پەلەقاژەی بوو. بۆ دەستیت نەگرت؟ بۆ هێشتت بخوا و بخواتەوە، هێشتت بخورێ و بخورێتەوە؟ بۆ تەماشای نیگاکانیت نەکرد؟ جارێک چاوی هەڵنەبڕی، ئەو ئەسپە پێشترشێتەی ناو گلێنەی ببینی وا لە ئاویلکەدا بوو؟ فیشەکێک (ماچێک)ی لێت نەویست؟ هەر هێندەت پێ کرا بڕوانیتە گۆڕەکانی ناو چاوی. سەرڕێژ بوو لە گۆڕ. وەخت بوو بزنمژۆک و مێروو لە کونەلووتیەوە بڕژێن. لەوێش بارتەقای دارزەیتوونەکەی ژوورسەری سوودت نەبوو سایەیەک بۆ حەوانەوەی دروست بکەی. هێندەت پێ کرا؟

دوای بیردۆزی چاڵە ڕەشەکان کەوتی. بردتییە ئەودیوی ئاسمان. گەشتت کرد بەنێو ڕەنگەکانی گەلەستێرەکان. چاڵێکی ڕەش لەناو ژوورەکەت بوو. چاڵێک؛ خۆی هەڵدەلووشی. بستێک لێت دوور بوو. کردت بە دوو، دە. ببووە چەندین کیلۆ بۆشایی. گۆشت و خوێنێک بۆشایی. نانی دەستی بۆشاییت دەخوارد. لەسەر جێخەوەکەت هەناسەی تەپی بۆشایی بوو. نەفەستەنگ هەڵدەستا، ڕێی دەکرد، گڵۆپی دادەگیرساند، خەریک بوو دەخنکا. دەستی دۆڵکەی نەگرت و لێی کەوت و شکا. شکا بۆشایییەکە. گوێت لێ نەبوو. نەتبینی.

تۆ حەجاج بووی- بۆ زامی دۆستەکەت خوێ

تۆ سەگە ڕەشەکەی نوگرە سەلمان بووی- بە زیندوویی گۆشتیت دەجنی

تۆ ئەنفال بووی- دۆستەکەتت زیندەنێژ کرد

     تۆ                           تۆ                                 تۆ

حەجاجی             سەگە                 نوگرە          ئەنفالی

                  ڕەشەکەی              سەلمانی  

١/٧/٢٠٢٦

The post پەیکەرێک دەدوێ appeared first on ژنەفتن.

نەمزانی چی بوو مەبەستی گەردوون/ لەم هاتوچۆیە، بوون و مەماتم.

خەیام

ئێمەش ئاژەڵێک نین

دەمانەوێ پەی بە نهێییەکان ببەین؟

چونکە منیش

لەو ڕۆژانەم هەبوو

مەتەڵێکم هەڵێنا و گوتیان

قسە لە شێت یان مناڵ.

*

شەوە. نۆڤێمبەرە.

گڵۆپی ماڵ، هۆتێل و یانەکان مرۆڤ کێش دەکەن. شەقام ملهوڕ دەست دەدەنە یەک. دوندی ستوونەکان ونن، سەریان بەتەمە. تەنانەت بێلانەکان شوێن هەورەکان دەچن- کەس نابینرێ لە دەر چاوەڕوانی گۆدۆیەک بێ

دوو قۆچی ئاگرین نەبێ داگیرساوە و لە ئاسماندا لێدەخوڕێ

فریشتەیەکە بڵێسە تینوویەتیی دادەمرکێنێ

فریشتەیەکە بەرکوڵی دۆزەخی لایە

خاڵی نیشانکراوی ئەمجارەی نەخشەکەی

ماڵێکە لە کازیوەی سلێمانی

لیستێکی درێژ ناوی قوربانی.

دەنیشێتەوە، ساتێ کە دکاری مانای نەمان لەمس بکەی؛

دەنگ خۆی کپ دەکا، وێنە خۆی دەسڕێتەوە…

یەک خێزان نەبێ، کۆ بوونەتەوە

وەک ئەوەی دوایین بن لەسەر هەسارە

دوایین هاتوچوون، دوایین خوان، دوایین دوایین.

بەلووعەیەک دەکرێتەوە، تانکییەک گڕ دەگرێ.

*

چەند منداڵێکن و پلەیستەیشنەکەیان

چاوەڕوانن کەمێکی دی، لووت

بۆنی کێکی تازه دەرهێنراو لە فڕن بگرێ

ئینجا هاپی بێرزدەی و کوژانەوەی مۆم، ڕەشبەڵەک و قاشکردن.

بەڵام قاشبوون تەنیا بڕینی کێک نییە لە ئاهەنگدا

ڕاکشانە لەسەر سیسەمی دۆستێک، کە چەقۆ تەنیویەتی

مێزی کۆبوونەوەی وڵاتانە و شڕوشیتاڵبوونی ئاڵایەک.

ئەوەتا ڕەشبەڵەک تەنیا لە خۆشیدا نابەسترێ

کچێک لە شەڕی ئازادبوونی قژدا کوژرا و

دایکی لەسەر گۆڕەکەی هەلهەلەی لێ دا.

خامۆشبوونی مۆم هەمیشە شوبهاندنێکی ڕۆمانسییانەی شیعرییە؟

ناگەن بە بینینی ئەمانە

پشتیان لەناو پرسیارەکاندا ناچەمێتەوە

دەسکەکان جێ دێڵن

نزیک دەبنەوە

لەو ساتەی نهێنییەکان هەڵدەتەکێن.

*

ئاخۆ چ گەمەیەکتان کردووە؟

دوای کام نهێنی گەڕاون؟

مردنی کەسایەتییەکە؟ بڕینی بانکەکە؟

لە گەمەکەدا چ ڕووی داوە؟

وڵاتێک داگیر کراوە و

نەتانزانیوە لەبەر چی؟

ئەمێرکا و ڕووسیا وەک هەمیشە خەڵکیان گاوە؟

تێگەیشتن بۆچی لە بەشێکدا

خێزانەکە ئارام نان دەخۆن

لە بەشێکی تردا شەقام سوورە؟

بۆچی لە بەشێکدا منداڵەکە پێدەکەنێ

لە بەشێکی تردا پیرێکە تەنیا، دەگری؟

*

دەستەکان وەک ئەوەی قوڕمیش کرابن تاوێرەکان وەلا دەنێن، شۆفڵەکانیش بێ هەدادان دەکۆڵن. لەسەر داروپەردووم و تانکییەک لە تەنیشتمە- دەڵێی بە خەڵووز شۆردراوە، نەفەستەنگ. داوای لێ دەکەم بکەوێتە قسە.

دەکەوێ، ئاوا؛

نەدەبوو من لێرە دواییم بێت. کاتێ هێنایانمە ئەم خاکەوە، بە خۆمم گوت ئارام بگرە، ڕەنگە بکەویتە سەربانی کۆشکێکەوە، بەڵام بەختم نەبوو، بوومە ڕوانینوانێک لەم سەربانە، شارم بینی زنجیری لێ ئاڵابوو- لە گۆڕەپانێکی زۆرانبازیدا بریندار لەنێوان پێڵاوی شاهانەییدا شەقشەقێنی پێ دەکرا، خەڵکیش تەماشاکەر بوون، پەڕۆ لەسەر چاویان. پاشان تێگەیشتم کەسانی دی هەیە شایستەی سڕینەوە

کەسێکە ڕستەگەلی ئامادەی لە کۆمپیوتەرە بۆ سەرەخۆشی

هەمان، لە کاسەی زێڕین خوێنی هاونیشتمانەکەی دەخواتەوە.

کەسێکە سکی ئەمباری نەوتە

هەمان، پارە دەخاتە گیرفانی کەڕەناژەنەکە، ماڕلین مەنڕۆی یەک شەو بۆ زیندوو بکاتەوە.

کەسێکە دۆشەگی چەکەکانە، سەرینی بارووت

هەمان، دوژمنەکەی دەیپارێزێ.

کەسێکە باز و داڵ و ئەستێرەی وڵاتی داگرتۆتە سەر کراس

هەمان، تەنیا لە شاشەکانەوە کارەساتەکانی سەرزەوینەکەی چاو لێ دەکا.

بەڵام ئەوە، گشت نیوەشەوێک دڵۆپەی بنمیچی شێگرتووی ماڵە هەژارەکان دەچۆڕنە سیمای، گەریلاکان سواری داری ماسیحە بوونە و بەناو ژوورەکەیدا دەفڕن… دژخەو دەبێ، گڵۆپە سوورەکان تێدەپەڕێنێ، کیلۆمەتر دەپێوێ بۆ قومێک ئاو، سەلاجە دەکاتەوە چاوی دەرهاتوو لەناو قاپەکان و گوێی بڕاو. قاچوقول و دەستی جووڵاو وەردەبنە گیانی. گەرووی هاوار هاوار شەق دەبێ. بێتاوان-زیندانکراو لە ژێرزەمین هەڵاتووە و بە مشاری کارەبایی دەرگەی کۆشک دەبڕێ. پاسەوانەکانی ئاپۆڕە دەبەستن؛ دەموچاویان ڕووپۆش بە ماسکی زیندەبەچاڵکراوانی نوگرەسەلمان کە کوردی بیری خۆیان دەبەنەوە و وشەکانی کتێبێکی فەرهەنگی عەرەبی ئەزبەر دەکەن. بۆ ڕۆژنامەوانە شەهیدەکان ڕێ چۆڵ دەکەن بە قەڵەم ڕاوی بنێن و ئازادانە نامەکانیان بنووسن. مێشکی ئەوە زەنگی وەهم دەیشڵەقێنێ. دەروونیەتی غەرقی ئەڵوەن بووە، هانا دەباتە بەر خەڵکی خانەقین و وەردەسووڕێن، بۆق تاجەکەی دەخوا، قاقای زنجیرەچیاکانی حەمرین گوێی قانگ دەدەن.

*

منیش ڕۆژانێ…

ئاخ بۆ ئەو ڕۆژانەی

ئەوپەڕی خەمباریم مردنی کەسایەتییە دڵخوازەکەم و

بێزاریم دۆڕاندن بوو لە دووگۆڵی

بڕانی کارەبا کاتی گەمەکردن هۆی تووڕەییم.

بیرمە هەمبوو ڕۆژێکی وا تازە پەڕوباڵم دەرکردبوو، نیشتبوومە سەر نوێنەکەی دایەگەورە، چاوم چەشنی پانکە سووڕی دەخوارد لەنێوان لێوەکانی دوو مامم. ناوێکیان لێ ون ببوو.

کتوپڕ گوتم “گالیسکە” و نیگاکان بۆ من ڕاکێشران. مامێکم گوتی خۆیەتی… قسە لە شێت یان مناڵ. دامانە پێکەنین.

بووژامەوە، وەک کاپتنی چەتە دەریایییەکانی ڕۆمانێک بم، گەنجینەیەکم دۆزیبێتەوە.

*

سڵاو منداڵەکان

ئێستا ئەو لەبەینچووانە کوان پێیان دەگوتین

سەفەری مەرگ بە ئەسپەکێویی سپی دەکرێ؟

کەوایە دوای گوزەراندنی

ئەو هەموو ساڵە

کاتی ئەوە نییە

وەڵامی مەتەڵەکان

دەربارەی مەرگ،

نیازی گەردوون

لەم هاتوچۆ بێهوودەیە،

لە لاشەکانی

ئێوە وەربگرینەوە؟

١٣/١٢/٢٠٢٢

The post <strong>تەقینەوەیەک لە ناوەڕاستی نۆڤێمبەر</strong> appeared first on ژنەفتن.

ھەر ئەو بەیانییە بینی ژمارەکان خۆیان لە یادگەی ڕاپسکاندووە،

ئیدی دەستی بە گریان کرد.

ڕۆژی پێش درووستبوون

ئەوی ھەمووشتزان لە قووڵاییەوە دەرپەڕی

بەسەر پێستی ئاوەکاندا ھەنگاوی نا

بۆیە تاھەتایە قوڕسایی ئاو قوڕسایی پێی خوایە.

بە ژمارەکانی نێو توورەگەیەکی سەر کۆڵیەوە

چەشنی “با” ئاراستەکانی تێکوپێک دا

بەناو چاڵێکی چاونەیدیتوودا نادیاری ھەڵبژارد،

پاشان تەقەڵێکی توورەگەکەی ھەڵزڕاند.

ڕۆژی یەکەم ژمارە یەکی ھێنایە بەردەمی خۆی؛

-ئەی ڕووناکی، چوون تیرێ لە کەوان دەرچێ

دەرپەڕە و لەسەر پشتی شەو بچەقێ.

ڕۆژی دووەم ژمارە دووی ھێنایە بەردەمی خۆی؛

-ئەی بۆشایی، ببە پەرژینی نێوان زەمین و ئاسمان.

ڕۆژی سێیەم ژمارە سێی ھێنایە بەردەمی خۆی؛

-ئەی وشکانی، بەشێ لەو ئاوە بخۆرەوە و خۆت دەرخە.

ڕۆژی چوارەم ژمارە چواری ھێنایە بەردەمی خۆی؛

-ئەی ھەیڤ و خۆر، ڕۆژ و مانگ و ساڵەکان

زنجیرێکی بەناویەکداچوون، لێکیان ھەڵوەشێنن.

ڕۆژی پێنجەم ژمارە پێنجی ھێنایە بەردەمی خۆی؛

-ئەی ماسی، قەدەری ئێوەیە پانتاییە تەڕەکان.

ئەی باڵدار، نیشتنگەی ئێوەیە ناو هەورەکان.

ڕۆژی شەشەم ژمارە شەشی ھێنایە بەردەمی خۆی؛

-ئەی ئاژەڵ، قەدەری ئێوە پەرتبوونە بە دنیا.

ئەی مرۆڤ، تا ڕۆژی ھەستانەوە، خاوەنشکۆی ئەم گۆیەی.

ڕۆژی حەوتەم ژمارە حەوتی ھێنایە بەردەمی خۆی؛

-ئەی پشوودان نۆرەت ھات.

بەم شێوەیە

ڕۆژی ھەشتەم

ڕۆژی نۆیەم

ڕۆژی دەیەم

.

.

.

خوا تێگەیشت چەند گرانە بێکاری

بۆیە بۆ ناکۆتا ژمارە دوای ژمارەی پێکەوە نا

تەواوی ڕۆژەکان گەمەکردن بە خۆڵ.

بەیانییەک، پاش لەخەوھەستان، بینی ماتماتیکی بیر چووەتەوە و تەقەڵەکانی توورەگەکە بەدوای یەکدا ھەڵاتوون. ئینجا تەماشای ئەو ھەموو ئادەمییانەی کرد-وێنەی شانەھەنگ تێکچڕژاو- پەشیمان و نائومێدانە، بێ بڕانەوە گریا.

The post ھەڵەیەکی ماتماتیکی appeared first on ژنەفتن.

ئەمشەو پێویستت بە زارێکە

ھێندەی تەواوی تاوەرەکان درێژ بێ،

وشە دڕەکانت پەردەی گوێ بسمێ.

ئەمشەو ھەر “کرمانجی”یە بێزراوتەماشاکراوەکەت ھاوەڵتە. براکانت ھەستت دەڕووشێنن کە بە: “سوورییەکە؟!” پەنجەی ئاماژە ڕادەوەشێنن.

دەزانم چی ببارێ برسێتییت داناپۆشێ

بەڵام حەقە حەوت تەبەقەکە

بەسەر ئەم شارە کارتۆنییە داڕمێ.

تۆ پەیکەرەکەی مەریەم نی سەرما نەتتەزێنێ،

تۆ چندراو لە تاریکییت… مانگی تابانی چی؟

کلینێکسەکانی دەستت کەڵکی سڕینەوەی لیکی پێکەنین، فرمێسکی پیازی، سپێرمی پوول لێ داچۆڕاو نەماون.

ھەڵاتوو لە دەست تارمایی بابانوئێل

لەم شەقامە، ژێی پچڕاوی گیتارێکی

پەنجە بەرت ناکەوێ، بجووڵێی.

خاک نەماوە بۆ ھەناسەدان، بەڵام بۆ مەرگ وا ھەموو جێیەک ڕاخراوە.

ئەمشەو ھەرکوێت بوێ

نیو مەتر ھەڵدەکۆڵی و ڕادەکشێی.

٢٦/١٢/٢٠٢٠

The post سەری ساڵی کۆن، کاتژمێر بیستوپێنج، ھەولێر- عەنکاوە appeared first on ژنەفتن.

نیوەشەوێکی سامناک؛ دەنگی تەپەتەپ لە ژوورەکەی ئەودیو بەئاگای دێنێ. لەنێو پێخەفەکەی ڕادەپەڕێ و پتر گوێ ھەڵدەخا. دەنگ بەردەوامیی ھەیە. کارەبا بڕاوە، تروسکاییەک نییە بدرەوشێتەوە.

دوای پەلکوتانێکی هەڕەمەکیی بەسەر مێزەکە، بە ئەستەم دەتوانێ چەرخ بدۆزێتەوە. پەیتا پەیتا ڕووەو فانۆسەکە ھەنگاو ھەڵدێنێ. فانۆس ھەڵدەگیرسێ.

بەنێو داڵانەکەدا دەچێتە ژووری غەڵبەغەڵبەکە. دوودڵە لە واڵاکردنی دەرگە و دڵۆپە ئارەقەیەکی شین بەسەر لووتیەوە شۆڕ بووەتەوە. دەستەکانی لەرزیان تێ گەڕاوە و ھێندەی نەماوە فانۆسەکە بەربێتەوە.

پاش بڕێ ڕاڕایی، دەرگەکە دەکاتەوە. چەشنی داھۆڵ وشک دەبێتەوە بەو دیمەنەی دەیبینێ: پەنجەرەیەکی لەسەر پشت ڕاکشاو، ڕەشەبا لێوەی دێتە ژوورێ و پڕ بە ھۆدەکە دەزریکێنێ؛ لەگەڵیدا لاپەڕەگەلێ بە ھەواوە دەخولێنەوە. تەپەتەپێکی توند لە دیوارەکەوە دەردەپەڕێ. کابرایەکی پرچئاڵۆسکاوی ڕدێندرێژ، بە جلێکی یەکپارچەی درێژی سپییەوە، تنۆکەخوێن لە سەری دەچۆڕێ.

٢

-دایکم… بمبە بۆ لای.

ھێشتا ڕووداوەکانی دوێنێ شەوی لە ھزر نەسڕاونەتەوە، وەختێ گوێ بۆ ئەم وشە ناڕوونانەی ڕادەدێرێ. بەڵێنی دەداتێ بیباتە لای دایکی؛ بەڵام کام دایک؟ تەنانەت ناوونیشانی نازانێ! ناشزانێ ئاخۆ ئەم، لە شارێکی دیکەوە ھاتووە یاخۆ ھاوشاریەتی؟

-ئاخر چۆن دایکت بناسمەوە؟

بەلایەوە سەیرە کە بەرەو ساقۆ چڵکنەکەی دەڕوا و لەنێو گیرفانە بچووکەکەی دیوی ناوەوە، وێنەیەک دەردێنێ!

لێی ورد دەبێتەوە: وێنەیەکی ڕەشوسپی ناڕوونە، بە ئاستەم سیمای خانمێکی خانەدانی تێدا دەردەکەوێ. لە دیوی پشتەوەی وێنە، شوێنەواری ناوێک بە لێڵی دەبیندرێ: (یەھودا و ….).

ھەڵدەستێ. نەختێ پەشۆکاو و هەناسەسوار، دەیەوێ بڕوا. پێی ڕادەگەیەنێ ڕەنگە تا شەوێکی درەنگ نەیەتەوە، چونکە بەدوای دایکیدا دەگەڕێ. پێش ئەوەی بڕواتە دەرەوە، لە تەنیشت دەرگەکە، کتێبێکی کەوتوو بە بەرگێکی چەرمی پتەوەوە دەبینێ کە لاپەڕەکانی دڕاو، پەرشوبڵاو بەملاولادا کەوتوون.

٣

ھەر دەگەڕێ و دەگەڕێ، بێھوودەیە. ھیچ کەس ھاوشێوەی خانمی وێنەکە نادۆزێتەوە. لە چەقی بازاڕدایە. بەوپەڕی شەکەتییەوە، لەسەر یەکێک لە سەکۆ دارینەکان دادەنیشێ. ھەر بیر دەکاتەوە: لە کێ سۆراغی بکا؟ نازانێ. کەللەسەری خەریکە ھەڵدەتۆقێ. ترشەڵۆکێک لە گەدەیەوە تا ناو دەمی دێ؛ دواتر دەگەڕێتەوە. بۆ چەند چرکەیەک زەنگی مۆبایل دەبیسترێ. دەست دەخاتە باخەڵی و لێی ورد دەبێتەوە: ژمارەیەکی نامۆ.

-ئەلوو…

-سڵاو، جەنابت…

دەنگی ئافرەتێکە. ماندوویەتییەکەی پشتگوێ دەخا. ھەڵبەت لەمێژە گەیشتووەتە ئەو باوەڕەی کە ئافرەتیش ھەروەک مار، لە توانایدایە لەگەڵ وشەکانی، شتێک ھاوشێوەی ژەھر دەربدا؛ بەڵام یان سڕکەرە، یاخۆ دۆخی سڕبوون لا دەبا.

گوێی لەو وشانەی دوایی نەبوو، ھەر ھێندەی یەکسەر گوتی:

-بەڵێ، فەرموو.

-جەنابی (یەھودا) ئێستا لە نەخۆشخانەیە، تکایە گەر بکرێ سەردانی بکەی.

تەلەفۆنەکە دادەخرێ. ھەڵدەستێتە سەر پێ. بلەز دەڕوا. بەلایەوە سەیرە چۆن ژمارەی ئەمیان وەدەست کەوتووە؟ واز لەو پرسیارە دێنێ و پرسیارێکی لەوە گرنگتر قووت دەبێتەوە: (یەھودا) چی بەسەر ھاتووە؟

٤

دەگاتە نەخۆشخانە. بۆنی ناخۆشی ڕاڕەوەکە سووکە ھێڵنجێکی پێ دەدا. پەشۆکاو، دەپرسێ:

-بە یارمەتیت خانم، (یەھودا) لە چ ژوورێکە؟

یەک دوو خولەکی دەوێ تا لە کۆمپیوتەرەکەی بەردەمییەوە بەدوایدا دەگەڕێ.

-نھۆمی سێیەم، ژووری ژمارە ٨٧.

بە پلیکانەکاندا هەڵدەزنێ تا دەگاتە بەردەم ژوورەکە. ھێدی ھێدی دەرگە دەکوتێ.

ئێستا لە چەقی ژوورەکەدایە. دەڕوانێ: پەرستارێک دەرزییەکی ئاخنیوەتە قۆڵی (یەھودا) و خەریکە دەرمانەکەی تێدا بەتاڵ دەبێتەوە.

بێ ھیچ پرسیارێک، لە شوێنی خۆی سەراسیمە دەمێنێتەوە!

(یەھودا) لە چەند شوێنێکی جەستەیەوە، ڕووشان و برینی گەورە دەبیندرێ- ئاسەواری ئەشکەنجەیەکی بێشومار.

بێدەنگیی باڵە قوڕسەکانی ڕادەخا.

٥

بۆ ئەوە چووە دەرێ تا بە شوێن دایکی ھەڤاڵەکەی بگەڕێ؟ نا؛ ڕاستیی حیکایەتەکە ئەوەیە کە بە مەبەستی لێکۆڵینەوەی زیاتر لە ڕابردووی (یەھودا) چووە دەرێ. ھێندەی زانی وا کەوتووەتە ناو حەشاماتی بازاڕ.

ھەراوزەنا بەرز دەبێتەوە. خەڵکەکە ھەریەک بەرەو ئاراستەیەک غار دەدەن، ئەمیش خەریکە وەک بێچووە پشیلە دەکەوێتە بن پێیان.

ھاوار بەردەوامە:

-ھێێێێێێێی.

چەند سەربازێک بە بەردەمی تێدەپەڕن. پۆشاکی سوور و کڵاوی مسیان لەسەر و دەستیشیان ڕم یان شمشێری تێدا. جیا لەوەی هەندێکیشیان لە دەستەکەی دیکەیان، قەڵغانێکی پۆڵایین. لەنێویاندا، پیاوێکی سەدە دێرینەکان، ڕووتوقووت، بە سیمای تژی لە بەرائەتییەوە، شەڵاڵی خوێنە و پێیەکانی بە ئەرزەوە بەند نابێ. خاچێکیان خستووەتە سەر شانی و بەردەوامن لە پاڵدانی بەرەو پێش.

ھەرچەند سەر بەرز دەکاتەوە، ناتوانێ بە ڕوونیی لێوەی دیار بێ، تەنێ تەماتە و بەرد و ھێلکە- کە لە ئاسمان دەفڕن و دەنیشنەوە- دەبیندرێ. پێدەچێ ھەر بۆ ئەو کەسە تێ بگیرێ کە خەریکە بەرەو لەخاچدان ڕاپێچی دەکەن.

پیاوێک لە پشتەوە، توند خۆی پێدا دەکێشێ و نەرمە ئازارێک بە شانی دەگەیەنێ. ھەردووک تەماشای یەک دەکەن؛ ھیچیان بۆ ئەوی دیکەیان نامۆ نین، بەڵام بێدەنگیی بەسەریاندا باڵادەست دەبێ. ھاوزەمان بە تەنیشتییەوە کۆمەڵێ ئافرەت ڕوخساریان لەنێو سەرپۆشەکانیان حەشارداوە؛ دەگریین.

بڕیار بدا بچێ یا نا؟ ھێشتا نازانێ. بەڵام پاش نەختێ، بەگەڵ ئەو جەماوەرە دەکەوێ و شەقامە بەرینەکە تەی دەکا. لەو کاتەدا زەنگی تەلەفۆن بەرز دەبێتەوە.

-ئەلوو.

-لە بنکەی پۆلیسەوە پەیوەندییت پێوە دەکرێ. سەردانمان بکە.

بنکەی پۆلیس بۆ؟ پێی سەیرە! ھەرچۆنێ بێ، دەڕوا.

٦

کەوتووەتە ناوەندی ئاپۆرەیەک. ھاوارێکی لێوانلێو لە شادی بەرز دەبێتەوە:

-ھێێێێێێێی…

بەرد و ھێلکە و تەماتە بە ئاسمانەوە دەلەنگێنەوە.

سەرنج دەداتە دەوروپشتی: دەشتاییەکی فراوان.

ئاسمان ئاماژە دەدا بەوەی نیوەڕۆ بێ. لەناکاو ھەمدیسان ھاوارێکی بەجۆشتر بەرز دەبێتەوە:

-ھێێێێێێێی… بمرێ ناپاک.

سەر بەرز دەکاتەوە: پیاوێک وا لەخاچ دراوە و سەرتاپێی جەستەی خوێنە. ملی بەسەر شانیدا لار بووەتەوە و لە گیانەڵادایە. گەرمایەکی بەتینە، گشت دەست بە ناوچەوانەوە چۆڕەی ئارەقەیان دێ، لەگەڵ ئەوەشدا بێ بڕانەوە بەردەوام بەردەوام ھانی بە سزا گەیاندنی ناپاکەکە دەدەن. کێیە ئەو ناپاکە؟ ھەرچەند دەکا ناتوانێ بە تەواوی بیبینێ. ئەوەتا لەگەڵ سەر بەرزکردنەوە، ھەتاو ھورووژم بۆ چاوانی دێنێ. دیمەنەکان بە خاوێنی خۆیان پێشان نادەن، بەڵام ھێشتا گێژاوی ھەستێکی سەیر لوولی داوە، بەوەی پێی وانییە ئەم سیمایە نامۆ بێ. ھەست دەکا لە زەمانێکی دوور دوور بینیویەتی.

-لەگەڵ ئێوە قسە دەکەم.

پەتی بیرکردنەوەی پچڕاند. تەماشا دەکا ئەفسەر بە کەمێک توڕەییەوە ئەو پەیڤانە دەدرکێنێ.

-ببوورە بەڕێز… فەرمووتان ئەمە کەی ڕوویداوە؟

ئەفسەر ھەناسەیەکی تژی لە بێزاریی دەردەدا.

-ئەم بەیانییە.

-واتە چۆن؟ ئێوە دڵنیان؟ تکایە…

تۆنی دەنگی ئەفسەر، گڕ. بە تانەوە:

-بۆ گاڵتەکردن لێرە دانەنیشتووین.

-ببوورە مەبەستم ئەوە نەبوو، بەڵام دڵنیام ھەڵەیەک هەیە! من ئەم نیوەڕۆیە، بە چاوی خۆم دیتم! حەمکەیەک ئینسانی سەردەمی کۆن، وابزانم بەرەو لەخاچدانی کابرایەک دەچوونە ئەو دەشتاییە. دیارە ئێوە دوو کەستان لەگەڵ یەکدی لێ تێکەڵ بووە.

-واتە تۆ، ئەم نیوەڕۆیە، ئەو سەرھاتە و خەڵکی سەردەمێکی کۆنت بینیوە؟

دوابەدوای گوتنی ئەمە، بۆ ساتێ قاقا دەبیسترێ.

کە حەپەساویی ئەو دەبینێ، بەسەر خۆیدا دەشکێتەوە. هەست دەکا زێدەڕۆیی کردووە. ھەوڵ دەدا دۆخەکە ھێورتر بکاتەوە و لێک تێبگەن.

-نا قوربان، ھەڵەی؛ ئەوە تۆی دوو کەست لێ تێکەڵ بووە. ئەم نیوەڕۆیە ئەمە ڕوویداوە. بابەتەکە شتێکی دیکەیە بۆی دانیشتووین. پزیشکەکان بۆیان دەرکەوتووە (یەھودا) نەخۆشی دەروونیی ھەیە و چیتر ناکرێ لە ماڵەکەی ئێوە بمێنێتەوە. پێویستە ببردرێتە شوێنی گونجاوی خۆی.

گەرووی، خەریکە وەک فوارە دەتەقێ. خەمێکی قووڵ بە دەروونیدا ھاموشۆیەتی، وەختێ بیر لە حاڵی ئەو بەستەزمانە دەکاتەوە. بۆ ساتێ، دوو دەستی لەیەک گرێدراو. تەواو. ئەمێستا بەرەو نەخۆشخانە.

٧

داواکردنی قاوەیەک لە کافتریای نەخۆشخانە.

قاوەکە کەفی کردووە، ھێڵە پێچاوپێچەکان دیمەنگەلی شریتئاسای سەیر دەنوێنن. سەرنجی کێش دەکەن.

کاتژمێرێک لەمەبەر، ئەفسەر لە کۆمپیوتەرەکەیەوە ڤیدیۆیەکی پێشان دا کە بە مۆبایلێکی کامێراتەڵخ تۆمار کرابوو: ناو بازاڕ، لای میوەفڕۆشێک، (یەھودا) دەست دەداتە سێوێک و قەپاڵێکی لێ دەگرێ.

بە کابرا دەڵێ: خوا بتباتەوە، سێوی کرمگرتوو دەفڕۆشێ!

میوەفڕۆش تووشی ھێستریا دەبێ. کەللەی (یەھودا) لەنێو دەستەکانیدا ئەملاولایەتی. مێزەکە- بە سێوەکانیشەوە- بەسەر سەریدا دەکێشێ.

-ناوت چییە لەعنەتی؟

(یەھودا)، تۆقیو، دەگری… زۆر دەگری:

-(یە.. ھو… دا)

-ڕووڕەشی ناپاک، بەو ناوە گەنیوەتەوە ھاتووی گاڵتەشمان پێ دەکەی؟

پەیتا پەیتا کۆبوونەوەی خەڵک، لەقینی کامێرا، ھاوار و لێدان. دەنگ بەبێ وێنە:

-ھێێێێێێێی… بمرێ ناپاک.

ھەر ھێندە و تەواو. کۆتایی ڤیدیۆکە.

ئەوەی کە بینی، ھەر ئەوە بوو کە خۆی لەناو بازاڕ، حەشاماتێک بەدوای پیاوێکی خاچ لەسەر شان، لەش خوێناوی و ھەڵواسراو کەوتبوون؟

 ورتەیەکی ھێواش:

-ناکرێ!

٨

ھەنگاوە خوارەکانی تا لای “EXIT”ـە بە سوور نووسراوەکەی دەبەن. پیاوێک لە پشتەوە توند خۆی پێدا دەکێشێ و نەرمەئازارێک بە شانی دەگەیەنێ. ھەردووک تەماشای یەک دەکەن. پیاوەکە بە جلێکی یەکپارچەی تا خوار ئەژنۆ درێژ و ڕزیوی پڕ پینە، ڕوخسارێکی شەرمەزار؛ وەک بیەوێ خۆی بشارێتەوە. ھیچیان بۆ ئەوی دیکەیان نامۆ نین، لەگەڵ ئەوەشدا پەنجەکانی بێدەنگی لە گەروویان دەئاڵێ. خێرا خێرا ڕادەکا.

تەماشاکردنی دەوروبەر: لای دەستە چەپ، چوار مێز، دوویان بەتاڵ. لای ڕاستیش بەھەمان شێوە. مێزەکانی ناوەڕاست کە سێ مێزن، ھەموویان گیراون.

ساتێ ڕاوەستان. پەرداخە سەفەرییەکەی قاوەکە بۆ تەنەکەی خاشاک. بە “EXIT”دا چوونەدەرەوە.

لە مێشکی خۆی بیری لێ دەکاتەوە: پاش دەمێکی دی دەچێتە ژووری ژمارە ٨٧، لەوێ پزیشکەکان کۆبوونەتەوە و ئامێرێکیش بە دەنگێکی بێزارکەرەوە:

-تیییییییییت…

The post بایبڵی دڕاو appeared first on ژنەفتن.

زیکەزیکیان لە شەودا زەمینلەرزەيه بۆ ئەو وڵاتانەی جانتا بەکۆڵان لە ڕەحمییەوە هاتوونەتە دەر: “مەرگستان“.

بە چەک، لاسایی گیتارژەنان دەکەنەوە (دەنگ دەرناچێ. چەک ئامێری موزیکە، ئاوازی تێدا نێژراوە). گۆرانیی قەرەجیی فڕ دەکەن

بە پۆستاڵ مرۆڤ دەپلیشێننەوە. تەقە لە خەونەکان دەکەن.

خوێنی وشکەوەبووی پۆلێ ناولەپی بێ پێست، ڕووناک دەبێتەوە بە فڕینی گوڵەئەستێرە بەسەر تەلبەندەکانی سنوور.

گەنجانی خەونبین

کاتێک دادەنیشن، گوڵەوردیلەی کەنار ڕووبار دەخەنە زەرفی نامەکانیان، کەچی نازانن ڕادەستی بای کام ئاراستەی بکەن تا ڕەوانەی بکا

خەیاڵیان ئەو شڕە ئۆتۆمبێلەیە، گۆی زەوی بە تایە قوڕاوییەکانییەوە دەبەستێتەوە

لەم دارستانە، پیاسەی ئێوارانی پەمەیی لەگەڵ یار چەند جوانە… بووم! بۆمبی بێھوودەیی بە خەیاڵیاندا دەتەقێتەوە؛ پەمەییش بەرگی شێرپەنجەیی دەپۆشێ

بە بینایی نابیناوە چووکیان لە مابەینی درەخت گیر دەکەن؛ تەکان و تەکان… وەختێک دەبینن وا تۆواو، چما جۆگەلەیەکی دێرین ڕێ دەکا

لە ترسا ڕیقنەی باڵندە لە دەموچاویان ھەڵدەسوون، وادەزانن دەبنە تارمایی

کە دەیانەوێ سەرخەوێک بشکێنن، سەرینی ڕەق لەبن سەریان لەنگەر دەگرێ و بە بۆگەنی پەیڤی شاعیرانە بەخەبەر دێنەوە

شەپقەکانیان بە لقەکاندا هەڵدەواسن، تا ئەگەر ملیان لە ڕێی هەڵە نا، فریشتەی ڕێنیشاندەریان بۆ دابەزێ. بەڵام ئەوان کە جەستەی خۆیان ون کردووە، فریشتە چۆن بیانبینێ و شەپقەی شاهانەیی مسیۆ فڕەنسییەکانیان بنێتە سەر؟

کۆڵەپشتەکانیشان پەڕۆی پیسی چادری ئەو یەختەی تێدا، کە هەرکات برسی بوایە، چەند سەرنشینێکی هەڵدەلووشی

گیرفانیان سەرشار لە ئەسپێی بان پێخەفی ڕزیوی زیندان

نیگایان جێماوە لە وێنەی گۆڤارەکانی پۆڕنۆ، کە تێکەڵ ببوون لەگەڵ وێنەی دایکانی چارشێو لە قەد دیواری زیندان

مووی لووتیان تووتنی حەشیش دایپۆشیوە هیی زیندان

خدری زندە دەستی بە دەستیانەوە دەبێ کاتێک لۆریی بەخێرایی ٢٠٠ دەڕوا و ئەمان لەژێرین؟

پیرەکان، کە ئازار جومگەکانیان دەکڕێنێ و ناتوانن لە پلەی سفر سیلیزیی ڕێ بکەن

ھەرزەکاران کە لەبەرچاوی خودا پانتۆڵ دادەکەنن و شەیتان لە شێوەی مار ڕۆدەچێتە قووڵایی چاڵەکانیان، دوایی دەڵێن: ھۆمۆسێکواڵین!

ژنان کە مەمکیان ھەرجارە و میوەی خۆشە لە زاری پیاوێک

منداڵان، کە وادەزانن دنیا فیلمی ئەنیمەیشنە و قرشەکان بۆ یاریی ددانەکانیان دەردەخەن

کەللەسەریان لە کام نیشتمان بچێنن؟

حیکایەتی دەریا بۆ درەخت بگێڕنەوە، سیس دەبێ.

حیکایەتی چەرمەسەریی بۆ پوول بگێڕنەوە، پێدەکەنێ.

لە ئێوارەیەکی لەرزیو، بە کامێرای یەکێکیان، وێنەیەکی بەکۆمەڵ دەگرن بۆ یادگاری.

بەیانی دواتر، خۆر شیشی داغ دەچەقێنێتە چاوی سیسرکەکان، ئەمانیش ڕووەو “ژیانستان” غار دەدەن.

ساڵانێکی زۆر ڕادەبوورێ، چەندەها نامە بۆ دۆست و کەسوکاریان دەنێردرێ و چەندان وێنەی پرشنگدار دەچرکێنرێ و چەندین کچیش لەبری درەخت، چووکیان لە باڕە هەرزانەکاندا بۆ دەمژن…

ئێستا هەرکامیان تەماشای ئەو وێنە تۆز لێ نیشتووە دەکەن، شتێکی نامۆ دەبینن!

هەریەکەیان بوونەتە دوو بوونەوەر؛ کۆپییەکان لەپشتیانەوە ڕاوەستاون و ڕەنگێکی کاڵتر دەنوێنن، کەچی سیمایان گەشاوەتر.

درکیان بەوە کردووە: ئەوەی ئێستا هەیە جەستەی بەتاڵە، چونکە ڕۆحیان لەنێو باران و گەردەلوولی تاریکیی و وێنەکە فەوتا…

The post سروودی تارماییەکان appeared first on ژنەفتن.